வீடு திரும்பல்

முன்னாபாய்: தவறவிடக்கூடாத ஹிந்தி படம் !

2012-06-03T10:16:00.000+05:30

வசூல் ராஜா எனக்கு மிக பிடித்தமான படம் . ஹிந்தியில் அதன் இரண்டாம் பகுதி Lage Raho Munna Bhai முதல் பார்ட்டை விட மிக நன்கு இருந்ததாக கூறினர். ஆங்கில சப் டைட்டிலுடன் இந்த பட டீவிடீக்காக ரொம்ப நாள் தேடி சமீபத்தில் தான் கிடைத்தது.

கதை

முன்னாவும் அவன் நண்பன் சர்க்யூட்டும் கடன் வாங்கி திரும்ப தராதவர்களை மிரட்டி பணம் வாங்கும் (அதே ) தொழில் செய்கின்றனர். முன்னா ஒரு ரேடியோ ஜாக்கியின் (வித்யா பாலன்) குரலில் மயங்கி கிடக்கிறான். அக்டோபர் 2 -அன்று அவள் ரேடியோவில் காந்தி பற்றி கேட்கும் கேள்விகளுக்கு சரியான பதில் சொல்வோரை ஸ்டூடியோவில் சந்திப்பதாக சொல்ல, அவளை சந்திக்க அந்த போட்டியில் கலந்து கொள்கிறான் முன்னா. சில ப்ரொபாசர்களை கடத்தி வந்து அவர்கள் மூலம், ரேடியோவில் கேட்கும் கேள்விகளுக்கு சரியான பதில் சொல்கிறான். வித்யாவை நேரில் சந்திக்கும் போது தான் ஒரு பேராசிரியர் என்று பொய் சொல்கிறான்.

வித்யாவின் இல்லத்தில் சில வயதானவர்கள் உள்ளனர். அவர்களிடம் வந்து காந்தி பற்றி பேசுமாறு முன்னாவை அழைக்கிறாள் வித்யா. இதற்காக காந்தி பற்றி மூன்று நாள் உறங்காமல் படிக்கிறான் முன்னா. அவனது ஆர்வம் பார்த்து காந்தி நேரில் அவனுக்கு காட்சி தருகிறார். முன்னா தவிர வேறு யார் கண்ணுக்கும் காந்தி தெரிவதில்லை.

காந்தியை அருகில் வைத்து கொண்டு, அவர் மூலம் வித்யா வீட்டில் வயதானோர் கேட்கும் கேள்விகளுக்கு பதில் தருகிறான் முன்னா. ரேடியோவில் வித்யாவுடன் முன்னா இணைந்து நடத்தும் காந்தி குறித்த நிகழ்ச்சி மிக பிரபலம் ஆகிறது. வித்யாவும் முன்னாவை காதலிக்க துவங்குகிறாள்.

வித்யா தங்கியுள்ள வீட்டை முன்னாவை வைத்து வேலை வாங்கும் " லக்கி" அபகரிக்கிறான். அந்த வீட்டை லக்கியிடம் இருந்து மீட்க அஹிம்சை வழியில் போராடுகிறான் முன்னா.

காந்தி முன்னாவிடம் "பொய் சொல்லி காதலிக்காதே. நீ யார் என்கிற உண்மையை காதலியிடம் சொல்" என்கிறார். மிக தயக்கத்துக்கு பின் வித்யாவிடம் தான் யார் என்கிற உண்மையை சொல்ல, அவள் பிரிகிறாள்.

லக்கி திருந்தினானா? வீடு திரும்ப கிடைத்ததா? வித்யா முன்னாவுடன் இணைந்தாளா?

அனைத்து கேள்விகளுக்கும் பதில் "ஆம்; ஆம்; ஆம்" ! எப்படி என்பதை படத்தில் பாருங்கள் !

நடிப்பு

தமிழில் வந்த முன்னாபாயில் கமல் நடிப்பு நன்றாக இருந்ததாக தான் நானும் நினைத்திருந்தேன்...இந்த படம் பார்க்கும் வரை ! சஞ்சய் தத் என்ன ஒரு இயல்பான நடிப்பு ! இந்த கேரக்டருக்காகவே பிறந்த மனிதர் போல் இருக்கிறார் ! முழுக்க முழுக்க முன்னாபாய் என்று தான் நினைக்க தோன்றுகிறது. நிச்சயம் சஞ்சய் தத்துக்கு இது Lifetime காரக்டர் தான் ! காமெடியாக இருந்தாலும் சரி உணர்வு பூர்வமான காட்சியாக இருந்தாலும் சரி அசத்தி இருக்கிறார் அசத்தி !

முன்னாவின் நண்பனாக வரும் சர்க்கியூட் அர்ஷத் வர்சி. தமிழில் பிரபு நடித்த பாத்திரம். பிரபுவை வைத்து நீங்கள் ஒப்பிடவே முடியாது. ரொம்ப அழகாய் நடித்துள்ளார் . முன்னா தன்னிடம் பொய் சொல்ல மாட்டான் என நம்புவதும், அவன் "காந்தி இங்கே இருக்கிறார்" என்றதும் " முன்னா பொய் சொல்ல மாட்டானே ? காந்தி எங்கே ?" என தேடுவதும் கியூட். ஒரு காட்சியில் முன்னா சர்க்கியூட்டை அடித்து விடுகிறான். காந்தி முன்னாவிடம் " அடிப்பது பெரிய விஷயம் கிடையாது. மன்னிப்பு கேட்பது தான் கஷ்டமானது. அவனிடம் மன்னிப்பு கேள்" என்று கூற, முன்னா சர்க்கியூட்டிடம் அவனது நட்பு எத்தனை உயர்ந்தது என்று சொல்லிவிட்டு மன்னிப்பு கேட்பான். நெகிழ்ச்சியில் சர்க்கியூட்டுக்கு மட்டுமல்ல நமக்கும் அழுகை வந்து விடும் ! இப்படி ஒரு நண்பன் கிடைப்பானா என எங்க வைக்கும் பாத்திரம் சர்க்கியூட் உடையது !

காந்தியாக நடித்தவர் என்னை பெரிதும் கவர வில்லை. ஒப்பனை பொருந்தாத மாதிரி எண்ணம். ஏனோ மனதில் ஒட்டவில்லை.

வித்யாவுக்கு சுவீட்டான பாத்திரம். இன்றைக்கு வித்யா ஹிந்தியில் சூப்பர் டூப்பர் ஹீரோயின். ஆறு வருடம் முன் இந்த படம் வந்த போது சாதாரண ஆள் தான். ஸ்பெஷலாக ஏதும் இல்லா விடினும் தன பாத்திரத்தை நிறைவாய் செய்துள்ளார்.

முதல் பார்ட்டில் வில்லனாக (டாக்டர்- ஹீரோயினின் தந்தை) வந்த அதே போமன் இராணி இதில் லக்கி என்கிற வில்லன் பாத்திரம். முதல் பார்ட் பாத்திரத்தின் சாயல் அல்லது நினைவு சிறிதும் வராத மாதிரி அருமையாக நடித்துள்ளார்.

காந்தி குறித்த படம் என்பதாலோ என்னவோ படத்தில் எந்த ஒரு சண்டை காட்சியும் இல்லை ! முதல் பாதியில் ரசித்து சிரிக்கிற மாதிரி காமெடி காட்சிகள் பல உண்டு.

படத்தின் மிக முக்கிய ஒரு காட்சி பற்றி சொல்ல வேண்டும். முன்னா ரேடியோ ஜாக்கியாக இருக்கும் போது ஒருவன் போன் செய்கிறான். தன் தந்தை பணத்தில் சில லட்சம் எடுத்து அவருக்கு தெரியாமல் தான் பங்கு சந்தையில் போட்டு முழுதும் லாஸ் ஆனதாகவும், இதனால் வெறுத்து போய் தற்கொலை செய்ய போவதாகவும் சொல்கிறான். அவனிடமும் அவன் தந்தையிடம் போனில் முன்னா பேசும் அந்த ஐந்து நிமிட காட்சி பார்க்கும் யாரையும் உருக்கி விடும்.

போலவே படத்தின் க்ளைமேக்ஸ். மிக இக்கட்டான சூழ்நிலையில் ஓர் உண்மையை சொல்ல வேண்டிய நிலை. இதனால் வில்லனின் மகள் திருமணமே நிற்கும் சூழல். உண்மையை சொன்னாலும் கூட அந்த திருமணம் நிற்காத படி, போராடி ஜெயிக்கிறான் முன்னா. இன்னொரு நெகிழ்வான காட்சி இது.

படத்தை எழுதி இயக்கிய ராஜ்குமார் ஹிராணியை எவ்வளவு பாராட்டினாலும் தகும் !

12 கோடியில் தயாரிக்க பட்ட இப்படம், அதை போல் பத்து மடங்கு வசூலை குவித்தது. காந்தியடிகளின் கருத்துக்களை இன்றைய இளைய சமுதாயத்திடம் எடுத்து செல்ல இந்த படம் உதவியது

நெகிழ்ச்சியில் உங்களை அழ வைக்கும் இந்த படத்தை, ஏதாவது ஒரு வார இறுதியில் நிதானமாய் பார்த்து ரசியுங்கள் !

##########
வல்லமை மே 11 இதழில் வெளியான விமர்சனம்

சென்னையை சுற்றி பார்க்க.. சில டிப்ஸ்

2012-06-02T09:19:00.002+05:30

சமீபத்தில் நாளிதழில் செய்தி ஒன்று படித்தேன். சென்னையில் மட்டுமே இரண்டு மணி நேர மின்தடை. தமிழகத்தின் மற்ற ஊர்களில் குறைந்தது பத்து மணி நேரம் மின்சாரம் இருப்பதில்லை. இதனால் சென்னையில் உள்ளோர் வெளியூர் உறவினர் வீட்டுக்கு செல்வதை தவிர்க்க, அவர்கள் கிளம்பி சென்னை வருகிறார்களாம் !

கோடை விடுமுறையில் சென்னையை சுற்றி பார்க்கும் அனைவருக்கும் பயன்படும் என சில டிப்ஸ்கள் இதோ :

எந்த இடத்துக்கு போனாலும் காலையில் சீக்கிரம் கிளம்புவது நல்லது ! சனி, ஞாயிறில் கூட்டம் எங்கும் மிக அதிகமாக இருக்கும். நமக்கோ அந்த நாட்களில் தான் போக முடியும். விடுமுறை தினம் என்று மக்கள் சற்று மெதுவாக எழுந்து பதினோரு மணி போல் தான் இந்த இடங்களை அடைவார்கள். நீங்கள் ஒன்பது முதல் பத்துக்குள் பார்க்க வேண்டிய இடத்தை அடைந்து விட்டால் அனைத்து இடங்களிலும் சற்று கூட்டமின்றி பார்க்கலாம்.

அடுத்த விஷயம் எந்த வாகனத்தில் பயணம் செய்ய போகிறீர்கள் என்பது. நிச்சயம் மூன்று அல்லது நான்கு பேராய் போவதால் டூ வீலர் முடியாது. கார் என்றால் ஓகே. டூ வீலர், கார் இரண்டும் இல்லை என்றால், முடிந்த வரை ரயிலில் பயணம் செய்யுங்கள். சென்னையில் இப்போது பீச் டு தாம்பரம் ஒரு வழியிலும் , வேளச்சேரி டு பீச் இன்னொரு வழியிலும் ரயில் இயங்குவதால் உங்கள் வீடும், நீங்கள் செல்ல வேண்டிய இடமும் ஏதாவது ஒரு ரயில்வே ஸ்டேஷனுக்கு அருகில் இருக்க வாய்ப்புண்டு. ரயிலை விட வேகமாகவும், குறைவான பணத்திலும் பிரயாணிக்க சிறந்த வழி வேறு இல்லை. வீடு to ரயில்வே ஸ்டேஷன் அல்லது வேறு தேவைப்படும் இடங்களில் ஆட்டோ வைத்து கொண்டாலும், முடிந்தவரை ரயிலை பயன்படுத்துவது புத்தி சாலி தனம் !

தீம் பார்க்குகள் சென்றால் அங்குள்ள ராட்டினம் போன்ற விஷயங்களில் எடுத்த உடன் ஏறி விடாதீர்கள். ராட்டினம் ஒத்து கொள்ளாமல் புரட்ட ஆரம்பித்தால் பின் நாள் முழுதும் என்ஜாய் செய்ய முடியாமல் போய் விடும். என்னை பொறுத்தவரை ராட்டினம் வகை ஐட்டங்களை முழுவதும் தவிர்த்து விட்டு மற்றவை மட்டுமே என்ஜாய் செய்வேன்.

வாட்டர் கேம்ஸ் இருந்தால் குழந்தைகளுக்கு அதில் போடப்பட்டுள்ள க்ளோரின் காரணமாக நிறம் மாறும் வாய்ப்பு உண்டு. இதை நினைவில் கொள்க. எங்கள் பெண்ணுக்கெல்லாம் சில இடங்களில் வாட்டர் கேம்ஸ் ஆடி விட்டு, மாறிய உடல் நிறம் மீண்டும் பழைய படி வர பல மாதங்கள் ஆனது !

சாப்பாடு : பல தீம் பார்க்குகளில் சாப்பாடு உள்ளே அனுமதி இல்லை. அங்கு கிடைக்கும் சாப்பாடு மட்டும் தான் சாப்பிட வேண்டும். அதுவும் மிக சுமாராக தான் இருக்கும். வீட்டிலிருந்து சாப்பாடு எடுத்து போவதை பொதுவாய் தவிர்த்து விடுவது நல்லது. அவர்கள் சாப்பாட்டை உள்ளே விடாவிடில் அது வேஸ்ட் ஆகும். நீங்கள் வீணாய் வாக்கு வாதத்தில் இறங்குவீர்கள். அவரோ அது தான் ரூல்; மாற்ற முடியாது என்பார். அதை விட முக்கியமாக நாள் முழுதும் வெளியே சுத்த போகும் போது பெண்களுக்கு சமையல் என்று இன்னும் சிரமபடுதுவது தவறு. காலை அடுப்படியில், அனலில் சமைத்து விட்டு வந்து, பகலில் அவர்களால் என்ஜாய் செய்ய முடியாமல் போகலாம். வெளியில் சாப்பிடும் போது செலவானாலும் சரி என நல்ல ஹோட்டலில் சாப்பிடுவதும் சுத்தமான தண்ணீர் குடிப்பதும் அவசியம்

காமிரா எடுத்து போனால் அந்த இடங்கள் + நினைவுகளை பதிவு செய்து வரலாம். குழந்தைகள் பின் அவற்றை பார்த்து மிக மகிழ்வார்கள்.

இப்படி லோக்கல் ட்ரிப் போகும் போது அநேகமாய் சொந்த கார சிறுவர்களும் நம்முடன் வருவார்கள். அவர்களை நம் கண் பார்வையில் வைத்து, எங்கும் தொலைந்து விடாமல் சமாளிப்பதே பெரிய வேலை. இதை எப்போதும் சர்வ ஜாக்கிரதையுடன் செய்யும் போதும், இன்னொரு எளிய வழி வைத்துள்ளேன். சிறுவர்கள் அனைவரிடமும் பத்து ரூபாய் சில்லறையாக தந்து விடுவேன். எங்காவது மிஸ் ஆகி விட்டால், அந்த காசை வைத்து எனது மொபைல் எண்ணுக்கு போன் செய்யுங்கள் என எனது போன் நம்பரை ஒரு தாளில் குறித்து தந்து விடுவேன். கிராமத்தில் குடை எடுத்து போனால் மழை வராது என்பார்கள். அதை போல, என்னுடன் வரும் சிறுவர்கள் அந்த பணத்தை உபயோகம் செய்ய சந்தர்ப்பம் இதுவரை வரவில்லை !

தலைவலி, வாந்தி இவற்றுக்கான மாத்திரை எடுத்து செல்வது நல்லது.

நீங்கள் பதிவராய் இருந்தால் சென்று வந்த கையோடு அந்த அனுபவங்களை ஒரு பதிவாக எழுதி விடுங்கள். அந்த இடங்களுக்கு செல்வோருக்கு அது உதவ கூடும் !

அதீதம் மே 5 இதழில் வெளியானது .
***********
சமீபத்திய பதிவுகள்:

ஆனந்த விகடனும் வீடுதிரும்பலும்

குளு-மணாலி பயணம் -படங்கள் டிரைலர்

சென்னை பெட்ரோல் தட்டுப்பாடு: நேரடி அனுபவம்

ஹோட்டல் அறிமுகம்: தஞ்சை சாந்தி பரோட்டா கடை

வாஷிங் மெஷின்- வாங்க உபயோகிக்க சில டிப்ஸ் - பை அய்யாசாமி

2012-06-01T11:03:00.003+05:30

ஒவ்வொருவரும் திருமணம் முடிந்ததும் முதலில் டிவி வாங்குவார்கள். சிலர் பிரிட்ஜ் வாங்குவார்கள். அய்யாசாமி திருமணத்துக்கு பின் முதலில் வாங்கியது என்ன தெரியுமா ? வாஷிங் மெஷின் தான் !

இது ஏன் என அவரிடம் கேட்டபோது " எல்லா வேலைகளை விட துணி துவைக்க ரொம்ப சிரமம் ஆயிருக்கு; அதிலும் இந்த புடவையை துவைக்குறது இருக்கு பாருங்க அது ரொம்ப கஷ்டம் " என்றார்.

நன்கு விசாரித்து ஐ.எப்.பி (IFB) வாஷிங் மெஷின் வாங்கினார் அய்யாசாமி. அதன் பின் பிரிட்ஜ், டிவி போன்றவை வாங்கினாலும் அவருக்கு மிக பிடித்தது ஐ.எப்.பி வாஷிங் மெஷின் தான் !

இது பற்றி பலரிடமும் இப்படி சொல்வார்:" 15 ,000 போட்டு ஐ.எப்.பி வாஷிங் மெஷின் வாங்கினோம். சும்மா சொல்ல கூடாது. என்னமா உழைக்குது தெரியுமா? பதிமூணு வருஷம் ஒரு சின்ன பால்ட் கூட வந்தது கிடையாதுங்க. ஒவ்வொரு தடவை வீடு மாறும்போதும் பிளம்பரை கூட்டி பைப் கனக்ஷன் குடுப்பதோட சரி. சில நேரம் வெளியில் உள்ள பைப் எலி கடிச்சோ ரொம்ப வருஷம் ஆனதாலோ லேசா உடையும். அப்ப மட்டும் பிளம்பரை வச்சு பைப் மாத்துவோம். அதுவும் வெளியில் தான். மெஷினில் கை வச்சதே இல்லை. நம்மோட கஷ்டம் புரிஞ்ச ஜீவன்னா அது வாஷிங் மெஷின் தான். என்னோட பெஸ்ட் Friend களில் முக்கியமான ஆள் இது !"
இப்படியெல்லாம் அய்யாசாமியால் கொண்டாடப்பட்ட அவரது IFB வாஷிங் மெஷின் சமீபத்தில் திடீர் மரணம் அடைந்தது !

ஒரு நாள் வாஷிங் மெஷின் திடீரென வேலை செய்யலை. அய்யாசாமிக்கு கையும் ஓடலை ; காலும் ஓடலை. ஒவ்வொரு மெக்கானிக்கா கூட்டி வந்து காண்பித்தார். " இப்ப தாங்க முதல் தடவை ரிப்பேர் ஆகுது. இது வரை ரிப்பேர் ஆனதே இல்லை"

அனைவரும் சொல்லி வைத்த மாதிரி " இதை ரிப்பேர் செய்வது வேஸ்ட். பேசாம புதுசு வாங்கிடுங்க" என்றனர்.

"இந்த மெஷினை பொறுத்தவரை நீங்க தான் டாக்டர். எப்படியாவது காப்பாத்துங்க" என கெஞ்சி பார்த்தார். யாரும் நம்பிக்கை தரலை.

கனத்த மனதுடன் அடுத்த இரு நாளில் புது வாஷிங் மெஷின் வாங்கிட்டார் அய்யாசாமி (இன்னும் நாலு நாள் ஆனா, யார் சாமி துணி துவைக்கிறது?).

இந்த முறை IFB வாங்கலை. அதன் விலை 25 ஆயிரத்தை தாண்டி விட்டதால், Whirlpool-ல் சிக்கனமாய் ஒரு வாஷிங் மெஷின் 10,000-க்கு வாங்கி விட்டார்.
***************

அய்யாசாமி தன் வீட்டில் முழுசாய் பொறுப்பு எடுத்து செய்கிற வேலை ஒன்று உண்டென்றால் "வாஷிங்" வேலை தான் ! அவர் தான் வாஷிங் செய்கிறார்னு புரளியை கிளப்பிடாதீங்க ! வாஷிங் மெஷினில் துணி போடுவது, பின் காய வைப்பது, எடுப்பது, மடித்து அந்தந்த இடங்களில் வைப்பது, அயனுக்கு தருவது, அதனை வாங்குவது இத்தகைய வேலைகள் அவர் தான் செய்வார்.

மழை காலத்தில் துணிகளை மாடியில் போட்டு விட்டு ஆபிஸ் போன பின், மழை வந்தால் டென்ஷன் ஆகி மனைவிக்கு போன் செய்வார் " மழை பெய்யுது "

" பெய்யட்டும். நல்லது தானே?" என்பார் Mrs. அய்யாசாமி தன் அலுவலகத்தில் அமர்ந்தவாறு.

"இல்லை ........மொட்டை மாடியில் துணி காய போட்டேன்"

" அப்படியா? காய போட்டீங்களா ? " என சிரித்து விட்டு " எனக்கு அந்த கவலையே இல்லை. அது உங்க டிபார்ட்மென்ட் !"
************
நிற்க. புதிதாய் வாஷிங் மெஷின் வாங்குவோருக்கு அனுபவசாலி அய்யாசாமி தரும் டிப்ஸ் இதோ :

நிச்சயம் Fully ஆட்டோமேடிக் வாஷிங் மெஷின் வாங்குங்க. Partly ஆட்டோமேடிக் எனில் நிறைய வேலை வைக்கும். நாம் துவைக்கிற வேலையில் பாதி இதில் செய்ய வேண்டியிருக்கும்

இந்த பதிவில் சொன்னது போல் வாஷிங் மெஷின் பெரும்பாலும் அதிக வருஷம் உழைக்கும். மற்ற வீட்டு உபயோக பொருட்கள் போல் வாஷிங் மெஷின் அதிகம் ரிப்பேர் ஆகாது. நல்ல Life-ம் வரும். ஓரளவு நல்ல கம்பனி மெஷின் வாங்குங்க

அநேகமாக வாஷிங் மெஷின் ரிப்பேர் ஆகாது என்பதால், இதற்கு என எந்த AMC-ம் எடுக்க தேவையில்லை. எப்போதேனும் சிறு பிரச்சனை எனில் காசு தந்து சரி செய்து கொள்ளலாம்.

துணிகள் நிறைய போட்டு stuff பண்ணாதீங்க. அதே நேரம் பாதி காலியாவும் ஓட்டாதீங்க. சின்ன குடும்பம் எனில் வாரம் இரண்டு அல்லது மூன்று முறை போட்டாலே போதும்

துணிகள் போடும் போது பெருசு ஒன்றும் சின்னது ஒன்றுமா மாத்தி மாத்தி போடணும்.

வாஷிங் மெஷினுக்கு என்று குறிப்பிட்ட சோப்பு பவுடர் இருக்கும் அதை மட்டும் தான் போடணும், எல்லா சோப்பு பவுடரும் போட கூடாது; போட்டால் மெஷின் பிரச்சனை ஆகிடும். எந்த சோப்பு பவுடர் போடணும் என்பதை மெஷின் விற்கும் அதே கம்பனியில் சொல்வார்கள். (உதாரணமாய் IFB-க்கு Surf Excelmatic சோப்பு பவுடர் மட்டும் தான் போடணும்)

வாஷிங் மெஷினில் துணிகள் துவைத்து எடுத்தபின் உள்ளே சின்ன துணி ஏதும் கிடக்குதா என பாருங்கள். சில நேரம் கீழே சில துணி கிடந்து அடுத்து நாம் வாஷிங் மெஷின் போடும்வரை மெஷின் நாத்தம் அடிச்சிடும்.

Fully ஆட்டோமேடிக் மெஷின் என்பதால் துணிகள் ஓரளவு காய்ந்து விடும். எனவே துணிகளை அதிக நேரம் வெய்யிலில் போடாதீர்கள். அப்படி போட்டா துணி ரொம்ப வெளுத்துடும். நல்லா வெயில் அடிக்கும் போது மொட்டை மாடியில் துணியை போட்டால் இரண்டு மணி நேரத்தில் எடுத்துடலாம். இது தான் கணக்கு ! மழை காலத்தில் வெய்யில் அதிகம் இல்லாம துணி காய நேரம் ஆகலாம்.

மொட்டை மாடியில் துணிகளை போடும் போதும், எடுக்கும் போதும் அக்கம் பக்கத்து மாடியில் உள்ள மாமிகளை பார்க்காதீர்கள். அது உங்கள் இல்லறத்துக்கு நல்லது !

Happy Washing Folks !!

*******
வல்லமை May 18 இதழில் வெளியான கட்டுரை !

சமீபத்திய பதிவுகள்:

ஆனந்த விகடனும் வீடுதிரும்பலும்

குளு-மணாலி பயணம் -படங்கள் டிரைலர்

சென்னை பெட்ரோல் தட்டுப்பாடு: நேரடி அனுபவம்

ஹோட்டல் அறிமுகம்: தஞ்சை சாந்தி பரோட்டா கடை

ஹோட்டல் அறிமுகம்: தஞ்சை சாந்தி பரோட்டா கடை

2012-05-31T10:37:00.000+05:30

பதிவர்கள் கேபிள் சங்கர் மற்றும் Scribbling வித்யா வழியில் அவ்வப்போது ஹோட்டல்கள் குறித்து எழுத, நெடு நாளாக நினைத்திருந்தேன். பிற பதிவுகள் எழுதினாலும் ஹோட்டல்கள் குறித்த பதிவு எழுதுவதை மனம் தள்ளி போட்டே வந்தது. எழுத ஆரம்பித்து விட்டால், அவ்வப்போதாவது ஹோட்டல்களை அறிமுக படுத்த வேண்டும் என்கிற எண்ணத்தில் நான்கைந்து ஹோட்டல்கள் பற்றி எழுதி முடித்து, அவை தயாரான பிறகே முதல் பதிவை வெளியிட எண்ணினேன். இப்போ ஆட்டத்துக்கு தயார்.

இந்த பகுதிக்கு " ஹோட்டல் அறிமுகம்" என்று பெயர் வைத்துள்ளேன். வேறு நல்ல பெயர் தோன்றினால் பரிந்துரையுங்கள் நண்பர்களே !

முதல் பதிவாக, நமது ஆல் டைம் பேவரைட் ஹோட்டல்களில் ஒன்றான தஞ்சை சாந்தி பரோட்டாவில் துவங்குவோம்

**********

சாந்தி பரோட்டா !!

சிறுவயது முதல் 25 வருடங்களாக இங்கு பரோட்டா சாப்பிட்டு வருகிறேன்.

தஞ்சை பழைய பேருந்து நிலையத்துக்கு எதிரில் உள்ளது இந்த சிறிய கடை. முன் பக்கம் மட்டுமே ரொம்ப வருஷங்கள் கடை இருந்தது. இப்போது அதன் பின் புறமும் ஒரு இடம் பிடித்து அங்கும் இதே கடை எக்ஸ்டன்ஷன் வைத்துள்ளனர்.

காலை கடை இருக்காது. பகல் பதினோரு மணிக்கு மேல் திறப்பார்கள். இரவு 11,12 வரை கடை இருக்கும். எனக்கு தெரிந்து இங்கு தயார் செய்பவை இரண்டே வகை உணவுகள் மட்டும் தான்.

ஒன்று பரோட்டா, மற்றது குஸ்கா.

முழுக்க முழுக்க சைவ ஹோட்டல் இது. குஸ்காவும் சரி,பரோட்டவுக்கான குருமாவும் சரி சைவம் தான் !

80 முதல் 90 சதவீதம் வரை பரோட்டா வியாபாரம் தான். குஸ்கா மீதம் 10 அல்லது 20 % வியாபாரம் இருக்கும்.

பரோட்டா என்பதை விட டால்டா பரோட்டா என்பது தான் சரியாக இருக்கும். பரோட்டாவில் டால்டா மணம் தூக்கும். கொழுப்பு தான் ! வெயிட் போடும் தான் ! ஆனா அந்த டேஸ்ட் இருக்கே .. சான்சே இல்லை.

மூணு அல்லது நாலு பரோட்டா வாங்கி சிறுக சிறுக பிச்சி போட்டுடணும். அது மேலே சூடான குருமாவை ஊற்ற சொல்லணும். பின் சிறிது சிறிதாக மிக மெதுவாய் ருசித்து சாப்பிடணும். நடு நடுவில் மீண்டும் மீண்டும் குருமா கேட்டு வாங்கி சாப்பிட வெட்கமே பட கூடாது.

பரோட்டா இங்கு செம பாஸ்ட் மூவிங் என்பதால் எப்பவும் சூடாக இருக்கும். மேலும் குருமாவும் சூடு என்பதால் சாப்பிடும் போதே வியர்த்து கொட்டும். அதெல்லாம் அப்புறம் பாத்துக்கலாம். முதலில் பரோட்டா !

பிற ஊர்கள் மாதிரி குருமாவை பெரிய வாளியில் வைத்து கொண்டு, ஊற்ற மாட்டார்கள். எப்போதும் குருமா அடுப்பில் கொதித்து கொண்டே இருக்கும். கொதிக்கும் அடுப்பில் டம்ளர் மூலம் எடுத்து தான் அனைவருக்கும் குருமா ஊற்றுவார்கள். இது இந்த கடையின் ஸ்டாண்டர்ட் !

குஸ்காவும் இங்கு நன்கு இருக்கும் தான். ஆனால் சந்தானம் அருகில் நடிக்கும் புது ஹீரோ மாதிரி பரோட்டா முன்பு குஸ்கா தோற்று விடும். மதிய நேரத்தில் வெறும் பரோட்டா சாப்பிட்டால், முழு சாப்பாடு சாப்பிட்ட உணர்வு இருக்காது என்பதால் சாதம் டைப் உணவான குஸ்காவை நாடலாம். அதை தவிர மற்ற நேரங்களில் பரோட்டா தான்...பரோட்டா தான் ...பரோட்டா தான் ஐயா !

தஞ்சையில் அண்ணன் வீட்டுக்கு போய் சரியாக சாப்பிட வில்லையெனில் அண்ணன் சொல்லுவார்: " சாந்தி பரோட்டாவுக்கு நைசா போயிட்டு வந்திருப்பான்னு நினைக்கிறேன் " (பாம்பின் கால் பாம்பறியும் ! எங்க பரம்பரையே பரோட்டா பிரியர்கள் தான். புது தலைமுறையும் அப்படி தான் இருக்கு )

வாங்க சாந்தி பரோட்டாவின் குறுகலான கடையின் உள்ளே இந்த வீடியோ மூலம் போய் பார்க்கலாம்:

****
வீடியோவின் கடைசி பகுதியில் பேருந்து நிலையமும், அன்பு பால் கடையும் தெரியும் !
****

இப்போதெல்லாம் சாப்பிடும் முன்னே எத்தனை பரோட்டா வேண்டுமென டோக்கன் வாங்க சொல்கிறார்கள் அது தான் உறுத்துது. எத்தனை பரோட்டா வேண்டுமென எப்படி முன்பே முடிவெடுப்பது? நான்கு என வாங்கி கொண்டு சாப்பிட ஆரம்பித்த பின் மீண்டும் ஒன்று வேண்டுமெனில் கியூவுக்கு போய் வாங்க முடியுமா? (இது போன்ற நேரங்களில் மட்டும் கடை சிப்பந்திகள் டோக்கன் வாங்கு தந்து உதவுவாவர்கள் என நினைக்கிறேன் )

தஞ்சை பற்றி எழுதிய போன பதிவில், நண்பர்/ பதிவர் மணிஜி மலரும் நினைவுகளை இப்படி எழுதியிருந்தார்: " அப்பாவின் பையில் இருந்து காசு காண வில்லையென்றால் அது சாந்தி பரோட்டாவாகியிருக்கும்" !

இது தஞ்சை சிறுவர்கள் பலருக்கும் பொருந்தும்.

தஞ்சை பக்கம் போனால் அவசியம் விசிட் அடியுங்கள் சாந்தி பரோட்டா கடைக்கு !

பரிந்துரை: மிஸ் பண்ண கூடாத ஹோட்டல் இது ! Value for Money !!

சமீபத்திய பதிவுகள்:

ஆனந்த விகடனும் வீடுதிரும்பலும்

குளு-மணாலி பயணம் -படங்கள் டிரைலர்

சென்னை பெட்ரோல் தட்டுப்பாடு: நேரடி அனுபவம்

(ஹோட்டல் அறிமுகம் தொடரும் )

வானவில் 90: அனுஷ்கா- கன்னட நடிகை தன்யா

2012-05-30T10:51:00.001+05:30

ஆறாம் அறிவை இழந்த தன்யா

ஏழாம் அறிவு உள்ளிட்ட சில தமிழ் படங்களில் ஹீரோயினின் அல்லக்கையாக நடித்த பெங்களூரை சேர்ந்த தன்யா என்கிற நடிகை இப்படி ஒரு Facebook மெசேஜ் விட்டிருக்கிறார் :

dear chennai, you beg for water, we give! you beg for electricity, we give! ur people come n occupy our beautiful city and kocha paduthify it , we allow and nw u were at our mercy to go to playoffs, n we let be!! like this u begging – we givin! dai ungalukku vekkame illaiya da??

தன்யாவுக்கு சில கேள்விகள்:

சென்னை இரண்டு முறை கோப்பை வென்ற அணி. இன்னும் இரு முறை பைனல் சென்று இறுதி நிமிடம் வரை போராடி தோற்ற அணி. உங்கள் அணி எப்போதாவது கோப்பையை வென்றுள்ளதா? கெயில் மற்றும் டீ வில்லியர்ஸ் என்கிற இரு வெளிநாட்டு வீரர்கள் புண்ணியத்தில் ஆட்டமாய் ஆடி வந்த நீங்கள் இப்போது அடங்கி போய் உள்ளீர்கள். சொல்லி கொள்ளும்படி பெங்களூரு வீரர்கள் யாராவது உண்டா உங்களிடம்? அனைத்து எடிஷன்களிலும் most consistent அணி என்றால் அது சென்னை தான் என்பதை கிரிக்கெட் தெரிந்த யாராலும் மறுக்க முடியாது.

கிரிக்கெட்டை விட முக்கிய விஷயத்துக்கு வருவோம். தமிழகத்துக்கு தண்ணீர் பிச்சை போடுவதாக சொல்கிறீர்கள். காவிரி உங்கள் ஊரில் பிறப்பதால் தண்ணீர் முழுதும் உங்களுக்கு சொந்தம் என்று நீங்கள் நினைக்கிறீர்களே அது தான் பிரச்சனை.

நீங்கள் நன்கு படித்த ஒரு பெண் (என வைத்து கொள்வோம்). நீங்கள் பிறந்து வளர்ந்தது ஒரு இடத்தில். அங்கு தான் பிறந்தீர்கள் என்பதால் வாழ்க்கை முழுதும் சம்பாதிப்பதை உங்கள் பெற்றோருக்கே கொடுப்பீர்களா? அப்படி தான் இருக்கு தண்ணீர் விஷயமும்.

காவிரி என்கிற சொத்துக்கு தமிழகம் கர்நாடகம் இரண்டுக்கும் உரிமை உண்டு என்று சுப்ரீம் கோர்ட்டே பலமுறை சொன்ன பின்னும் எங்களுக்கு உரிமையான தண்ணீரை கன்னடியர்களே வைத்து கொள்கிறீர்களே? எங்களுக்கு சொந்தமான ஒன்றை தராமல் வைத்து கொள்ளும் நீங்கள் திருடர்கள் தானே? உண்மையில் எங்களுக்கு முழு உரிமை உள்ள தண்ணீரை எங்கள் அரசியல் வாதிகளின் ஒற்றுமையின்மையால் முழுதும் பயன் படுத்த முடியாமல் இருக்கிறோம். உங்கள் தேவை பூர்த்தியான பின் நீங்கள் தரும் உபரி தண்ணீரை எந்த எதிர்ப்பும் இன்றி பெற்று கொண்டு அமைதியாய் இருக்கிறோம்.

பெண்களுக்கு மட்டுமல்ல; எந்த மனிதனுக்கும் அகம்பாவம் கூடாது. தண்ணி அடித்து விட்டு டுவீட் செய்து, இப்போது "தமிழ் நாடு பக்கம் வர மாட்டேன்; தமிழில் நடிக்க மாட்டேன்" என்று அழுது புலம்புகிறீர்கள். அடுத்த வருட கிங் பிஷர் காலண்டரில் இடம் பிடிக்க நீங்கள் போட்ட நாடகம் இனிதே முடிந்தது. இனியாவது நாவை அடக்கி பேச கற்று கொள்ளுங்கள் !

ஆனந்த் கார்னர்

Everyday may not be good, but there is something good in every day.

ரசித்த கவிதை

எனக்கு நாயுடன் பழக்கமில்லை
நாயும் என்னோடு பழகியதில்லை.
நாய்க்கு ஒரு கவிதையும் சொன்னதில்லை
நாயும் என்னிடம் எதையும் சொன்னதில்லை

நாயைக் கண்டதும் பயப்படுகிறேன்.
நாயும் என்னைக் கண்டதும் பயப்படுகிறது.

நான் அறையில் உறங்குகிறேன்.
நாய் தரையில் உறங்குகிறது.
நாய் தேர்தலில் நிற்பதில்லை.
நானும் தேர்தலில் நிற்பதில்லை.

நாய் இப்போதும் நாயாக இருக்கிறது.
மனிதன் நான் எல்லாவற்றுக்கும்
நாயாக அலைந்து கொண்டிருக்கிறேன். -கோசின்ரா

ஐ.பி.எல் இறுதி போட்டி

ஐ.பி.எல் லை இந்தியன் பிரீமியர் லீக் என்பதை விட இந்தியன் பெட்டி லீக் என்பதே சரியாக இருக்கும். முதலில் பண பெட்டி வைத்து தங்கள் அணிக்கான வீரர்களை வாங்குகிறார்கள். பின் ஆட்டம் துவங்கியதும் அதே பெட்டி மூலம் அடுத்த அணி வீரர்களை தங்கள் வெற்றிக்காக வாங்குகிறார்கள். அருமையாக பந்து வீசும் ஹிலன்பாகஸ் என்கிற சென்னை வீரர் ஒவ்வொரு முக்கிய போட்டியிலும் தன் கடைசி ஓவரில் பல புல்டாஸ்கள் போட்டதை பார்த்தால் மேட்ச் பிக்சிங் உண்டு என்பது நிச்சயம் தெரிந்தது.

சென்னை தோற்றதை விட வருத்தம் மேட்சை நேரில் பார்த்து கண்ணீர் விட்டு அழுத 35000 சென்னை மக்களை நினைத்து தான் ! நொந்து போன இவர்கள் மூட் சரியாக சில நாள் ஆகியிருக்கும் !

பொதுவாக கோப்பைகள் ரோலிங் முறையில் இருக்கும். அதாவது ஒரு முறை வென்ற அணி அந்த கோப்பையை ஒரு வருடம் வைத்திருக்கும், அடுத்த வருடம் வேறு அணி வென்றால் அதே கோப்பை அவர்களிடம் செல்லும். ஆனால் மூன்று முறை தொடர்ந்து ஒரு அணி கோப்பை வென்றால் அந்த குறிப்பிட்ட கோப்பை அவர்களிடமே தங்கி விடும். அடுத்த முறை புது கோப்பை தான் செய்வார்கள். சென்னை கோப்பையை தன்னிடமே தக்க வைப்பதை நூலிழையில் தவற விட்டது. :((

நாட்டி அஜூ கார்னர்

நாட்டி - அஜூ இருக்கும் இடத்தை வீட்டு வாசலுக்கு நேரே மாற்றி விட்டோம். இங்கும் ஸ்க்ரீன் கம்பி மீது தான் இருப்பார்கள். தேவையான போது கூண்டின் மேல் இருக்கும் சாப்பாட்டை போய் சாப்பிட்டு கொள்வார்கள்.

கூண்டின் மேல் இருவரும் இருக்கும் போது நாட்டியை எங்கள் பெண் எடுத்து கொஞ்ச, அஜூ பயத்தில் கீழே இறங்கி, தத்தி தத்தி நடந்து வீட்டு வாசலுக்கு வந்து விட்டான். வீட்டின் உள்ளே இருந்து அதனை பார்த்த எனக்கு அதிர்ச்சி ! அவரசமாய் ஓடினால் என்னிடமிருந்து தப்புவதாக நினைத்து வெளியே பறந்து விட வாய்ப்புண்டு. மிக மெதுவாய் போய் உள்ளே விரட்ட, நல்ல வேளையாக உள்ளே வந்து விட்டான். ஒரு நொடி கவனிக்காமல் இருந்தால் வீட்டை விட்டு வெளியே போயிருப்பான். எப்போதும் கதவு திறந்து இருக்கும் அதற்கு நேரே தான் இருவரும் இருப்பார்கள். ஆனால் பறக்க பார்த்ததில்லை.

வெளியே போவதில் பிரச்சனை பக்கத்து வீட்டிலியே நான்கு நாய்கள் உள்ளன. அவற்றில் ஒன்று கவ்வினாலும் உடனடி மரணம் தான் ! நல்ல வேளை அன்று அஜூ தப்பி விட்டான் என பெருமூச்சு விட்டோம்

ஷ்......அனுஷ்கா !

‘‘இந்த அனுஷ்காவிடம் என்ன இருக்கிறது என்று கோடிகளில் கொட்டிக் கொடுத்து அப்படித் தூக்கி வைத்துக் கொண்டாடுகிறார்கள்?’’

‘‘அனுஷ்காவின் இதழ், இடை போன்ற கவர்ச்சிப் பிரதேசங்கள் எதுவுமே ‘என்னைப் பார்... என் அழகைப் பார்’ என்று துருத்தா தவை... உறுத்தாதவை. அதேசமயம், மழையில் நனைந்து, பிகினியில் உருண்டு புரளும் கவர்ச்சித் தருணங்களில்... அனுஷ்காவின் முகத்தைக் கவனித்திருக்கிறீர்களா? அத்தனை சாந்தமாக அழகின் எந்தத் திமிரும் தொனிக்காத ஒரு வசீகரப் புன்னகையை அது சூடி இருக்கும். ‘கவர்ச்சிப் பிரதேசங்களுக்கும் எனக்கும் எந்தச் சம்பந்தமும் இல்லை. அவை உண்டாக்கும் சேதங்களுக்கு கம்பெனி நிர்வாகம் பொறுப்பாகாது!’ என்பதுபோல ஒரு குழந்தைத்தன எக்ஸ்பிரஷனைச் சுமந்து இருக்கும் அனுஷ்கா முகம். அது மிக அரிதான அழகு. அதனால்தான் ‘கோடி லேடி’யாக வலம்வருகிறார் அனுஷ்!’’

நன்றி: நானே கேள்வி - நானே பதில் @விகடன்.

கல்யாண சமையல் சாதம்

சமீபத்தில் சாப்பிட்ட கல்யாண சாப்பாட்டின் (காலை டிபன்) மெனு:

இட்லி / மசால் தோசை/ தேங்காய் சட்னி/ தக்காளி சட்னி/ பொதினா சட்னி/ சாம்பார்/

பூரி/ குருமா/

பொங்கல்/

குழாய் புட்டு/ கொண்டை கடலை/

அசோகா அல்வா/

திவ்யமான காபி

இதுக்கு மேல் டிபன் ஐட்டம் ஏதாவது மிச்சம் இருக்கா? சமீபத்தில் மணாலி போய் ரொட்டியாக சாப்பிட்டு வந்தவன், இங்கு இந்த உணவுகளை பார்த்ததும் பாய்ந்து விட்டேன். அனைத்திலும் ஒன்று சாப்பிடவே கஷ்டமாய் இருந்தது. பக்கத்தில் ஒருத்தர் எக்ஸ்ட்ரா பூரி எல்லாம் வாங்கி சாப்பிட்டார். நம்மை விட அதிக தூரம் டூர் போயிருப்பார் போல :)

சமீபத்திய பதிவுகள்:

ஆனந்த விகடனும் வீடுதிரும்பலும்

குளு-மணாலி பயணம் -படங்கள் டிரைலர்

சென்னை பெட்ரோல் தட்டுப்பாடு: நேரடி அனுபவம்

சென்னை பெட்ரோல் தட்டுப்பாடு: நேரடி அனுபவம்

2012-05-29T12:09:00.003+05:30

ஒவ்வொரு முறை பொது தேர்தலில் தோற்கும் போதும் கலைஞர் " சூடு, சொரணையற்ற தமிழர்கள்" என அறிக்கை விடுவார். அறுபது ஆண்டுகளுக்கு மேலாய் தமிழர்களை உன்னிப்பாய் கவனித்து அவர்களின் இந்த குணத்தை exploit செய்பவர் சொன்னால் தவறாகவா இருக்கும்? அப்படி திட்டப்பட்டதை மறந்து அடுத்த ஐந்து ஆண்டில் மீண்டும் தி.மு.க வுக்கே வாக்களித்து, கலைஞர் சொன்னது மெய் என்று நிரூபிக்கும் தமிழர் கூட்டம் ! அப்படி மீண்டும் ஒரு முறை நிரூபிக்கும் சம்பவம் சென்னையில் நடந்தேறி வருகிறது. பெட்ரோல் தட்டுப்பாடு !

ஞாயிறு அலுவலகம் செல்ல வேண்டியிருந்தது. சென்று திரும்பும் போது அனைத்து பெட்ரோல் பங்குகளிலும் பெட்ரோல் இல்லை. ஒரு டிராபிக் போலீசிடம் விசாரித்தால், " அப்படியா சார்? எங்கேயும் பெட்ரோல் இல்லையா? எல்லாத்துக்கும் சென்ட்ரல் கவர்மெண்டு தான் சார் காரணம்" என்றார் மம்மியை கண்டு பம்மும் மந்திரி போல ! அருகிலுள்ள மற்றொரு போலிஸ் காரர் " ஆமாப்பா .. எங்கேயும் பெட்ரோல் இல்லை" என்றார். சரி இது தற்காலிகமானது மறு நாள் கிடைக்கும் என வீடு வந்து சேர்ந்தேன்.

திங்கள் கிழமை நிலைமை மோசமானது. அன்று ஒரு கல்யாணத்துக்கு பாடி வரை செல்ல வேண்டி இருந்தது. வீட்டிலிருந்து முப்பது கிலோ மீட்டர். பல பங்குகளில் பெட்ரோல் இல்லை. எங்கு கிடைக்கும் என தேடி, கியூவில் நின்று பெட்ரோல் போடுவதற்குள் நொந்து நூடுல்ஸ் ஆகி விட்டேன்.

பாடி செல்லும் வரை ரோடில் கண்ட காட்சிகள் பரிதாபம் ! பத்துக்கு ஒன்பது பெட்ரோல் பங்குகள் மூடப்பட்டிருந்தன. இருக்கும் ஒரு பங்கில் கூட்டம் சொல்லி மாளாது. அந்த இடத்தில ரோடை கிராஸ் செய்யவே முடியாத சூழல். ஒரு பக்கம் பாதி வழியில் வண்டி நின்று போனதால் காலி பாட்டிலுடன் பலர் பெட்ரோல் கேட்டு கியூவில் நிற்கிறார்கள். அதற்கு தனி கியூ.

சில இடங்களில் பெட்ரோல் மற்றும் டீசல் லிட்டருக்கு பத்து ரூபாய் அதிகம் வைத்து விற்றுள்ளனர்.

மக்கள் என்ன சொல்கிறார்கள்?

"பெட்ரோல் விலை பத்து பெர்சன்ட் ஏறிடுச்சுல்ல.. அதான் எப்படியோ பெட்ரோல் கிடைச்சா போதும்; விலை எப்படி இருந்தாலும் பரவாயில்லைன்னு நாம நினைக்கணும்னு இப்படி பண்றாங்க" இது ஒரு சாரார் கருத்து.

இன்னொரு குருப்: " பெட்ரோல் விலை மறுபடி குறைய போகுது. அதான் பெட்ரோல் பங்குகள் வாங்கி ஸ்டாக் வச்சிக்க மாட்டேங்குது. அதிக விலைக்கு வாங்கிட்டு அப்புறம் கம்மி விலைக்கு அதை நஷ்டத்தில் விக்கனும்னு பாக்குறாங்க"

ஆனால் ஆயில் கம்பனிகள் டிவி மற்றும் பேப்பர் மூலம் சொல்வது வேறாய் உள்ளது. அவர்கள் சொல்வதாவது:

சென்னையில் பெட்ரோல் டிமாண்ட் அதிகம் ஆகிடுச்சு ( அதெப்படி நீங்க விலை ஏத்துன மறுநாளில் இருந்து திடீர்னு டிமாண்ட் அதிகம் ஆகும்?) வர வேண்டிய டாங்குகள் வரலை. அதான் இப்படி ! நாளை டீசல் டாங்கு வந்துடும் மறுநாள் எல்லாருக்கும் டீசல் கிடைக்கும் (அப்போ பெட்ரோல் டாங்கு எப்ப வரும்?)

இவ்வளவு நடந்தும் கூட மத்திய அரசு விலை ஏற்றுவது மட்டும் தான் என் வேலை; மற்றபடி பெட்ரோல் கிடைக்காமல் அல்லாடினால் எனக்கென்ன என்று ஜம்மென்று உட்கார்ந்துள்ளனர்.

அருகில் இருந்து வேடிக்கை பார்க்கும் மாநில அரசும் மக்கள் கஷ்டத்தை மத்திய அரசிடம் எடுத்து சொன்ன மாதிரி தெரிய வில்லை.

அரசியல் வாதிகள் என்பவர்கள் மக்களை சுரண்ட, கொள்ளை அடிக்க மட்டும் தான்; மக்கள் கஷ்டப்பட்டால் அதை நீக்க துளி நடவடிக்கையும் எடுக்க மாட்டார்கள் என்கிற என் எண்ணம் மீண்டும் ஒரு முறை உறுதி படுகிறது.

இதில் அரசியல் வாதிகள் செய்ய என்ன இருக்கு என கேட்கலாம்:

மக்களின் கஷ்டம் எதுவாயினும் அதனை தீர்க்க வேண்டிய பொறுப்பு Elected representatives-க்கு தான் உண்டு. ஆனால் இவ்விஷயத்தில் மட்டுமல்ல எவ்விஷயத்தில் இறங்கினாலும், தனக்கு எவ்வளவு கமிஷன் வரும் என்று மட்டும் தான் பார்ப்பார்கள் இந்த அரசியல் வியாதிகள் !

மூன்றாம் நாளாக இன்று ஆங்காங்கு சில பெட்ரோல் பங்குகள் மட்டும் திறந்துள்ளனர். கூட்டம் கட்டுக்கடங்காமல், ஆனால் அமைதியாக கியூவில் இருக்கிறது.

ரோடில் வண்டிகளின் எண்ணிக்கை வழக்கத்தை விட குறைவாய் உள்ளது. அலுவலகத்தில் பார்க்கிங் ஏரியா பாதி காலியாய் உள்ளது !

இத்தகைய நிலை வரும்படி ஏன் விடவேண்டும்? மற்ற மாநிலத்தில் இப்படி இல்லாத போது சென்னை மீது மட்டும் ஏன் இந்த அலட்சியம்?

இனி ஒரு சில நாட்களில் பெட்ரோல் கிடைத்தால் கூட மக்கள் பயத்தில் தங்கள் டேன்க்குகளை முழுதாய் நிரப்பி வைத்து கொள்வார்கள்.

சென்னை மக்கள் சரியான விஷயத்துக்கு சரியான அளவில் கோபப்பட தெரியாதவர்கள். இந்நேரம் இன்னொரு ஊரில் இது நடந்தால் பெட்ரோல் பேங்க் மீது கல்லெறி சம்பவம் உள்ளிட்ட பல கொதிப்பான விஷயம் நடந்திருக்கும். ஆனால் இங்கோ மக்கள் அமைதியாக கியூவில் நிற்கிறார்கள். ஆனால் இந்த சம்பவங்களின் எதிரொலி நிச்சயம் தேர்தலில் தெரியும் !

உபயோகமான தகவல்: அனைத்து ஷெல் (Shell) பங்குகளில் பெட்ரோல் தொடர்ந்து கிடைக்கிறது. மற்ற கடைகளை விட லிட்டருக்கு ஒரு ரூபாய் அதிகம் என்றாலும், தரம் மற்றும் அளவு சரியாய் இருக்கும். விலை அதிகம் என்பதால் ஷெல் பக்கம் போகாத நான் இப்போது ஷெல்லை தான் நாடி வருகிறேன் !

*******
சமீபத்திய பதிவுகள்:

ஆனந்த விகடனும் வீடுதிரும்பலும்

குளு-மணாலி பயணம் -படங்கள் டிரைலர்

தில்லி, சிம்லா, குளு-மணாலி பயணம்-அசத்தல் படங்கள்- டிரைலர்

2012-05-28T12:40:00.001+05:30

தில்லி, சிம்லா, குளு, மணாலி பயண கட்டுரை விரைவில் துவங்குகிறது. மினி டிரைலர் இதோ.

சென்று வந்த ஒவ்வொரு இடத்துக்கும் ஒரு போட்டோ வீதம் மட்டுமே பகிர்கிறேன். 10 நாளில் ஆயிரத்துக்கும் மேல் புகைப்படங்கள் எடுத்தோம். பாதி குடும்ப உறுப்பினர் படங்கள் என்பதால் பொது வெளியில் பகிர மாட்டேன். அவை தவிர்த்து இங்கு பகிர தயாராக உள்ள படங்கள் மற்றும் தகவல்கள் ஏராளம்.

பெரும்பாலும் பயண கட்டுரையின் ஒவ்வொரு அத்தியாயத்திலும் இரண்டு அல்லது மூன்று இடங்கள் பற்றி சொல்வேன். ஆனால் இம்முறை பல வரலாற்று சிறப்பு மிக்க இடங்கள் உள்ளதால் பொறுமையாக , ஒரு அத்தியாயத்துக்கு ஒவ்வொன்றாக தான் சொல்ல போகிறேன். ஒரே பகுதியில் நிறைய தகவல் இருந்தாலும் படிக்க சுவாரஸ்யம் இல்லாமல் போகலாம் அல்லவா?

இப்போதைக்கு சில படங்கள் மட்டும் உங்கள் பார்வைக்கு :

பனிமலையில் டூர் முழுதும் எங்களை குஷிப்படுத்திய குட்டி பாப்பாவுடன்

இம்புட்டு பேர் எங்கிட்டு போறாங்க?

பிரதமர் கொடியேற்றும் செங்கோட்டையில்

மகாத்மாவின் இறுதி நிமிஷங்கள் :பல நெகிழ்வான தகவல்கள்

இது தாஜ்மஹாலா? ஆனா வெள்ளை கலரில் இல்லையே?

இந்த தொங்கு பாலத்தை தெரியுதா? பல படத்தில் பார்த்திருக்கோம்

குட்டி சர்தார்ஜியிடம் அய்யாசாமி என்ன சொன்னார்? பையன் செமையா முழிக்கிறான் !

மறக்க முடியாத Rafting பயணம் -வீடியோவுடன்

பூ மிதிக்க ரெடி

உங்களுக்காக (குறிப்பெழுதி) உழைக்கும் அய்யாசாமி

நூற்றுகணக்கான கார் குளிரில் நடுங்கிய படி ஏன் காத்திருக்கு? நேரடி அனுபவம்

தலை நகரின் புகழ் பெற்ற இந்த இடத்தில் மனிதர்கள், குறிப்பிட்ட இடத்துக்கு மேல் அனுமதி இல்லை. ஆனால் உள்ளே ஹாயாக தூங்கும் நாய்கள்

High Point of the whole trip: பனியில் ஆடிய விளையாட்டுகள் (உடன் இருப்பது பம்பாய் குடும்பங்கள்)

பனியிலும் அய்யாசாமி மட்டும் ஏன் கிளவ்ஸ் போடலை?

இரவு ஒளி வெள்ளத்தில் குதுப்மினாரில் இனிய அனுபவம்

முன்னாள் பிரதமர் சுடப்பட்ட இடம்; நெகிழ்வான தகவல்கள்

108 அடி உயர கடவுள்: காலை பார்த்து யார் என ஊகிக்க முடிகிறதா?

கோட்டையை பிடிப்பது எப்படி? நண்பர் தேவா என்ன சொல்கிறார்?

பியானோ வாசிப்பாராம்...நல்லா குடுக்குறாரையா போசு !

அதிர்ச்சி தந்த Paragliding அனுபவங்கள் ! With வீடியோ....

இந்த படத்துக்கு சிறந்த காமன்டுகள் வரவேற்கபடுகின்றன :))

சாகசத்துக்கு தயாராகிறார் அய்யாசாமி ! விரிவான படங்கள் மற்றும் வீடியோ ..

இந்த பெண்கள் என்ன தைக்கிறார்கள் என தெரிகிறதா?

கையில் ஏறி விளையாடும் அணில் ...ஒரு அனுபவம்

இப்படி கம்பி எண்ணும்படி என்ன தப்பு பண்ணார் ?

இந்த புகைப்படம் எடுத்த வி.வி.ஐ.பி யார்? மறக்க முடியாத வரலாற்று புகைபடங்கள் பல..Wait and Watch !

மணாலியில் தங்கிய ஹோட்டலின் மிக மிக அற்புத கார்டன் ஒரு பகுதி (மற்றவை பின்பு)

விமான ஜன்னலில் இருந்து மாலை வானம் (விமான பயணம், படங்கள் மற்றும் வீடியோ மட்டும் தனி பதிவாக)

தில்லியில் ஷாப்பிங் செய்ய வேண்டியது இந்த தெருவில் தான் !

விபரங்களுக்கு காத்திருங்கள் !

அய்யாசாமி பின்னாலிருக்கும் குரங்கு அவர் மேல் பாய்ந்ததா இல்லையா? ஊமை விழிகள் டைப் பாட்டியிடம் என்ன ரகசியம்?

என்ன நடக்குது இங்கே? ஆச்சரியம் + நெகிழ வைத்த இடம் !
**********
ஆனந்த விகடனில் வெளியான சமீபத்திய பதிவு வாசிக்க இங்கே க்ளிக் செய்யவும் : ஆனந்த விகடனும் வீடுதிரும்பலும்

சென்னை சேப்பாக்கம் மைதானத்தில் சில அனுபவங்கள்

2012-05-26T16:44:00.002+05:30

ஐ.பி. எல் பைனல் நடக்கும் இன்று சென்னை சேப்பாக்கம் மைதானத்தில் நான் பார்த்த சில மேட்ச்கள் குறித்த அனுபவத்தை பகிர்கிறேன்:

இந்தியா நியூசிலாந்து டெஸ்ட் மேட்ச் வருடம் : 1995

திருச்சியில் என் நண்பன், அங்கு நடக்கும் டிஸ்டிரிக்ட் மேட்ச்களுக்கு அம்பயர் ஆக இருப்பார். இத்தகைய அம்பயர்களுக்கு சென்னையில் நடக்கும் மேட்ச்க்கு ஒரு டிக்கெட் இலவசமாக கிடைக்கும். அவர் போக முடியாத போது அந்த மேட்ச் டிக்கெட்டை நமக்கு தந்து விடுவார். இப்படி தான் துவக்கத்தில் நிறைய மேட்ச்கள் இலவசமாக பார்த்தேன்.

இந்த டெஸ்ட் மேட்சில் பெரிய காமெடி மேட்ச் ஆரம்பிக்க சில நாள் முன் மழை பெய்தது. அதனால் கடைசி நாள் வரை மேட்ச் நடக்கவே இல்லை. அப்புறம் என்ன விசேஷம் என்கிறீர்களா? மேட்ச் நடக்குதோ இல்லையோ ஒவ்வொரு நாளும் காலை அங்கு ஒரு விசிட் அடிப்பேன். என்னை போல் சில நூறு ரசிகர்கள் மட்டும் கிரவுண்ட் வருவார்கள்.

அம்பயர் டிக்கெட் என்பது விளையாட்டு வீரர்கள் இருக்கும் அறைக்கு மிக அருகில் ! எனவே தினம் அனைத்து இந்திய வீரர்களையும் பார்க்கலாம். பார்ப்பது மட்டுமல்ல கூட்டம் மிக குறைவு என்பதால் அனைவரிடமும் நன்கு பேசலாம்.

அப்போது அசார் கேப்டன் ! அசார், கும்ப்ளே, ஸ்ரீநாத், வேங்கடபதி ராஜு, காம்ப்ளி என பலரிடுமும் மிக சாதாரணமாக பேசி, ஆட்டோ கிராப் வாங்கினேன். பேச முடியாத, ஆட்டோ கிராப் வாங்க முடியாத ஒரே நபர் சச்சின் தான் ! சச்சினை அருகில் பார்த்திருக்கிறேன். ஆனால் கிட்டே போய் பேச முடியாது. அப்போதே இந்தியாவில் மிக அதிக பாபுலர் ஆன வீரர் அவர் தான். கூட்டம் அவரை பார்க்க தான் மோதும். கூட்டம் பார்த்தாலே சச்சின் ஓடி விடுவார்.

எனக்கு வீரர்களை அருகில் பார்த்து பேசியதில் கிடைத்த ஆச்சரியம் : கும்பிளே மற்றும் ஸ்ரீநாத் சுத்த தமிழில் பேசியது தான். அதுவும் ஸ்ரீநாத் பேசும் தமிழ் நம் தமிழ் நாட்டில் பிறந்து வளர்ந்த மாதிரி அவ்வளவு சுத்தம் !

ஐந்தாவது நாள் மதியம் மேட்ச் ஆரம்பித்தது. அரை நாள் இந்தியா பேட் செய்தது. சச்சின் ஒரு அரை சதம் அடித்தார். அந்த அரை நாள் டெஸ்டுக்கு மேன் ஆப் தி மேட்ச்-ம் அவர் தான். ஐந்து நாளும் சுத்தமாய் மழை இல்லா விட்டாலும் பிச் சரியால்லாமல் மேட்ச் இப்படி ஆனது ! ஒரு காலத்தில் சென்னை கிரவுண்டில் அவ்வளவு லட்சணமா மழை நீர் வடியும் வசதி (drainage facility) இருந்திருக்கு !

ஆஸ்திரேலியா Vs நியூசிலாந்து உலக கோப்பை 1996

பகல் இரவாக நேரில் பார்த்த முதல் மேட்ச் இது. அடடா ! முதல் முறை அந்த சூழலை நேரில் பார்த்து அசந்து போனேன். மதிய நேரம் மேட்ச் ஆரம்பிக்கும். அப்போது சாதாரண சூரிய ஒளியில் ஆடுவார்கள். முதல் பேட்டிங் முடிய ஆறு மணி ஆகும். அப்போது ஒளி விளக்குகள் முழுதும் எரியும். ஆட்ட சுவாரஸ்யத்தில் எப்போது அந்த விளக்குகள் எரிய ஆரம்பித்தது என தெரியாமல் விழிப்போம். இதனாலேயே தான் ஐ. பி. எல் முதல் முறை பார்க்க போகும் நண்பர்கள் மாலை நான்கு மணி மேட்ச் பார்ப்பது சிறந்தது. நிஜ சூரிய ஒளியில் முதலிலும் பின் விளக்குகள் சூழ இரவிலும் பார்ப்பது அருமையான அனுபவம்.

சரி குறிப்பிட்ட மேட்சுக்கு வருவோம். உலக கோப்பை யில் கால் இறுதி ஒரு ஆட்டம் மட்டுமே சென்னையில் நடந்தது. அது ஆஸ்திரேலியா Vs நியூசிலாந்து மேட்ச். முதலில் ஆடிய நியூசிலாந்து 290 ரன்கள் எடுத்தது. பின் ஆடிய ஆஸ்திரேலியா அதனை அடிக்காது என்றே நினைத்தோம். ஆனால் மிக எளிதாக அதனை அடித்து ஜெயித்தது. மார்க் வா செஞ்சுரி மற்றும் மேன் ஆப் தி மேட்ச்.

இந்த மேட்சில் மறக்க முடியாத நபர் ஷேன் வார்ன். அலுவலக நண்பர்கள் சிலர் சேர்ந்து சென்றிருந்தோம். முதலில் ஆடிய நியூசிலாந்து நன்கு அடிக்கவும், பவுண்டரி லைனில் எங்கள் அருகில் பீல்டிங் செய்த ஷேன் வார்னை கூப்பிட்டு " வார்னே ஆஸ்திரேலியா " என்று கூறி விட்டு தோற்று விடும் என்பதற்கு அடையாளமாக கட்டை விரலை தரை நோக்கி கீழே காட்டினோம். ஆனால் வார்னே " நோ நோ " என கூறி தன் கட்டை விரலை மேலே காட்டினார். எங்களிடம் இப்படி சொல்லி அடுத்த ஓவர் வார்னே வீசினார். அப்போது நன்கு ஆடிய நபரை அவுட் செய்ததுடன் மெய்டன் ஓவர் போட்டு விட்டு, எங்கள் அருகில் மீண்டும் பீல்ட் செய்ய வந்தார். இப்போது நாங்கள் அவரை பாராட்டி கை தட்ட, செம குஷி ஆகி தன் தொப்பியை மடக்கி உடலை வளைத்து எங்களுக்கு நன்றி சொன்னார்

இந்தியா Vs பாகிஸ்தான் : பெப்சி இண்டிபெண்டன்ஸ் கப் - ஒரு நாள் போட்டி - 1997

இந்தியா சுதந்திரம் அடைந்து 50 வருடங்கள் முடிந்ததை ஒட்டி நடந்த இண்டிபெண்டன்ஸ் கோப்பை இது. இந்தியா இந்த மேட்சில் தோற்றாலும் மறக்க முடியாத ஒரு மேட்ச் அதற்கு சில காரணம் இருக்கிறது.

என் மாமா ஒருவர் மூலம் வி.ஐ.பி டிக்கெட் கிடைத்தது. அது ஒரு பாக்ஸ் டிக்கெட். சினிமா தியேட்டரில் உள்ளது போல் ஒரு கண்ணாடி அறைக்குள் சில நூறு பேர் தான் இருப்பார்கள். அங்கு பெரிய டிவி திரையும் உண்டு. டிவியில் நீங்கள் பார்க்கும் மேட்ச் அதில் முழுதும் ஒளி பரப்பாகும். ஒவ்வொரு பந்தையும் நேரில் பார்ப்பதோடு, அந்த பந்து முடிந்ததும் டிவியிலும் பார்ப்பார்கள் அனைவரும் !!

பாகிஸ்தான் முதலில் பேட் செய்து அடி அடி என அடித்தது. பேட்டிங்கில் அதுவரை கபில் அடித்த 175 தான் உலக சாதனையாக பல ஆண்டுகளுக்கு இருந்தது. அதை முறியடித்து சயீத் அன்வர் 194 ரன் இந்த மேட்சில் எடுத்தார். பாதி நேரத்துக்கும் மேல் அவருக்கு பை ரன்னர் இருந்தது குறிப்பிடத்தக்கது. முதலில் இரட்டை சதம் எடுக்கும் வீரராக அவர் ஆவோரோ என பேசி கொண்டோம். 194 ரன்னில் அவர் அவுட் ஆகி வரும் போது, மைதானத்தில் இருந்த ஒவ்வொருவரும் எழுந்து நின்று அவர் உள்ளே சென்று சேரும் வரை கை தட்டினர் ! அது தான் சென்னை மக்கள் ! சயீத் அன்வர் சொந்த ஊரில் ஆடி இந்த சாதனை செய்து விட்டு அவுட் ஆனால், எப்படி கை தட்டி ஆரவாரம் செய்வார்களோ அப்படி இருந்தது இந்த பாராட்டு !

இந்த மேட்சுக்கு காப்டன் சச்சின் ! சச்சின் காப்டன்சியை நேரில் பார்த்து வெறுத்து போனது அன்று தான் ! பவுலர் பாட்டுக்கு பவுலிங் போட இவர் பாட்டுக்கு பீல்டிங் செட் செய்கிறார். பவுலர் நடந்து வரும் போதோ, அல்லது பந்து வீச ஓட ஆரம்பித்த பிறகோ கூட, சச்சின் பீல்டருடன் பேசி கொண்டும், மாற்றி கொண்டும் இருப்பார் !

இந்தியா மிக மோசமாக இந்த மேட்சில் தோற்றது. யாரும் ஜெயிக்கும் என எதிர்பார்க்கலை. டிராவிட் அந்த மேட்சில் அதிரடியாய் ஆடி சதம் அடித்தது ஆச்சரியம்.

ஒரு உலக சாதனை நடந்த மேட்சை நேரில் பார்த்தேன் என்பதை பெருமையாக நீண்ட நாள் சொல்லும் படி இருந்தது இந்த மேட்ச் !

இந்தியா Vs பாகிஸ்தான் டெஸ்ட் மேட்ச் வருடம் : 1999

அனைவரும் அறிந்த மேட்ச். நீண்ட வருடங்களுக்கு பிறகு இந்தியாவுக்கு டூர் வந்திருந்தது பாகிஸ்தான். முதல் டெஸ்டே சென்னையில் தான். வாசிம் அக்ரம் மிக அருமையாக பந்து வீசிய காலம். ஷோயப் அக்தர் அந்த சீரிஸில் தான் அறிமுகம்.

சென்னை டெஸ்ட் நான் ஒரு நாள் மட்டும் தான் பார்த்தேன். அன்று சிறப்பாய் ஏதுமில்லை. அடுத்த நாள் டிக்கெட் இருந்தது. ஆனால் அந்த மேட்ச் முழுக்கவே பாகிஸ்தான் இருந்ததால் வெறுத்து போய் போகலை.

கடைசி நாள் டிராமாக்களை டிவியில் பார்த்து மனம் நொந்தேன். சச்சின் மிக அருமையாக ஆடி வெற்றி கோட்டின் அருகே கொண்டு சென்று விட்டு பேக் ஸ்பாசம் காரணமாக அவுட் ஆக, அடுத்து பத்து ரன் எடுக்க முடியாமல் நான்கு விக்கட்டை இழந்து ஒரு டெஸ்ட் தோற்றோம். டிபிகல் இந்தியன் பேட்டிங் !

இதன் பின் சில ஐ. பி. எல் மேட்ச்கள் பார்த்திருக்கிறேன். எட்டு மணி மேட்சுக்கு ஆறு மணிக்கெல்லாம் உள்ளே சென்றால் தான் நல்ல சீட் கிடைக்கும். மாலை ஆறு முதல் ஏழரை வரை சிறந்த பின்னணி பாடகர்கள் துள்ளலுடன் கூடிய பாடல்களை பாட மைதானம் களை கட்டும். மேட்ச் நடக்கும் போது எழும் சத்தம், கூட்டமாய் எழுப்பும் அலை எல்லாம் பார்ப்பது ஒரு தனி அனுபவம் !

நீங்கள் இதுவரை சென்னை சேப்பாக்கத்தில் மேட்ச் பார்க்க வில்லையெனில் வாழ்க்கையில் ஒரு நல்ல அனுபவத்தை தவற விடுகிறீர்கள் என்று அர்த்தம்.

ஆனந்த விகடனும், வீடு திரும்பலும்

2012-05-26T10:36:00.000+05:30

சுஜாதா என்கிற சொல்லுக்கு அடுத்து, விகடன் என்கிற சொல் தான் பல ஆண்டுகள் ஆகியும் வியப்பையும் மரியாதையும் தருகிறது.

ஒரு காலத்தில் விகடன் (மாணவ) நிருபர் ஆக வேண்டும் என்பது லட்சியமாக இருந்தது. நேர்முக தேர்வு வரை போய், அங்கு சொதப்பியதன் வலி இன்னும் மனதில் உண்டு.

விகடன் வலையோசை துவங்கிய கொஞ்ச நாளிலேயே தஞ்சை பகுதி நண்பர்/ நிருபர் லோகநாதன் தொடர்பு கொண்டு வலையோசையில் வீடுதிரும்பல் பற்றி எழுத விருப்பம் தெரிவித்தார். " இப்போது வசிப்பது சென்னையில். சென்னை எடிஷனில் நம் ப்ளாக் பற்றி வெளியானால் தான் நன்றாய் இருக்கும்" என்றேன். பின் அவரே சென்னை எடிஷனை கவனிக்கும் செந்தில் குமாரை அறிமுகம் செய்தார். சென்னையில் வெளியிடுவதா, தஞ்சை பதிப்பிலா என்ற குழப்பம் இருவருக்கும் இருக்க, இப்போது தஞ்சை பதிப்பில் வீடுதிரும்பல் பற்றி வெளியாகி உள்ளது.

சென்னை பதிப்பில் வந்திருந்தால், என்னை நன்கு அறிந்த சென்னையிலிருக்கும் அனைத்து நண்பர்களும் பார்த்திருப்பார்களே என்கிற வருத்தம் சிறிது உண்டு. சில விஷயங்கள் நம் கையில் இல்லை. வேறன்ன சொல்வது?

இந்த இதழ் வெளியான பின் பின்னூட்டத்திலும், போனிலும் மெயிலும் பத்துக்கும் மேற்பட்ட பதிவுலக நண்பர்கள் தொடர்பு கொண்டு இத்தகவலை கூறி விட்டனர். விகடனை எவ்வளவு பேர் நெருக்கமாய் கவனிக்கிறார்கள் பாருங்கள் ! அன்போடு தகவல் தந்த அனைத்து நண்பர்களுக்கும் ....குறிப்பாய் இந்த பக்கங்களை ஸ்கேன் செய்து அனுப்பிய செல்வராஜ் ஜெகதீசன் அவர்களுக்கும் மிக்க நன்றி !

இதோ விகடனில் வெளியான பக்கங்கள் உங்கள் பார்வைக்கு:

வானவில் 89: கல்வி கட்டணம்- இளையராஜா-ஐஸ்வர்யாராய்

2012-05-24T23:41:00.001+05:30

தில்லி, சிம்லா, குலு, மணாலி பயணம்

தில்லி, சிம்லா, குலு, மணாலி 10 நாள் பயணம் இன்றுடன் முடிந்தது. நினைத்ததை விட மிக அதிக அனுபவங்களை, நண்பர்களை, தகவல்களை மகிழ்ச்சியை கொடுத்தது இந்த பயணம். விரைவில் இதன் பயண கட்டுரை தொடங்கும் என்பது யாம் சொல்லாமலே உங்களுக்கு தெரிந்திருக்கும் !

முதல் சில நாட்கள் நான் கேட்டு கொண்டதற்கு இணங்க நண்பர் ரகு பதிவுகளை Draft-ல் இருந்து பிரசுரித்து கொண்டிருந்தார். பின் அவரிடம் இணையம் பக்கம் வருவதே சிரமம் ஆக உள்ளதால் மற்ற பதிவுகளை பிரசுரிக்க வேண்டாம் என கேட்டு கொண்டேன். இப்போது ஊருக்கு திரும்பி விட்டதால் மறுபடி ஆட்டம் நிதானமாக தொடங்கும் !

தமிழக பள்ளிகளில் கல்வி கட்டணம்

கல்வி கட்டணம் குறிப்பிட்ட அளவு தான் வசூலிக்க வேண்டும் என தமிழக அரசும், உயர்நீதி மன்றமும் உத்தரவு போட்டாலும் தமிழக பள்ளிகள் வழக்கத்தை விட அதிக பீஸ் தான் வாங்குகின்றன. எனக்கு தெரிந்த ஒரு பள்ளியில் முன்பெல்லாம் ரெசீப்ட் தருவார்கள். இப்போதோ மாதாந்திர பீசுக்கு மட்டும் பள்ளி பெயரில் ரெசீப்ட் தந்து விட்டு, பெரிய அமவுண்டுக்கு சாதாரண தாளில் எந்த விளக்கமும், பள்ளி பெயரும் இன்றி எழுதி தருகிறார்கள். பள்ளி பெயர் போட்டு தந்தால் அதிகம் வசூலிக்கிறார்கள் என தெரிந்து விடுமே !!

மாணவர்களுக்கு நேர்மையை கற்று தர வேண்டிய இடத்திலேயே நேர்மை இல்லை ! என்ன சொல்வது?

ரசித்த வரிகள்

எந்த மலரும் நாம் விரும்பியதால் மலரவில்லை.

களைகள் நாம் விரும்பாத போதும் முளைக்காமல் இருப்பதுமில்லை -டோகன் (ஜப்பான்)

நாட்டி- அஜூ கார்னர்

அஜூவிற்கு பியூட்டி பாய் என்று ஒரு பெயர் உண்டு என முன்பே கூறியிருந்தேன். அதை தவிர இன்னொரு பெயர் இப்போது வைத்திருக்கிறோம் அது " பம்மல்" .

ஸ்க்ரீன் மேலே தான் நாட்டி அஜூ இருவரும் எப்போதும் இருப்பர். அந்த ஸ்க்ரீன் பக்கம் நாம் போனாலே அஜூ சற்று பயந்து அங்கும் இங்கும் நகர்வான். பின் பக்கமாக அவன் நகர்ந்து போவது செம காமெடியாக இருக்கும். இப்படி நம்மை பார்த்தாலே அங்கும் இங்கும் நடந்து பம்முவதால் தான் அவருக்கு பம்மல் என பெயர் வைத்தோம். பம்மல் என்றாலோ அஜூ என்றாலோ அவனை தான் கூப்பிடுகிறோம் என தெரியும் ! நாம் அவனை கூப்பிட்டால், தன் அழகான பெரிய கண்களால் நம்மை பார்ப்பான் இந்த பட்டு பையன் !

பத்து நாள் கழித்து இன்று ஊருக்கு வந்ததும் முதலில் எங்கள் வீட்டுக்கு போகாமல், நாங்கள் இல்லாத போது நாட்டி அஜூ இருந்த மாமனார் இல்லம் தான் முதலில் சென்றோம். தினமும் போன் செய்து விசாரிக்கவும் தவற வில்லை. We missed them so much !!

என்னா பாட்டுடா இது !

சமீபத்தில் விஜய் டிவியில் இறந்த சில பின்னணி பாடகர்கள் பாடிய பாடலை நினைவு கூறும் விதமாய் சிறுவர் சிறுமிகள் பாடினார்கள். அப்போது ஸ்வர்ணலதாவின் "குயில் பாட்டு. வந்ததென்ன இளமானே " பாடலை ஒரு சிறுமி மிக சுமாராய் பாடினாள். அதை கேட்கும் போது அப்பாட்டை ஸ்வர்ணலதா குரலில் கேட்க தோன்றி இணையத்தை நாடினேன். அடடா ! என்னா அருமையான பாட்டு இது !

இளையராஜா இசை ராஜாங்கம் நடத்திய கால கட்டத்தில் வந்த பாட்டு. ராஜா பாடல்களில் எப்போதும் பிளூட் மற்றும் வயலின் இரண்டையும் மிக அற்புதமாய் பயன் படுத்துவார். இப்பாட்டிலும் அவை என்னமாய் பயன் படுத்தியுள்ளார் ...பாருங்கள் ! Class ! முதலில் பிளூட் ஒலிக்கும். அது முடிகிற இடத்தில வயலின் துவங்கும். இவை இரண்டும் மாறி மாறி பயணிக்கும். இப்படி பிளூட் மற்றும் வயலின் மாறி மாறி அசத்திய எத்தனையோ ராஜா பாட்டுகளை காட்ட முடியும்.

வீடியோவில் பார்க்கும் போது சினிமாவே ஆனாலும் இந்த பாட்டின் இறுதி பகுதியை காண மனம் வராது. நிறுத்தி விடுவேன் :((

போஸ்டர் கார்னர்

வழுக்கையான அரவிந்த் சாமி ! குண்டான ஐஸ்வர்யா ராய் !

அய்யாசாமியின் புது போன்

அய்யாசாமி கடந்த 6 வருடங்களாக ஒரே மொபைல் போன் தான் வைத்திருந்தார். எத்தனை முறை ரிப்பேர் ஆனாலும், எவ்வளவு செலவு செய்தும் அதை சரி செய்வாரே ஒழிய மாற்றவே மாட்டார். " என் இன்னொரு விரல் மாதிரி எளிதா யூஸ் பண்ணுவேன். இதை மாற்ற மனசே இல்லை" என்பார். ஒரு முறை மிக சிக் ஆகி யாரும் ரிப்பேர் செய்ய முடியாது என்றபோது தனக்கு நன்கு தெரிந்த ஒரு மெக்கானிக்கிடம் போய் அழுது புலம்பி, இவர் இம்சை தாங்காமல் எங்கோ ஸ்பேர் பார்ட் வாங்கி அவர் அதை சரி செய்து தந்தார்.

அதன் வெளி பாகமெல்லாம் உடைந்து பார்க்கவே கோரமாக இருக்கும்.

அவர் மகளும், மனைவியும் " இந்த போன் தேவையா? மாத்துங்க" என்றாலும் காதிலேயே வாங்கி கொள்ள மாட்டார்.

திடீரென அவர் அண்ணன் மகன் புதிதாய் வேலைக்கு போனதால் இவருக்கு ஒரு சாம்சங் டச் போன் வாங்கி தந்து விட்டான். இவர் சொல்ல சொல்ல கேட்காமல் பழைய போனை உருவி போட்டு விட்டு புதுசை ஆக்டிவேட் செய்து விட்டான். மனுஷன் டச் போனை வைத்து கொண்டு அல்லாடுகிறார் !

பழசும் புதுசும்

Contacts-ல் யாரையாவது தேட முயல அது பாட்டுக்கு எங்கெங்கோ ஓடுது. மெசேஜ் டைப் செய்வதற்குள் இவருக்கு தாவு தீருது ! பார்க்கும் நபரிடமெல்லாம் " இந்த போனை எப்படி யூஸ் பண்றது?" என கேட்டு கேட்டு கற்று வருகிறார். கூடிய சீக்கிரம் கற்று தேற கூடும் !

சென்னை ஸ்பெஷல் : எக்ஸ்பிரஸ் அவின்யூவில் வியாழன் என்ன ஸ்பெஷல் ?

எக்ஸ்பிரஸ் அவின்யூவில் Hunger Games படம் பார்க்கும் போது தான் இந்த தகவல் தெரிந்தது. ஒவ்வொரு வியாழனும் எக்ஸ்பிரஸ் அவின்யூவில் எந்தெந்த ஹிந்தி படம் நடக்கிறதோ அவை அனைத்துக்கும் வியாழன் அனைத்து காட்சிகளிலும் ஆங்கில சப் டைட்டில் போடுவார்களாம் !

ஹிந்தி தெரியாது என்பதால் தான் நல்ல ஹிந்தி படங்களை சப் டைட்டில்களுடன் DVD- யில் பார்ப்பது வழக்கம். இப்படி சப் டைட்டிலுடன் காட்டினால் தியேட்டரிலேயே பார்க்கலாமே? வியாழன் பொதுவாய் அதிக கூட்டம் இராது போலும்; எனவே மக்களை தியேட்டருக்கு ஈர்க்க இந்த யோசனை செய்திருக்கலாம் !

எப்படியோ... யாம் பெரும் இன்பம் பெருக இவ்வையகம் என இத்தகவலை உங்களுக்கு பகிர்கிறேன் !

சொத்தின் மீது வழக்கு: வில்லங்க சான்றிதழில் தெரியுமா? சட்ட கேள்வி பதில்

2012-05-17T07:26:00.001+05:30

கேள்வி: கோபி ராமமூர்த்தி, பெங்களூர்

ஒரு சொத்து வாங்கும் போது அது சம்பந்தமாக வழக்குகள ஏதேனும் நிலுவையில் உள்ளனவா என்று தெரிந்து கொள்ள முடியுமா?

பதில் :

நல்ல கேள்வி. Encumbrance Certificate மூலம் சொத்து மீது ஏதும் கடன் உள்ளதா என அறிய முடியுமே ஒழிய, அந்த சொத்து சம்பந்தமாய் வழக்கு ஏதும் நிலுவையில் உள்ளதா என்பதை அது காட்டாது.

சொத்தை விற்கும் யாரும், அதன் மீது வழக்கு நிலுவையில் இருந்தால் அதைப் பற்றி மூச்சு விட மாட்டார்கள்…. அது தெரிந்தால் யாரும் சொத்தை வாங்க முன் வர மாட்டார்கள் என்பதால்!

இந்நிலையில் சொத்து மீது வழக்கு ஏதும் உண்டா என்பதை அறிய ஒரே வழி ரகசியமாக (Discreet) அக்கம் பக்கம் விசாரித்து பார்ப்பது தான்! அநேகமாய் பக்கத்து வீட்டுக்காரர்களுக்கு சொத்து மீது வழக்கு இருந்தால் தெரிய வாய்ப்புண்டு. அவர் மூலம் இதை தெரிந்து கொண்டு, பின் சொன்னவர் பெயரை சொல்லாமல் சொத்து உரிமையாளரிடம் ” இப்படி ஒரு வழக்கு நிலுவையில் உள்ளதாமே?” என கேட்காலாம். விஷயம் உங்களுக்கு தெரிந்து விட்டது என்ற பின், அவர் முழு விஷயமும் பகிர வாய்ப்புண்டு!

உண்மையில் கடன்கள் எப்படி Encumbrance Certificate-ல் தெரிகிறதோ, அதே போல் வழக்குகளும் தெரிந்தால் நன்றாயிருக்கும் தான்! அரசு ஏதேனும் இவ்விஷயத்தில் நடவடிக்கை எடுத்தால் நன்றாயிருக்கும் !

ஆங்கிலத்தில் ” Caveat Emptor ” என்பார்கள். இதற்கு அர்த்தம் “Let the buyer be aware ” – எந்த பொருளையும் வாங்குபவர் தான் ஜாக்கிரதை உணர்வோடு இருக்க வேண்டும். விற்பவர் சிறு சிறு குறைகள் இருந்தாலும் அவற்றை மறைத்து விற்கக் கூடும்தான் ! நாம் தான் தீர விசாரித்து அறிய வேண்டும் !

*******************

கேள்வி : இளங்கோவன்

சொத்தின் மீது உரிமை கோரி ஒருவர் வழக்கு தொடர்ந்து, நீதிமன்றம், தற்போதைய உரிமையாளர் அந்த சொத்தை விற்பதற்கு, இடைக்காலத்தடை விதித்தால், அது வில்லங்க சான்றிதழில் வர வாய்ப்பு உள்ளதா? அதையும் மீறி, அந்த சொத்து விற்கப்படுவதற்கான வாய்ப்பு உள்ளதா?

பதில் :

இல்லை திரு. இளங்கோவன். வில்லங்க சான்றிதழில் கடன் விபரங்கள் மட்டும் தான் வரும். வழக்கு விபரங்கள் வராது.

நீதி மன்றத்தின் இடைக் காலதடையையும் மீறி விற்க முயலுவார்களா எனில்.. நீதி மன்றத்தை மதிப்பவர்கள் அப்படி விற்க மாட்டார்கள். எதற்கும் துணிந்தோர் இடை கால தடை இருந்தும் கூட விற்க முயல கூடும். இது போன்ற காரணிகளை கருத்தில் கொண்டே எந்த ஒரு கிரைய பத்திரமும் (Sale deed) எழுதும் போது, அந்த சொத்தில் எந்த வழக்கும் (Dispute ) இல்லை என்றும், அந்த சொத்தை விற்க அவருக்கு எல்லா உரிமையும் உண்டு என்றும் ஒரு வேளை சொத்தில் வழக்கோ வில்லங்கமோ இருந்தால் அவற்றுக்கு விற்பவர் பொறுப்பு எடுத்து சரி செய்து தருவார் என்றும் ஷரத்துகள் போடுவது அவசியமாகிறது.

சொத்து வாங்கும் முன் :

1) வில்லங்கம் ஏதும் இல்லையென வில்லங்க பத்திரம் பார்ப்பதும்,

2) வழக்கு இல்லை என்பதற்கு அருகில் உள்ளோரிடம் விசாரிப்பதும்,

3) சரியான முறையில் கிரைய பத்திரம் எழுதுவதும்
மிக மிக அவசியம் !

***********
வல்லமை மே 11 இதழில் வெளியானது

********

நண்பர்களே சட்டம் குறித்த உங்கள் கேள்விகளை பின்னூட்டத்திலோ, snehamohankumar@yahoo.co.in என்கிற மெயிலுக்கோ எழுதுங்கள்.

வானவில் 88: விஜய் டிவி- ரஹீலா- வழக்கு எண் 18/9-சச்சின்

2012-05-16T10:30:00.000+05:30

பேஸ்புக் கிறுக்கல்கள்

24 மணி நேரமும் டிவியில் பார்க்க வெவ்வேறு சேனல்கள். கணினியில் விளையாட்டுகள் மற்றும் இன்டர்நெட். வாசிக்க எத்தனையோ புத்தகங்கள்.. இருந்தும் இந்த கால பிள்ளைகள் சொல்கின்றன " லீவுல போர் அடிக்குது".

நாம் பள்ளியில் படித்த போது மேலே சொன்ன எதுவுமே இல்லை. ஆனால் நாம் போர் அடிப்பதாக நினைத்ததோ, சொன்னதோ இல்லையே ? ஏன்?
##########
இன்று அட்சய திரியை மற்றும் சச்சின் பிறந்த நாள். அட்சய திரியை அன்று பெண்கள் தங்கம் வாங்குவர். சச்சின் அம்மாவுக்கோ தங்கமே மகனாய் அட்சய திரியை அன்று பிறந்துள்ளது !

இன்று பிறந்த நாள் காணும் சொக்க தங்கமே, எங்கள் சிங்கமே...நீவிர் வாழ்க ! உம்ம ஆட்டம் பார்த்து நாங்கள் மகிழ்க !

சச்சின் தீவிர ரசிகர் படை, சென்னை கிளை (எங்களுக்கு எல்லா ஊரிலும் கிளைகள் உண்டு)
##########
விகடனில் வழக்கு எண் படத்துக்கு 55 மார்க் ! 45 மார்க்குக்கு மேல் விகடன் தந்தாலே படம் மிக அருமை என அர்த்தம் ! கடந்த சில வருடங்களில் எந்த படமும் இவ்வளவு மதிப்பெண் வாங்கிய நினைவில்லை.

படம் அருமை தான் எனினும் கடந்த சில ஆண்டுகளில் வந்த அனைத்து படங்களையும் விட சிறந்தது என சொல்ல முடியலை. விகடன் மார்க்கை சில நேரம் புரிஞ்சுக்க முடியலை.
******************
ஒரு கோடி நிகழ்ச்சியில் கலக்கிய பெண்

நீங்களும் வெல்லலாம் ஒரு கோடியில் ரஹீலா என்கிற பெண் செம காமெடியாக பேசினார். என்ன ஒன்று.. அவை பெரும்பாலும் வடிவேலு பேசும் காமெடி பன்ச் டயலாக் என்பது சற்று உறுத்தியது (மனுஷங்களை சினிமா எம்புட்டு பாதிக்குது!) பெண்கள் சுய எள்ளலுடன் பேசுவது மிக அரிதே ! (நமக்கு தெரிஞ்ச பொண்ணுங்க எல்லாரும் செம சென்சிடிவ்!!) இவர் காமெடியை மிக ரசித்து சிரித்தோம் ...நீங்களும் இந்த வீடியோ பார்த்து ரசியுங்கள்.

அய்யாசாமியின் வாட்டர் ஹீட்டர் அனுபவம்

அய்யாசாமி முன்பு பார்ட் டைம் ஆக, காலை ஆறு மணிக்கு வகுப்புகள் எடுத்து வந்தார். அப்போது அவர் வீட்டில் கெய்சர் இல்லை. நீண்ட எலக்ட்ரிக் குச்சி போல இருக்கும். ஒரு வாளியில் தண்ணீர் பிடித்து அந்த குச்சியை வாளிக்குள் அமிழ்த்தி விட்டு சுவிட்சை ஆன் செய்தால் சிறிது நேரத்தில் தண்ணீர் சூடாகிடும்.

அய்யாசாமி இரவே வாளியில் தண்ணீர் பிடித்து ரூமில் கொண்டு வந்து வைத்து விடுவார். அந்த எலக்ட்ரிக் மெஷினும் சொருகி வைத்து விடுவார். காலை அந்த குச்சியை உள்ளே வைத்து விட்டு சுவிச் மட்டும் ஆன் செய்வார்.

குறிப்பிட்ட நாள் இதே போல செய்துவிட்டு அய்யாசாமி மற்ற வேலை பார்க்க ஏதோ பொசுங்கும் வாசனை. என்னவென்று பார்த்தால் அய்யாசாமி தூக்க கலக்கத்தில், எலக்ட்ரிக் மெஷினை தண்ணீர் உள்ளே வைக்காமல் டேபிள் மேலேயே வைத்து விட்டு சுவிட்ச் ஆன் செய்து விட்டு போய் விட்டார். இதனால் அருகில் இருந்த லேண்ட் லைன் போன் ஹீட்டில் உருகி, எரிய ஆரம்பித்திருந்தது. தண்ணீர் ஊற்றலாமா என தெரியலை. பெரிய துணியை போட்டு நெருப்பை அணைத்து சுவிட்ச் ஆப் செய்தார். வீட்டம்மா எழுந்ததும் செம டோஸ் !

அவ்வளவு களேபரத்திலும் அய்யாசாமி கடமை வீரராக அன்றும் போய் வகுப்பு எடுத்தார் என்பது குறிப்பிட தக்கது !

ரசித்த கவிதை/ பதிவர் பக்கம்

கொஞ்சம் கண்ணீர் சில கவிதைகள்

உங்களை பிடிக்குமென்றான்
எனக்கும் என்றாள்
பார்க்க வேண்டுமென்றான்
பார்க்கலாம் என்றாள்

பருக வேண்டுமென்றான்
சற்றே தயங்கி சரியென்றாள்

விட்டு விலகினான்
பட்டு வதங்கினாள்

கொஞ்சம் கண்ணீர்
சில கவிதைகள்
மனம் தேற்றி கொண்டிருந்தவளிடம்
மற்றுமொருவன்
உங்களை மிகவும்
பிடிக்குமென்றான் - லாவண்யா சுந்தர்ராஜன்

நம் பதிவில் தயாரிப்பாளர் லிங்குசாமி போட்ட கமன்ட் + திண்ணை கமண்டுகள்
நாம் எழுதும் சில கட்டுரைகள், புத்தக விமர்சனங்கள் திண்ணை, உயிரோசை, அதீதம், வல்லமை உள்ளிட்ட இணைய இதழ்களில் வெளியாவது உங்களுக்கு தெரிந்திருக்கும். நமது கட்டுரை வெளியானதை பார்த்ததும், அதன் லிங்கை குறித்து கொள்வதுடன் பல நேரங்களில் அங்கு வெளியானதை மறந்து விடுவேன். அத்தகைய இணைய இதழ்களில் கமன்ட் வருவது மிக குறைவு என்று தான் நினைத்திருந்தேன். எதேச்சையாக கண்ணதாசன் எழுதிய வனவாசம் குறித்து வெளியான கட்டுரையை திண்ணையில் பார்க்க, கமன்டுகள் என்பதை பார்த்து அசந்து போய் விட்டேன். அவ்ளோ காமன்டுகள் நம்ம பதிவுகள் எதற்கும் ப்ளாகில் கூட வந்ததில்லையே ! உள்ளே எட்டி பார்த்தால் குறிப்பிட்ட சிலர் கலைஞர் பற்றியும் கண்ணதாசன் பற்றியும் செமையா சண்டை போட்டிருக்கிறார்கள் (நல்ல வேளை ! நம்மை யாரும் திட்டலை !) நாம பாட்டுக்கு ஓரமா எதோ எழுதிட்டு போயிடுறோம் ! ஆனால் எழுதுவது என்னென்ன விளைவுகளை உண்டாக்குது என்பது சில நேரம் ஆச்சரியம் தருது !

இந்த லிங்கில் நீங்கள் அந்த பதிவுக்கு வந்த ஏராளமான கமண்டுகளை "பார்க்கலாம்" ; ஆம் பார்க்க தான் முடியும்; படிக்க அல்ல ! என்னால் கூட முழுதும் படிக்க முடியலை. அவ்ளோ இருக்கு !

நிற்க. வழக்கு எண் படம் குறித்தான நம் விமர்சனத்துக்கு தயாரிப்பாளர்/ இயக்குனர் லிங்கு சாமி பின்னூட்டத்தில் வந்து நன்றி கூறி இருக்கிறார் ! சற்று பின்னூட்டம் ஆக இருக்கிறதே பலருக்கும் சென்று இதே போட்டுள்ளாரா என பார்த்தால் அய்யனார் விஸ்வநாத், வீடுதிரும்பல் போன்ற ஒரு சில பதிவுகளில் மட்டுமே இப்படி பின்னூட்டம் இட்டிருப்பது தெரிந்தது. நமது பதிவு இந்த அளவு ரீச் இருப்பது ஆச்சரியமாய் உள்ளது !

போஸ்டர் கார்னர்

சினிமா பாடல் புதிர்

வழக்கு எண் படத்தில் "ஒரு குரல் கேட்குது பெண்ணே" பாடல் இசையின்றி இருப்பதை வித்யாசமான முயற்சி என்று கூறுகின்றனர். இதற்கு முன்பும் தமிழ் படங்களில் இசையின்றி பாடல்கள் வந்துள்ளனர். உங்களுக்கு ஏதேனும் பாடல் நினைவுக்கு வருகிறதா? பின்னூட்டத்தில் சொல்லுங்கள்!

சிரிப்பு டாக்டர்- என்.எஸ்.கேயின் காமெடி அனுபவங்கள்

2012-05-15T08:27:00.000+05:30

கிழக்கு பதிப்பகம் வெளியிட்ட "கலைவாணர் என் எஸ்.கே "சிரிப்பு டாக்டர்" என்கிற புத்தகம் சமீபத்தில் வாசித்தேன்.

புத்தகத்தின் முதல் அத்தியாயத்திலேயே என். எஸ். கே யின் பல வித்தியாச குணங்களை சொல்லி புத்தகம் முழுதும் வாசிக்கும் ஆவலை தூண்டி விடுகிறார் நூலாசிரியர்

என். எஸ். கே ஒரு நாள் இரவு மொட்டை மாடியில் படுத்திருக்கிறார். அப்போது ஒரு திருடன் வந்து மொட்டை மாடியில் குதிக்கிறான். அவனை பார்த்து விட்டு மனைவி மதுரம் " யாரோ திருட்டு பய" என்கிறார். என். எஸ். கே எழுந்து பார்க்கிறார். அவன் திருடன் தான். ஆனால் என். எஸ். கே தன் மனைவியிடம் இப்படி சொல்கிறார்: " என்னுடன் நாடகத்தில் நடித்தவன்; வாச கதவு தாழ் போட்டதால் இப்படி வந்துருக்கான் " என சொல்லி விட்டு அவனுக்கு சாப்பாடு போட்டு பணம் தந்து அனுப்புகிறார். இது தான் என். எஸ். கே !

இன்னொரு சம்பவம். இவர் நிறுவனத்தின் கணக்கு வழக்கு பார்த்து விட்டு வருமான வருவாய் அதிகாரி ஹனுமந்த ராவ் கணக்குகளை கொண்டு வந்தவரிடம் " என்னயா நிறைய தர்மம், தர்மம் -னு கணக்கு எழுதிருக்கு. எப்படி நம்புறது?" என்று கேட்க, என்னெனவோ சொல்லியும் அவர் நம்பாததால், இப்படி சொல்லியுள்ளார். " சார் நீங்க வேணா இப்ப நேரா போய் என். எஸ். கே யை பாருங்க. உங்களை யாருன்னு சொல்லிக்காம, உங்க மகள் கல்யாணத்துக்கு வேணும்னு பணம் கேளுங்க. தர்றாரா இல்லையா பாருங்க " என சொல்ல, அதிகாரி ஹனுமந்த ராவ் அதே போல் போய் ஆயிரம் ரூபாய் பெண் கல்யாணத்துக்கு வேண்டும் என கேட்டுள்ளார். பணம் தர என். எஸ். கே ஏற்பாடு செய்யா, அதை பார்த்து விட்டு ஆச்சரியமான ஹனுமந்த ராவ் இப்படி சொல்லி விட்டு கிளம்புகிறார்: " ஐயா கிருஷ்ணா, உனக்கு உங்க அப்பா தப்பான பேர் வச்சிட்டார். உனக்கு கர்ணன்னு தான் பேர் வச்சிருக்கணும். பணம் தர்மம் தருவேதேல்லாம் சரி. இனியாவது அதுக்கு ஒரு வவுச்சர் வாங்கிக்குங்க"

கலைவாணர் தன் இறுதி காலத்தில் பண வசதி இன்றி மருத்துவ மனையில் இருந்த போது எம். ஜி ஆர் அவரை பார்க்க வரும் போதெல்லாம் பண கட்டை அவர் படுக்கைக்கு கீழ் வைக்க, " ராமச்சந்திரா. பணமா தராம காசா மாத்தி கொடு இங்கே இருக்க ஏழைகள் எல்லாருக்கும் அப்ப தான் தர முடியும் " என்றாராம். தன்னை பார்க்க வருவோர் வாங்கி வரும் பழங்கள், ஹார்லிக்ஸ் இவற்றையும் கூட மற்ற ஏழைகளுக்கு கொடுத்து விடுவாராம் என். எஸ். கே.

மேற்சொன்ன சம்பவங்கள் அனைத்தும் முதல் அத்தியாயத்திலேயே உள்ளது ! இப்படி படு சுவாரஸ்ய அறிமுகத்துடன் துவங்குகிறது புத்தகம்.

மளிகை கடை வேலை, டென்னிஸ் கோர்ட்டில் பந்து பொறுக்கி போடும் போடும் சிறுவன் வேலை என பார்த்து வந்தார் என். எஸ். கே. மாலை நேரத்தில் நாடக கொட்டகையில் முறுக்கு விற்க போகும் போது நாடகம் முழுதும் பார்த்து அதில் வரும் பாடல்களை எப்போதும் பாடுவாராம். இதை பார்த்து விட்டு அவர் தந்தை அவரை ஒரு நாடக குழுவில் சேர்த்து விட, சிறு சிறு பாத்திரங்களில் நடித்து பின் முக்கிய சிரிப்பு நடிகர் ஆனார் என். எஸ். கே. அதன் பின் திரைப்படத்தில் நுழைந்து கலக்கியவருக்கு வந்த பெரும் சோதனை லட்சுமி காந்தன் கொலை வழக்கு.

அப்போது பிரபலமாக இருந்த பாகவதர் மற்றும் என். எஸ். கே இருவரும் அந்த கொலை வழக்கில் முக்கிய குற்றவாளிகள். லட்சுமி காந்தன் நடிகர்களை பற்றி எழுதும் மஞ்சள் பத்திரிக்கை நடத்தி வந்துள்ளார். அதில் பாகவதர் மற்றும் என். எஸ். கே பற்றி தவறாக எழுதியாதால், அவர்கள் ஆள் வைத்து லட்சுமி காந்தனை கொன்றனர் என்பது வழக்கு. இது பல வருடங்கள் நடந்து அதுவரை இருவரும் ஜெயிலில் இருக்க நேரிட்டது. பின் திறமை வாய்ந்த ஒரு வக்கீலின் வாதத்தால் மேல் முறையீட்டில் இருவரும் விடுதலை ஆகினர்.

விடுதலைக்கு பின் பாகவதர் பெரிதாய் சோபிக்காமல் போனார். ஆனால் அதன் பின் தான் என். எஸ். கே-க்கு கலை வாணர் என்கிற பட்டம் கிடைத்தது. தன் திரை வாழ்வின் பல வெற்றி படங்களை தந்ததும் "நல்ல தம்பி" உள்ளிட்ட படங்களை அவர் இயக்கியதும் அதன் பின் தான்.

அந்த காலம் பற்றி சில வித்யாசமான தகவல்களை தெரிந்து கொள்ள முடிகிறது. நாடக குழுக்களில் நடிப்போர் சண்டை போட்டு கொண்டு ஊருக்கு ஓடி விடுவார்களாம்; பின் திரும்ப வந்து அதே குழுவில் சேர்ந்து கொள்வார்களாம். அனைத்து குழுவிலும் இது நடக்குமாம்.

இழந்த காதல் என்கிற நாடகம் அனைவருக்கும் பொதுவான ஒன்றாம். ஏதாவது ஒரு நாடக குழு கஷ்டத்திலோ அல்லது நஷ்டத்திலோ இருந்தால் இழந்த காதல் நாடகம் கொஞ்ச நாட்கள் போட்டால், நஷ்டத்திலிருந்து மீண்டு விடுவார்களாம் !

எம்.ஜி. ஆர் அறிமுகமான அதே சதி லீலாவதி படத்தில் தான் என். எஸ். கே யும் அறிமுகமானார் என்பது ஆச்சரியமாய் உள்ளது.

என். எஸ். கே ஏற்கனவே திருமணம் ஆனவர். அதை மறைத்து மதுரத்தை மணந்துள்ளார். இறுதி வரை அவருடன் தான் வாழ்ந்துள்ளார். முதல் அமநிவி என்ன ஆனார் என்கிற தகவல் புத்தகத்தில் இல்லை.

அந்த காலத்திலேயே பல பன்ச் டயலாக்குகள் இவர் பிரபலம் ஆக்கியுள்ளார். அதில் முக்கியமான பன்ச் இது : " இவரு சொன்ன சொன்னது தான். எவரு? இவரு !" இதனை ஒரு காலத்தில் அனைவரும் சொல்லி திரிவார்களாம் !

ஐம்பது வயதுக்கு மேல் மனிதன் வாழ கூடாது; நான் அதற்குள் இறந்து விடுவே என மதுரத்திடம் சொல்லி கொண்டே இருப்பாராம். அதன் படி ஐம்பது வயதுக்குள் இறந்து விட்டார்.

அவர் இறப்பிற்கு பின்னும் புத்தகம் வேறு ஏதேதோ சம்பவங்கள் சொல்கிறது. பின் திடீரென ஒரு பாராவில் கலைவாணர் அரங்கம் திறக்க பட்டதை சில வரிகளில் சொல்லி முடிகிறது.

முதல் அத்தியாயத்துக்கு எடுத்து கொண்ட சிரத்தையை கடைசி அத்தியாயங்களில் காட்ட வில்லை.

என். எஸ். கே நடித்த 102 படங்களின் பட்டியலும் இறுதியில் தரப்பட்டுள்ளது

கலைவாணர் என்ற மாமனிதரின் வாழ்க்கையையும், கூடவே அந்த கால நாடக உலகம் மற்றும் தமிழ் சினிமாவையும் நிச்சயம் அறிய முடிகிறது இந்த புத்தகத்தில் !

நூல்: சிரிப்பு டாக்டர்

ஆசிரியர்: முத்து ராமன்

பக்கம்: 164

விலை: 70

வெளியீடு: கிழக்கு பதிப்பகம்
புத்தகம் வாசிக்க தந்தமைக்கு நன்றி : பதிவர் ரகு

கீற்று ஏப்ரல் 29 இதழில் வெளியான கட்டுரை .

அதிக செலவின்றி மருத்துவம் (MBBS) படிக்க ஒரு வழி

2012-05-14T11:20:00.000+05:30

ப்ளஸ் டூ தேர்வுகள் முடிந்து மாணவர்கள் தேர்வு முடிவுக்கு காத்திருக்கின்றனர். இந்த நேரத்தில் அவர்களுக்கு அதிக செலவின்றி மருத்துவம் படிக்க உள்ள வாய்ப்பு பற்றி பகிர்வது பயனுள்ளதாய் இருக்கும் என நம்புகிறேன்.

இந்தியாவை பொறுத்த வரை மருத்துவ படிப்பு குதிரை கொம்பாக தான் உள்ளது. அரசு மருத்துவ கல்லூரிகள் மிக குறைவாக உள்ளன. 98% க்கு மேல் மதிப்பெண் எடுத்தால் தான், அரசு மருத்துவ கல்லூரியில் MBBS சீட் கிடைக்கும். ( Forward Community எனில், அதுக்கும் மேல் 99% எடுக்கணும் !!)

தனியார் மருத்துவ கல்லூரியில் படிக்க ஐந்தாண்டில் கிட்டத்தட்ட ஐம்பது லட்சம் செலவழிக்க வேண்டும் என நினைக்கிறேன். ( தவறாயிருந்தால் திருத்துங்கள் ! )

இந்நிலையில் நடுத்தர மக்களுக்கு வர பிரசாதமாய் உள்ளது வெளி நாட்டு மருத்துவ படிப்புகள் !

நண்பரின் உறவினர் பெண் ஒருவர் இப்படி தான் ரஷ்யா சென்று மருத்துவம் படித்துள்ளார். இவரை போல பல்வேறு மாணவ மாணவிகள் தமிழகத்திலிருந்து ஆண்டு தோறும் ரஷ்யா சென்று படிக்கின்றனர் . தமிழகத்தில் தனியார் கல்லூரியில் ஒரு ஆண்டுக்கு ஆகும் செலவு தான் அங்கு ஐந்து வருடத்துக்கு மொத்தமும் சேர்த்து ஆகிறது என்கிறார்கள் பெண்ணின் பெற்றோர் !.

ரஷிய மருத்துவ கல்லூரி

மருத்துவ படிப்பை ஆங்கிலம் அல்லது ரஷிய மொழியில் படிக்கலாம்.

ஆங்கிலத்தில் படித்தால் தான் மேலே சொன்ன அளவு செலவாகிறது. ரஷிய மொழியில் படித்தால் செலவு மிக மிக குறைவு. ( இந்தியர்கள் பலரும் ஆங்கிலத்தில் தான் படிக்கிறார்களாம். ரஷிய மொழியில் படிப்போர் குறைவே !)

Pavlov, , Mechnikov, Sechenov ஆகியவை ரஷியாவில் படிக்க நல்ல யூனிவர்சிட்டி என்று இணையத்தில் தேடி பார்க்கும் போது தெரிகிறது.

ஆனால் இதில் ஒரு முக்கிய பிரச்சனை உள்ளது ! அங்கு படித்த படிப்பை Medical council of India இங்கு அப்படியே அங்கீகரிப்பதில்லை ! இந்தியா வந்த பிறகு வந்து மூன்று தேர்வுகள் எழுதி பாஸ் செய்தால் தான், இந்தியாவில் பிராக்டிஸ் செய்ய அனுமதி உண்டு .

இது சம்பந்தமாய் Medical council of India இப்படி கூறுகிறது:

Any Indian student who receives a medical graduate degree from a foreign country must meet three conditions to be a registered medical practitioner in India.

First, the students must pass MCI's Screening Test. Second, they must earn a medical degree from an institute listed in the World Directory of Medical Schools, published by the World Health Organization. Third, they must obtain the Eligibility Certificate from MCI according to the Eligibility Requirement for Taking Admission in an Undergraduate Medical Course in a Foreign Medical Institution Regulations, 2002.

***

இதில் இரண்டாவதாக சொல்லப்படும் "World Directory of Medical Schools"-ல் லிஸ்ட் ஆகியுள்ள யூனிவர்சிட்டியில் படிக்க வேண்டும் என்பது முக்கியமான ஒன்று. ஆயினும் நாம் சேர்கிற யூனிவர்சிடி அந்த லிஸ்டில் உள்ளதா என்பதை முன்பே பார்த்து விட்டு சேரலாம்.

ஆனால் ஸ்க்ரீனிங் டெஸ்ட் என்று சொல்லப்படும் மூன்று தேர்வுகள் தான் தலைவலி !

இதென்ன பிரமாதம் ஒரு கோர்சே முடித்தவர்கள் மூன்று பரீட்சை பாஸ் செய்ய முடியாதா என்கிறீர்களா? அங்கு தான் இருக்கு விஷயம் !

ஒவ்வொரு ஆண்டும் இந்த தேர்வு ரெண்டாயிரம் அல்லது மூவாயிரம் பேர் எழுதினால் தேர்ச்சி பெறுவது வெறும் ஐம்பது பேர் தான். அதாவது நூற்றுக்கு ரெண்டு சதவீதம் பேர் தான் தேர்ச்சி பெறுகின்றனர். இது அவர்களை மனதளவில் மிகவும் வாட்டுகிறது.

இரண்டாயிரம் பேரில் ஐம்பது பேர்தான் தேர்வு பெறுகிறார்கள் எனில் மீதம் உள்ளவர்கள் முடிக்க எத்தனை வருடம் ஆகும் என யோசித்து பாருங்கள் ! மேலும் வருடா வருடம் புது மாணவர்கள் வேறு வந்த வண்ணம் இருப்பார்கள் !

இந்த மூன்று தேர்வுகளில் தேர்ச்சி பெறும் வரை அவர்கள் இந்தியாவில் தனியார் மருத்துவ மனைகளில் டியூட்டி டாக்டர் ஆக பணியாற்றுகிறார்கள். அந்த தேர்வு பாஸ் செய்த பிறகு தான் தனியே கிளினிக் வைக்கலாம்.

நீங்கள் ரஷ்யாவிலேயே மருத்துவராக இருப்பதானால் இந்தியாவில் நடக்கும் இந்த தேர்வுகள் எழுத தேவையில்லை.

ஆனால் படிக்க போகும் நம்மவர்கள் பெரும்பாலும் அங்கு செட்டில் ஆவதை விரும்புவதில்லையாம் ! திரும்ப இந்தியா வரவே விரும்புகிறார்களாம் !

அங்கு பாடங்களோ தேர்வுகளோ மிக எளிது என்று சொல்வதற்கில்லையாம். வழக்கமான மருத்துவ படிப்பை போல மிக கஷ்டப்பட்டு படித்து விட்டு பின் இங்கும் வந்து இவ்வளவு கடினமான தேர்வு முறை ஏன் என்பதே இவர்கள் அனைவரின் கேள்வியாக உள்ளது !

உங்களுக்கு தெரிந்த உறவினர் அல்லது நண்பர்கள் பிள்ளைகள் யாரேனும் மருத்துவம் படிக்க நினைத்தால், அவர்களுக்கு இந்த ரஷிய கோர்ஸ் பற்றி
சொல்லுங்கள். மேலதிக தகவல்கள் இணையத்தில் தேடினால் கிடைக்கிறது.

ரஷியாவில் MBBS முடித்து விட்டு இந்தியாவில் இந்த தேர்வுகளும் எழுதி பாஸ் ஆனவர்கள் MBBS என்று போட்டு விட்டு பிராகெட்டில் Moscow என்று போட்டிருப்பதை நீங்கள் கவனிக்கலாம் !

மருத்துவ நண்பர்கள் யாரேனும் இந்த பதிவை வாசித்தால் ரஷியாவில் படிக்கும் இந்த கோர்ஸ் பயனுள்ளதா, நம் இந்தியர்கள் படிக்கலாமா என அவசியம் பின்னூட்டத்தில் சொல்லுங்கள் !

பதிவர்கள் பங்கேற்ற சத்யம் டிவி நிகழ்ச்சி- வீடியோ

2012-05-12T11:27:00.001+05:30

நண்பர்களே சமீபத்தில் சத்யம் டிவியில் நண்பர் சிவகுமாரும் நானும் " கிரிக்கெட் மக்களுக்கு ஒரு நல்ல என்டர்டெயின்மென்ட் ஆக உள்ளதா அல்லது மக்களை மிகவும் பாதிக்கிறதா?" என்ற தலைப்பில் பேசியதன் வீடியோ வடிவம் இதோ

இது டிவி நிலையத்தில் எடுத்த வீடியோ அல்ல. வீட்டிலிருந்து காமிரா மூலம் டிவியில் வந்ததை எடுத்தது. எனவே தரம் சற்று சுமாராய் தான் இருக்கும். Memory Card-ல் இடம் இல்லாததால் முழுவதும் எடுக்க வில்லை. நான் பேசிய இடங்களாக பார்த்து வீடியோ எடுத்த என் குடும்பத்தினர் நல்ல வேளையாக நண்பர் சிவகுமார் பேசியதையும் ஒரு முறை எடுத்துள்ளனர் !

ஒவ்வொரு வீடியோவும் ஒன்று அல்லது இரு நிமிடங்கள் தான் வரும். எனவே நீங்கள் குறைந்த நேரத்திலேயே இந்த வீடியோக்கள் அனைத்தும் பார்த்து விடலாம் !

****

கிரிக்கெட் ஏன் மக்களை அதிகம் ஈர்க்கிறது?

*************
கிரிக்கெட் அனைத்து விளையாட்டுகளையும் dominate செய்கிறதா? மற்ற விளையாட்டுகளுக்கு அது எப்படி உதவுகிறது?

சிவா பேசிய சிறு வீடியோ இதோ

*****************

சச்சினுக்கு எம். பி பதவி தந்தது தவறு தான். ஏன்?

*******************
மின்சார பற்றாக்குறை இருக்கும் இந்நேரத்திலும் ஐ.பி. எல் போட்டிகளுக்கு மின்சாரம் தருவது அவசியமே !!

******************

போட்டிகளில் மேட்ச் பிக்சிங் எந்த அளவு சாத்தியம்?

*******************
சச்சின் நேர்மையான வீரரா? கிரிக்கெட் வீரர்கள் ஒரு ரோல் மாடலாக உள்ளனரா?

**********

ஐ.பி.எல் கொண்டாட்டம் - என்னா மாதிரி ஒரு பாக்கேஜ் !!

******************

கிரிக்கெட் ஆடாத நாடுகள் ...

நிகழ்ச்சி ஒளி பரப்பானது ஒரு மணி நேரம். பெரும்பாலும் நண்பர் சிவாவும் நானும் தான் பேசினோம். அதில் 15 நிமிடத்துக்கும் குறைவான அளவே இங்கு பகிர்ந்துள்ளோம். முழு நிகழ்ச்சி வீடியோ கிடைத்தால் நண்பர் சிவகுமார் பகிர்வார் என நம்பகிறேன்.

இந்த நிகழ்ச்சியில் பங்கு கொள்ள விரும்புவோர் நண்பர் செல்வினை 9444125010 என்கிற எண்ணில் தொடர்பு கொள்ளவும்

தஞ்சை- இனிய நினைவுகள்- ஏராள படங்கள்

2012-05-11T07:55:00.000+05:30

சமீபத்தில் தஞ்சை சென்ற போது சிறுவயது முதல் நான் சுற்றி திரிந்த மறக்க முடியாத பல இடங்களை காமிராவில் பதிவு செய்து வந்தேன். தஞ்சையில் சில காலமேனும் இருந்த யாருக்கும் இந்த இடங்கள் பல இனிய நினைவுகளை மீட்டு தரும் !
******
தஞ்சை பெரிய கோவில்...

கோவிலின் பிரம்மாண்டம் வியப்பாக, பச்சை புல்வெளி பார்த்து மகிழ, தரையில் நிழல் விழாத கோபுரம் பற்றிய கதை கேட்டு ரசிக்க .. பக்தியெல்லாம் தாண்டி மேற்சொன்ன விஷயங்களே நம்மை பெரிதும் கவரும் !
****************
பெரிய கோவிலுக்கு அருகே இருக்கும் ஆற்று பாலம். வருடத்தில் பாதி மாதங்களுக்கு மேல் தண்ணீர் இல்லாத பொழுதில் வறண்டு குப்பைகளுடன் காட்சி அளிக்கிறது. நீர் புரண்டு ஓடும் நேரத்தில் இதன் அழகே தனி !

****************
தஞ்சை பெரிய கோவிலின் முதல்/ வெளி கோபுரம்

***********
மருத்துவ கல்லூரி சாலையில் உள்ளது இந்த புனித லூர்து சர்ச். செம உயரமாக உள்ள இந்த சர்ச் மிக அழகாக இருக்கும். சர்ச்சை சுற்றி எவ்வளவு காலி இடம் !

**********

ராணி பேரடைஸ்:

தஞ்சையின் தற்போதைய சிறந்த தியேட்டர் என்று இதனை தான் சொல்கிறார்கள். சென்னைக்கு சத்யம் தியேட்டர் மாதிரி தஞ்சைக்கு ராணி பேரடைஸ். (ஒரே தியேட்டர் தான். சத்யம் மாதிரி காம்ப்ளக்ஸ் அல்ல)

**********
சிவகங்கை பூங்காவின் வெளிப்புறம் ! பூங்கா ஒரு காலத்தில் மிக அற்புதமாக இருந்தது. தற்போது மிக சுமாரான maintenance தான் !

**********
பழைய பேருந்து நிலையத்தை ஒட்டி அமைந்துள்ள இந்த அன்பு பால் நிலையம் எனக்கு தெரிந்து இருபது வருடத்துக்கும் மேலாக இருக்கிறது. பகலில் லஸ்ஸியும் இரவில் கற்கண்டு பாலும் விற்பார்கள். நின்றவாறே மிக பெரிய கூட்டம் குடிக்கும் இது போன்ற லஸ்ஸியை நான் வேறெங்கும் குடித்ததில்லை.

இவர்களே இரவில் கற்கண்டு பால் தயார் செய்வார்கள். இதற்கும் கூட்டம் அம்மும்.

***********
தஞ்சையின் மிக புகழ் பெற்ற இனிப்பு கடை பாம்பே சுவீட்ஸ் ! தஞ்சையில் ரயிலடி, பழைய பேருந்து நிலையம் அருகே, வினோதகன் ஆஸ்பத்திரிக்கு அருகே, மருத்துவகல்லூரி சாலை.. என பல இடங்களில் கிளைகள் கொண்டது. அசோகா அல்வாவும், சந்திரகலாவும் இக்கடையின் ஸ்பெஷாலிட்டிகள் ! நினைத்தாலே எச்சில் ஊறுகிறது !

************
நல்ல விஷயங்கள் மட்டுமே பேசினால் எப்படி? தஞ்சை மக்களை விட்டு பிரியும் ஒரு நினைவு சின்னத்தையும் சற்று பார்ப்போம். குமரன் தியேட்டர்...!

தஞ்சையில் இருபது வருடத்துக்கு முன்பே பத்துக்கும் மேற்பட்ட தியேட்டர்கள் இருந்தன. அவற்றில் எல்லாம் புது படம் ஓடும். அந்த தியேட்டர்களில் புது படம் எடுத்த, மறு நாளே குமரன் தியேட்டருக்கு வந்து விடும் ! தினம் மூன்று ஷோ சினிமா. மதிய ஷோவுக்கு பெண்கள் கூட்டம் தான் நிறைய வரும். (அப்போதெல்லாம் டிவி சீரியல்கள் அதிகம் இல்லை). டிக்கெட் விலை மிக குறைவு. இங்கு எத்தனையோ படங்கள் பார்த்துள்ளேன். இன்று தியேட்டர் மூடப்பட்டு அந்த இடம் பரிதாபமாக இருக்கிறது. அந்த இடத்தில் என்ன வர போகிறது என தெரிய வில்லை.

குமரன் தியேட்டர் நினைவாக சில படங்களும், அதன் இன்றைய நிலையும் இதோ...

***********
தஞ்சை திலகர் திடல். இந்திரா காந்தி, ராஜீவ் காந்தி தொடங்கி எம். ஜி. ஆர், கலைஞர், ஜெ , சோனியா என இங்கு பேசாத அரசியல் தலைவர்களே இல்லை. தஞ்சையின் மிக பெரும் அரசியல் கூட்ட மேடை இது ! நான் சென்ற போது அங்கு ஒரு கண்காட்சி நடந்து திடல் முழுதும் மூடியிருந்ததால் மைதானத்தை முழுதாய் படம் எடுக்க முடியலை

********
மருத்துவமனைகளுக்கும், டாக்டர்களுக்கும் மிக புகழ் பெற்றது தஞ்சை. பழைய பேருந்து நிலையம் அருகில் மட்டுமே நூற்றுக்கும் மேற்பட்ட டாக்டர் கிளினிக்குகள் உள்ளன. அங்குள்ள ஒரு பில்டிங்கில் எத்தனை டாக்டர்களின் போர்டுகள் .....பாருங்கள் !

****

பழைய பஸ் ஸ்டாண்டை ஒட்டியுள்ள ஏராள பழ கடைகள்.

*********
தஞ்சையின் பழம் பெரும் தியேட்டர் இது. பெயர்: திருவள்ளுவர். நண்பர்கள் தீபாவளிக்கு முதல் நாள் இங்கு போடும் "மஜாவான" படத்தை அவசியம் பார்ப்பார்கள். போலிஸ் தொந்தரவு இன்றி நிறைய சீன் அன்றுதான் காட்டுவார்கள் என்பது அவர்கள் அனுபவம் (மீ ..போனதில்லை. நம்புங்கோ)

திருவள்ளவர் திரையரங்கு உள்ளே நூற்றுகணக்கான டூ வீலர் நிற்க " சினிமாவுக்கு இவ்வளவு கூட்டம் வருதா என ஆர்வமாய் விசாரித்தேன். உள்ளே உள்ள காலி இடத்தை டூ வீலர் ஸ்டாண்ட் ஆக்கி வெளி ஆட்களும் வண்டியை இங்கு விட்டுவிட்டு போகிறார்களாம் ! அதான் அவ்ளோ வண்டி நிக்குது !
************
மருத்துவ கல்லூரி சாலையில் உள்ளது இந்த ஆபிரஹாம் பண்டிதர் கார்டன். ஒரு டாக்டரின் இல்லம் இது ! உள்ளே பெரிய கார்டன் ஒன்று அந்த வழியே செல்லும் அனைவரையும் ஈர்க்கும்

*****
தஞ்சை ரயில் நிலையத்திலிருந்து சற்று தொலைவில் ராஜராஜன் தியேட்டர் அருகில் உள்ளது இந்த ஆஞ்சநேயர் கோவில். சாலையிலேயே இருக்கும் சிறிய கோயில் எனினும், சனிக்கிழமையில் மிக அதிக கூட்டம் வரும். சக்தி வாய்ந்த, வேண்டுதலை நிறைவேற்றும் கடவுள் என பலராலும் நம்பப்படும் கோயில் இது

*****************

தஞ்சை ஆற்று பாலமும் கடை வீதியும்

**************

ஞானம் தியேட்டர் இருந்த இடம் இப்போது ஞானம் ஹோட்டல் ஆகி விட்டது. இங்கு ஒரு சூப்பரான சிலோன் பரோட்டா கடையும் முன்பு இருக்கும். இப்போது இல்லை :((

ஞானம் தியேட்டர் ...இப்போது ஞானம் ஹோட்டல்

*****
தஞ்சாவூரு மல்லியும் கனகாம்பரமும் ...

தஞ்சை கலை பொருட்களுக்கு புகழ் பெற்ற பூம்புகார் கைவினை பொருட்கள் விற்பனை நிலையம்

************
நிறைவாக தஞ்சையில் எனக்கு மிக பிடித்த ஹோட்டலான சாந்தி பரோட்டா கடை.

இங்கு பல படங்களும் வீடியோவும் கூட எடுத்தேன். அவை சாந்தி பரோட்டா பற்றி தனி பதிவாக வெளியாகும் !

லட்சுமி சீவல் நிறுவனத்தில் சீவல் தயாரிப்பு, தஞ்சை அரண்மனை, சரஸ்வதி மகால், தலை ஆட்டி பொம்மை தயாரிப்பு என தனி தனி பதிவுகள் தயார் ! ஒவ்வொன்றாக வெளியாகும் நண்பர்களே.. காத்திருங்கள் !

தொடர்புடைய பதிவுகள்:

தஞ்சையின் மறக்க முடியாத இடங்கள்

வானவில்: தஞ்சை ஸ்பெஷல்

சொத்தை ஏமாற்றும் அண்ணன்- சட்ட தீர்வு என்ன?

2012-05-10T09:31:00.000+05:30

கேள்வி : ரவி, செங்கல்பட்டு

எனது தந்தை தற்போது உயிரோடு இல்லை. இறக்கும் முன் அவரது சொத்துக்கள் அனைத்தும் எனது அண்ணனுக்கும் எனக்கும் சரி பாதியாக சேரவேண்டும் என உயில் எழுதி வைத்து விட்டார். ஆனால் எனது அண்ணன் சொத்துக்கான அனைத்து பத்திரங்கள் மற்றும் லீகல் ஹேர் சர்டிபிகேட் உட்பட அனைத்தையும் தான் வைத்து கொண்டு, எனக்கு அவற்றின் நகலை கூட தர மறுக்கிறார். நான் என் தந்தையின் லீகல் ஹேர் சர்டிபிகேட் இன்னொரு காப்பி வாங்க முடியுமா? எனது அண்ணன் வெளி நாட்டில் வேலை செய்கிறார். தற்போது இந்தியா வந்துள்ளார். சொத்தில் எனக்கும் எல்லா உரிமையும் இருந்தும், எனக்கு சரி பாதி சொத்தை தர மறுக்கும் அண்ணனிடம் எப்படி சொத்தை கேட்டு வாங்குவது? இந்த விஷயத்தில் என்னிடம் எந்த கோப்புகளும் இல்லாமல் என்னால் வழக்கு தொடர முடியுமா?

பதில்:

கிராமத்தில் ஒரு பழமொழி சொல்வார்கள். “ஐந்து வயது வரை அண்ணன்-தம்பி; பத்து வயதில் பங்காளி ” என்று. எத்தனை அண்ணன் – தம்பிகளிடையே பங்காளி சண்டை வந்து சொத்துக்காக நீதி மன்றம் வருகிறார்கள் என்பது வழக்கறிஞர்களுக்கும் நீதிமன்றத்தில் பணி புரிவோருக்கும் தான் தெரியும்.

உங்கள் விஷயத்தில் உங்களுக்கு எல்லா உரிமைகள் இருந்தும், அண்ணன் உங்களுக்கு சொத்தை தர மறுக்கிறார். தவறு முழுதும் அவர் மீது தான். இவ்விஷயத்தில் நீங்கள் சொத்தை பிரித்துத் தருமாறு உங்கள் அண்ணன் மீது ” பார்டிஷன் சூட் ” (Partition Suit) போட வேண்டும். இந்த வழக்கு தொடர, சொத்து சம்பந்தமான தாக்கீதுகள் கூட தேவையில்லை.

உங்கள் பெயர், நீங்கள் வசிக்கும் முகவரி இவை இரண்டுக்குமான அடையாளங்கள் ( ரேஷன் கார்ட் போன்ற போட்டோ ஐடன்டிடி கார்ட் மற்றும் வீட்டு விலாசம் காட்டும் ஒரு தாக்கீது ) இவை இருந்தாலே போதும். உங்கள் அண்ணன் எல்லா முக்கிய தாக்கீதுகளையும் தன் வசம் வைத்துக் கொண்டு இருப்பதால் உங்களால் அவற்றின் நகலை கூட சமர்ப்பிக்க முடியவில்லை என வழக்கில் சொல்லலாம். பிரச்சனை இருக்காது.

உங்கள் சொத்து எங்கு இருக்கிறதோ அந்த எல்லைக்குட்பட்ட சிவில் நீதிமன்றத்தில் (சொத்தின் மதிப்பை பொறுத்து முன்சீப் அல்லது மாவட்ட நீதிமன்றத்தில்) வழக்கு தொடரவேண்டும்.

அண்ணன் மீது வழக்கு தொடர யோசனையாக இருந்தால் இருவருக்கும் பொதுவான பெரியவர்கள் மூலமாக பேசிப் பாருங்கள். அதிலும் அவர் சரி வரவில்லையெனில் வழக்கு தொடர்வதைத் தவிர வேறு வழி இல்லை.

அவர் வெளிநாட்டில் உள்ளார் என்கிறீர்கள். இதனை நீதிமன்றத்தில் கூறி அவர் வெளிநாடு செல்வதற்குள் இடைக்கால உத்தரவு ( Interim Order ) வேண்டும் என கேட்டு வாங்கலாம். இப்படி வழக்கு இருக்கும் போது , வெளிநாடு செல்வது பிரச்சனையாகும் என்பதால் உங்கள் அண்ணன் இறங்கி வர வாய்ப்பிருக்கிறது

ஒரு விஷயம் நினைவில் வைத்துக் கொள்ளுங்கள். உங்களை ஒருவர் கஷ்டப்படுத்துகிறார். ” நீங்கள் செய்வது என்னை கஷ்டப்படுத்துகிறது” என நீங்கள் எதோ ஒரு விதத்தில் அவருக்கு தெரிவிக்க வேண்டும். அப்போது தான் அவருக்கு உரைக்கும். மாறாக நீங்கள் பேசாமல் இருந்தால் “உங்கள் உரிமைகளை மறந்து நீங்கள் தூங்கி விட்டீர்கள் “You have slept over your rights” என்று நீதிமன்றம் பின்னாளில் உங்கள் வழக்கை எடுத்துக் கொள்ளாமல் போகவும் வாய்ப்புண்டு.

மீண்டும் சொல்கிறேன்: இருவருக்கும் பொதுவான பெரியவர்கள் மூலம் பேசிப் பாருங்கள். அதில் அவர் வழிக்கு வராவிடில் விரைவில் வழக்கு பதிவு செய்யுங்கள் !
************
கேள்வி: சரண்

எனது தாத்தாவின் விவசாய நிலத்திற்கான கிரய ஆவணம் 1981ம் ஆண்டில் பதிவுபெற்ற ஆவணமாக உள்ளது. அவர் 1987ல் காலமாகிவிட்டார்.எனது தாயார் மட்டுமே ஒரே வாரிசு. இந்நிலையில் 1985ம் ஆண்டு UDR என்னும் நில உடமை பதிவு மேம்பாட்டு திட்டம் செயல்பாட்டில் எனது தாத்தாவின் பெயரில் பட்டா வழங்காமல் அதே ஊரைச் சேர்ந்த வேறு ஒரு நபருக்கு UDR பட்டா கொடுக்கப்பட்டுள்ளது. அவர் அதை வைத்து பட்டா, சிட்டா, அடங்கல் போன்ற வருவாய் ஆவணங்களை ஏற்படுத்திக்கொண்டு, அவருக்கு இந்த பட்டா மூலம் அனுபவப்பாத்தியமும் கிடைக்கப்பெற்றுள்ளதாக நீதிமன்றத்தில் தவறான முறையில் அளித்து PERMANENT INJUNCTION ORDER ஐ பெற்றிருக்கிறார்.

உண்மையில் UDR பட்டா தவறான முறையில் வழங்கப்பட்டதாகும். இப்போது நீதிமன்றமும் அவர்களுக்கு INJUNCTION ORDER ஐ கொடுத்துவிட்டது. தற்போது இந்த வழக்கு எங்களுக்கு எதிராக முடிந்து 11 வருடங்களாகியும் எங்களது வழக்கறிஞர் 2வது மேல்முறையீட்டினை தாக்கல் செய்யாமல் ஏமாற்றியுள்ளார். எனது தகப்பனாரும் தாயும் படிப்பறிவில்லாதவர்கள். UDRக்கு முன்பு வரை இந்நிலம் எனது தாத்தா கிரயம் பெற்ற நபரிடம் தான் இருந்துள்ளது.

இவற்றிற்கான தீர்வு தான் என்ன? தயவுசெய்து எனது தாத்தாவின் விவசாய நிலத்தை மீட்டெடுக்க உதவிசெய்யுங்கள்…. நான் மிகவும் சாதாரணமான நடுத்தர வர்க்கம். எனக்கு நீதி கிடைக்க வேண்டும்.

பதில்:

” UDR என்கிற ஸ்கீம் தற்போது இல்லை. கிரைய பத்திரத்தை கணக்கில் எடுக்காமல் UDR ஐ வைத்து பட்டா கொடுத்தது தவறு. உங்கள் பக்கம் நியாயம் உள்ளது எனில் இந்த சொத்தை உங்கள் தாயார் திரும்ப பெறலாம்.

ஏற்கனவே ஒரு வழக்கு நடந்ததாக சொல்கிறீர்கள். அதன் பேப்பர்களையும் பார்க்க வேண்டும்
நீங்கள் இது பற்றி சம்பந்தப்பட்ட தாசில்தாரிடம் ஒரு மனு தரலாம். அதில் உங்கள் எதிராளிக்கு தவறான முறையில் பட்டா தரப்பட்டுள்ளது. உண்மையில் அதற்கு சொந்தக்காரர் உங்கள் தாயார்தான் என்றும், அந்தப் பட்டாவை நீக்கக் கோரியும் எழுத வேண்டும். ஒரு வேளை தாசில்தார் உங்களுக்கு எதிராகச் சொன்னாலும் கூட, அதனை எதிர்த்து கோர்ட்டில் வழக்கு தொடரலாம். அப்போது கோர்ட் யாருடைய Title documents சரியாக உள்ளதோ அவருக்குத் தான் சொத்தின் மீது உரிமை உண்டு என்று தீர்ப்பு கூறும்.

இன்னொரு வழி சொத்து உள்ள அதே ஏரியாவில் இருக்கும் மாவட்ட நீதிமன்றத்தில் உங்கள் எதிராளிக்கு வழங்கப்பட்ட பட்டா சரியானதல்ல ( Null and void) என வழக்கு தொடரலாம்".
*********
வல்லமை ஏப்ரல் 30 தேதியிட்ட இதழில் வெளியானது

*********
நண்பர்களே சட்டம் குறித்த உங்கள் கேள்விகளை பின்னூட்டத்திலோ, snehamohankumar@yahoo.co.in என்கிற மெயிலுக்கோ எழுதுங்கள்.

வானவில் 87: நடிகர் கார்த்தி- பதிவர் சந்திப்பு -பாலஹனுமான்

2012-05-09T07:34:00.000+05:30

டிவி கார்னர் : கார்த்தி பங்கேற்ற நீங்களும் வெல்லலாம் 1 கோடி

நடிகர் கார்த்தி நீங்களும் வெல்லலாம் ஒரு கோடியில் விளையாடினார்.

கடைசி பசங்க எல்லாருமே மிக குறும்பா, செம ஜாலியா இருக்காங்க பாத்துருக்கீங்களா (ஹிஹி மீ டூ கடைசி பிள்ளை) .

கார்த்தியை ஒரு நடிகராக மிக பிடிக்க ஆரம்பித்துள்ளது ! குறிப்பாக காமெடி காட்சியில் செம டைமிங் ! ஜாலியான நடிப்பு இயல்பாய் வருது. வெளியாகும் படங்களில் 10 சதவீதம் மட்டுமே ஓடும் நிலையில் கார்த்தியின் படங்கள் பெரும்பாலும் நன்கு ஓடுவது ஆச்சரியம் ! இனி ஒரு சில தோல்விகள் வரும். அதிலிருந்து கார்த்தி எப்படி எழுகிறார் என பார்க்கணும் !

சினிமாவை தாண்டி கார்த்தியிடம் பிடித்த விஷயம் மனதில் தோன்றுவதை தெளிவாக, அழகாக பேசி விடுகிறார். இந்நிகழ்ச்சி வியாழன் அன்று முடிந்து " திங்கள் சந்திப்போம்" என சூர்யா அறிவித்த போது செட்டில் இருந்த அனைத்து பெண்களும் கார்த்தியிடம் ஓடி வந்து விட்டனர். அருகிலிருந்த சூர்யாவை யாரும் கண்டு கொள்ளாததால், சூர்யா சும்மாவே நின்றார் ! கலகலவென பேசும் கார்த்தி நடத்தியிருந்தால் நிகழ்ச்சி இன்னும் களை கட்டியிருக்கும் போலும் !

பதிவர் சந்திப்பு - 1

பதிவர் கார்த்திகை பாண்டியன் தன் திருமண பத்திரிக்கை வைக்க நண்பர்களை அழைத்திருந்தார். அழைத்த இடம் - மடிப்பாக்கம் . எங்க ஊரு ! விதூஷ் அவர்களின் பள்ளியில் தான் சந்திப்பு. நானும் விதூஷிடம் சில முறை உங்கள் பள்ளிக்கு வருகிறேன் என்று சொன்னேனே அன்றி இதற்கு முன் போனதில்லை.

படம்: நன்றி : கண்ணன் ராமசாமி

பதிவர்கள் பால பாரதி, மணிஜி, செ.சரவண குமார், கண்ணன் ராமசாமி, குட்டி டின், மதார் , ரோமியோ, மேவி என பலரும் வந்திருந்தனர். நான் செல்ல சற்று முன் தான் பதிவர் வித்யா (Scribblings ) வந்து சென்றிருந்தார்.

சீனியர் பதிவர் பாலபாரதி செம சுவாரஸ்யமாக பேசுகிறார். பல கவிதைகள் மனப்பாடமாய் சொல்கிறார்.

கண்ணன் ராமசாமி வெளி நாட்டிலிருந்து சென்னைக்கே வந்து விட்டார் என்று இப்போது தான் தெரிந்தது.

சரவணகுமார் நமது ப்ளாக் பற்றி " Blogging-ன்னா என்ன செய்யணுமோ அதை வீடுதிரும்பலில் சரியா செய்றீங்க. இப்படி தான் இருக்கணும் ஒரு ப்ளாக்" என்றது மிக நிறைவையும் மகிழ்வையும் இருந்தது. இதே கருத்தை அங்கிருந்த மற்றவர்களிடமும் அவர் சொன்னதற்கு நன்றி !

கார்த்திகை பாண்டியன் திருமண பத்திரிக்கை மிக அழகு. மே 31 அன்று திருமணத்துடன் சேர்த்து மதுரையில் பெரிய பதிவர் சந்திப்பு நடக்க கூடும் ! பின்னே? நம்ம பதிவர்கள் கூகிள் பிளஸ்சில் போட்டாலே ஈகோ பார்க்காம வந்துடுவாங்க. நேரில் வேற பத்திரிக்கை தந்துட்டா கேட்கணுமா !

பதிவர் சந்திப்பு - 2

டில்லியிலிருந்து சென்னை வந்த பதிவர்கள் வெங்கட் நாகராஜ், கோவை2தில்லி, ரோஷிணி ஆகியோர் எங்கள் இல்லம் வந்திருந்தனர். மன்னை மைனர் RVS- அவர்களை வழியிலேயே மடக்கி தங்கள் வீட்டுக்கு கடத்தி போனார். பின் அவர்களை தம் பெண்களுடன் எங்கள் இல்லம் அழைத்து வந்தார்.

வெங்கட் குடும்பத்தில் மூன்று பதிவர்கள்,RVS , நான் என மினி பதிவர் சந்திப்பு நடந்தது. வானத்துக்கு கீழே உள்ள பல்வேறு விஷயங்கள் பற்றியும், தன் கருத்தை எடுத்துரைத்த RVS, திடீரென பிரேக் விட்டு" நானே பேசுறேன்.. நீங்க எல்லாம் கொஞ்சம் கொஞ்சம் பேசுங்க" என்றார். எவ்ளோ நல்ல மனசு !!

பதிவர்கள் யாரும் இதுவரை நம்ம ஹவுஸ்பாசை சந்தித்ததில்லை. முதல் முறை சந்தித்தது இவர்களே ! ஹவுஸ் பாஸிடம் " உங்களை ரொம்ப ஓட்டுறாரே.. நீங்க இவர் ப்ளாக் படிக்கிறதில்லையா? " என்றார் ஒருவர் ! டாபிக் மாறியதால் தப்பி விட்டேன்.

RVS-தான் தைரியமாய் நாட்டியை கையில் தூக்கினார். ரோஷிணி கிளிகள் அருகில் போகாவிடினும் ஆச்சரியத்துடனும் பயத்துடனும் தூர இருந்து பார்த்தவாறே இருந்தாள். RVS பெண்கள், என் பெண்ணுடன் கார்ட்ஸ் விளையாட ஆரம்பித்து விட்டனர்.

வெங்கட் விரைவில் சென்னைக்கு மாறுதல் ஆக கூடும் என்பது இந்த சந்திப்பில் கிடைத்த நல்ல செய்தி.

பதிவர் பக்கம்: பாலஹனுமான்

பாலஹனுமான் என்கிற நண்பர் தனது ப்ளாக்கில், தான் வாசித்த பதிவுகளில் பிடித்தவற்றை ஒரிஜினல் லிங்குடன் பகிர்கிறார். சுஜாதா இவருக்கு பிடித்த எழுத்தாளர் என்பதால் சுஜாதா பற்றி எங்கெங்கு வந்த கட்டுரைகளும் (வீடுதிரும்பலில் வந்தவை உட்பட) அவர் ப்ளாகிலும் மறுபடி பப்ளிஷ் செய்துள்ளார். போலவே ஜென்சி பாடல்கள் போல நம் ப்ளாகில் அவருக்கு பிடித்த இன்னும் சில பதிவுகளும் அங்கு வந்துள்ளது.

ஒரு மனிதன் எழுதுவதற்கு முக்கிய காரணங்களில் ஒன்று, தான் எழுதுவதை நிறைய பேர் படிக்க வேண்டும் என்பது தான். நமது பதிவு அங்கு பகிரப்படும் போது, பால ஹனுமான் ப்ளாகை தொடர்ந்து வாசிப்போர் வாசிக்கவும், அது பற்றி கமன்ட் எழுதவும் செய்கிறார்கள். அவரது ப்ளாகை பாருங்கள். அதில் பாலஹனுமானின் ரசனை தெரியும். ஒருவேளை அவருக்கு பிடித்த உங்கள் பதிவும் கூட இருக்கலாம்... Of course உங்கள் பெயரோடு !

சினிமா பாடல் புதிர்

"வேணாம் மச்சான் வேணாம் இந்த பொம்பளை காதலு " - இது ஒரு கல் ஒரு கண்ணாடியில் செம ஹிட்டான பாட்டு. ஹாரிஸ் இந்த பல்லவியின் டியூனை, ரொம்ப சிரமப்படாமல் தனது வேறொரு பாடல் பல்லவியில் இருந்து தான் சுட்டிருக்கிறார். எந்த பாட்டின் பல்லவியில் இருந்து சுட்டிருக்கிறார் தெரியுமா? தெரிந்தால் பின்னூட்டத்தில் சொல்லுங்கள் !

ஐ.பி. எல் கார்னர்

மும்பை சென்னையை கடைசி மூணு பந்தில் 6,4,4 என அடித்து ஜெயித்த மேட்ச், Match Fixing உயிருடன் உலவுகிறது என்பதை நினைவூட்டியது. அது வரை நன்கு பந்து பேசியவர் பின் எப்படி கடைசி பந்துகளில் புல் டாசாக வீசி தள்ள வேண்டும்?

டில்லி, கொல்கத்தா, மும்பை ஆகிய மூன்று மெட்ரோ சிட்டிகளும் நிச்சயம் Playoff சென்றுவிடும் என்று நினைக்கிறேன். (மும்பை 5 மேட்ச்சில் இன்னும் 2 ஜெயித்தால் போதும்!) Playoff செல்ல வாய்ப்பே இல்லாத அணிகள் ஹைதராபாத், பஞ்சாப் மற்றும் புனே ஆகியவை (இந்த மூன்றும் கடைசி நான்கிற்குள் தான் வரும் என்பதை டோர்னமென்ட் துவங்கும் போதே நாம் இங்கு ஊகித்திருந்தோம்)

பெங்களூரு அல்லது ராஜஸ்தான் Playoff செல்லும் நான்காவது அணியாக இருக்கும். சென்னைக்கு Playoff செல்லும் வாய்ப்பு மிக மிக குறைவே ! மீதமுள்ள நான்கு மேட்சிலும் வென்றால் தான் Playoff-க்கு தேவையான 18 பாயிண்டுகள் கிடைக்கும். மூன்றில் ஜெயித்தால் (அதுவே கஷ்டம்) மற்ற முடிவுகள் பொறுத்து அதன் அதிர்ஷ்டம் அமையும். மும்பை, பஞ்சாப், புனே ஆகிய மூன்று அணிகளுடன் ஜெயிக்க வேண்டிய மேட்சை தோற்ற சென்னை அடுத்த கட்டத்துக்கு செல்ல தகுதி இல்லாத அணியாக இம்முறை திகழ்கிறது என வருத்தத்தோடு சொல்ல வேண்டி உள்ளது !

டூர் போகிறார் அய்யாசாமி

வரும் திங்கள்கிழமை முதல் அய்யாசாமி பத்து நாள் பயணமாக டில்லி, ஆக்ரா, சிம்லா, குளு மணாலி போகிறார். சென்னைக்கு பக்கத்திலே இருக்க காஞ்சிபுரம் போனாலே ஏழெட்டு பதிவு போட்டு கொல்லுவார் ! பத்து நாள் டூருன்னா, திரும்ப வந்து எவ்ளோ பந்தா விடுவாரோ தெரியலை !

எல்லாத்துக்கும் நீங்க தான் காரணம் .. இந்த ஆளு எழுதுற பயண கட்டுரை எல்லாம் நல்லா இருக்குன்னு ஏத்தி விட்டு, ஏத்தி விட்டு, நீங்க சும்மா தான் சொல்றீங்கன்னு தெரியாம இப்ப பத்து நாள் டூருக்கு வந்து நிக்குறார் !

நீண்ட நாள் டூர் என்பதால் "பத்து நாளும் பதிவு இல்லையா?" ன்னு அய்யாசாமியிடம் கேட்ட போது "முப்பது .. நாப்பது பதிவு Drafts -ல் கிடக்குது. (எப்பவும் இதே தான் சொல்வார். நோ Change).. அதனால பதிவு போடுறது பிரச்சனை இல்லை. நடுவில இன்டர்நெட் செண்டர் போக நேரம் கிடைச்சா பதிவு வெளியிட்டுடலாம். அதுக்கு வாய்ப்பு குறைவு என்பதால் இந்த பத்து நாளும் பதிவு கொஞ்சம் கம்மியா தான் வரும்". க்கும். இந்த பந்தாவுக்கு ஒண்ணும் குறைச்சல் இல்லை !

வாழ்த்தி வழியனுப்பி வைப்போம் அய்யாசாமியை (வேற வழி??)

சுஜாதாவின் வஸந்த் வஸந்த் - விமர்சனம்

2012-05-08T08:30:00.000+05:30

சுஜாதா எழுதி எண்பதுகளின் துவக்கத்தில் கல்கி வார இதழில் வந்த நாவல் வஸந்த் வஸந்த். வெளி வந்த போதே வாசித்துள்ளேன். ஒவ்வொரு அத்தியாயம் முடியும் போதும் சுஜாதா வைக்கும் சஸ்பென்ஸ் செமையாக இருக்கும் ! உயிர்மை பதிப்பு நூலாக பல ஆண்டுகளுக்கு பிறகு இதனை இப்போது மீண்டும் வாசித்தேன். இத்தனை ஆண்டுகளுக்கு பின்னும் முதலில் வாசித்த போது கிடைத்த அதே உணர்வுகள் ..! வாத்தியார் வாத்தியார் தான் !

2005-ல் எழுதிய முன்னுரையில் சுஜாதா இப்படி சொல்கிறார்:

"வஸந்த் முதலில் கதையில் தோன்றி முப்பது ஆண்டுகள் ஆகிறது. இருவருக்கும் இன்னும் கல்யாணம் ஆக வில்லை. வஸந்த் பெண்களை பார்த்தால் சற்று அசடு வழிவதோடு சரி (நாம் எல்லோருமே தானே!) "

அட ! சுஜாதாவே பெண்களை பார்த்தால் வழிவாரா என்கிற ஆச்சரியத்துடன் வாங்க கதைக்குள் போவோம்..!

கதை

இனியா என்கிற பெண்ணை காதலிக்கிறான் வஸந்த். இனியாவின் தந்தை ஒரு வரலாற்று பேராசிரியர். அவர் எழுதிய ஒரு ஆராய்ச்சி கட்டுரையை கடத்தி போகிறது ஒரு கூட்டம். அந்த கட்டுரை வேண்டும் என அவர் சொன்னதால் அதை தேடி போகின்றனர் வஸந்தும் கணேஷும்.

அந்த கட்டுரையில் ராஜராஜன் கிணறு பற்றி எழுத பட்டுள்ளது என அறிந்து அந்த கிணறு இருக்கும் உக்கல் என்கிற கிராமத்துக்கு செல்கின்றனர் கணேஷ் & வஸந்த். அங்கு வினோதமான பல அனுபவங்கள் கிட்டுகின்றன. கிணற்றில் புதையல் உண்டா, தங்க காசுகள் உண்டா என்கிற கேள்வி எல்லாம் தாண்டி, அந்த கிணற்றின் நீருக்காக தான் அவ்வளவு போராட்டம் என்பது தெரிகிறது. அப்படி என்ன அந்த நீரில் விசேஷம், அதை வைத்து என்ன செய்கிறார்கள் வில்லன்கள் என்பது கதையின் இறுதியில் தெரிகிறது.

நாவலின் இறுதியில் இனியா அமெரிக்க மாப்பிள்ளையை மணக்க சம்மதிக்க, வஸந்த் அடுத்த காதலுக்கு தயார் ஆகிறார் !

கிணறு குறித்த அந்த சஸ்பென்ஸ் செமையாக உள்ளது. அது என்ன என அறியும் ஆவலிலேயே பக்கங்கள் பறக்கின்றன. அது தெரியும் போது நமக்கே வியப்பாக தான் உள்ளது

வஸந்த் ஸ்டைல் குறும்புகள் சில :

"என்னமா எழுதிருக்கார் மகாகவி பாரதி. தலைப்பாவை விலக்கி தலையை தடவி கொடுக்கணும் போல இருக்கு பாஸ் "

" என் பேரு ரங்காச்சாரி. சமீபத்தில் தமிழ் நாட்டில் ஜாதி பேர் கூடாதுன்னதால் ரங்கா. வீட்டில் கூப்பிடுறது '...ங்கா' "

ஆங்காங்கு சுய எள்ளலும் உண்டு " வர வர சுஜாதா கதை நிறைய படிக்க ஆரம்பிசிட்டீயா நீ? ". இன்னொரு இடத்தில் " வேண்டாம் அந்த வார்த்தை சொல்லாதே தொடர் கதையை பாதியில் நிறுத்திடுவாங்க"

நூலகம், மருத்துவமனை என தான் போகும் இடமெல்லாம் பெண்களிடம் கடலை போடுவதும், தன் நகைச்சுவை பேச்சால் பெண்களை கவர்வதும் என வஸந்த் எப்போதும் போல் வசீகரிக்கிறார்.

அரிதாக இந்த கதையில் வஸந்துக்கு கல்யாணம் என்றும், பிறிதோர் இடத்தில வஸந்த் துப்பாக்கியால் சுடப்பட்டு இறக்க போவதாகவும் சொல்கிறார். இரண்டுமே நடக்க வில்லை. (வஸந்த் இறக்க போகிற மாதிரி ஒரு வாரம் முடித்த போது " வஸந்தை கொன்று விடாதீர்கள்" என பலரும் தந்தி அடித்ததாக சுஜாதா சொன்னது.. நீங்களும் அறிந்திருக்கலாம்)

சோடியம் ஹைட்ராக்சைட் , சோடியம் மானோ சல்பேட் என அறிவியலுக்குள் சென்று விளக்கும் போதும், எளிமையாக சுவாரஸ்யமாக சொல்வதில் தான் சுஜாதா நிற்கிறார்.

26 அத்தியாயங்கள் கொண்ட இக்கதையை இரண்டரை மணி நேரத்தில் படித்து முடித்தேன். செம விறுவிறுப்பு !

கணேஷ் -வஸந்த்தின் துப்பறியும் நாவலை சுஜாதாவின் வழக்கமான பாணியில் வாசிக்க விரும்பினால் அவசியம் வாசியுங்கள் !

************
நூல்: வஸந்த் வஸந்த்

ஆசிரியர்: சுஜாதா

வெளியீடு : உயிர்மை பதிப்பகம்

பக்கங்கள்: 176

விலை: ரூ. 100
நன்றி : பதிவர் ரகு

************

திண்ணை ஏப்ரல் 22 , 2012 இதழில் வெளியானது

வழக்கு எண் 18 /9 : வழக்கறிஞர் விமர்சனம்

2012-05-07T08:55:00.000+05:30

வழக்கறிஞர் அய்யாசாமி வழக்கு எண் 18 /9 பார்த்து விட்டு, நமக்காக தரும் ஸ்பெஷல் விமர்சனம் இதோ:

பாலாஜி சக்திவேல், தமிழில் சமூக பொறுப்புள்ள ஒரு சில இயக்குனர்களில் ஒருவர். "காதல்" என்கிற படம் பள்ளி மாணவர்கள் காதலை சொல்கிறதே என சிறு வருத்தம் இருந்த போதும், ஒரே பாடலில் அவர்கள் பணக்காரர்கள் ஆகி விடவில்லை. மாறாக அந்த வயதில் காதலித்து, வீட்டை விட்டு ஓடினால் என்ன விளைவுகள் வரும் என்று வலியுடன் சொன்னது. காதலிக்கும் பள்ளி மாணவிகளை சற்றேனும் யோசிக்க வைக்கும் அளவில் தான் இருந்தது அப்படம்.

வழக்கு எண் 18 /9 கூட பள்ளி காதல் பற்றி பேசுகிறது. ஆனால் இம்முறை பள்ளி மாணவர்கள் செய்யும் அக்கிரமங்களை தோலுரிக்கிறது. இந்த விதத்தில் பள்ளி மாணவிகள் அவசியம் பார்க்க வேண்டிய படம் தான் !

அது என்ன வழக்கு எண் 18 /9 ? வழக்கு எண்ணை சொல்லும் போது முதலில் வருவது வழக்கின் சீரியல் எண். அடுத்து வருவது அந்த வழக்கு பதிவு செய்யப்பட வருடம். இந்த பட பெயரான வழக்கு எண் 18 /9 ஐ எடுத்து கொண்டால், வழக்கின் வரிசை எண் :18; வழக்கு பதிவு செய்யப்பட வருடம் 2009 என்பது புரியும் ! (ஓ ஓ இது தான் வழக்கறிஞர் டச்சா?)

கதை

ஜோதி என்கிற இளம் பெண் முகத்தில் தீ காயங்களுடன் மருத்துவமனையில் சேர்வதில் துவங்குகிறது படம். இதற்காக வழக்கு பதிவாகி, இன்ஸ்பெக்டர் குமரவேல் விசாரிக்க துவங்குகிறார். அந்த பெண்ணை ஒரு தலையாய் காதலித்த பிளாட் பார டீ கடை பையன் வேலு மீது சந்தேகம் வருகிறது. போலிஸ் அவனை விசாரிக்க, அவனது கதை விரிகிறது.

அடுத்த பகுதியில் ஜோதி வேலை பார்த்த வீட்டில் உள்ள பணக்கார பள்ளி மாணவி ஆர்த்தி தன் கதையை பகிர்கிறாள். அவளோடு நட்பாக பழகி, ஏமாற்றி அவளை வீடியோவில் படமெடுக்கிறான் பணக்கார சிறுவன் தினேஷ். அவனது நிஜ குணம் தெரிந்து ஆர்த்தி விலக, அவளை பல விதத்திலும் கொல்ல முயல்கிறான் தினேஷ். ஆர்த்தி மீது ஊற்றுவ தாய் நினைத்து தவறுதலாய் வேலைக்கார பெண் மீது ஆசிட் ஊற்றி விடுகிறான் தினேஷ்.

போலிஸ் பணம் இருக்கும் பக்கம் சாய்ந்து ஏழை பையன் வேலுவை குற்றவாளியாக்க முயல்கிறது . முடிவு என்ன என இங்கு சொன்னால் சுவாரஸ்யம் போய் விடும். வெண் திரையிலோ சில மாதங்களில் சின்ன திரையிலோ பாருங்கள் !

படத்தின் முதல் பாதியில் பிளாட்பார கடையில் வேலை பார்க்கும் வேலுவின் கதையே பெரிதும் சொல்ல படுகிறது. இப்பகுதி ரொம்ப சுமார் தான் ! ஐம்பது நிமிடத்தில் முதல் பாதி முடிந்து விடுகிறது. " புதுசாய் ஒண்ணும் இல்லையே .. வழக்கமான காதல் கதை" போல தானே இருக்கு என நினைத்தவாறு மீண்டும் வந்து அமரும் போது தான், பிற்பாதியில் நம்மை திடுக்கிடவும், நெகிழவும், கோபப்படவும், அழவும் வைக்கிறார் இயக்குனர்.

எத்தனையோ முறை " இளம் பெண் மீது ஆசிட் வீச்சு" என செய்தி தாளில் வாசித்து விட்டு பின் மறக்கிறோம். ஆனால் அவர்களுக்கும் ஒரு வாழ்க்கை உண்டு என்பதையும் அவர்கள் உலகை எப்படி எதிர் கொள்கிறார்கள் என்பதையும் முதல் முறை திரையில் இப்படம் மூலம் காண்கிறோம் .

அனைவரும் புதுமுகங்கள் என்பதால் பாத்திரங்களுடன் நம்மால் எளிதாக ஒன்ற முடிகிறது.

இது படத்தில் வரும் காட்சியல்ல

படம் முடியும் போது நம் மனதில் பெரிதும் நிறைபவர் ஆசிட் வீசப்பட்ட பெண்ணான ஜோதி (ஊர்மிளா) தான். வட நாட்டில் பிறந்த வசதியான இந்த பெண்ணை ஒரு நிஜ வேலைக்கார பெண் போல ஆக்கிய இயக்குனருக்கு ஷொட்டு ! அதிகம் பேசாத, அமைதியான இந்த பெண் கண்களாலும், உணர்வுகளாலும் அசத்தி விடுகிறாள். படம் முடியும் அந்த கடைசி தருணத்தில் விழியோரம் நீர் துளிர்க்காதவர் கல் நெஞ்சக்காரர்களாய் தான் இருக்க முடியும் !

வேலுவாக நடித்த ஸ்ரீ, கனா காணும் காலங்கள் சீரியலில் நடித்தவர். மிக ஒல்லியாக அந்த பாத்திரத்துக்கு நன்கு பொருந்துகிறார். முதல் பகுதியில் இவர் கதை ரொம்ப மெலோ டிராமா. குறிப்பாய் அவர் தந்தையாய் வருபவருக்கு சுத்தமாய் நடிக்க தெரியலை.

தினேஷ் மற்றும் ஆர்த்தியாக வரும் இருவரும் கூட தங்கள் பங்கை செவ்வனே செய்துள்ளனர். ஆர்த்தி பாத்திரம் தவறுதலாய் சித்தரிக்கப்படாமல் நன்கு படிக்கிற பெண் லேசாய் சலனப்படுகிறாள் என அழகாய் காட்டியுள்ளார் இயக்குனர். ( ஆர்த்தியை விட அவர் தோழியாக வரும் ஸ்வேதா செம அழகு !)

படத்தின் செம சர்பிரைஸ் இன்ஸ்பெக்டர் குமரவேல் தான் ! மிக இயல்பான நடிப்பில் நிஜ இன்ஸ்பெக்டரை கண் முன் கொண்டு வந்து விடுகிறார். போலிஸ் ஸ்டேஷனில் இருந்து கொண்டு ஜன்னல் வழியே அடிக்கடி வெளியே எச்சில் துப்புவதிலேயே இவர் என்ன மாதிரி ஆள் என உணர்த்தி விடுகிறார் இயக்குனர்.

வேலுவின் நண்பனாக வரும் வேலுசாமி என்கிற சிறுவன் அனைவர் மனதையும் கொள்ளை கொள்கிறான்

கதை நடைபெறும் இடமான அந்த தோஷி பிளாட்ஸ் கூட ஒரு கதாபாத்திரம் மாதிரி விரிவது அருமை.

மாணவர்கள் மொபைல் போன் வைத்து எப்படி கெட்டு சீரழிகிறார்கள் என்பதை சற்று மிகை படுத்தலோடு தான் காட்டுகிறார்கள். நிச்சயம் பள்ளி/ கல்லூரி மாணவிகளுக்கு, ஆண்கள் குறித்த எச்சரிக்கை மணி இந்த படம் ! அந்த விதத்தில் சற்று பெரிது படுத்தி சொன்னால் தான், மனதில் உறைக்கும் என்பது உண்மையே !
*********

தியேட்டர் நொறுக்ஸ்

ஐநாக்ஸில் சனிக்கிழமை மாலை காட்சி பார்த்தோம். 90 % தான் அரங்கம் நிரம்பி இருந்தது.

ஸ்ரீ கடைசி காட்சியில் ஜோதியை நோக்கி " உனக்கு நான் இருக்கேன் ஜோதி" என கத்தும் போது தியேட்டரில் செமையாய் கை தட்டல் எழுகிறது.

நாங்கள் சென்ற அதே காட்சிக்கு நடிகர் எஸ்.வீ. சேகரும் தனியாக வந்திருந்தார். பல ஆண்டுகள் முன் பார்த்த மாதிரி அதே தொப்பை, சிரிப்பு, உருவம் !
படம் முடிந்த போது மக்கள் "நன்றாக இருந்தது " என்று தான் பேசி கொண்டு சென்றனர்

நாங்கள் ஐந்து பேர் சென்றோம். கணினி இஞ்சினியராக இருக்கும் என் அண்ணன் மகன் " இந்த டைரக்டர் ரொம்ப அழ வைப்பார். நான் வரலை" என்றான். வறுபுறுத்தி தான் கூட்டி சென்றேன். அவனுக்கும் படம் பிடிக்கவே செய்தது
*********

படத்தில் இரண்டு பாடல்கள். ஆனால் இசை இன்றி ஒலிப்பதால் பலரும் ஒரே பாடல் மறுபடி மறுபடி வருகிறது என்றே நினைக்கிறார்கள். பின்னணி இசை பல இடங்களில் அடக்கி வாசித்தாலும், வேலு ஜோதியை பார்க்கும் இடத்திலெல்லாம் சஸ்பென்ஸ் இசை மாதிரி போட்டது உறுத்துகிறது.

எல்லா பாத்திரங்களையும் பார்த்து பார்த்து செய்த இயக்குனர், பெற்றோர்களின் பாத்திரம் எதற்கும் ஒரு வடிவமின்றி, சும்மா வந்து போகிறவர்களாய் காட்டியிருக்கிறார். ஜோதியின் அம்மா பாத்திரத்துக்கு மட்டும் தான் Identity என ஒன்று சற்றேனும் உள்ளது !

நம் நாட்டில் பணம் உள்ளவர்கள் எந்த தப்பும் செய்யலாம் ! போலிசும் நீதிமன்றமும் அவர்களிடம் பணத்தை வாங்கி கொண்டு சுதந்திரமாய் விட்டு விடும் என்பது தான் சட்டத்தின் நிலை. இதை துல்லியமாக காட்ட முற்பட்ட இயக்குனருக்கு சபாஷ் ! படத்தில் கெட்டவர்களுக்கு தண்டனை கிடைத்து விடுகிறது. நிஜ உலகில் இப்படி நடப்பது இல்லை.

இப்படத்தை எத்தனையோ விதமாய் முடிக்க சாத்திய கூறுகள் உள்ளன. ஆனால் பார்வையாளர்கள் மகிழவும், நெகிழவும் இதை விட சிறந்த முடிவு இருக்க முடியாது !

படம் முடிந்து வெளியே வரும் போது, பொய் வழக்கில் உள்ளே இருக்கும் எத்தனையோ அப்பாவிகள் பற்றி யோசிக்கிறது மனது. இத்தகைய படங்கள் ஓட வேண்டும். தமிழ் சினிமாவிற்கு அது தான் நல்லது ! ஓட வைப்பார்களா நம் மக்கள்?
*********
வல்லமை மே 7, இதழில் வெளியான விமர்சனம்
*********
டிஸ்கி: அருண் என்கிற நண்பர் நமது பதிவுகள் ஈ மெயிலில் வருவதில்லை ஏன் என கேட்டுள்ளார். வராமல் இருக்கும் படி நான் ஏதும் செய்யலை. செட்டிங்க்ஸில் ஏதும் மாறி விட்டதா என நண்பர்களிடம் கேட்டு பார்க்கிறேன். ஈமெயிலில் பிற நண்பர்களுக்கு பதிவுகள் வருகிறதா என சொல்லவும். நன்றி !

சென்னை ஐ.பி.எல் மேட்ச் நேரடி அனுபவம் ஏராள படங்களுடன்

2012-05-05T07:58:00.002+05:30

சமீபத்தில் சென்னை சேப்பாக்கத்தில் CSK VS KKRமேட்ச் பார்த்தோம். இதுவரை சேப்பாக்கம் பார்க்காதோருக்கு புது தகவல்களும், பார்த்தோருக்கு இனிய நினைவுகளும் இக்கட்டுரையில் இருக்கும்.

*******
மேட்ச் பார்க்க பலரும் பறக்கும் ரயிலையே பயன் படுகின்றனர். கார் வைத்திருக்கும் மிக மிக பணக்கார்கள் கூட பார்க் செய்து எடுப்பது சிரமம் என ரயிலில் வருகின்றனர். நம்மை மாதிரி மிடில் கிளாஸ் நாடுவது இதுவே. வேளச்சேரி ஸ்டேஷனில் ஏறும்போதே நிறைய மஞ்சள் கலர் டி ஷர்ட்டுகள் !!

நாங்கள் வேளச்சேரி ஸ்டேஷனில் பைக் டோக்கன் தரும் பெரியவரே " IPL மேட்சுக்கா?" என்று கேட்டு " பன்னிரண்டு மணிக்கு மேலாகும் திரும்ப வர " என அதற்கு தகுந்த ( டபிள் சார்ஜ்) டிக்கெட் தந்தார்.

சேப்பாக்கம் ரயில் நிலையத்தில் இறங்கினால் ஓரிரு நிமிடத்தில் மைதானத்தை அடையலாம். நாங்கள் (மகளும் நானும்) எட்டு மணி மேட்சுக்கு ஆறரைக்கு மைதானம் சென்று விட்டோம். CSK பெயர் போட்ட இலவச மஞ்சள் டி ஷர்ட்டும் தொப்பியும், கையில் வைத்து சத்தம் எழுப்ப பலூனும் தந்தனர். வெளியில் இருந்து தண்ணீர், உணவு எதுவும் எடுத்து செல்ல அனுமதி இல்லை. சீக்கிரம் சென்றதால் நல்ல வியூ கிடைத்தது.

நாங்கள் இருந்தது A ஸ்டாண்டு. டிக்கட் விலை ரூ. எழுநூறு.

மைதானம் முழுதும் பெரும்பாலும் 12 முதல் 25 வயது நிரம்பிய இளைஞர்களே நிரம்பி வழிந்தனர். அவர்களுக்கு துணையாக அம்மா அல்லது அப்பா தங்கள் பசங்களின் நண்பர்கள் கூட்டத்துடன் வந்திருந்தனர்.

ஆறரை முதல் ஏழே முக்கால் வரை வீரர்கள் பயிற்சியில் இருந்தனர். நடு மைதானத்தில் கம்பீர், யூசுப் பதான் உள்ளிட்ட KKR வீரர்கள் கடுமையான பயிற்சியில் ஈடுபட்டனர். ஓரத்தில் சில CSK வீரர்கள் மட்டும் பயிற்சியில் இருந்தனர். (எப்போதும் இப்படி தானாம் ! நடு பிட்ச் வரும் டீமுக்கு... மேலும் அவர்களே நிறைய பயிற்சியில் ஈடுபடுகின்றனராம் )

ஒரு வயதானவர் ..ஆர்வத்துடன் மைதானத்தில்

கல்லிஸ் மட்டும் எதுவும் செய்யாமல் காலை மடித்தவாறு அமர்ந்திருந்தார். அவருக்கு காயமோ, ஆட மாட்டோரோ என நினைத்தோம். ஆனால் ஆடினார்.

இந்த ஐ. பி. எல்.லில் மைக்கேல் ஹசி முதல் முறை இந்த மேட்சில் விளையாடினார். Consistent ஆக விளையாடுபவர் என அவர் விளையாடுவதில் மக்களுக்கு செம மகிழ்ச்சி. அவர் பெயர் சொன்னதும் பெரும் குரல் எழுப்பினர்.

சென்னை வீரர் பாலாஜி KKR-க்கு ஆடுகிறார். அவர் மட்டும் தனியாக மைதானத்தை சுற்றி சில ரவுண்டு ஓடினார். அப்போது கூட்டம் பெரிய அளவு சத்தம் எழுப்பி " பாலாஜி, பாலாஜி" என சத்தம் போட்டாலும் அவர் கண்டு கொள்ளவே இல்லை. (அன்று அணியில் அவர் இல்லை. இது தெரிந்து தான் அமைதி காத்தாரோ?)

மாறாக வெளி நாட்டு வீரர்கள் குறிப்பாய் லீ, பிரேவோ போன்றோர் மக்களின் கை தட்டலுக்கு நன்றியும் வணக்கமும் ஒவ்வொரு முறையும் தெரிவித்தனர். குறிப்பாய் லீ நம் கலாச்சாரப்படி இரு கையும் கூப்பி வணக்கம் சொன்னது மக்களிடம் செம ரெஸ்பான்ஸ் !

எங்களுக்கு நன்கு தெரிந்த குடும்பத்திலிருந்து ஏழெட்டு பள்ளி மாணவிகளுடன் கூட்டமாக மேட்ச் பார்த்தோம். அனைவரும் சேர்ந்து கமன்ட் அடித்தவாறு பார்த்தால் நன்றாக இருந்தது.

எங்களுக்கு நேர் முன்னே KKR சப்போர்ட் செய்யும் ஒரு கூட்டம் இருந்தது. அவர்கள் சென்னைக்கு எதிராக குரல் கொடுத்தனர் " வந்துட்டாருய்யா பத்து கோடி ஜடேஜா. அப்புடியே.... பின்னிடுவாரு. ஏய் பத்து கோடி.... பத்து கோடி " என்றெல்லாம் குரல் கொடுக்க, நம் மாணவிகள் கூட்டம் செம கடுப்பாகி அவர்களுக்கு பழிப்பு காட்டினர்

சியர் கல்ஸ் அருகே போலீசார் !

ஆட்டம் துவங்க இருபது நிமிடம் முன்பு சியர் கேர்ள்ஸ் வந்து ஆட துவங்கினர். சரியான துள்ளல் இசை கொண்ட தமிழ் பாட்டுக்கு, பாடல் வரிகள் அர்த்தம் புரியாவிடினும் இசையை வைத்து நன்கு ஆடுகின்றனர். உத்து (நீங்க நினைக்கிற உத்து அல்ல) கவனித்ததில் குறிப்பிட்ட சில ஸ்டெப்புகலே வைத்து கொண்டு மாற்றி மாற்றி ஆடுவது தெரிந்தது

பூட்ட பட்ட அந்த 3 ஸ்டாண்டுகள் + நான்குக்கு புகை !

நான்கு அடித்தால் சியர் கேர்ல்ஸ் ஆடும் போது அருகில் "புகை போடுகின்றனர்" . ஆறு அடித்தால் புஸ்வானம் மாதிரி விடுகின்றனர். நேரில் பார்க்க ரொம்ப அருமையாக இருந்தது.

மைதானத்தில் மூன்று ஸ்டேண்டுகள் முழுக்க காலியா இருக்கு. அதனால் மைதானம் காலி என பலரும் நினைக்கிறார்கள். உண்மை அதுவல்ல. இந்த 3 ஸ்டாண்டுகளும் தி.மு.க ஆட்சியில் கட்டப்பட்டவைஅ .தி.மு.க வந்த பின் இவை முறையின்றி கட்டப்பட்டவை என அனுமதி தர மறுத்து விட்டது. இதனால் இந்த ஸ்டேண்டுகள் பூட்டியே கிடக்கிறது. இவை திறக்கப்பட்டால் அவை யும் நிரம்பும். இப்போது டோட்டல் கெப்பாசிட்டி குறைந்ததால், டிமாண்ட அதிகமாகி டிக்கெட் விலை நிறைய அதிகமாகி விட்டது

எங்களுக்கு அருகில் மூன்று சிறுவர் சிறுமிகள் செம டான்ஸ். ஒவ்வொரு முறை பாட்டு போடும் போதும் அலுக்காமல் ஆடி தீர்த்தனர்

Entrance Gate: Checking done here

முதல் பாதி CSK ஆடிய போது ஒவ்வொரு ரன்னுக்கும் கூட்டம் ஆர்ப்பரித்தது. பின் KKR பேட்டிங்கின் போது அமைதியாகி விட்டது. அப்போதும் கூட அவ்வப்போது CSK CSK என சத்தம் எழுப்பி தம் அணியை ஊக்குவித்தனர்

இவ்வளவு கூட்டத்துக்கும் Toilet சுத்தமாக இருப்பது ஆச்சரியம் !

********
டைம் அவுட் முடிந்து கடைசி பத்து நொடிகளை குறிக்க 10,9,8,7 என மைக்கில் கத்த கூட்டமும் சேர்ந்து கத்துகிறது. மேட்ச் சற்று டல் அடிக்கும் போதெல்லாம் ஐ. பி. எல்லின் ஒலியான "பீ பீ பீ .." ஒலிக்க, கோட்டம் "ஓஒ" என கத்தி மகிழ்கிறது

ஒருவர் " அஸ்கலக்கடி கல கல கல " என கத்த, மொத்த கூட்டமும் " ஊ.. ஆ ஊ.. ஆ " என்று கத்தும் ! இது சென்னை ஸ்பெஷல்

வெளியில் சாப்பாடு யானை விலை விற்றது. சின்ன பர்கர் எண்பது ரூபாய். சாம்பார் சாதம் என்று பெயரில் ஒரு வஸ்த்து அறுபது ரூபாய். பத்து ரூபா சிப்ஸ் பாக்கெட் முப்பது ரூபாய்.

நடிகர்கள் சித்தார்த் மற்றும் உதயநிதி ஸ்டாலின் மேட்ச் பார்க்க வந்திருந்தனர். மேலும் KKR மேட்ச் என்பதால் ஷாருக்கும் ! அவர்களை திரையில் காட்டிய போது தான் பார்க்க முடிந்தது, எங்கு இருந்தார்கள் என தெரியலை. இங்கும் ஷாருக் நின்று கொண்டிருந்தார். அது அவர் செண்டிமெண்ட் போலும்.

ஆறுக்கு புஸ்வானம்

உதயநிதியை திரையில் காட்டி முடித்ததும் ஓகே ஓகே பட பாடலான “வேணாம் மச்சான் வேணாம்” பாடல் ஒலிக்க கூட்டம் ஆடி தீர்த்தது.

சென்னை குறைவான ரன் எடுத்ததால், சரி " இனி கொல்கத்தாவை சப்போர்ட் பண்ணுவோம், அதுவும் கம்பீர் தானே?" என பலரும் (குறிப்பாய் எனக்கு நேர் பின்னே இருத்த ஆண்டீஸ் ) பேசி கொண்டாலும் சென்னை எப்படியாவது ஜெயிசிடாதா என்று தான் பார்த்தனர்.

15 முதல் 20 ஓவர் வரை தோனி மற்றும் ஜடேஜாவின் மிக மெதுவான ஆட்டம் மற்றும் நம் பவுலர்கள் போட்ட மிக அதிக ஒய்டுகள் இவற்றால் சென்னை தோற்றது

பல சின்ன பசங்க அழ ஆரம்பித்து விட்டனர். பாவமாய் இருந்தது.

என் பெண் எவ்வளவோ பரவாயில்லை. இந்த experince ஐ தான் என்ஜாய் செய்யணும் என்கிற தெளிவோடு இருந்தாள். . மேட்ச் முடிந்தும் ஒரு டிரையின் உள்ளது. அது சேப்பாக்கம் மைதானத்தில் இருந்து கூட்டம் வரும் வரை காத்திருந்து பின் எடுக்கிறார்கள்.

வீட்டுக்கு வந்து சேர இரவு பன்னிரெண்டரை ஆனாலும், அடுத்த ஒரு மணி நேரம் தூங்காமல் மேட்ச் பார்த்த வியப்பை பேசி கொண்டிருந்தாள் பெண் !

மேட்ச் தோற்றதுக்கே இப்படி ! சென்னை ஜெயிச்சிருந்தா அவள் வகுப்பு தோழிங்க எல்லாருக்கும் கதை அளந்து தள்ளியிருப்பா !

முடிந்தால் சேப்பாக்கம் பக்கம் ஒரு மேட்சுக்கு உங்க பசங்களுடன் போயிட்டு வாங்க சார் !

அதீதம் மே 5 இதழில் வெளியானது

காந்திகிராமம், திண்டுக்கல் பயணம் நிறைவு பகுதி

2012-05-04T08:13:00.000+05:30

பயண கட்டுரை முதல் பகுதி: சிறுமலை+திராட்சை தோட்டம் இங்கே

***
திண்டுக்கலுக்கு மிக அருகில் உள்ள ஊர் காந்தி கிராமம்

இந்த "மாதிரி கிராமம்" சிறுமலை அடிவாரத்தில், இரு ஓடைகளின் நடுவே, இயற்கை எழில் சூழ அமைந்துள்ளது.

காந்தியடிகளின் கிராமிய பொருளாதாரக் கருத்துக்களைப் பரப்பும் எண்ணத்தில் டாக்டர்.டி.எஸ்.சௌந்திரம் அம்மையார் 1947 ஆம் வருடம் காந்தி கிராமத்தை உருவாக்கினார். இதனை துவக்க அருகிலுள்ள சின்னாளபட்டி மக்கள் இடம் தந்து உதவினர். முதலில் இங்கு துவக்கப்பட்டது ஒரு தொடக்க பள்ளி. இன்று கல்லூரி, பல்கழை கழகம் என 200 ஏக்கர் பரப்பில் விரிவடைந்துள்ளது !

திண்டுக்கல்லில் விவசாயமே பிரதானம். மேலும் சில கம்பனிகளும் உள்ளது. நாகா, மார்டின் மில்ஸ் மற்றும் சௌந்தர ராஜா மில்ஸ் ஆகியவை இங்குள்ள பெரிய நிறுவனங்கள்.

" திண்டு + கல் " என்பது தான் திண்டுக்கல் ஆனது. இங்கு ஒரு பெரிய மலை உள்ளது. அதை தான் "திண்டு" "கல்" என்கின்றனர். இங்கு திப்பு சுல்தான் கோட்டை இருந்துள்ளது. இப்போது மலை மேல் ஒரு கோவில் மட்டுமே உள்ளது

சௌந்தர ராஜா மில்ஸ் ஓனர் பற்றி அந்த ஊர் காரர் சொன்ன தகவல் குஜாலானது. இவர் நடிகை கே. ஆர் விஜயாவுக்கு அந்த காலத்திலேயே ஏரோபிளேன் வாங்கி தந்தாராம். இதை சொல்லிட்டு "ஒரு நாளைக்கே கே. ஆர் விஜயாவுக்கு ஏரோபிளேன் வாங்கி தந்தவர்ன்னு ஊர் முழுக்க அவர் பிரபலம் சார்" என்றார் !

ஏரோபிளேன் வாங்கி தந்தவர் தன் அலுவலகத்தில் வைத்திருக்கும் ஏரோபிளேன்

***********

திராட்சை தோட்டங்கள் பார்த்து விட்டு திரும்பும் வழியில் ஞாயிறன்று பகலில் பள்ளி மாணவர்கள் நிறைய பேரை வைத்து கொண்டு ஒரு இளைஞர், கோவிலில் பாடம் நடத்தி கொண்டிருந்தார். அனைவரும் ஒரே வகுப்பு மாணவர் போலலாமல் வெவ்வேறு வயதை சேர்ந்தவர்களாய் இருந்தனர். விடுமுறை நாள் பகலில் டிவி பார்க்காமல், கிரிகெட் விளையாடாமல் அப்படி என்ன செய்கிறார்கள் என கேட்டபோது கார்த்திக் என்கிற இளைஞர் அந்த ஊர் மாணவர்களுக்கு ஒவ்வொரு ஞாயிறும் பொது அறிவு வகுப்பு நடத்துகிறார் என்றும், ஆர்வம் உள்ளவர்கள் ஐ. ஏ.எஸ் படிக்க தூண்டுதலாக இதை செய்கிறார் என்றும் கூறினர். மின் வாரியத்தில் பணியாற்றிய கார்த்திக்கின் தந்தை பணியில் இருக்கும் போதே இறந்ததால் அவர் வேலை மகன் கார்த்திக்கு கிடைத்துள்ளது. மின் வாரியத்தில் வேலை செய்தவாறே, பகுதி நேரமாக மாணவர்களுக்கு இலவச பொது அறிவு வகுப்பு நடத்துகிறார் கார்த்திக். இப்படியும் இளைஞர்கள் உள்ளார்களே என்று மிக மகிழ்வாக இருந்தது
*****************
சின்னாள பட்டி நிஜமாகவே புடவைக்கு மிக புகழ் வாய்ந்த ஊர்.

இங்கு புடவை நெய்ய பட்டு கிடைக்கிறது. அவற்றை பார்க்கும் வாய்ப்பு இம்முறை கிடைக்க வில்லை.

ஆட்டு கூட்டம் ஒன்று இங்கே ரோடில் சென்றது அழகான காட்சியாய் இருந்தது.

சின்னாள பட்டி பேருந்து நிறுத்தமும், ஆட்டு கூட்டமும் இந்த வீடியோவில் காணலாம்

**********
சின்னாளபட்டி அருகே ஒரு பாட்டியிடம் கொய்யா பழம் வாங்கினோம். பாட்டியின் காதை பார்த்ததும் காமிரா கைகள் துறுதுறு வென போட்டோ எடுத்தது. அருகில் நின்ற பெண்கள், " ஏய் இங்கே பாரு ..பாட்டியை போட்டோ பிடிக்கிறதை" என்றதும் பாட்டி முகத்தில் ஏகத்துக்கும் வெட்கம் !

***
அம்பாத்துரை பக்கத்தில் ஆத்தூர் என்று ஊர் இருந்தது. சேலம் பக்கம் அல்லவா ஆத்தூர் இருக்கும் என்று கேட்டால், ஆத்தூர் மட்டும் மூன்று உள்ளதாக கூறி அதிர வைத்தார் அங்குள்ளவர். சேலம் அருகில் ஒரு ஆத்தூரும், திண்டுக்கல் அருகே ஒரு ஆத்தூரும், இவை தவிர இன்னொரு ஆத்தூரும் உண்டாம் ! சரி தான் !

திண்டுக்கல் அருகே செல்லும் போதோ, கொடைக்கானல் செல்ல கோடை ரோடுக்கு செல்லும் போதோ அங்கு மிக அருகில் இருக்கும் இந்த சிறுமலையையும் அதனை சுற்றி உள்ள திராட்சை உள்ளிட்ட அழகான தோட்டங்களையும் ஒரு முறை கண்டு வாருங்கள் !

***
கட்டுரை அதீதம் ஏப்ரல் 13 இதழில் வெளியானது.

***
இன்று பிறந்த நாள் கொண்டாடும் எமது ஹவுஸ்பாஸை வாழ்த்தி வணங்குகிறேன் !

டிவியில் மே தின சிறப்பு நிகழ்ச்சிகள் எப்புடி ?– ஒரு பார்வை

2012-05-03T08:48:00.000+05:30

முன்பெல்லாம் டிவியில் தீபாவளிக்கு தான் சிறப்பு நிகழ்சிகள் இருக்கும். இப்போது எந்த விடுமுறை தினம் என்றாலும், மனிதர்களை கட்டிப்போடும் விதமாய் சிறப்பு நிகழ்ச்சிகள் உண்டு. மே தின டிவி நிகழ்ச்சிகள் பற்றி ஒரு விமர்சனம் இதோ:

சன் டிவியில் சிரிப்பு கொண்டாட்டம் என ஒரு நிகழ்ச்சி. சின்னி ஜெயந்த் மற்றும் சொர்ணமால்யா இணைந்து வழங்கினர். பெரும்பாலும் மொக்கையாக இருந்தாலும், விஜயகாந்த் மாதிரி பேசியவர் சொன்ன காமெடி நல்லா இருந்தது ” என் துண்டை தோள் மேலே போட்டிருந்தேன்னா, பாக்கெட்டில் பத்து காசு இல்லை; அதை மறைக்க போட்டிருக்கேன்னு அர்த்தம். தலையை சுத்தி கட்டியிருந்தா குடை எடுத்துட்டுவர மறந்துட்டேன்னு அர்த்தம். இடுப்பில சுத்தி கட்டியிருந்தா வேட்டி லூசா இருக்கு கழண்டு விழுந்துடும்னு அர்த்தம்”

வடிவேலு, மக்களுடன் மண் பாண்டம் செய்யும் அனைத்து ஸ்டெப்களும் பார்ப்பதை சன் டிவியில் காண்பித்தது நன்றாய் இருந்தது. நடு நடுவே வடிவேலு ” என் காமெடி எது பிடிக்கும்? ” என அனைவரிடமும் கேட்டு ” தினம் சாயந்திரம் ஆனா என் காமெடி தான் பாப்பீங்க இல்லே?” என சுயமகிழ்ச்சி அடைந்து கொண்டது ஒரு புறம் இருந்தாலும், பானை செய்யும் விதத்தையும் அந்த தொழிலாளர்களையும் உழைப்பாளர் தினத்தில் காட்டியது அருமை.

விஜய் டிவியில் நண்பன் நூறாம் நாள் நிகழ்ச்சி பார்க்க சுவாரஸ்யம் ! விஜய்யின் படத்தை ஒருவர் இரு கைகளாலும் வரைய, நிகழ்ச்சியில் ஆடிய டீமும் செமையாக ஆடினர். சிவ கார்த்திகேயன் மற்றும் நீயா நானா கோபி நிகழ்ச்சியை தொகுத்து வழங்கினர். சிவா செம அட்டகாசம் செய்து சிரிக்க வைத்தார். இவர் தொல்லை தாங்க முடியாமல் விஜய்” நீ தான் ஹீரோ ஆகிட்டேல்ல?அப்புறம் ஏன் இந்த வேலை எல்லாம் பாக்குறே?” என்று கேட்க ஏக சிரிப்பு! நடிகர் சத்யன் நண்பன் பட ஷூட்டிங்கின் போது தன தந்தை இறந்து விட, அதன் பின் சத்யராஜ் தான் தனக்கு எமோஷனல் சப்போர்ட் ஆகவும், தந்தை ஸ்தானத்திலும் இருப்பதாகவும் சொன்னது நெகிழ்வாய் இருந்தது.

ஒரு கல் ஒரு கண்ணாடி படத்தில் எடுக்கத் தவறிய காட்சிகள் சன் டிவியில் காட்டினர். மிக எதிர்பார்ப்புடன் பார்த்தாலும் அந்த காட்சிகள் அவ்வளவு சுவாரஸ்யம் ஆக இல்லை. உண்மையில் சிரிப்பு வராத காட்சி மேல் தான் கை வைத்து எடிட் செய்துள்ளனர். சந்தானத்தின் ஒரு டயலாக் மட்டும் தேறியது: ” என முன்னாடி உட்கார்ந்து குடிக்காதே நீ! பாட்டிலை முகர்ந்து பாத்துட்டு குடிக்கிறேன்னு சொல்றவன் என் முன்னாடி உட்கார்ந்து குடிச்சா, குடிச்சே மஞ்சா காமாலை வந்து செத்து போன என தாத்தா பெருமை என்னா ஆவறது?”

கலைஞர் டிவியில் எடிசன் சினிமா விருதுகள் நிகழ்ச்சி தரத்திலும் சரி எடுத்த விதத்திலும் சரி ரொம்ப சுமார். அதே கலைஞரில் எல்லா சீரியல் குடும்பத்திற்கும் மியூசிகல் சேர் நிகழ்ச்சி வைத்தனர். மற்றவர்களை ஏமாற்றி, தனக்கு முன் ஓடுபவரை விட சற்று தூரம் விட்டு (அப்போது தானே ஏதாவது ஒரு நாற்காலியில் உட்கார முடியும்?) ஓடுபவர் கடைசி ரவுண்ட் வரை வந்து சில நேரம் வெற்றியும் பெற்றனர்.

எடிட்டர் மோகனின் எழுபதாவது பிறந்த நாளை அவர் மகன்கள் ராஜா மற்றும் ஜெயம் ரவி திரை உலக பிரபலங்களை அழைத்து கொண்டாடியதை காட்டினர். இயக்குனர் ராஜா தன் தந்தை பிறந்த நாள் அழைப்பிதழை ஒரு பிலிம் துண்டில் அச்சிட்டு அனைவருக்கும் அனுப்பி, வியக்க வைத்து விட்டாராம்!

ஜெயா டிவியில் ” மின்சார சிக்கனம் அதிகம் செய்வது ஆண்களா? பெண்களா?” என்கிற தலைப்பில் ஒரு பட்டி மன்றம்! மின் சிக்கனம் பற்றிய இந்த பட்டி மன்றத்தை ஏற்பாடு செய்தது யார் தெரியுமா? தமிழ் நாடு மின்சார வாழிய ஊழியர்கள் ! தமிழ் நாட்டில் மின்சாரத்தை சரியான முறையில் அம்மா விநியோகிப்பதாகவும், மின் வாரியத்தின் பங்கு பாராட்டும் விதத்தில் இருப்பதாகவும் எல்லாரும் பேசினார். நோ கமண்ட்ஸ்!!

விஜய்யில் பாலாஜி சக்திவேல் இயக்கத்தில் வெளி வர இருக்கும் ” வழக்கு எண் 18 /9 ” படம் குறித்து மிஷ்கின், வெற்றி மாறன், சமுத்திர கனி, பிரபு சாலமன், சசி உள்ளிட்ட பல இயக்குனர்கள் வந்து வாழ்த்து மழை பொழிந்தனர். அனைவரும் படம் பிரிவியூ ஷோ பார்த்து விட்டு ஆஹா ஓஹோ என புகழ்ந்தனர். நாமும் பாராட்டும் படி உள்ளதா என்பது இன்னும் சில நாளில் ( மே 4 அன்று) தெரிந்துவிடும்.

காமிராமேன் ரவிவர்மன் ஜெயாவில் தன் அனுபவம் பகிர்ந்தது நன்றாய் இருந்தது. ஷங்கர், கமல், கெளதம் மேனன் போன்ற பிரபல இயக்குனர்/ நடிகர்களுடன் பணியாற்றிய வித்தியாசமான அனுபவங்களை அவர் பகிர்ந்து கொண்டார்.

நீங்களும் வெல்லலாம் ஒரு கோடி – உழைப்பாளர் தின சிறப்பு நிகழ்ச்சி நடந்தது. ஒரு பெண் எந்த லைப் லைனும் எடுக்காமல் மூணு லட்சத்து இருபதாயிரம் ஜெயித்தார். பின் ஒரு கேள்விக்கு தவறாக பதில் தந்து அவுட் ஆகி விட்டார். லைப்லைனாவது பயன் படுத்தியிருக்கலாம்! இந்த நிகழ்ச்சிக்கு பார்வையாளராக ஆட்டோ ஓட்டுனர்கள் மற்றும் சென்னை போக்குவரத்துக் கழக டிரைவர் மற்றும் கண்டக்டர்கள் வந்திருந்தனர்.

சன் டிவி மதியம் ராஜ பாட்டை என்கிற மகா தோல்வி படம் போட்டது. அன்று மாலை முதலில் “போக்கிரி ” என அறிவித்திருந்தது சன் டிவி. பின்னர் விஜய்யில் நண்பன் வருவதால், அதற்கு சமமான புது படம் போட்டால் தான் எடுபடுமென சன்னில் காவலன் என மாற்றி விட்டார்கள்! (இந்த படம் வெளி வந்த போது தியேட்டர் கிடைக்காமல் செய்தவர்கள் இன்று தங்கள் சேனலில் அந்தப் படத்தை போடுகிறார்கள்! அரசியல்ல இதெல்லாம் சாதாரணமப்பா !!)

ஒரே நேரத்தில் நண்பன், காவலன், விண்ணைத் தாண்டி வருவாயா மூன்றும் ஒளிபரப்பாக, முக்கியமாக நண்பனும் அதன் விளம்பர இடைவேளையில் பிற படங்களும் பார்க்கிற மாதிரி ஆயிற்று. நண்பனும் சரி, அதன் ஒரிஜினலான த்ரீ இடியட்சும் சரி எப்போது பார்த்தாலும் சில இடங்களிலாவது கண்ணீர் வராமல் போகாது. பத்து நிமிடத்துக்கொரு முறை ஐந்து நிமிட விளம்பரங்கள் வந்த போதும் கூட நண்பன் நெகிழ்த்தவே செய்தான்!

ஜெயா டிவியில் நடன இயக்குனர் ரகுவின் ஐம்பதாவது வருட திரை உலக வாழ்வுக்கு பாராட்டு விழா காட்டி விட்டு இரவு ஏழு மணி முதல் வழக்கமான சீரியல்களுக்கு போய் விட்டார்கள். ராஜ் டிவியும் கூட மாலை வழக்கமான சீரியல்கள் ஒளிபரப்ப ஆரம்பித்து விட்டது. சீரியல்கள் வந்ததும் பெண்கள் கைக்கு ரிமோட் போக ஆண்கள் வழமை போல் கணினிக்கு வந்து சேர்ந்தனர்.

இவ்வாறாக கழிந்தது ஒரு சாதாரண தமிழனின் மே தினம்!

************

வல்லமை மே 2 இதழில் வெளியானது !

வானவில் 86: விகடன்- MP சச்சின் - பதிவர் ரகு

2012-05-02T08:45:00.000+05:30

சச்சினுக்கு எம். பி பதவி

சச்சினுக்கு ராஜ்யசபா எம். பி பதவி தந்தது சற்று சர்ச்சையை கிளப்பி உள்ளது. சிவசேனா இது பற்றி " காங்கிரசிடம் ஜாக்கிரதையாக இருங்கள்" என எச்சரிக்கிறது ! இன்னொரு பக்கம் "கங்குலிக்கு எம். பி பதவி குடுங்க" என மேற்கு வங்க கம்யூனிஸ்ட் எம். பி.க்கள் குரல் எழுப்புகின்றனர். ( சச்சின்-கங்குலி ஒன் டே பார்ட்னர்ஷிப் போல இங்கும் சேர்ந்து ஆடவா?) மஞ்சரேக்கர், ஹர்ஷா போகலே உள்ளிட்டோர் சச்சினுக்கு இது ஏன் என்றே கேட்கின்றனர்.

சச்சின் அடைந்துள்ள வெற்றிக்கும் புகழுக்கும் எம். பி பதவி என்பது மிக சிறிது. நம் சிவாஜி கணேசனுக்கு சிறந்த துணை நடிகர் விருது மட்டுமே மத்திய அரசு ஒரு முறை தந்து கௌரவித்தது. அது போல் தான் சச்சினுக்கு எம். பி பதவியும் ! இத்தகைய எம். பி க்கள் யாரும் பாராளுமன்றம் பக்கம் வருவதும், பேசுவதும் இல்லையாம் ! அப்புறம் ஏன் தான் இந்த பதவியோ?

ஆனந்த விகடனில் இருந்து வந்த பணம்

விகடனில் பெண்கள் தினத்துக்கு நமது கட்டுரை வந்தது தெரியும் தானே ! அதற்காக முன்னூறு ரூபாய் பணம் மணி ஆர்டர் செய்திருந்தனர். எதிர் பார்க்கவே இல்லை. மிக மகிழ்ச்சியாய் இருந்தது. தமிழ் பத்திரிக்கைகளில் அனைத்து படைப்புகளுக்கும் அதிக அளவு பணம் தருவது விகடன் தான் !

தமிழக மாணவர்களுக்கு நடக்கும் நல்ல விஷயம்

தமிழகத்தில் அடுத்த ஆண்டு முதல் எட்டாம் வகுப்பு வரை உள்ள மாணவர்களுக்கு ஒவ்வொரு பருவத்துக்கும் (காலாண்டு, அரையாண்டு, முழு ஆண்டு) தனி தனி புத்தகங்களாக தர உள்ளனர். ஒரே புத்தகத்தினுள் வரலாறு, புவியியல், அறிவியல் அனைத்தும் ரெண்டு அல்லது மூன்று பாடம் இருக்கும். எனவே மொத்த புத்தக எண்ணிக்கையே ஒரு பருவத்துக்கு ஓரிரண்டு மட்டுமே இருக்கும். அடுத்த பருவத்துக்கு வேறு புத்தகம். இது தினம் எடுத்து போகும் சுமையை மட்டும் குறைக்காது. ஒவ்வொரு முறையும் தேர்வுகளே அந்த புத்தகத்திலிருந்து தான் என நினைக்கிறேன். இதனால் காலாண்டு, அரையாண்டு, முழு ஆண்டு ஒவ்வொரு முறையும் அதே பாடத்தை திரும்ப திரும்ப படிக்க வேண்டியதில்லை. மேலும் ஒவ்வொரு தேர்வுக்கு இரண்டு அல்லது மூண்டு பாடங்களே எல்லா பாடத்திலும் இருக்கும்.என் பெண் சிறுவயதில் படித்த பள்ளியில் இந்த முறை தான் இருந்தது. அப்போது அப்படி தான்.

மாணவர்களுக்கு புத்தக சுமை மட்டுமல்லாது தேர்வு துயரும் இதன் மூலம் குறையும். இந்த நல்ல விஷயத்துக்காக தமிழக அரசை பாராட்டுவோம் !

பங்காருவுக்கு ஜெயில்

இதை வாசிக்கும் நீங்கள், கல்லூரியில் படிக்கும் போது டிவியில் ஒரு காட்சி பார்த்திருப்பீர்கள். அப்போதையை பா. ஜா.க தலைவராக இருந்த பங்காரு லட்சுமணன் கத்தை கத்தையாக பணம் லஞ்சம் வாங்குவதை டிவியில் வீடியோவாக போட்டார்கள். இதனால் அவர் உடனே ராஜினாமா செய்தார். 11ஆண்டுகள் கழித்து சி. பி. ஐ நீதிமன்றம் அவர் குற்றவாளி என தீர்பளித்துள்ளது. என்னா வேகம் ! நாடு உருப்பட்டடும் ! இதனை எதிர்த்து அவர் மேல் முறையீடு செய்ய போறாராம் ! அது முடிய எத்தனை வருஷம் ஆகுமோ?

இப்படி தான் காங்கிரசில் ஒரு ஊழல் அரசியல் வாதி சுக்ராம் என்பவர்.. பல வருஷம் வழக்கு நடந்து முடியும் போது " அவர் குற்றவாளி தான். ஆனால் அவர் வயதை (எண்பதுக்கும் மேல்) கருத்தில் கொண்டு அவரை ஜெயிலில் அடைக்காமல் விடுகிறோம் " என்று கோர்ட் தீர்ப்பளித்தது.

சட்டத்தில் "Delayed justice is denied justice" என்பார்கள் ; " தாமதமாக தரப்படும் நீதி, அநீதிக்கு சமம் " என்று !

நீதிமன்றத்தில் தீர்ப்புகள் விரைவாய் வராத வரையில், அரசியலில் ஊழல் பெருச்சாளிகள் பெருகி கொண்டு தான் இருப்பார்கள் :((

ஈ. பி பில் அப்டேட்

இம்மாதம் ஈ. பி பில் புது tariff-ல் கட்டவேண்டும். கணக்கெடுக்க வந்தவர்கள் யூனிட்டுகளை மட்டும் எழுதி விட்டு போய் விட்டனர். எங்களுக்கு சரியாக 510 யூனிட்டுகள் ! ஐநூறை தாண்டினாலே மிக அதிக பில் வரும் என்பது உங்களுக்கு தெரிந்திருக்கும்.

"ஐநூறுன்னு போட்டுட்டு போக கூடாது? பத்து யூனிட் அடுத்த முறை சேர்த்து போட்டா தான் என்னவாம்?" என்று புலம்பி கொண்டிருக்கிறார் ஹவுஸ் பாஸ் !

ஆனந்த் கார்னர்

Life is a great travel trip. But it does not come with a map. We have to search our own ways to reach the destinations.

பதிவர் பக்கம்

வீடுதிரும்பலுக்கு ரெகுலராய் வருவோருக்கு பதிவர் ரகுவை தெரியும் என்றே நினைக்கிறேன். காஞ்சிபுரத்தை சேர்ந்த இளைஞர். சென்னை தனியார் நிறுவனம் ஒன்றில் சாப்ட்வேர் இஞ்சினியராக பணி புரிகிறார். இணையம் மூலம் அறிமுகமாகி பேசி இருந்த நாங்கள் இப்போதெல்லாம் அவரவர் புத்தகங்கள் மாற்றி கொள்ளவும், புது உணவகமாக பார்த்து சாப்பிடவும் ஓரிரு மாதங்களுக்கு ஒரு முறை சந்திக்கிறோம்.

மிக அரிதாக எழுதினாலும் பஸ் டே கொண்டாட்டம், சத்யம் சினிமாஸ் பற்றி இவர் எழுதிய பதிவுகள் ரசிக்க வைப்பவை.

நிற்க. நான் பதிவெழுத ஆரம்பித்து இரண்டு ஆண்டுகள் ஆன நிலையில் என்னை பற்றி ஒருவர் தனி பதிவு எழுதினர் என்றால் அது ரகு தான். வேறொன்றும் இல்லை. நாங்கள் முதல் முறை சந்தித்தது பற்றி இந்த பதிவில் எழுதியிருக்கிறார். வாசித்து பாருங்கள்.

*********
டிஸ்கி: வீடுதிரும்பலை தொடர்வோர் எண்ணிக்கை நானூறையும், பதிவுகள் எண்ணிக்கை 350-ஐயும் தாண்டி உள்ளது. எந்த வேகத்தில் செல்கிறோம் என தெரியும் என்பதற்காக இங்கு பகிர்ந்து வைக்கிறேன். உங்கள் அனைவர் அன்பிற்கும் நெகிழ்வான நன்றி !

வெளியூர் டூர் போகிறீர்களா - சில டிப்ஸ்

2012-05-01T12:48:00.002+05:30

கோடை விடுமுறை ஆரம்பம் ஆகிடுச்சு. குடும்பத்தோடோ, நண்பர்களுடனோ டூர் போக திட்டமிடுகிறீர்களா? சில டிப்ஸ் இதோ:

முதலில் செய்ய வேண்டியது ரயில் டிக்கெட் புக் செய்வது தான். இப்போது 120 நாள் முன்பே டிக்கெட் முன் பதிவு செய்யலாம் என்பதால் ரயில் டிக்கெட் மிக சீக்கிரம் புல் ஆகி விடுகிறது. நீங்கள் செல்ல வேண்டிய இடத்துக்கு முன்பே பிளான் செய்து டிக்கெட் புக் செய்து விடுங்கள். பின் ஏதாவது காரணத்தால் கான்சல் செய்தாலும், ரெண்டு நாள் முன்பு கான்சல் செய்து விட்டால் அதிகம் உங்களுக்கு லாஸ் ஆகாது.

இன்டர்நெட் மூலம் புக் செய்தால் confirm ஆன டிக்கெட் உள்ளதா என பார்த்து கொள்ளுங்கள். வெயிட் லிஸ்ட் எனில், அது confirm ஆகா விட்டால், பயணம் துவங்கும் முன் அந்த டிக்கெட்டுகளை ரயில்வே நிர்வாகம் கான்சல் செய்து விடும். இதுவே ரயில்வே ஸ்டேஷன் கியூவில் நின்று வாங்கிய டிக்கெட் எனில் வெயிட் லிஸ்ட் கான்சல் ஆனால் குறைந்தது Unreserved-ல் பயணம் செய்ய அனுமதி உண்டு. TTR-ஐ பார்த்து கேட்டு கொண்டால், அவர் எங்கேனும் சீட் தரவும் கூடும்.

ஆனால் குடும்பத்துடன் செல்லும் போது confirm ஆன டிக்கெட் இருக்கும் படி பார்த்து கொள்வது நல்லது !

முடிந்த வரை காரில் வெளியூர் டூர் செல்வதை தவிர்த்து ரயிலில் செல்வது பாது காப்பானது. பின் அங்கேயே கார், ஆட்டோ இவற்றை எடுத்து கொள்ளலாம். என் அனுபவத்தில் இதுவே சிறந்தது

எந்த ஊருக்கு செல்கிறீர்கள் என்பது மிக முக்கியம். உங்கள் குடும்பத்தில் பெரும்பாலானோர் இதுவரை பார்க்காத இடம் செல்வது நல்லது. ஏறகனவே ஒரு முறை சென்ற இடம், மிக அதிக மகிழ்ச்சி தருவது குறைவே ( ஒரு சில exceptions இருக்கலாம் ). கோடை எனில் குளிர்வான இடங்கள் செல்ல திட்டமிடுவது நல்லது. அக்டோபர் மாதம் டில்லி, இந்தியாவின் பல பகுதிகள் செல்ல உகந்தது.

நீங்கள் போகும் ஊர் குறித்து முன்னரே நெட்டில் படித்து விடுங்கள். அந்த ஊர் குறித்த சுவாரஸ்ய தகவல்கள் செல்லும் முன்னே நீங்கள் கொஞ்சம் தெரிந்து கொண்டு அதை அந்த ஊரில் இருக்கும் நபர்களிடம் தகுந்த நேரத்தில் பேச்சோடு பேச்சாக சொன்னால் அவர்கள் மிக மகிழ்வார்கள். மேலும் பல தகவல்களை தருவார்கள்

போலவே என்னென்ன இடம் பார்க்க வேண்டும் என்பதையும் இணையம் மூலமே ஓரளவு லிஸ்ட் பண்ணி விட முடியும். பத்து இடங்கள் லிஸ்ட் செய்து வைத்தால் ஓரிரு இடங்கள் சிற்சில காரணங்களால் அங்கு சென்ற பின் பார்க்க முடியாமல் போகலாம். இடங்கள் லிஸ்ட் எடுக்கும் போதே அந்த இடங்கள் என்றைக்கு விடுமுறை எந்த நேரம் திறந்திருக்கும் போன்ற தகவல்களும் பார்த்து விடுவது உங்கள் டூரை சரியாக திட்டமிட உதவும்.

சிலர் மிக நிதானமாக போகும் ஊரில் ஓரிரு இடங்கள் மட்டும் பார்த்தால் போதும் என நினைப்பார்கள். வேறு சிலரோ ஒரு இடமும் விடாமல் பார்க்க நினைப்பார்கள். இரண்டுக்கும் நடுவில் balancedஆக இருப்பதே எனக்கு தெரிந்த வரை சிறந்தது. அனைத்து இடங்களையும் பார்ப்பது நிச்சயம் சிரமம். அங்கு என்னென்ன இடங்கள் அதிக விசேஷமோ அவற்றை மட்டும் பார்த்தால் நலம். உங்களுக்கு இருக்கும் அதீத ஆர்வம் உங்கள் குடும்பத்தினருக்கும் இருக்க வேண்டும் அல்லவா?

தங்கும் ஹோட்டல் : பெரும்பாலும் சுற்றி கொண்டு தான் இருக்க போகிறோம். இரவு மட்டும் தான் ஹோட்டல் ரூமில் இருப்போம். எனவே பெரிய ஸ்டார் ஹோட்டல் தேர்ந்தெடுப்பது தேவை இல்லை. அதே நேரம் நிச்சயம் டீசன்ட் ஆன ஹோட்டல் அவசியம். இணையத்தில் ஒவ்வொரு ஊரிலும் இருக்கும் ஹோட்டல்கள் பற்றி விரிவான விமர்சனங்கள் கிடைக்கின்றன. அங்கு சென்று தங்கியோர் தங்கள் அனுபவத்தை www.indiamike.com போன்ற இணைய தளங்கள் தருகின்றன. இதன் Forum-களில் எந்த ஊர் போனால், எங்கு தங்கலாம், என்ன விசேஷம் போன்ற கேள்விகளும் அதற்க்கான விடைகளும் நேரடி அனுபவம் மூலம் பலர் பகிர்கிறார்கள். நாம் எப்படி ப்ளாக், Facebook-ல் ஆர்வமாய் உள்ளோமோ அது போல பயணத்தில் ஆர்வமுள்ள பலர் இங்கு தொடர்ந்து விவாதம் செய்த வண்ணம் இருப்பர். அவர்கள் அனுபவத்தை நாம் கேட்டு அறிந்து கொள்ளலாம்.

குளிர் பிரதேசம் எனில் அதற்கு தகுந்த சுவெட்டர் போன்றவை எடுத்து சென்று விடுவது நல்லது. முழுக்க உஷ்ணமான இடத்திலிருந்து மிக அதிக குளிர் பிரதேசம் செல்வதால் நமக்கு இவை அவசியம் தேவைப்படும். அங்கு சென்று வாங்கினால் பெரும் செலவு. எனவே சிரமம் பார்க்காமல் இங்கிருந்து எடுத்து சென்று விடுங்கள்.

சாப்பாடு: அந்தந்த ஊருக்கு ஸ்பெஷல் உணவு இருக்கும். அதை டேஸ்ட் செய்து பார்ப்பது வித்தியாச அனுபவம் தரும். அதே நேரம் டூரில் பொதுவாய் நிறைய சாப்பிடாமல் வழக்கத்தை விட சற்று குறைவான அளவு சாப்பிடுவது நல்லது. உணவு அதிகம் சாப்பிட்டால் வாந்தி, வயிற்று போக்கு போன்றவை வந்து நாமும் என்ஜாய் செய்யாமல் பிறரும் நம்மால் வருந்தும் படி ஆகி விடும். கவனம் !

நிறைய அலைவதால் நிறைய தண்ணீர் குடிப்பது மிக அவசியம். ஆங்காங்கு மினரல் வாட்டர் வாங்கி குடிப்பது மிக முக்கியம். பலரும் போதுமான தண்ணீர் குடிக்க தவறுகின்றனர்.

காமிரா: அவசியம் காமிரா கொண்டு செல்வது நினைவுகளை பதிவு செய்து வைக்க உதவும். இதிலும் ஒரு அனுபவம். சிலர் காமிராவும் கையுமாய் எப்போதும் இருந்து இருக்கும் இடத்தை நன்கு கவனித்து என்ஜாய் செய்வதை தவற விடுகிறார்கள். இருக்கும் இடத்தை அனுபவிப்பதே முக்கியம். போட்டோ எடுப்பது போனஸ் தான். இதை நினைவில் கொள்வது அவசியம்

ஷாப்பிங் : செல்லும் ஊரில் என்ன வாங்கலாம், என்ன பொருள் எந்த இடத்தில் குறைவான விலையில் கிடைக்கும் போன்ற தகவல்களும் கூட இணையத்தில் கிடைக்கும், அல்லது அங்கு சென்ற பின், அங்குள்ள நபர்களை கேட்டும் தெரிந்து கொள்ளலாம். ஆட்டோ காரர்கள் போன்ற ஆட்களை கேட்டால் தங்களுக்கு எங்கு கமிஷன் கிடைக்குமோ அதை சொல்ல வாய்ப்புண்டு. எனவே ஹோட்டல் சூபர்வைசர் போன்ற ஆட்களிடம் அல்லது அந்த ஊரில் உள்ள நண்பர்களிடம் கேளுங்கள்.

ஷாப்பிங் செய்யும் போது உங்கள் நெருங்கிய உறவினர் மற்றும் நண்பர்களுக்கு ஒரு சில பொருட்கள் வாங்கி வாருங்கள். வெளியூர் சென்றாலும் அவர்களை நினைவில் வைத்திருந்தீர்கள் என்று தெரிவிக்க தான் இந்த செயல் ! கூட்டு குடும்பங்களில் இந்த எதிர் பார்ப்பு அதிகமாய் இருக்கும் !

டூர் முடிகிற தருவாயில் உங்களுடன் வந்த அனைவரையும் எந்தெந்த இடம் மற்றும் அனுபவம் அவர்களுக்கு பிடித்தது என பேச சொல்வது எங்கள் வழக்கம். இது அனைவரின் ரசனையை அறிய உதவுகிறது என்பதோடு ஒவ்வொருவரும் நிஜமாகவே நாம் நன்கு என்ஜாய் செய்தோம் என்பதை உணரவும் உதவுகிறது ( பயண கட்டுரை எழுதும் என்னை மாதிரி ஆசாமிகள் குறிப்பு எடுத்து கொள்ளவும் தான் !)

டூரில் அவ்வப்போது சில சண்டைகள் வரலாம். அதனை பெரிது படுத்தாமல் உடனே மறந்து, சமாதானம் ஆகி விடுவது நல்லது. மாறாக அவற்றை மனதில் வைத்து கொண்டு, சண்டையை பெரிதாக்கினால் பயணம் நரகமாகும்.

வருடத்துக்கு ஒரு முறையேனும் இதுவரை செல்லாத இடம் எதற்கேனும் அவசியம் சென்று வாருங்கள் நண்பர்களே ! அந்த பயணங்கள் உங்களுக்கு இனிய நினைவுகளையும், அற்புத அனுபவங்களையும் தரும் !

இதில் தவறவிட்ட சில விஷயங்களை உங்கள் அனுபவத்திலிருந்து நீங்களும் பின்னூட்டத்தில் பகிரலாம் !

வல்லமை ஏப்ரல் 30 இதழில் வெளியானது