Tuesday, May 16, 2017

மின்ட் ஸ்ட்ரீட்டில் ஒரு சுவாரஸ்யமான Food Walk...

Food Walk ...சென்னையின் சில இடங்களில் மிகப் பிரபலம் ! அதில் முக்கியமானது ... சென்னை பாரிஸ் கார்னர் அருகிலுள்ள மின்ட் ஸ்ட்ரீட் Food walk.

அண்மையில் நண்பர்கள் சிலர் மின்ட் ஸ்ட்ரீட்டில் Food Walk சென்றோம்..ஏற்கனவே சென்று அனுபவம் உள்ள திரு.  முரளி ரங்கராஜன் எங்களை முன்னின்று அழைத்து சென்றார்

மாலை 4 மணிக்கு எங்கள் பயணம் வேளச்சேரி ரயில் பயணத்தில் துவங்கியது. ரயிலை விட்டு இறங்கியதும் முதல் மற்றும் முக்கிய வேலையை பார்த்து விட்டு (வேறென்ன செலஃபீ தான் !) நடக்க துவங்கினோம்



அரசு மருத்துவ கல்லூரி மாணவர் விடுதி வழியே பூக்கடை போலீஸ் ஸ்டேஷன் அருகே சென்று இடது புறம் திரும்பி சற்று தூரம் சென்றால் மின்ட் ஸ்ட்ரீட் வந்து விடுகிறது

மேத்தா பிரதர்ஸ் மித்தாய் வாலா

நாங்கள் முதலில் சென்ற கடை..இங்கு வடா பாவ் தான் பிரசித்தி பெற்றது. நாங்கள் சாப்பிட்டதும் அதுவே !





வடா பாவ்.........உருளை கிழங்கு நன்கு வேக வைக்கப்பட்டு ஒரு தவாவில் கடுகு, பச்சை மிளகாய், பூண்டு, மஞ்சள் மற்றும் உப்பு  உள்ளிட்டவை சேர்க்கப்படுகிறது. சூடு குறைந்த பின் எலுமிச்சம் பழம் சைசில் உருண்டையாக உருட்டப்படுகிறது. இது பெங்கால் கிராம் மற்றும் கடலை மாவுடன் கலந்து  - உடன் சோடா மற்றும் உப்பு சேர்த்து  நன்கு வறுக்கப்படுகிறது. அற்புதமான போண்டா தயார். இதனுடன் சுவையான சட்னி (Green Chutney made of Coriander and garlic powder)  மற்றும் ஒரு Stuffed  Pav/ Bun சேர்த்து பரிமாறுகிறார்கள்.



நண்பர்கள் பலரும் ரசித்து சாப்பிட்ட உணவுகளில் இதுவும் ஒன்று !

காக்கடா ராம்பிரசாத் 

நாங்கள் சென்ற கடைகளில் குளிரூட்டப்பட்ட வசதியுடன், அமர்ந்து சாப்பிடும் படி இருந்த ஒரே கடை இது தான். பாதி பேர் தான் உள்ளே சென்று அமர்ந்து சாப்பிடுகிறார்கள்.   பெரும்பாலான மக்கள்   வெளியில் வாங்கி அங்கேயே சாப்பிட்டு .விடுகிறார்கள்.


ஆலூ டிக்கா, பாதாம் பால்  மற்றும் ஜிலேபி ஆகியவை இங்கு சாப்பிட்டோம்.

ஆலூ டிக்கா - தவாவில் நெய் ஊற்றி மிக நன்றாக வறுக்கப்பட்டு (deep fry ) செய்யப்படும் ஒரு உணவு. டிக்காவை துண்டு துண்டாக்கி - கடைந்த தயிர் அதன் மேலே ஊற்றப்பட்டு - சாட் மசாலா, ஜீரக பவுடர், தனியா, இனிப்பு சட்னி உள்ளிட்டவை சேர்க்கப்படுகிறது. இதனுடன் ப்ரெஷ் பன்னீர்  மற்றும் சீஸும் சேர்ந்து தரும்போது.. சாப்பிட ஓஹோ என்று இருக்கும். வயிறும் சீக்கிரம் நிரம்பிவிடும்.



பாதாம் பால் .. Simply Superb !

பாதாம் பால் பற்றி ஒரு நண்பர் சொன்னது "காலையில் ஓடும் முன் குடிக்க சிறந்த beverage இது !  பால் மற்றும் Almond இரண்டும் ஓடும் முன் குடிக்க மிகவும் உகந்தவை  !! "

(ரன்னிங் பிரியர்களாயிற்றே.. பல நேரம் .. ரன்னிங் பற்றி பேச்சு வராமல் இருக்காது !)

நிச்சயம் செல்ல வேண்டிய / தவற விடக்கூடாத கடைகளில் ஒன்று இது

லஸ்ஸி கடை

காக்கடா கடைக்கு அருகிலேயே உள்ளது ஏரியாவில் புகழ் பெற்ற லஸ்ஸி கடை.

காக்கடா கடைக்கு பக்கத்தில் ஒரு ஜைஜான்டிக் மனிதர் நின்று கொண்டிருக்கிறார். அவர் தான் லஸ்ஸி கடை ! அகில உலகிலும் இப்படி ஒரு லஸ்ஸி கடையை காண முடியாது ( கடை என ஒன்று இல்லாமல் தெருவில் நிற்கும் ஒரு மனிதரே கடை !)

அவரிடம் லஸ்ஸி வேண்டும் என்றதும், எத்தனை வேண்டும் என விசாரிக்கிறார். நாங்கள் காக்கடாவில் ஏற்கனவே ரவுண்ட் கட்டியதை பார்த்ததாலோ என்னவோ, உங்களால் முழு டம்பளர் லஸ்ஸி குடிக்க முடியாது; பாதி டம்பளர் எல்லாருக்கும் தருகிறேன் என்றார்.

பாதி டம்பளர் லஸ்ஸி 70 ரூபாய். முழு லஸ்ஸி  140 ரூபாய்.

அருகில்.. எதோ ஒரு சிறு இடத்தில் லஸ்ஸி தயாராகிறது; மொபைல் மூலம் ஆர்டர் தர அதிக காத்திருப்பின்றி,  சில நிமிடத்தில் லஸ்ஸி வந்து விட்டது.

எவ்ளோ பெரிய டம்பளர் !!!!!

கெட்டியான தயிர், சர்க்கரை, saffron இவை சரியான விகிதத்தில் சேர்க்கப்பட்டு - பெரிய சைஸ் கிளாசில் தரப்படுகிறது.

பாதி டம்பளர் லஸ்ஸி குடிக்க குறைந்தது 5 நிமிடம் எடுத்து கொண்டேன். லஸ்ஸியை சிறிது சிறிதாக முழுக்க என்ஜாய் செய்து ரசித்து ருசித்து குடிக்க வேண்டும்..நாக்கில் சென்று ஒட்டி கொள்கிறது லஸ்ஸி.. முடியும் போது ஒரு பிளசண்ட் ஷாக். அடியில் அட்டகாசமான பால்கோவா.. வாவ் !

தஞ்சை அன்பு லஸ்ஸியை பீட் செய்ய உலகில் இன்னொரு லஸ்ஸி இருக்குமா என நினைத்து கொண்டிருந்தேன்.. சென்னையின் இந்த லஸ்ஸி நிச்சயம் அன்பு லஸ்ஸியை தோற்கடித்து விடும்.



ஓனர் தினேஷ் சோனி.. ராஜஸ்தானில் இருந்து இங்கு வந்து செட்டில் ஆன wrestler ! குடித்து முடித்து விட்டு ஓனருடன் ஒரு செலஃபீ எடுத்து கொண்டோம். கிளம்பும் முன் அவரிடம் "இதுவரை இவ்வளவு அருமையான லஸ்ஸி குடித்ததே இல்லை; ரொம்ப அருமையா இருந்தது" என சொல்ல " எல்லாம் கடவுள் செயல் " என சொல்லிய படி வானத்தை பார்த்தார் . முகத்தில் மகிழ்ச்சியும் நிறைவும் தெரிந்தது.

அகர்வால் மிஸ்தான் பந்தர் 

நாங்கள் பானி பூரி சாப்பிட்ட இந்த கடை - வழக்கமாய் நாம் சாப்பிடுகிற பானி பூரி தரத்திலேயே இருந்தது.



இங்கு நாங்கள் வேறு எதுவும் சாப்பிட்டு பார்க்க வில்லை

கணேஷ் கூல் பார் (கரும்பு ஜுஸ் கடை)

மின்ட் தெருவில் இருந்து ஆவுடையப்பன் தெரு செல்லும் முனையில் உள்ளது இந்த கரும்பு ஜுஸ் கடை. எப்போதும் கூட்டம் அள்ளுகிறது.



12 ரூபாய்க்கு ஐஸ் போட்ட ஜுசும், 15 ரூபாய்க்கு ஐஸ் இல்லாத ஜுசும் கிடைக்கிறது. ஆஹா ஓஹோ இல்லை. கொடுத்த காசுக்கு நிச்சயம் நல்ல ஜுஸ்.



நிறைய நடப்பதாலும், இனிப்பு சாப்பிடுவதிலும் நிறையவே தாகமாய் இருக்கும். எனவே கரும்பு ஜுஸ் தாகத்தை தணிக்க பெரிதும் உதவியது !

சீனா பாய் டிபன் சென்டர் 

டிபன் சென்டர் என ஹோட்டல் போல பெயர் இருந்தாலும், இதுவும் ஒரு சிறு கடை தான்.


NSC போஸ் ரோடில் இருக்கும் இக்கடையில் சீஸ் முறுக்கு மற்றும் காக்ரா சாண்ட் விச் இரண்டுமே .. மிக ரசிக்கும் வண்ணம் இருந்தது.



சீஸ் உள்ளிட்டவை சிக்கனம் பார்க்காமல் போடுகிறார்கள். சின்ன கடை என்றாலும் லாபம் பார்க்காமல் - கொடுத்த பணத்திற்கு நியாயம் செய்கிறார்கள்...



அவசியம் செல்ல வேண்டிய சாப்பிட்டு பார்க்க வேண்டிய உணவு வகைகள் இவை. சின்ன விஷயம்: இவை இரண்டுமே தயார் செய்ய சற்று நேரம் எடுக்கிறது !

பொடி இட்லி கடை

பயணத்தின் இறுதியில் சாப்பிட்டது பொடி இட்லி கடை. சிறிய சைஸ் இட்லிகள் (மினி இட்லி அளவு அல்ல.அதை விட நிச்சயம் பெரிது; நமது வழக்கமான இட்லியை விட சற்று சிறிது )


பொடியுடன் நெய் ஊற்றப்பட்டு இட்லி மணக்கிறது. வயிறு ஏற்கனவே நிரம்பி இருந்ததால் ஆளுக்கு ஒவ்வொரு இட்லி மட்டுமே சாப்பிட்டோம். நிச்சயம் வித்தியாச சுவை; முயற்சித்து பார்க்க வேண்டிய கடை

சில குறிப்புகள் :

* வார நாட்களின் மாலை ஏராள மக்கள் பர்சேஸ் செய்ய வருவதால் கூட்டம் அதிகமாயிருக்கும். ஞாயிறு பாதி கடைகள் இருக்காது. எனவே சனிக்கிழமை மாலை Food walk க்கு செல்வது நல்லது 

* காரில் செல்வதை முடிந்த வரை தவிர்ப்பது நல்லது. மின்ட் ஸ்ட்ரீட்டில் பார்க் செய்வது மிக கடினம். ஒருவேளை கார் எடுத்து சென்றால் உயர் நீதி மன்றம் அருகே நிறுத்தி விட்டு நடக்க வேண்டும். 

* ரயில் என்றால் Fort ஸ்டேஷனில் இறங்கி நடக்கவேண்டும். கிட்டத்தட்ட முக்கால் கிலோ மீட்டர் நடை இருக்கும். அல்லது Fort ஸ்டேஷனில் இருந்து ஒரு ஆட்டோ மூலம் மின்ட் ஸ்ட்ரீட் வரை சென்று அங்கிருந்து நடையை துவங்கலாம்.



* மின்ட் ஸ்ட்ரீட் ரொம்ப நீட் ஆகவெல்லாம் இருக்காது. இதை மனதில் கொள்க ! கார், பைக், சைக்கிள், ரிக் ஷா, ஆட்டோ எல்லாம் - இரண்டு பக்கமும் செல்லும்; ( ஒன் வே என்று சொல்கிறார்கள். பார்த்தால் அப்படி தெரியலை ) வாகனங்களுக்கு இடையில் கிடைத்த கேப்பில் புகுந்து செல்லவேண்டும்.  

மின்ட் ஸ்ட்ரீட் 

* வாங்கும் உணவு வகைகளை அவசியம் பிரித்து சாப்பிடவும்.கொஞ்சம் கொஞ்சமாக சாப்பிட்டால் தான் பல இடங்களில் சாப்பிட்டு முயல முடியும். 

* அவசியம் ஏழெட்டு நண்பர்கள் அல்லது உறவினர்களுடன் செல்லுங்கள். உணவு சாப்பிடுவது ஒரு சந்தோசம் என்றால் அரட்டை அடித்தபடி அவர்கள் தரும் கமெண்ட்களுடன் செல்வது தான் சிறப்பே !

 நிறைவாக ...

இந்த Food walk சென்ற பலரும் அண்மையில் நண்பர்களானவர்கள் தான். (எனக்கு மட்டுமல்ல.. ஒரு சிலர் தவிர்த்து ஏராளமானோர் ஓரிரு வருடத்தில் வைப்ரன்ட் வேளச்சேரி வந்தவர்களே) ஆயினும் எந்த சிறு தயக்கமும் இன்றி இந்த Food walkல் ஒரே தட்டில் .....ஆளுக்கு ஒரு கை எடுத்து சாப்பிட தயங்கவே இல்லை.

எந்த ஒரு உணவையும் யாரும் முழுமையாக சாப்பிட வில்லை ( கரும்பு ஜுஸ் தவிர) ..எல்லாம் கொஞ்சம் கொஞ்சம் தான். அநேகமாய் பலரும் அன்று இரவு டின்னர் சாப்பிட்டிருக்க மாட்டார்கள் ! அந்த அளவு இனிப்பு மற்றும் ஸ்நாக்சிலேயே வயிறு நிரம்பி விட்டது.



வேளச்சேரியில் கிளம்பி - சென்னை Fort சென்று - அத்தனை வகை உணவுகளை சாப்பிட்டு, ஆங்காங்கு தொடர்ந்து மினரல் வாட்டர் பாட்டில் வாங்கி குடித்த படியே இருந்தும் கூட, ஒருவருக்கான செலவு ..200 ரூபாயை கூட தாண்டவில்லை..

 இவ்வளவு குறைவான செலவில் - உணவால் வயிறும், உடன் வந்த நண்பர்களால் மனதும் நிறைந்து போனது.. !

அனைத்தும் கூடி வந்தால்.. ஒரு நான் வெஜ் Food walk (அத்தோஸ்) விரைவில் நடக்கலாம் !

நன்றி:

புகைப்படங்கள் -  வடிவேல் & ஆரத்தி

அடிஷனல் தகவல்கள் - ஹேமா ஸ்ரீகாந்த் & பாஸ்கர் 

Wednesday, May 10, 2017

நங்கநல்லூர் .......ஒரு விரிவான பார்வை

ங்கநல்லூர்....

ஒரு காலத்தில் சென்னை புறநகராக இருந்து - இன்று சென்னையின் ஒரு முக்கிய அங்கமாக மாறியுள்ளது. முழுக்க முழுக்க குடியிருப்புகள் மட்டுமே.. தொழிற் சாலைகள் போன்றவை மருந்துக்கும் இல்லை.


சென்னை வந்த போது நான் முதன்முதலில் தங்கிய இடங்களுள் ஒன்று நங்கநல்லூர். மாமா - மாமி வீடு இங்கு தான் உள்ளது (இப்போது இருவரும் இல்லை; அடுத்தடுத்த வருடம் தவறி விட்டனர்) ; 20 வருடம் முன்பு பார்த்த நங்கநல்லூருக்கும் இப்போதைக்கு நிறையவே வித்யாசம்.

அருகில் உள்ள  மடிப்பாக்கம், ஆதம்பாக்கம், பல்லாவரம் போன்ற ஏரியாக்களை விட நங்கநல்லூரை மக்கள் அதிகம் விரும்ப முக்கிய காரணம் இங்குள்ள அகலமான சாலைகள்....மற்றும் கோவில்கள் !

முன்கதை சுருக்கம் 

நங்கநல்லூர் என்கிற ஏரியா கடந்த 40 வருடத்திற்கு முன் தான் உருவாகியது; அதற்கு முன் முழுவதும் வயல் வெளிகள். முதன் முதலில் சில ஆயிரம் ரூபாய்க்கு இடம் வாங்கி சிலர் குடி வந்தனர்.

அப்போது பழவந்தாங்கல் ரயில் நிலையமோ திரிசூலம் ரயில் நிலையமோ கிடையாது; செயின்ட் தாமஸ் மவுண்ட் ரயில் நிலத்தில் இறங்கி இருந்த ஒரே பேருந்தில் ஏறி நங்கநல்லூர் வரவேண்டும்

நங்கநல்லூர் கோ ஆபரேட்டிவ் பில்டிங் சொசைட்டி பிளாட் போட்டு விற்க துவங்கிய பின் மக்கள் கொஞ்சம் கொஞ்சமாக குடியேற துவங்கினர். முதலில் அதிகம் வந்த மக்கள் மத்திய மற்றும் மாநில அரசு ஊழியர்கள். பின் அடுத்தடுத்து மற்றவர்களும் வரத்துவங்கினர் !

அன்றும் இன்றும் 

நங்கநல்லூர் என்றால் ஒரு காலத்தில் .. எப்போதோ ஒரு முறை பஸ் வந்து போகும், சுமாரான சாலைகள் கொண்ட,  Connectivity க்கு சுமாரான  ஊர் என்று 20 ஆண்டுக்கு முன் வெளிநாட்டில் சென்று செட்டில் ஆன நங்கநல்லூர் வாசிகளுக்கு மனதில்  பதிந்திருக்கலாம்.

இன்று நங்கநல்லூர்..  அட்டகாசமான சிமெண்ட் சாலைகள்.. (வெள்ளத்தில் கூட சிமெண்ட் சாலைகள் பாதிக்கப்படலை !) அதிகமான பேருந்துகள், ஏராள சூப்பர் மார்க்கெட்டுகள், மெட்ரோ ஸ்டேஷன் என அசத்துகிறது !

பழவந்தாங்கல் Vs நங்கநல்லூர்

நங்கநல்லூருக்கு ரயிலில் வந்தால்  பழவந்தாங்கல் ரயில் நிலையத்தில் இறங்க வேண்டும். இந்த ரயில் நிலையம் அருகில் நான்கைந்து தெரு மட்டும் பழவந்தாங்கல், சென்னை -114 என்று கூறுகின்றன. உடனேயே நங்கநல்லூர் (சென்னை 61) வந்து விடுகிறது !

பழவந்தாங்கல் மற்றும் நங்கநல்லூர் ஒட்டி பிறந்த இரட்டை பிறவிகள் ! பிரிக்க முடியாத இரு ஊர்கள் என்றால் அவை இவை தான். குறிப்பாக நங்கநல்லூர் இல்லாமல் பழவந்தாங்கலுக்கு என தனி identity இருக்காது !

பழவந்தாங்கல் ரயில் நிலையத்தில் இறங்குவோரில் 10 % பழவந்தாங்கலுக்கு சென்றால் அதிகம். 90% நங்கநல்லூர் செல்லும் மக்கள் தான் !

சாலைகள்.. பெயர்கள்....

நங்க நல்லூரில் சாலைகளுக்கு பெயர் வைக்க நிரம்ப சிரமப்படவில்லை; தில்லை கங்கா நகரை எடுத்து கொண்டால் முதல் தெரு,  இரண்டாவது தெரு என 35 வது தெருவிற்கு மேல் நீள்கிறது. இதை தவிர நங்கநல்லூர் முதல் தெரு, இரண்டாம் தெரு என 45க்கு மேல் செல்கிறது. பீ.வி நகர் என்பது இன்னொரு முக்கிய ஏரியா. இங்கும் முதல் தெரு... இரண்டாம் தெரு கதை தான். இப்படியே நம்பரை வைத்தே நூற்றுக்கும் மேற்பட்ட தெருக்கள் இருக்கின்றன.

தில்லை கங்கா நகரில் இந்த நம்பரை பெயராக கொண்ட தெருக்களை  கண்டுபிடிப்பது புது ஆட்களுக்கு கஷ்டமான காரியம். 15 வது தெருவுக்கு உள்ளே போனால் குறுக்கே 18 வது தெரு இருக்கும். 16 எங்கே என மண்டையை உடைத்து கொள்ளணும்.சில நேரம் ஒரே ரோடில் பாதி வரை 15 வது தெரு.. அடுத்த பகுதி சம்பந்தமே இல்லாமல் 27 வது தெரு என்று இருக்கும் !

இரத்தினபுரம் மலைச்சரிவு என்ற வித்தியாச பெயருடன் ஒரு சாலை 

கமர்ஷியல் பக்கம் 

பழைய காலத்தில் கமர்ஷியல் ரோடு  என்றால் அது.. எம் ஜியார் ரோடு ! தற்போது நான்காவது மெயின் ரோடு.. ! வசந்த் அண்ட் கோ, விவேக்ஸ் அண்ட் கோ, முருகன் இட்லி கடை, GRT Jewellery என பாதி தி.நகரை தனக்குள் கொண்டிருக்கிறது . இதே தெருவில் இருக்கும் சிறிய கடையான சிதம்பரம் ஸ்டோர்ஸ் - ஒரு பாரம்பரிய அடையாளம். எவ்வளவோ பெரிய கடைகள் வந்தபின்னும் இன்னும் சிதம்பரம் ஸ்டோர்ஸ் - என்பது பேருந்து  நிறுத்த அடையாளமாக இருக்கிறது

வங்கிகள் 


கோவில்களுக்கு இணையாக ஏராள வங்கிகள் நங்கநல்லூரில்  உள்ளது. தேசிய மயமான வங்கிகளில் இந்தியன் வங்கி, இந்தியன் ஓவர்சீஸ் வங்கி, சிண்டிகேட் வாங்கி, KVB துவங்கி தனியார் வங்கிகளில் HDFC, Axis, ICICI, IDBI, Repco  என அண்மையில் உதயமான ஈக்குவிட்டாஸ்  வங்கி வரை இங்கு உண்டு. இதனால் பென்ஷனர்களின் சொர்க்க பூமியாக விளங்குகிறது நங்கநல்லூர் !

பூங்காக்கள்- உடற் பயிற்சி 

ஏராள பூங்காக்கள் இருக்கின்றன.குறிப்பாக சுதந்திர தின பூங்கா - நிறைய மரங்களுடன் பார்க்கவே கண் கொள்ளா காட்சியாக இருந்த இப்பூங்கா வரதா புயலில் எக்கச்சக்க மரங்களை இழந்து நிற்கிறது.

காலை 5 மணி துவங்கி பார்க்கை மக்கள் மொய்க்க துவங்கி விடுகிறார்கள்



எல்லா பார்க் போல நடக்கிற மக்கள் தான் அதிகம்.  யோகாவிற்கென தனி அறை ..அதில் 10-15 பேர் யோகா செய்து பழகுகிறார்கள்.


                           

இன்னொரு பக்கம் ஷட்டில் ஆடுகிறார்கள் ;ஓட்டம் முடித்து விட்டு வந்த வீரர்கள் ஸ்ட்ரெட்சஸ் செய்து கொண்டிருக்கிறார்கள்.

பண்டிட் ரன்னர் எனப்படும் இவர்கள் ஒவ்வொரு திங்கள்-புதன் - வெள்ளி  ஆகிய 3 நாள் இங்கிருந்து காலை 5.30க்கு ஓட்டத்தை துவக்குகிறார்கள். இதில் இணைய எந்த கட்டணமும் இல்லை; விருப்பமுள்ள எவரும் சுதந்திர தின  பூங்காவில் இவர்களை சந்தித்து இணையலாம் .

நூறடி சாலை அருகிலேயே நான்கைந்து பார்க்குகள் உள்ளன  ;ஸ்கேட்டிங் பயிற்சிக்கு ஒரு தனி கிரவுண்டும் உள்ளது

கோவில்கள்

சின்னதும் பெரியதுமாய் நூற்றுக்கும் மேற்பட்ட கோவில்கள்  இங்கு உண்டு.  இதனால் நங்கநல்லூரை கோவில்கள் நகரம் என்றும் சின்ன காஞ்சிபுரம் என்றும் சொல்கிறார்கள்.

பழமையான மற்றும் முக்கிய கோவில்கள் என்றால் -  வரசித்தி விநாயகர் கோவில், உத்திர குருவாயூரப்பன் கோயில், ஐயப்பன் கோயில், இராஜராஜேசுவரி கோயில், இராகவேந்திர கோயில், சத்ய நாராயணன் கோயில், தேவி கருமாரியம்மன் கோயில், முத்து மாரியம்மன் கோயில், ஏழூரம்மன் கோயில், ஹயவதன பெருமாள் கோயில், அர்த்த நாரீசுவரர் கோயில், லட்சுமி நாராயணன் கோயில், லட்சுமி ஹயக்ரீவர் கோயில் !

குறிப்பிட்டு சொல்ல வேண்டிய மற்றொரு கோவில் -32 அடி உயரம் கொண்ட ஆஞ்சநேயர் கோவில் ! நங்கநல்லூருக்கு ஒரு அடையாளமாக திகழ்கிறது !

நங்கநல்லூர் பிரசாதம்  : Information is Wealth !

நங்கநல்லூரில் இரவு சாப்பாடு பற்றி கவலையே படவேண்டாம். பல கோவில்களில் இரவு நேரம் பிரசாதம் இலவசமாக கிடைக்கும். ஆஞ்சநேயர் கோவில், ஹயக்ரீவர் கோவில், குருவாயூரப்பன் கோவில் இவையெல்லாம் அநேகமாக தினம் பிரசாதம் கிடைக்கும் கோவில்கள். இவை அனைத்தையும் ஒரு ரவுண்ட் வந்தால் நிச்சயம் இரவு உணவு சாப்பிட வேண்டிய அவசியம் இல்லை.

இந்த வசதி இரவில் மட்டும் தான் உண்டு என்றும் காலை/ மதிய நேரங்களில் இல்லை என்றும் வருத்தத்துடன் சொன்னார் நமது நங்கநல்லூர் நண்பர் !

குடிநீர் - டிரைனேஜ் 

முதலில் நல்ல விஷயம்- டிரைனேஜ் - பல இடங்களுக்கும் வந்து விட்டது. நல்லதொரு ரிலீப் இது.

குடி நீர் - மெட்ரோ வாட்டர் கனக்ஷன் மற்றும் பாலாறு நீர் பல இடங்களுக்கும் வருகிறது. ஆனால் இது தண்ணீர் பிரச்சனை இல்லாத நேரத்தில் தான். கோடையில் மெட்ரோ வாட்டர் வாரத்தில் ஓரிரு நாளோ, ஒரு நாளோ தான் வருகிறது.

போர்வெல் வெய்யில் காலத்தில்  பல்லிளித்து விடுகிறது.. எனவே சில ஏரியாக்களில் மட்டும் வெளியிலிருந்து தண்ணீர் வாங்க வேண்டிய சூழல்.

சாப்பாடு

உணவகங்களை பொறுத்த வரை அடையார் ஆனந்த பவன் துவங்கி, முருகன் இட்லி கடை உள்ளிட்ட பல பிராண்டட் கடைகள் ஒரு பக்கம், மிக சாதாரணமான - ஆனால் அருமையான மெஸ்கள் இன்னொரு பக்கம் என ஏராள தேர்வுகள் உள்ளன.( பெரிய ஹோட்டல்கள் எல்லாம் அண்மையில் தான் இங்கு வந்துள்ளன.. !)

துர்கா நிவாஸ் .. பழமையான ஹோட்டல்.. சீப் அண்ட் பெஸ்ட் ...அதனாலேயே இன்றும் பலரால் விரும்பப்படுகிறது

ராஜபுத்ரா ரெஸ்ட்டாரண்ட், சீஸ் அண்ட் பிரீஸ், 80 டிகிரி ஈஸ்ட், அன்னப்ரஸன்னம் இவை புதிதாய் வந்துள்ள  நல்ல ஹோட்டல்கள் !

நண்பர் ஒருவர் சொன்ன தகவல்: நங்கநல்லூரின் மைய பகுதியில் நான் வெஜ் ஹோட்டல்கள் அநேகமாய்  இருக்காது. வானுவம்பேட்டை சர்ச் அருகிலோ - ரெங்கா தியேட்டர் அருகிலோ ஒரு சில நான் வெஜ் ஹோட்டல்கள் இருக்குமே ஒழிய மற்றபடி நகரின் - மைய பகுதியில் நான் வெஜ் ஹோட்டல்கள் இல்லை !

போலவே - கறிக்கடையும் கூட இதே ஏரியாவில் அதிகம் காண  முடியாது. இது யாரும் restriction போட்டு  வரவில்லை;தானாகவே அமைந்தது என்கிறார்.

அதே நண்பர் சொன்ன இன்னொரு தகவல்: ஒரு காலத்தில் இங்கு வசிப்போரில் குறைந்தது 75 % மக்கள் பிராமணர்களாக  இருந்துள்ளனர்.தற்போது அது ஓரளவு குறைந்தாலும் இன்னமும் 60 % பேராவது பிராமணர்கள் தான் என்றார்.

தியேட்டர்கள் - மருத்துவமனைகள்

ரங்கா தியேட்டர் என்பது நங்கநல்லூரில் முக்கிய அடையாளத்தில் ஒன்றாக இருந்தது. இப்போது அது வெற்றிவேல் மற்றும் வேலன்  என்ற இரு தியேட்டர் ஆகிவிட்டது. ஆனால் மக்கள் பீனிக்ஸ் உள்ளிட்ட மால் செல்லவே அதிகம் விரும்புகிறார்கள்.

வேலனில் 2  D  சவுண்ட் சிஸ்டம் தான். ஒருவேளை அருகில் சினிமா பார்க்கணும் என்றால் வேலனை விட - மடிப்பாக்கம் குமரன் (4 D சவுண்ட்) நிச்சயம் பரவாயில்லை என்கிறார்கள். அதுவும் ஓரிரு கிலோ மீட்டர் தூரத்தில் தான் உள்ளது.

மருத்துவமனைகளை பொறுத்தவரை ஹிந்து மிஷன்  ஹாஸ்பிடல், சிட்னி மருத்துவமனை, ஸ்ரீ சக்ரா .. இவை மூன்றுமே மக்கள் விரும்பும் மருத்துவ மனைகள்.. மேலும் தனி மருத்துவர்களிலும் டயபடீஸ் ஸ்பெஷலிஸ்ட் ஆன ஹரிஹரன் துவங்கி ஏராள நல்ல டாக்டர்கள் உண்டு.

நகரமா ......கிராமமா ?

நங்கநல்லூரில் தனிப்பட்ட முறையில் எனக்கு ரொம்ப பிடித்த விஷயம்.. என்ன தான் நவநாகரீகமாக மாறினாலும், இன்னமும் தன் பழமையை விடாதிருப்பது தான் !

பல இடங்கள் தொடர் அடுக்கு மாடி குடியிருப்புகளால் நிறைந்திருந்தாலும் BV நகரின் சில பகுதிகள் கிராமத்திற்கென்று உள்ள பல விஷயங்களை தன்னிடம் கொண்டுள்ளது. உதாரணத்திற்கு இந்த போஸ்ட்டரை பாருங்கள்

முதலாவது பிறந்த நாளுக்கு ரஜினி, விஜய் படம் போட்டு பிளக்ஸ் 
அதே நகரில் சென்று கொண்டிருக்கும்போது ஒரு குறிப்பிட்ட பகுதி வந்ததும் அப்படியே ஷாக் ஆகி நின்று விட்டேன். இந்த படத்தை பாருங்கள்.




பெரிய மலையை குடைந்தது போன்ற தோற்றம்.. நங்கநல்லூரின் மையப்பகுதியில் உள்ளது இந்த இடம்.

BV நகரில் செல்ல  பிராணிகள் சிகிச்சை மையம், கால்நடை மருந்தகம் இவை இலவசமாக இயங்குகின்றன. இதுவும் கூட கிராமங்களில் அதிகம் காணக்கூடிய ஒரு விஷயம்..இங்கு காண முடிகிறது







வீடுகள் .. Flat கள் 

முதன் முதலில் 2000 ரூபாய்க்கு ஒரு கிரவுண்ட் விற்ற நங்கநல்லூரில் இன்று காலி இடம் கிடைப்பது அரிதிலும் அரிது. Flat கள் தான் கிடைக்கிறது. விலை 7500 லிருந்து தான் துவக்கமே. 60- 70 லட்சத்துக்கு குறைவாய்  இன்று Flat கிடைப்பதே கடினம் என்கிற நிலை !

ரங்கா தியேட்டரில் நின்று பார்த்தால் ஒரு காலத்தில் நேரு அரசு பள்ளியும், ரயில்வே ஸ்டேஷனும் தெரியுமாம் ! இன்று காலி இடம் என்பதே இல்லை !

காலி மனை ஒரு கிரவுண்ட் சற்று உள் தள்ளியிருந்தால் 1.5 கோடியும், முக்கிய இடமெனில் 2.5 கோடிக்கும் செல்கிறதாம் !

இடம்/ வீடுகள் இவற்றின் விலை இவ்வளவு இருந்தாலும், வாடகைக்கு வீடுகள் ( 2 பெட் ரூம்) 8000 துவங்கி பல ரேட்டில் கிடைக்கிறது. 10000 - 12000 ல் நல்ல டீசண்ட் ஆன 2 பெட் ரூம் வீடு கிடைத்து விடும். (தற்சமயம் .. கடந்த ஓரிரு வருடமாய் வாடகை பொதுவாய் சற்று குறைந்திருப்பதாக சொல்கிறார்கள்)    

பள்ளிகள் - கல்லூரிகள்

ஒரு காலத்தில் நேரு அரசு பள்ளி தான் ஒரே பள்ளியாக இருந்தது. இப்போது பலரும் விரும்பும் பள்ளிகள் மாடர்ன் ஸ்கூல் மற்றும் பிரின்ஸ் ஸ்கூல்.


Image result for nanganallur images

மாடர்ன் CBSE  பாட திட்டத்தை அடிப்படையாக கொண்டது.  பிரின்ஸ் முன்பு மெட்ரிகுலேஷன் பாட திட்டத்தையும், தற்போது ஸ்டேட் போர்ட் மற்றும் CBSE பள்ளி ஒன்றும் நடத்தி வருகிறதுஇந்த இரு பள்ளிகளுமே பல ஸ்டேட் ரேங்க் மாணவர்களை தொடர்ந்து உருவாக்கும் பள்ளிகள் !

கேந்திர வித்யாலயா, பெஸ்ட் மெட்ரிகுலேஷன், செல்லம்மாள் வித்யாலயா உள்ளிட்ட இன்னும் பல பள்ளிகள்

ஆனால்  நங்கநல்லூர் மக்களின் நீண்ட நாள் கோரிக்கைகளில் ஒன்று - ஒரு அரசு கல்லூரி வேண்டும் என்பது.

நேரு அரசு மேல்நிலைப்பள்ளி பத்து ஏக்கருக்கும் மேல் பறந்து விரிந்து கிடக்கிறது. இங்கு காலி இடம் ஏராளமாக உள்ளது. அரசு இடம்/ நிலம் தான்.  மாநில அரசாங்கம் நினைத்தால் நிச்சயம் ஒரு அரசு கல்லூரி கட்டலாம். ஆனால் 20 வருடத்திற்கு மேலாக இந்த கோரிக்கை இருந்தும் எந்த அரசும் இதனை நிறைவேற்றவில்லை.

அருகில் ஜெயின் கல்லூரி இருந்தாலும் - அது தனியார் கல்லூரி - கட்டணம் சற்று அதிகம். அரசு கல்லூரி நங்கநல்லூரில் வந்தால் அது நங்கநல்லூருக்கு மட்டுமின்றி சுற்றியுள்ள ஆலந்தூர், மடிப்பாக்கம் உள்ளிட்ட ஊர்களுக்கும் பயன் தர கூடியதாய் இருக்கும்

மற்றொரு தேவை மினி பஸ்கள் மிக குறைந்த அளவில் இயக்கப்படுகிறது. பிற பேருந்துகளின் எண்ணிக்கையும் மடிப்பாக்கம்- கீழ்கட்டளை அளவிற்கு இல்லை; எனவே ஏராள மக்கள் ரயில் நிலையம் சற்று தள்ளி உள்ளதால் கால் டாக்சி - ஆட்டோவை இன்னும் நம்ப வேண்டியுள்ளது. மினி பஸ்கள் இன்னும் அதிகம் இயக்கப்பட வேண்டும் என்பதும் மக்களின் கோரிக்கைகளில் ஒன்று.

என்ன இடம் இது?



நங்கநல்லூர் பஸ் டிப்போ... காலை ஏழரை மணிக்கு இந்த நிலையில் இருக்கிறது.. ! நல்ல வேளை 8 மணிக்கு திரும்பி வந்த போது பேருந்து ஒன்று நின்று கொண்டிருந்தது

பஸ் டெர்மினஸ் அருகிலேயே உழவர் சந்தை.. அதுவும் பரிதாப நிலையில் - பூட்டி கிடந்தது ; காலை 8 மணிக்கு மேல் தான் அதையும் திறக்கிறார்கள்



ஒரு காலத்தில் பஸ் சர்வீஸ் இங்கு மிக மிக குறைவு. 18 C பஸ் ஒன்று தான் இங்கு வரும். இதனால் ஆட்டோ வாலாக்கள் சவாரிக்கு நிறையவே சார்ஜ் செய்ய  ஆரம்பித்தனர். மேலும் வெளியிலிருந்து வரும் ஆட்டோக்களை இங்கு சவாரி ஏற்ற விடமாட்டார்கள் .. நாங்கள் தான் சவாரி ஏற்றுவோம் என.. இதனால் வெளியில் இருந்து வரும் போதும் ஆட்டோக்கள் " நங்கநல்லூரா? அங்கே ரிட்டன் சவாரி நாங்க ஏத்த கூடாது; காலியா வரணும்" என சொல்லி அதிகம் சார்ஜ் கேட்பார்கள் ! ஷேர் ஆட்டோக்களும் கூட இங்கு காண முடியாது !

இப்போது  18 C தவிர இன்னும் சில பஸ்களும், மினி பஸ்ஸும் கூட வரத்துவங்கி விட்டன.

தவிர - சாந்தி பெட்ரோல் பங்க் வழியே GST  சாலையை அடைந்தால் எல்லா இடத்துக்கும் ஏராள பேருந்துகள் ! பஸ்ஸில் போகணும் என்றால் நான்  GST  சாலைக்கு வந்து விடுவேன்; அது தான் வசதி என்கிறான் எனது பள்ளிக்கால நண்பன் மது !

மெட்ரோ ரயில் 

நங்கநல்லூர் சாலை என ஒரு மெட்ரோ ரயில் ஸ்டேஷன் இருக்கிறது ! ஆனால் வீட்டில் கோபித்து கொண்டு வெளியே போன பெரியவர் மாதிரி நங்கநல்லூரை தாண்டி GST சாலையில் இருக்கிறது. இங்கு சென்று சேர வழி, சாலை எல்லாமே மக்கள் விரும்பும் படி இல்லை என்பதால் தற்சமயம் அது பரவலாக நங்கநல்லூர் மக்களால் பயன்படுத்த படவில்லை !

காமெடி கார்னர் 

BV நகரில் கண்ட ஒரு போர்டு..

சர்க்கரை நோயை கட்டுப்படுத்தும் நாட்டுப்பால் மற்றும் ஆட்டுப்பால் கிடைக்குமாம்..இதில் டிவி புகழ் என்ற பந்தா வேறு...



நங்கநல்லூர் டைம்ஸ்

நங்கநல்லூர் டைம்ஸ் பத்திரிகை 40000 பிரதிக்கு மேல் அச்சிடப்பட்டு வாரம் இருமுறை வெளியாகிறது. இதன் காப்பி இணையத்திலும் காண முடிகிறது

கடிகாரத்தில் கேட்கும் திருக்குறள் - நங்கநல்லூரில் புதுமை 



நங்கநல்லூருக்கு ஒரு புது வரவு.. மணிக்கூண்டுகள்.இவற்றில் புதுமை என்னெவென்றால்.. இவை ஒவ்வொரு மணி நேரத்திற்கும் ஒரு முறை ஒரு திருக்குறளை ஒலிக்கின்றது

கண்ணன் நகர், சுதந்திர தின பூங்கா, TNGO காலனி லட்சுமி நகர் ஏழாவது தெரு எஸ்ட்டென்ஷன் மற்றும் MMTC காலனி ஆகிய இடங்களில் இது நிறுவப்பட்டுள்ளது. காலை 6 மணி முதல் இரவு 10 வரை ஒவ்வொரு மணி நேரத்திற்கும் திருக்குறள் ஒலிக்கும்

மூன்று சப்வேக்களும் மழை நாட்களும்   

நங்கநல்லூரில் 3 சப்வேக்கள் உள்ளன. பழவந்தாங்கல் சப்வே, தில்லை கங்கா நகர் சப்வே, மீனம்பாக்கம் சப்வே இவை மூன்றும் நங்கநல்லூரை இணைக்கும் சப்வேக்கள்

சில மழை நேரங்களில் அடைப்போ அல்லது வேறு என்ன பிரச்சனையோ இதில் ஒரு சில சப்வே மழை நீரில் நிரம்பி ஒரு சில நாள் போக்குவரத்து பாதிப்பதும்  உண்டு



2015 சென்னையை உலுக்கிய வெள்ளத்தில் நங்கநல்லூரில் மாடன் ஸ்கூல் மற்றும் மார்க்கெட் அருகே உள்ள ஏரியாக்கள் தான் மோசமாக பாதிக்கப்பட்டதாகவும் மற்ற சில இடங்களில் தெருவில் தண்ணீர் ஓடியதோடு சரி.. வீடுகளுக்கு உள்ளே தண்ணீர் வரவில்லை என்கிறார்கள்...

பிளஸ் 

கோயில்கள்.. இதனை தவிர்த்து விட்டு நங்கநல்லூரை யோசிக்கவே முடியாது. இங்கு வந்து பலரும் செட்டில் ஆக முக்கிய காரணங்களில் ஒன்று...இங்குள்ள அற்புத கோவில்கள்

மிக அமைதியான, பழமையை இன்னும் விட்டு கொடுக்காத இடம்.

ஓய்வு பெற்றவர்கள் மிக விரும்பும் ஊர்களில் ஒன்று நங்கநல்லூர் !

ஏர்போர்ட்டுக்கு அருகில் உள்ளது. கிண்டியில் ஏராள கம்பெனிகள் வந்துவிட்டன... அவற்றை 15 நிமிடத்தில் அடையலாம். இன்னொரு புறம் OMR சாலையும் ரொம்ப தூரம் இல்லை

ரயில் மற்றும் பஸ் டெர்மினஸும் உள்ள அரிதான ஊர்களில் ஒன்று.

பெரும்பாலும் அகலமான சாலைகள்....

அகலமான சாலைகள் 
மைனஸ் 

வாடகைக்கு வீடு மற்றும் புதிதாக வாங்க எண்ணினால் அதன் விலை இரண்டுமே மிக அதிகம்.எனவே ஏற்கனவே இருப்போர் இங்கு தொடர்ந்து இருப்பது தொடர்கிறது. புதிதாக வருவோர் மேடவாக்கம், மடிப்பாக்கம் போன்ற இடங்களில் விலைக்கு வாங்கவும், வாடகைக்கு இருக்கவும் நினைக்க காரணம் அங்கு affordable ஆக இருக்கிறது என்பதால் தான்.

தண்ணீர் கஷ்டம் சில இடங்களில் உண்டு. சில இடங்களில் போர்வெல் குறிப்பிட்ட அளவே இருக்கும். 5 நிமிடத்திற்கு மேல் தண்ணீர் வராது. விட்டு விட்டு தான் மோட்டார் போட்டு தண்ணீர் ஏற்றுவர். இந்த ஏரியாக்களில் தண்ணீர் வெளியே வாங்குவது ஒரு தனி செலவாக அமைந்து விடுகிறது.

வளர்ச்சியை பொறுத்தவரை வேளச்சேரியும், நங்கநல்லூரும்  அருகருகில் இருந்தாலும் வேளச்சேரி பெற்ற  வளர்ச்சியை நங்கநல்லூர் பெறவில்லை என இங்கு 30 ஆண்டுகளுக்கு மேலாக வசிக்கும் ஒரு நண்பர் கூறினார். இதற்கு காரணம் புதுமையை அதிகம் விரும்பாத conservative மனப்பான்மை தான் என்பது இவரின் கருத்து !

இறுதியாக...

இங்கிருக்கும் மக்களை கேட்டால் இந்த இடத்தை விட்டு நகரவே மாட்டார்கள் என்பது தெரியும். அலுவலகமோ, கல்லூரியோ எதுவாய் இருந்தாலும் ரயிலில் செல்லும் வசதி, மெட்ரோ வாட்டர் கனக்ஷன், டிரெயினேஜ் வசதி, வயதானோருக்கு விருப்பமான கோவில்கள், அகல சாலைகள்..எல்லாவற்றுக்கும் மேல் இன்னும் பழமையை எங்கோ ஓர் ஓரத்தில் வைத்திருக்கிறது நங்கநல்லூர் !

நன்றி:

மதுசூதன்
ஸ்ரவண் குமார் &
திருமதி பூமிஜா 

முந்தைய பதிவு  

சென்னை 1 முதல் 130 வரை-பள்ளிக்கரணை - ஒரு பார்வை


Sunday, May 7, 2017

வெறும் காலில் 5 கி மீ ஓட்டம் ஒரு அனுபவம்

ன்று உலக Bare foot running தினம். இதனை முன்னிட்டு பெசன்ட் நகரில் உள்ள ரன்னிங் குழு ஒரு இலவச 5 கி மீ ஓட்டத்திற்கு ஏற்பாடு செய்திருந்தனர். கலந்து கொண்ட அனைவருக்கும் தரமான டி ஷர்ட்டுகள் இலவசமாக வழங்கப்பட்டது

ஓட்டத்தின் போது Kesevan VS மற்றும் அவரது வழக்கறிஞர் நண்பர்கள் பழனி & மூர்த்தி ஆகியோரை சந்தித்தேன். 



பழனி அவர்களும் நானும் முழு ஓட்டமும் ஒன்றாக ஓடினோம்.வழக்கறிஞர் பழனி ஓட ஆரம்பித்த ஒரே வருடத்தில் முழு மாரத்தான் ஓடியவர்.. துவக்கமே 21 கி மீ தானாம் ! ஓட்டம் பல இனிய நண்பர்களை அறிமுகம் செய்து கொண்டே இருக்கிறது. ஜவ்வாதுவில் என்னை போலவே பழனி அவர்களும் 25 கிலோ மீட்டர் ஓடுவதால், இருவரும் மீண்டும் இணைந்து ஓடுவோம்..

அருமையான பாதை ...இது போன்ற சாலைகள் என்றால் - வெறும் காலில் ஓடலாமா. கண்ணாடி அல்லது முள் இருக்குமா என்ற கவலை இல்லை..

முதன் முறை திரு வெங்கடராமன் அவர்களை சந்தித்ததில் பெரும் மகிழ்ச்சி. ஓட்டம், சைக்கிளிங், நீச்சல் மூன்றிலும் கலக்கும் 45 வயதுக்கு மேலுள்ள இளைஞர்..ஓட்டம் குறித்து பல டிப்ஸ் ஓடுகிற அனைவருக்கும் சொல்லும் அற்புத மனிதர்..



வெறும் கால் ஓட்டம் பெரிய வித்யாசத்தை தரவில்லை; காலை கிளம்புவதில் 5 நிமிடம் குறைகிறது..விடிகாலையில் ஷூ, சாக்ஸ் போடுவது சற்று அலுப்பான வேலை தான். அந்த நேரம் மிச்சமானது.




மேலும் எனக்கு ஓடும்போது அவ்வப்போது ஷூ முடிச்சு கழன்று விடும். நின்று கட்டி விட்டு வர வேண்டும். அந்த நேரமும் மிச்சம்.


மற்றபடி பெரிய மாறுதல் தெரிய வில்லை; தொடர்ந்து ஓடஓட வித்யாசம் தெரியலாம். வெறும் காலில் ஓடுவது எப்போதோ ஒரு முறை எனக்கு நிகழலாம். தினமும் தற்போது வாய்ப்பில்லை..





பெசன்ட் நகரில் எத்தனை activities அந்த காலை நேரமே நடக்கிறது..அந்த நேரத்தில் பெசன்ட் நகர் கடற்கரை வேறு முகம் கொண்டிருந்தது. பல முறை சென்றும் காணாத வேறு முகம்..அந்த முகத்தை ரொம்ப பிடித்திருந்தது

கடந்த ஏழு ஞாயிறாக ஒவ்வொரு வாரமும் காலை வெவ்வேறு ஈவண்ட்களில் பங்கு கொண்டிருக்கிறேன்.. ஓட்டம் மட்டுமல்ல, சைக்கிள் ரைடு, டுவதல்லான், நங்கநல்லூரில் கோவில்களுக்கிடையேயான வித்தியாச ஓட்டம், இன்று வெறும் கால் ஓட்டம் ......வாழ்க்கை இப்போது தான் வண்ண மயமாக இருக்கிறது

பல்வேறு நண்பர்கள்,...இனிய அனுபவங்கள்.. போனஸாக நல்ல உடல் நலம்..இவை அனைத்தும் தரும் ஓட்டத்திற்கு வந்தனம் ! இந்த ஓட்டத்தை அருமையாக ஏற்பாடு செய்த குழுவினருக்கு நன்றியும் வாழ்த்துகளும் ...!

Saturday, May 6, 2017

வானவில் :நயன்தாராவின் டோரா + விஜய் டிவி மாப்பிள்ளை எனும் மெகா காவியம்

பார்த்த படம்- டோரா

நயன்தாரா, ஹரிஷ் உத்தமன், தம்பி ராமையா நடித்த த்ரில்லர் படம் ...டோரா. படத்தின் சில காட்சிகள் எங்கள் வீட்டருகே படமானது (இரண்டாவது வில்லனை காரில் துரத்தும் காட்சிகள்)

பேய் - வில்லன்களை பழி வாங்கும் வழக்கமான கதை தான். 2 வித்யாசம்.. இங்கு பேய்.. ஒரு நாய் !! மேலும் அது வந்து இறங்குவது மனிதர் மேல் அல்ல.. ஒரு காரின் மீது.

Image result for dora movie

இந்த 2 அம்சங்கள் மற்றும் காரை வைத்து கொஞ்சம் வித்யாசமாக எடுக்க முயன்றது தான் பார்க்க வைக்கிறது. மற்றபடி பெரிதாக ஈர்க்க எதுவும் இல்லை.

தம்பி ராமையா காமெடி செய்ய முயன்று மொக்கை போடுகிறார். ஸ்லிம் ஆன நயன் மட்டுமே ஆறுதல் !

தவற விடக்கூடாத படமெல்லாம் இல்லை. சனி, ஞாயிறில் ரொம்ப போர் அடிக்கிறது என்றால்... 2 மணி நேரம் சும்மா  பார்த்து வைக்கலாம்..அவ்வளவே !

ஐ. பி எல் கார்னர் 

மும்பை, கொல்கத்தா, ஹைதராபாத், புனே இவை தான் play off செல்லும் என்பது ஏறக்குறைய உறுதியாகி விட்டது. இதில் மாறுதல் வர.....ஹைதராபாத், புனே இனியுள்ள அனைத்து மேட்ச்சும் தோற்கணும்..டில்லி அல்லது பஞ்சாப் இனி வரும் அனைத்து மேட்சும் ஜெயிக்கணும். இவற்றுக்கு probability கம்மி தான் !

இந்த வாரத்தின் சிறந்த ஆட்டம் டில்லி வீரர் ரிஷப் பாண்ட்   குஜராத்துக்கு எதிரே அடித்த 97 ரன்கள். சச்சின் இந்த ஆட்டத்தை இதுவரை நடந்த ஐ. பி எல்லில் ஒரு மிக சிறந்த இன்னிங்ஸ் என கூறியிருக்கிறார்.

19 வயது பையன்.. பயமின்றி வெளுத்து வாங்குகிறான்.. ஏற்கனவே 5 நாள் ரஞ்சி போட்டிகளிலும் 100 முதல் 300 வரை அடித்து விட்டான். இப்போது 20-20ல் தன்னை நிரூபித்து வருகிறான்..

Mark my words......பையன் இந்தியாவுக்கு ஆடி கலக்கப்போவது உறுதி !

போஸ்ட்டர் கார்னர்



நானே சிந்திச்சேன் 

எந்த ஒரு துயரும் .. அந்த நேரத்தில் தான் அதீத வலி தருகிறது. மனம் அதனை சுற்றியே உலாவுகிறது. ஆனால் காலம் எல்லா துயரையும் கழுவிப்போகிறது..தீராத துயரென்று எதுவும் இல்லை.

உலகின் மிகப்பெரும் துயர் என்றால் குழந்தைகயை இழப்பது தான் என நினைக்கிறேன்.ஆனால் அத்தகைய பெற்றோரும் கூட சில மாதங்களில் மெல்ல எழவும், சில வருடங்களில் இயல்பு நிலைக்கு திரும்பவும் ஆரம்பிக்கிறார்கள். இந்த துயரிலிருந்தே மீள முடிந்தால் மற்ற துயரெல்லாம் பெரிதா என்ன?

கவிஞர் வைரமுத்து சொன்னது போல்

விடியாதே இரவென்று எதுவும் இல்லை
முடியாத துயரென்று எதுவும் இல்லை

ரசித்த காமெடி

மறைந்த மலையாள இயக்குனர் வி எம் சி ஹனிபாவை சரியாக பயன்படுத்தியவர் இயக்குனர் ஷங்கர். அவரது  முகபாவம்,மாடுலேஷன் எல்லாமே வித்யாசமாக  இருக்கும்.

சிவாஜி படத்தில் அவர் கத்தி குத்து வாங்கும் காட்சி ..அதற்கு பிறகு வரும் ஓரிரு நிமிடங்கள் அட்டகாச சிரிப்பு..

வயிற்றில் கத்தியால் குத்த, டாக்டர் தையல் போட்டதும் ஹனீபா கேட்கும் கேள்வி: பிரைனுக்கு ஒண்ணும் ஆகலியே?

ரஜினி கிளம்பும்போது " பாஸ் கத்தி குத்தெல்லாம் வாங்கியிருக்கேன். அந்த பணத்தை குடுக்க கூடாதா? " என பரிதாபமாக கேட்பதும், அதற்கு ரஜினி பதிலும்.. செம !




வைப்ரன்ட் வேளச்சேரியில் நடந்த சைக்கிளிங் ஈவென்ட் 

இது நடந்து இரு வாரங்கள் ஆனபோதும் நல்லொதொரு நிகழ்வு என்பதால் - தாமதமானாலும் பரவாயில்லை என பதிவு செய்கிறேன்

சென்னையில் பல ரன்னிங் மற்றும் சைக்கிளிங் குழுக்கள் உள்ளன. ஆனால் ரன்னிங் மற்றும் சைக்கிளிங் இரண்டும் இணைந்து, இரண்டிற்கும் நிறைய முக்கியத்துவம் கொடுத்து ஒரே குழுவில் செய்வது... மிக அரிது. வைப்ரன்ட் வேளச்சேரி அப்படி ஒரு அரிதான குழு.

இவர்கள் ஒவ்வொரு ஆண்டும் சைக்கிளிங் ஈவென்ட் ஏற்பாடு செய்கிறார்கள். 50 மற்றும் 100 கிமீ சைக்கிளிங்... என இரண்டு கேட்டகரி.. இரண்டிற்குமே நுழைவு கட்டணம் ரூ 300 (வழியில் கூல் ட்ரிங்ஸ், குடி நீர், பழங்கள் மற்றும் முடியும் போது காலை உணவு இவற்றுக்கான கட்டணம் இது )

இந்த ஈவெண்ட்டில் கலந்து கொள்ள ஒரு வாரம் முன்பு தான் ஹைபிரிட் சைக்கிள் வாங்கினேன். எனவே 50 கி, மீ தூரத்தை தேர்ந்தெடுத்தேன்

நிகழ்ச்சியை அறிவித்து 36 மணி நேரத்துக்குள் 150 பேருக்கும் மேல் ரிஜிஸ்டர் செய்ய உடனே குளோஸ் ஆகி விட்டது !! (வைப்ரன்ட் வேளச்சேரி குழு மட்டுமல்ல, வெளியில் உள்ள நண்பர்களும் கலந்து கொள்ளலாம் !)

நிகழ்ச்சியன்று திரு சைலேந்திர பாபு ஐ.பி எஸ் தனது காவல் படை வீரர்களுடன் எங்களுடன் 50 கி மீ சைக்கிள் ஓட்டினார்.

நிகழ்ச்சியில் ஆண்கள் மட்டுமல்லாது ஏராள பெண்களும் கலந்து கொண்டு வெளுத்து வாங்கினர்.

100 கி மீ தூரத்தை இரண்டரை மணி தூரத்தில் ஓட்டி கடந்த அஷ்வின். அருகே வைப்ரன்ட் வேளச்சேரியை துவங்கிய திரு அனில் ஷர்மா 

வைப்ரன்ட் வேளச்சேரி வாலன்டியர்கள் பல இடங்களிலும் இருந்து உதவினர்;குறிப்பாக சைக்கிள் பஞ்சர் ஆனவர், ஓட்டும்போது வேறு பிரச்சனை வந்தவர்.. இவர்களுக்கெல்லாம் வாலன்டியர்கள் வெய்யிலை பொருட்படுத்தாமல் அற்புதமான உதவிகள் செய்த வண்ணம் இருந்தனர்.

50 கி மீ தூரத்தை நான் 2 மணி நேரம் 16 நிமிடத்தில் முடித்தேன். அவ்வப்போது 20,30 கி மீ ஏற்கனவே ஓடியதால் அதிக சிரமப்படலை. 100 கி மீ ஒட்டியிருக்கலாமே என தோன்றியது


அடுத்த முறை வைப்ரன்ட் வேளச்சேரி இந்த நிகழ்வு நடத்தும் போது நிச்சயம் 100 கி மீ ஓட்டுவேன் !

விஜய் டிவி - மாப்பிள்ளை எனும் காவிய சீரியல் 

விஜய் டிவியில் வரும் மாப்பிள்ளை எனும் மாபெரும் காவியத்தை எங்கள் இல்லத்தில் கண்டு களிக்கிறார்கள். இதனால் நானும் காண வேண்டிய துர்பாக்கிய நிலைக்கு ஆளாகிறேன்.

ஹீரோவும், ஹீரோயினும்  காதலிச்சு அதை சொல்ல முடியாம, மெல்ல முடியாம பல மாசம் ஓட்டினாங்க. (இதுல ரெண்டு பேருக்குமே இன்னொருத்தங்க லவ் பண்றாங்கன்னு தெரியும்) ஒரு வழியா லவ்வை சொன்ன பிறகு ரெண்டு வீட்டுலையும் பேசி நிச்சய தார்த்தம் வந்துச்சு.

அய்யா.. நிச்சய தார்த்தம் சீனை எவ்வளவு நாள் ஓட்டுவாங்கன்னு நினைக்கிறீங்க? நாலு வாரம் !!!!!!!! ஒரே ஒரு நாள் நடக்குற நிச்சய தார்த்த சீனை நாலு வாரம் ஓட்டி நாக்கு தள்ள வச்சாங்க

இப்ப பத்திரிக்கை எடுத்துக்கிட்டு ஒவ்வொருத்தரா பாத்து கொடுத்துக்கிட்டுக்கங்க. எப்படியும் இந்த வருஷம் முடியறதுக்குள் பத்திரிக்கை கொடுத்து முடிப்பாங்கன்னு நினைக்கிறேன்..

இந்த சீரியல்ல ஒரு நல்ல விஷயம் என்னான்னா .. நீங்க சில பல வாரம் பாக்காம - மறுபடி வந்து பாத்தாலும் ஒண்ணும் மிஸ் பண்ணிருக்க மாட்டீங்க. கதை அங்கேயே தான் நின்னுக்கிட்டு இருக்கும்....

ஒரு நாள் நடக்குற நிச்சய தார்த்தத்துக்கே 4 வாரம் ஓட்டினவய்ங்க... கல்யாணத்தை எத்தனை மாசம் எடுப்பாங்கன்னு நினைச்சாதான் கொஞ்சம் கெதக்குன்னு இருக்குது....


Thursday, May 4, 2017

பாஷன் டிசைன் படிப்பு + வேலை வாய்ப்பு - ஒரு அறிமுகம்

ன்ன படிக்கலாம் வரிசையில் பல்வேறு துறைகள் பற்றி வீடுதிரும்பலில் எழுதி வருகிறோம்.

அவ்வரிசையில் இம்முறை - பேஷன் டிசைனிங் துறை பற்றி சற்று அறியலாம்.

ஆர்த்தி சுவாமிநாதன் இத்துறையில் 10 வருடத்திற்கும் மேல்  பணியாற்றுபவர். மாரத்தான்  ரன்னர்,சைக்கிளிஸ்ட், நீச்சல் வீரர், புகைப்படக்காரர் என பன்முகம் கொண்டவர்.

இவரிடம் பேஷன் டிசைனிங் துறை குறித்து கேட்டறிந்தது.. இதோ உங்கள் பார்வைக்காக...

Image may contain: 1 person, standing and outdoor

பாஷன் டிசைன் படிப்பில் எப்போது சேரலாம் ?

பன்னிரண்டாம் வகுப்பிற்கு பிறகு நேரடியாக பாஷைன் டிசைன் படிப்பில் சேரலாம். வெவ்வேறு கல்லூரியில் அட்மிஷன் முறைகள் மாறுபடுகின்றன. சில கல்லூரிகள் எண்ட்ரன்ஸ் தேர்வும் நடத்துகின்றன. +2 இறுதி ஆண்டுக்கு முன்னதாகவே கல்லூரியில் அப்ளிகேஷன் வழங்கப்படும். மார்ச் 17ல் +2 தேர்வு எழுதுகிறார்கள் எனில்,  செப்டம்பர் 16-ல் கல்லூரிகளில் அப்ளிகேஷன் வழங்கப்படும்.

+ 2 முடித்தவர்கள் மட்டும் தான் இந்த படிப்பில் சேரலாமா? Bsc,  B com போன்ற டிகிரி முடித்தவர்களும் சேரலாமா?

நிச்சயமாக. டிகிரி முடித்தவர்களும் இந்த படிப்பில் சேரலாம். பேஷன் டிசைனிங் மற்றும் இவை இரண்டில் விரும்பிமிருந்தால் டிகிரி முடித்தபின்னும் கூட இந்த துறைக்குள் நுழையலாம்

டிகிரி முடித்தவர்கள் MSc, PG Diploma in Fashion designing போன்ற படிப்புகளை படிக்கலாம்

சென்னை மற்றும் இந்தியாவில் இந்த துறையில் சிறந்த சில கல்லூரிகள் பற்றி கூறுங்கள் 

சிறந்த கல்லூரிகள் ஏராளமாக உள்ளன. அதில் குறிப்பிட்டு சொல்ல வேண்டியது - NIFT (Nation Institute of Fashion technology); மேலும் பேர்ல் அகாடெமி போல - பல நல்ல நிறுவனங்கள் தமிழகத்திலும், இந்தியாவின் பிற இடங்களிலும் உள்ளது. மேலும் சென்னை பல்கலைக்கழகம், பாரதியார்  பல்கலைக்கழகம், பாரதி தாசன் பல்கலைக்கழகம் என பல்வேறு யூனிவர்சிட்டிகளும் இந்த படிப்பை நடத்துகின்றன.

இந்த கோர்ஸ் படிக்க பொதுவாக என்ன செலவு ஆகும்?

கல்லூரிகளின் பீஸ் - அது தனியார் கல்லூரியா, அரசு கல்லூரியா என்பதை பொறுத்து பெரிதும் மாறுபடும்.

அரசு கல்லூரியில் ஒரு செமெஸ்டருக்கு 20 முதல் 35 ஆயிரம் வரை பீஸ் இருக்க கூடும். (வருடத்திற்கு எனில் இந்த பணத்தை இரண்டால் பெருக்கி கொள்ளுங்கள்)

இதுவே தனியார் கல்லூரி என்றால்  வருடத்திற்கு 2 முதல் 3 லட்சம் ஆகலாம்.

படிக்கும் போது என்ன விதமான பயிற்சி (Training ) கிடைக்கிறது? படித்து முடித்தபின் எடுக்க வேண்டிய பயிற்சி என்ன?

படிக்கும் போது பேஷன் டிசைனில் உள்ள அடிப்படைகளாக Designing, pattern making, Stitching உள்ளிட்ட விஷயங்களை கற்று தருவார்கள். ஆனால் பிராக்டிகல் அறிவு- படிப்பு முடிந்த பிறகு intern ஆக வேலை பார்க்க துவங்கிய பின்பு தான் நிறைய கிடைக்கும். இத்துறை தொடர்ந்து மாறிக்கொண்டே இருக்கும் ஒன்று என்பதால் - கற்பது ஒவ்வொரு நாளும் தொடர்ந்து நடக்கும் ஒன்று.. அது வேலைக்கு சேர்ந்த பின்னும் தொடர வேண்டும் ..

இத்துறைக்கு பெண்கள் தான் அதிகம் வருகிறார்கள் என நம்பப்படுகிறது. அப்படியா என்ன?

இல்லை. இரு பாலாருமே இத்துறையை விரும்பி தேர்ந்தெடுக்கிறார்கள். துறையை பொறுத்தவரை அது ஆண் - பெண் என்ற பாரபட்சம் இன்றி இருவரையும் ஒருங்கே வரவேற்கிறது

துறையில் உள்ள வேலை வாய்ப்பு பற்றி கூறுங்கள் 

மிக பெரிய வேலை வாய்ப்பு தரும் துறை இது. தற்சமயம் ஆன்லைன் மார்க்கெட்டிங் நன்கு வளர்ந்து வருவதால் அதிலும் வேலை வாய்ப்புகள் கிடைக்க துவங்கி உள்ளது.

துணி வியாபாரம் செய்வோருக்கு ஆண்டு முழுதும், உலகம் முழுதும் வேலையும், வியாபாரமும் இருக்கும். எனவே துறை சார்ந்து வேலை செய்வோருக்கும் வேலை இருக்கும்

இத்துறையில் துவக்க சம்பளம் என்னவாக உள்ளது? 

அது அவர்கள் எந்த கல்லூரி/  யூனிவர்சிட்டியில் படிக்கிறார்கள்..  அவர்களின் அறிவு மற்றும் திறமையை பொறுத்தது. சாதாரணமாக சொல்ல வேண்டுமென்றால் டிகிரி முடித்து விட்டு நுழையும்  பிரெஷர்- க்கு   கல்லூரியை பொறுத்து 10,000 முதல் 20,000 வரை மாத சம்பளம் கிடைக்க கூடும்

பேஷன் டிசைனர் என்பது   ஓரளவு அனைவருக்கும் தெரிந்த ஒரு வேலை; இது தவிர  வேறு என்ன வித வேலைகள் இத்துறை மூலம் கிடைக்கும்?

பேஷன் டிசைனிங் துறையை 3 வகையாக  பிரிக்கலாம்.

1. Designer module
2. Manufacturer module
3. Retail module

1. Designer module- இதை பொறுத்த வரை ஒரு தனியார் நிறுவனத்தில் நீங்கள் டிசைனர் ஆக பணி  புரிவீர்கள். அல்லது சொந்தமாய் ஒரு டிசைன் ஹவுஸ் துவங்கி நீங்களே புது வித டிசைனில் துணிகள் தயாரிப்பீர்கள். ரித்து  குமார், மனிஷ் மல்ஹோட்ரா   ஆகியோரை இதற்கு உதாரணமாய் .சொல்லலாம்.

2. Manufacturer module- இங்கு ஒரு தயாரிப்பு நிறுவனத்தில் Product development teamல் நீங்கள் பணியாற்றுவீர்கள். இதன் கீழ் merchandiser, sourcing, fabric , trims, production planning என பல கிளைகள்/ துறைகள்  உண்டு.

3. Retail module- இது துணிகளை விற்பனை செய்யும் துறை - இங்கு விற்பனை பிரிவிலோ, அதனை தயாரிக்கும் பிரிவிலோ நீங்கள் பணி  புரியலாம்.

இப்படி பேஷன் டிசைனிங் கீழ் எண்ணற்ற வேலை வாய்ப்புகள் கொட்டி கிடக்கிறது

சொந்தமாக தொழில் துவங்குவது சாத்தியமா?ஆம் எனில் எப்போது துவங்க முடியும்?

இப்படிப்பை படித்தோருக்கு - அவர்கள் குடும்பத்தில் ஏற்கனவே வியாபாரத்தில் இருந்தால் அல்லது வியாபாரம் குறித்த ஆர்வம் மிக அதிகமாக இருந்தால் - படித்து முடித்த பின் கூட சொந்த தொழில் துவங்கலாம்.

அல்லது அவர்களது ஆர்வம், உழைப்பு  மற்றும் எந்த பிரிவில் சுய தொழில் துவங்க உள்ளார்கள் என்பதை பொறுத்து மாறும். சுய தொழில் செய்யலாம் என்பது நிச்சயம் சாத்தியமே !

இத்துறையில் உங்களது பயணம் பற்றிக் கூறுங்கள் 

நான் வழக்கமான படிப்பு/ துறை இல்லாமல் - சற்று வித்யாசமாக செய்ய நினைத்தேன். என்னிடம் கிரியேட்டிவிட்டி இருக்கிறது என உறுதியாக நம்பியதால் இத்துறையை தேர்ந்தெடுத்தேன்.  BSc  - Fashion Technology and costume designing - திருச்சியில் படித்தேன். அதில் அதிகம் டிசைனிங் பற்றி தெரிந்து கொண்டேன்.

சுய தொழில் செய்ய வேண்டும் என்ற எண்ணம் அதிகமிருந்ததால் துறை பற்றி மேலும் தெரிந்து கொள்ள விரும்பினேன்.  எனவே பேர்ல் அகாடெமி சென்னையில் போஸ்ட் கிராடுவேஷன் படித்தேன் ( Fashion Merchandising)

கடந்த பத்து வருடங்களாக வெவ்வேறு பிரிவில்/ நிறுவனங்களில் பணி புரிந்து வருகிறேன். சுய தொழில்  துவங்கும் எண்ணம் இன்னமும் தீவிரமாக உள்ளது. விரைவில் துவங்குவேன் என நம்புகிறேன்.

இப்பத்து வருடத்தில் வெற்றி, தோல்வி இரண்டுமிருந்தாலும் இரண்டையும் சரி சமமாக எடுத்து கொண்டு அதிலிருந்து என்ன கற்று கொள்ள முடியும் என்பதையே அதிகம் சிந்தித்துள்ளேன்.

ஏற்ற இறக்கங்கள் சில இருந்தாலும் இன்றைக்கு சீனியர் பொசிஷனில் இருப்பது நிச்சயம் மகிழ்ச்சியும் மன நிறைவும் தருகிறது

இப்படிப்பிற்கு வெளிநாட்டு வேலை வாய்ப்புகள் எப்படி?

பேஷன் டிசைனிங் படிப்பிற்கு ஐரோப்பிய நாடுகளிலும், அமெரிக்காவிலும் நல்ல மதிப்பு உள்ளது. இப்படிப்பு முடித்தவர்கள் வெளிநாடு செல்ல விரும்பினால் மேற்சொன்ன நாடுகளை தேர்ந்தெடுக்கலாம்

இத்துறையில் வணிகம் தற்போது எப்படி உள்ளது? 

உள்நாட்டு வியாபாரம் மிக நன்றாக உள்ளது; ஆன்லைன் துறை நன்கு வளர்ச்சி அடைந்து வருகிறது

இத்துறையில் work culture மற்றும் stress level எப்படி உள்ளது?

சற்று கஷ்டமான கேள்வி. stress level என்பது அவரவர் பார்வைக்கேற்ப மாறுபடும். நான் அதனை ஒரு learning experience ஆகத்தான் எப்போதும் பார்க்கின்றேன்

துறை பெருமளவில் disorganized ஆக உள்ளதால் தங்களை adopt செய்துகொள்ள சிலர் சிரமப்படுகின்றனர். ஆனால் அவை பற்றி பெரிதும் கவலை கொள்ளாது, அவற்றை ஒரு சாலஞ்ச் ஆக எடுத்து கொண்டு முயலுவோர் துறையில் நன்கு முன்னேறுகின்றனர்

இத்துறையை தேர்ந்தெடுக்க விரும்புவோருக்கு வேறு ஏதாவது சொல்ல விரும்புகிறீர்களா?


பேஷன் டிசைனிங் என்பது ஒரு தனி உலகம். அதனுள் வரும் அனைவரையும் அன்புடன் வரவேற்கிறேன். இதன் உள்ளே வரும்போது தான் - நீங்கள் அணியும் உடைக்கு பின் இருக்கும் பல்வேறு விஷயங்களும் உழைப்பும் உங்களுக்கு தெரியும். ஆல் தி பெஸ்ட் !

*****
தொடர்புடைய பதிவுகள்:

கம்பனி செக்ரட்டரி படிப்பும் வேலை வாய்ப்பும்

காஸ்ட் அக்கவுன்ட்டசி கோர்ஸ் - ஒரு பார்வை

வக்கீல் படிப்பு- வேலை வாய்ப்பு - ஓர் அலசல்

Tuesday, May 2, 2017

வானவில்: பாகுபலி சர்ச்சை- ஞாபகமறதி கணவர்கள் குறித்த நீயா நானா

பார்த்த படம்: Parched (ஹிந்தி)

அஜய் தேவ்கான் தயாரிப்பில் வெளியான இப்படம் ஏராள தேசிய விருதுகளை வென்றது; நாங்கள் படம் பார்க்க இதுவே காரணம்

ஒரு கட்டு பெட்டியான, மூட நம்பிக்கைகள் நிறைந்த கிராமம் .. மிகுந்த போராட்டத்திற்கு பின் தான் மொபைல் அனுமதிக்கப்படுகிறது; இன்னும் டிவி க்கு அனுமதி இல்லை; இந்த கிராமத்தில் இருக்கும் 4 பெண்களின் கதை தான்   Parched.

Image result for parched

நால்வரில் மூவர் தோழிகள். நான்காவது ஒரு சிறு வயதில் மணமுடிக்கும் ஒரு இளம்பெண்;திரைக்கதை முழுதும் இந்த பெண்களை - ஆண்கள் எப்படி பயன்படுத்துகின்றனர் - உதாசீனப்படுத்துகின்றனர் - வன்முறையை உபயோகிக்கின்றனர் என்றே பயணிக்கிறது.. இவற்றில் இருந்து அவர்கள்  எப்படி தீர்வு காண்கிறார்கள் என முடிகிறது படம்

ஜாலியாய் ஒரு படம் பார்ப்போம் என்போர் தவிர்க்க வேண்டிய படம்; போலவே குடும்பத்துடன்/ குழந்தைகளுடன் பார்க்கவும் ஏற்றதல்ல.

நல்ல சினிமா - ஆர்ட் பிலிமில் ஆர்வமுள்ளளோர் மட்டும் தனியே கணினியில் அல்லது டிவியில் காணலாம் !

பிட்னெஸ் பக்கம் 

அண்மையில் கலந்து கொண்ட ஒரு சுவாரஸ்ய போட்டி - நங்கநல்லூர் பண்டிட் ரன்னர்ஸ் நடத்திய "டெம்பிள் ரன்".

மூன்று பேர் கொண்டது ஒரு அணி; இந்த மூவர் அணி 20 கோயில்களை சென்றடைந்து விட்டு புறப்பட்ட இடம் வரவேண்டும். அனைவரும் 20 கோயிலுக்கும் செல்ல அவசியமில்லை; ஒருவர் 6 கோவிலும் மற்ற இருவர் ஆளுக்கு 7 கோவிலும் சென்றால் கூட போதும்.

போட்டிக்கு முதல் நாள் 20 கோவில்கள் லிஸ்ட் தரப்பட - ஒவ்வொரு அணியும் நங்கநல்லூரை அலசி ஆராய்ந்தது.

போட்டியன்று 20 அணிகள் கலந்து கொண்டன. அதில் 6 அணிகள் மட்டுமே நிர்ணயிக்கப்பட்ட 45 நிமிடத்திற்குள் 20 கோவிலை தொட்டு வந்தன (அதில் எங்கள் அணியும் உண்டாக்கும் !) வெற்றி பெற்ற அணி 27 நிமிடத்திற்குள் அனைத்து கோவிலையும் தொட்டு ஆச்சரியத்தில் ஆழ்த்தியது

அருமையான வீட்டில் தயாரிக்கப்பட்ட ஹெல்தி ஸ்நாக்ஸ், அனைவருக்கும் மரக்கன்று என தந்து ஆச்சரியத்தில் ஆழ்த்தி விட்டனர் நிகழ்ச்சி ஏற்பாட்டாளர்கள்.. !

Image may contain: outdoor
Photo courtesy: Shumon Singha 

இந்த நங்கநல்லூர் ரன்னர்ஸ் தினம் நங்கநல்லூர் சுதந்திர தின பூங்காவில் இருந்து தான் ஓடுகின்றனர். நீங்கள் அந்த ஏரியா வாசி எனில் இவர்களுடன் இணையலாம்.. !

இவர்களின் முகநூல் பக்கம் : https://www.facebook.com/groups/181620802198310/

ஐ பி எல் கார்னர் 

வழக்கமாய் கடைசி நேரம் வரை எந்த அணிகள் Play off  உள்ளே வரும் என்பது தெரியாமல் இருக்கும். இம்முறை கொல்கத்தா, மும்பை மற்றும் ஹைதராபாத் Play off செல்வது அநேகமாய் உறுதியாகி விட்டது. போலவே பெங்களூரு, டில்லி மற்றும் குஜராத் Play off உள்ளே செல்ல வாய்ப்பே இல்லை என்பதும் நிச்சயம். Play off உள்ளே செல்லும் நான்காவது அணி புனேவா அல்லது பஞ்சாபா என்பது மட்டும் தான் முடிவாக வேண்டும். (புனேவிற்கு வாய்ப்புகள் அதிகம்)

இளம் வீரர்களில் மும்பைக்கு ஆடும் ராணா மற்றும் டில்லி வீரர் ரிஷாப் பாண்ட் இந்திய அணிக்கு விளையாட பிரகாச வாய்ப்பு இருக்கிறது; குறிப்பாக இவ்வருடத்தில் மிக சிறந்த கண்டுபிடிப்பு ராணா.

பவுலிங்கில் எத்தனையோ வெளி நாட்டு வீரர்கள் இருந்தாலும் புவனேஷ்வர் குமார் மற்றும் பும்ரா தான் அசத்தி வருகிறார்கள்;  இவர்களுடன் ஷாமியும் சேர்ந்து விட்டால் இந்திய அணியின் பவுலிங் ஒரு நாள் மற்றும் 20-20 ல் வலுப்பெறும் என்ற நம்பிக்கையை தருகிறது

இம்முறை கோப்பை வெல்வது கொல்கத்தா அல்லது ஹைதராபாதாக இருக்கலாம் என எண்ணுகிறேன்.

என்னா பாட்டுடே :என்னுள்ளே என்னுள்ளே (வள்ளி)

வள்ளி படத்தில் இடம் பெற்ற இப்பாட்டு ராஜாவின் மேதைமைக்கு ஒரு அட்டகாச எடுத்து காட்டு.

படத்தில் ஒரு ஏடாகூட காட்சியில் - பாடல் சற்று கிளாமராக வரும் என்பதால் - ஆடியோ வடிவத்தை மட்டும் இங்கு ஷேர் செய்கிறேன்

மெட்டு, வாத்திய கோர்வை, சுவர்ண லதாவின் குரல் அனைத்தும் சேர்த்து பாடலை வேற லெவலுக்கு எடுத்து போகிறது

சரணத்தில் மெட்டு அங்கும் இங்கும் அலை பாய்வதும், ஸ்வர்ண லதாவின் மயக்கும் குரலும்..வாவ் !!



பாகுபலி சர்ச்சை 

பாகுபலி குறித்து 90 % பாசிட்டிவ் விமர்சனங்கள் வந்தாலும் 10 % பேர் அதனை எதிர்த்து எழுதுகிறார்கள். இதில் தவறில்லை; எந்த  படைப்பும் விமர்சனத்துக்கு அப்பாற்பட்டது அல்ல. ஆனால் பாகுபலியை ஆதரிப்போரை நக்கல் அடிப்பதும், பாகுபலியை ஒன்றுமே இல்லாத குப்பை என ஏசுவதும் தான் உறுத்துகிறது.

சிலருக்கு ஒருவரை பிடிக்க வில்லை என்றால் அவர் என்ன செய்தாலும் பிடிக்காது. எப்படி குறை கண்டு பிடிக்கலாம் என்று தான் அலைவர்.. பாகுபலி விஷயத்திலும் இது நடக்கிறது; முதல் பாகம் வந்தபோதே - அது மாபெரும் வெற்றி கண்டபின்னும் -50 நாள் கழித்து பாகுபலியை விமர்சித்து எழுதியோர் இருந்தனர். அதே நபர்கள் மீண்டும் இப்போது முதல் நாளே பார்த்து விட்டு மீண்டும் விஷம் கக்குவதை பார்த்து சிரிக்கத்தான் வேண்டியுள்ளது

பாகுபலியில் லாஜிக் குறை பேசுகிறார்கள். எத்தனை ஹாலிவுட் சினிமாவில் லாஜிக் பார்த்துள்ளோம்.. அங்கெல்லாம் செய்தால் வாயை மூடி கொள்வோம். உள்ளூரில் ஹாலிவுட் தரத்தில் ஒரு படம் தந்தால் முதல் ஆளாய் கல் எறிவோம்

பாகுபலியில் குறைகள் இல்லாமல் இல்லை;ஆனால் அவற்றை விட நிறைகள் அதிகம். பாகுபலியை ஆதரிப்போர் பார்ப்பது நிறைகளை; விமர்சிப்போர் குறைகளை மட்டுமே காண்கின்றனர்

சரி ..சர்ச்சைகள் ஒரு பக்கம் இருக்கட்டும் ஜாலியாக இந்த பாகுபலி மீம்ஸ் கண்டு சிரியுங்கள் !

போஸ்ட்டர் கார்னர் - பாகுபலி ஸ்பெஷல் 

Why Kattappaa killed Bahubali - Funny reason 







நீயா நானா -  ஞாபகமறதி கணவர்கள் 

ஞாபக மறதி கணவர்கள் பற்றி மனைவிகள் பேசிய நீயா நானா - எனக்கு மகிழ்ச்சியை தந்தது; வீட்டம்மாவை "அவசியம் பாரு" என  உட்கார வைத்தேன். நான் ஒன்றும் ஞாபக மறதி ஆசாமி கிடையாது; வீட்டில் பத்து பொருள் சொன்னாலும் சரி, ஒன்றே ஒன்று சொன்னாலும் சரி எவ்வளவு வேலை/ எந்த முக்கிய மீட்டிங் முடிந்து திரும்பினாலும் நினைவோடு வாங்கி வருகிற ஆள் தான். இருந்தும் வீட்டில் திட்டு என்ன குறைவாகவா கிடைக்கிறது !!

அதற்கு தான் அம்மணியை அமர்ந்து பார்க்க சொன்னேன்...பிறந்த நாள், கல்யாண நாளை  மறப்பது, வீட்டில் சின்ன வேலை சொன்னாலும் மறந்து விட்டு செய்யாமல் போவது என ஒவ்வொன்றாய் சொல்ல சொல்ல - நம்ம மேடம் " நீங்க எவ்வளவோ பரவாயில்லை" என சர்டிபிகேட் கொடுத்து விட்டார்.

டிவியில் வழக்கம் போல கோபிநாத் " அவரு மறக்கும்போது உங்க மனநிலை எப்படி இருக்கும்? உங்களுக்கு அது எவ்வளவு கஷ்டமா இருக்கும் " என குடும்பத்திற்குள் குண்டு வைத்து கொண்டிருந்தார்... !

Monday, May 1, 2017

சைக்கிளிங் : சுவாரஸ்ய உடற்பயிற்சி - ஒரு அறிமுகம்

ட்டம், நடை என துவங்கும் உடற் பயிற்சியில் அடுத்த கட்டம்.. சைக்கிளிங் !

தினமும் ஒரே வித பயிற்சி செய்து வந்தால் - உடல் அதற்கு எளிதாக பழகி விடும். எனவே வெவ்வேறு பயிற்சி செய்வது அவசியமாகிறது. மேலும் ரன்னிங் பயிற்சி மேற்கொள்வோர் வாரத்திற்கு மூன்று அல்லது நான்கு நாள் மட்டுமே (ஒரு நாள் விட்டு ஒரு நாள்) ஓடுதல் நலம். மீதமுள்ள 3 நாட்களில் கிராஸ் ட்ரைனிங் என சொல்லப்படும் பயிற்சி மேற்கொள்ள அறிவுறுத்துவார்கள் .. அதாவது சைக்கிளிங் அல்லது நீச்சல்..

நீச்சல் அனைவருக்கும் தெரியுமா என்பது சொல்ல முடியாது; மேலும் ஒவ்வொரு முறை நீச்சலுக்கும் பணம் தந்து  செல்ல வேண்டும். அல்லது மாதாந்திர/ வருடாந்திர சப்ஸ்கிருப்ஷன் கட்ட வேண்டும்..எனவே ரன்னிங்கில் இருந்து பல நண்பகட்டமாக சைக்கிளிங்கிற்கு நகர்கிறார்கள்..

நாம் வழக்கமாய் ஓட்டும் சைக்கிள்களையே ஓட்டலாம். தவறில்லை. ஆனால் சைக்கிளிங்கை வழக்கமாய் செய்வோர் இன்னும் சற்று அட்வான்சுட் சைக்கிள்கள் பயன்படுத்துவார்கள்.



3 வகை சைக்கிள்கள்   

சைக்கிள்களில் பல வகை உண்டு. முக்கியமான 3 வகைகள் பற்றி பார்ப்போம்

மௌண்டன் பைக்குகள் (சைக்கிள்களை பைக்குகள் என்றே அழைக்கிறார்கள். ஆரம்பத்தில் எனக்கும் குழப்பமாய் தான் இருந்தது......... சைக்கிளை பைக் என்று அழைத்தால் பைக்கை எப்படி அழைப்பார்கள் என ! இப்போது நானே மௌண்டன் பைக் என்று தான் இயல்பாக எழுதுகிறேன் ) ... ... பெயருக்கேற்ற படி மலையேற்றம் உள்ளிட்ட ஈவென்ட்டுகளுக்கு பயன்படும் சைக்கிள். இதே சைக்கிளில் சென்னை தெருக்களில் செல்வோரும் உண்டு. இவற்றின் டயர்கள் பெரிதாக இருக்கும். வெயிட்டும் அதிகம். எனவே 50 கி. மீ/ 100 கி. மீ செல்வோர் இதனை அதிகம் நாட மாட்டார்கள். மலையேற்றம் செய்யும் நண்பர்கள் இதனை அதிகமாக நாடுவர். நல்ல மௌண்டன் சைக்கிள்  10,000 லிருந்து கிடைக்கிறது.


ரோடி /ரோட் பைக் - 50 கிலோ மீட்டர் துவங்கி, 100, 200, 300 கி மீ என அதிக தூரம் சைக்கிளில் செல்வோர் விரும்பும் சைக்கிள் இது. சைக்கிள் வீரர்களில் பலரும் வைத்திருக்கும் சைக்கிள் இதுவே. இவற்றின் டயர் மிக மெலிதாக இருக்கும். மொத்த எடையும் கூட மிக குறைவே. எனவே சைக்கிள் வீரர்கள் ஒரு மணி நேரத்தில் சாதாரணமாக 20 முதல் 30 கிலோ மீட்டர் தூரம் வரை செல்வார்கள். மிக சிறந்த வீரர்கள் ஒரு மணி நேரத்தில் 40 கிலோ மீட்டர் செல்வதும் உண்டு. சைக்கிள்களில் இது கொஞ்சம் விலை அதிகம் தான். 50,000 துவங்கி ஒரு லட்சம், இரு லட்சம் என விலை நீண்டு கொண்டே போகிறது. பலரும் வாங்கும் சைக்கிள் 60,000 முதல் ஒரு லட்சத்திற்குள் இருக்கும்

மூன்றாவது - ஹைபிரிட் சைக்கிள் - இது மவுண்டன் பைக் - ரோடி இரண்டிற்கும் இடைப்பட்டது.. எல்லா விதத்திலும்.

டயர் ...மவுண்டன் பைக்கை விட மெல்லியது.. ரோடியை விட பெரியது. விலையும் இரண்டிற்கும் இடைப்பட்டது. 30,000 முதல் ஹைபிரிட் சைக்கிள் கிடைக்கிறது

முக்கிய விஷயம்: இந்த மூன்று வகையும் அநேகமாய் கியர் சைக்கிள்கள் !

பலரும் முதலில் ஹைபிரிட் வாங்கி விட்டு கொஞ்ச காலம் கழித்து ரோடிக்கு நகர்கிறார்கள். நான் வாங்கியதும் ஹைபிரிட் சைக்கிள் தான்.

வைப்ரன்ட் வேளச்சேரி நடத்திய சைக்கிளிங் ஈவெண்ட்டில் டிஜிபி சைலேந்திர பாபு அவர்களுடன் 

எதற்கு கியர்?

செல்லும் வேகத்திற்கேற்ப கியர் மாற்றி கொள்ளலாம். கியர்  சைக்கிள் இன்னும் சற்று வேகமாய் செல்லும். பாலங்களில் சாதாரண சைக்கிள் மிதிக்க நிரம்ப சிரமப்படுவோம். கியர் சைக்கிளில் எளிதாக ஏறலாம்.

சைக்கிள் ஓட்டுவதே கலோரி எரிக்க/ எனர்ஜியை செலவழிக்க.. அப்புறம் கியர் எதற்கு? சாதாரண சைக்கிள் போதாதா என்று நானும் யோசித்ததுண்டு.

சாதாரண சைக்கிளில் 50,100 ஏன் ஆயிரம் கிலோ மீட்டர் கூட பயணிக்கும் /  போட்டிகளில் கலந்து கொள்ளும் நபர்கள் உண்டு. ஆனால் இவர்கள் மிக சின்ன கேட்டகரி.

சைக்கிளிங் ஈவென்ட்களும் BMR எனப்படும் நெடூந்தூர பயணங்களும் சரி 50,100,200,300 கி மீ என அதிகரித்து கொண்டே செல்லும்.

துவங்கும் போது வெறும் உடற் பயிற்சி என துவங்கினாலும் - ஏதேனும் குழுவில் இணைந்தால் பின் 50ல் துவங்கி அடுத்தடுத்து செல்ல துவங்குவோம். இங்கு தான் கியர் சைக்கிள் பயன்பட துவங்குகிறது

கலோரி எரிப்பு 

கலோரி எரிப்பை பொறுத்த வரை நடையை விட சைக்கிளிங் நிச்சயம் அதிக Calorie எரிக்கும். வேகமான ரன்னிங்கை விட கலோரி எரிப்பு சைக்கிளிங்கில் குறைவாக இருக்கும்.

பொதுவாகவே அடுத்தடுத்த இரண்டு ஒர்க் அவுட் ஒரே விதமாய் இல்லாமல் பார்த்து கொள்ள சொல்வார்கள். ஒரு நாள் ரன்னிங் - மறு  நாள் சைக்கிளிங் என்றால் நிச்சயம் அதிக கலோரிகள் எரிக்க முடியும். தொடர்ந்து இரு நாள் ரன்னிங் அல்லது சைக்கிளிங் செய்வதை விட உடல் எடை குறைப்புக்கு இது அதிக பலன் தரும்

வாடகை சைக்கிள் 

ஜஸ்ட் பை சைக்கிள், ப்ரோ பைக்ஸ் போன்ற பிரபல கடைகளில் சைக்கிள்கள் வாடகைக்கு தருகிறார்கள். ஒரு நாள் வாடகை 300 ருபாய் என்கிற அளவில் இருக்கும்.

ஒரு நாள் வாடகைக்கு எடுத்து ஒட்டி பார்த்து விட்டு கூட சைக்கிளிங்க் நமக்கு பிடிக்கிறதா - எந்த சைக்கிள் வாங்கலாம் என முடிவெடுக்கலாம்

எனது அனுபவம் 

ஓட்டம் துவங்கிய பின் சைக்கிள் ஓட்ட பலரும் அறிவுறுத்த - முதலில் வீட்டில் இருந்த பெண்ணின் லேடி பேர்ட் சைக்கிள் எடுத்து 3 மாதம் ஓட்டி வந்தேன். வாரம் சில முறையாவது சைக்கிள் ஓட்டுவது வழக்கமானது.



முதலில் 6 கிலோ மீட்டர், பின் 10 கிலோ  மீட்டர் ,15, 25 என 40 கிலோ மீட்டர் வரை 3 மாதத்தில் லேடி பேர்ட் சைக்கிளில் ஒட்டிவிட்டேன். அப்புறம் தான் சைக்கிளிங் நமக்கு பிடிக்கிறது - சைக்கிள் வாங்கலாம் என முடிவு செய்து எனக்கான கியர் சைக்கிள் வாங்கினேன். பணம் போட்டு வாங்கி வீணாய் போயிடக்கூடாது என்ற பயம் தான் !

சைக்கிள் டு ஒர்க் 

தினமும் அலுவலகத்துக்கு சைக்கிளில் செல்வது என்பது ஒரு இயக்கமாகவே நடந்து வருகிறது. டைடல் பார்க் உள்ளிட்ட பல பெரும் அலுவலக வளாகங்களில் இத்தகைய சைக்கிள்கள் பார்க்கிங் தனியாக வைத்துள்ளனர்.

மேலும் மிக அதிக தூரத்தில் இருந்து வந்தால் குளிக்க, உடை மாற்றி கொள்ள வசதியும் பல நிறுவனங்கள் செய்கின்றன

மோட்டார் பைக் அல்லது கார் இரண்டிற்குமே பெட்ரோல் அல்லது டீசல் தேவை. அவை காற்றை மாசு படுத்தவே செய்கின்றன.  மாறாக சைக்கிள் சுற்று சூழலுக்கு மிக நல்லது-எந்த விதத்திலும் மாசுபடுத்த வில்லை

மேலும் அண்மையில் நடந்த ஒரு ஆய்வில் - தினமும் அலுவலகத்திற்கு சைக்கிளில் செல்வோருக்கு பெரிய நோய்கள் வரும் அபாயம் பெரிதும் குறைகிறது என கண்டு பிடித்துள்ளனர்.

இந்த ஆய்வில் சொல்லும் முக்கிய விஷயம்: எந்த உடற் பயிற்சியும் தினமும் செய்வதில் இருந்து பலர் தவறலாம். ஆனால் ஆபிஸ் செல்வது தினமும் நடக்கும் ஒரு விஷயம்.இத்துடன் சைக்கிளிங்கை இணைத்து விடும்போது தினமும் சைக்கிளிங் செல்வதும் வழக்கமாகி விடுகிறது. எனவே தான் அலுவலகத்திற்கு சைக்கிளில் செல்வோர் பெரும் பலன் அடைகிறார்கள் என கூறுகிறது !

வைப்ரன்ட் வேளச்சேரி உள்ளிட்ட பல குழுவில் அங்கிருக்கும் மெம்பர்கள் வாரத்திற்கு எத்தனை நாள் சைக்கிளில் வேலைக்கு செல்கிறார்கள் என்பதை ஒரு போட்டியாக வைத்து வாரா வாரம் யார் வெற்றி பெறுகிறார் என அறிவிக்கிறார்கள்

சென்னை சைக்கிளிங் குழுக்கள்

சென்னையை பொறுத்தவரை WCCG (Chennai cyclists ) என்கிற குழு முக்கிய பங்காற்றி வருகிறது. இவர்களுக்கு தாம்பரம், அசோக் நகர், வேளச்சேரி, அண்ணா நகர் என பல்வேறு இடங்களில் கிளைகள் உள்ளது.

இவர்களின் இணைய முகவரி :

https://www.facebook.com/groups/wccgisthebest/

உங்கள் வீட்டின் அருகே உள்ள கிளை நண்பர்களுடன் இணைந்து கொண்டால் - சைக்கிளிங் செல்ல எளிதாக இருக்கும் !

நிறைவாக ...

சைக்கிளிங்கில் அதிக தூரம் செல்லும்போது பல இடங்களை சுற்றி பார்க்க ஒரு வாய்ப்பு ! டிராவலிங்கில்   விருப்பம் உள்ள சிலர் .... சைக்கிளில் பயணம் செய்தபடி பல இடங்களை சுற்றி பார்ப்பதை வழக்கமாய் கொண்டுள்ளனர்.

மேலும், சைக்கிளிங் - ரன்னிங் போல கடினமான ஒன்றல்ல - மராத்தான் ஓடும்போதும் சரி, ஓடி முடிக்கும் கடைசி நிமிடமும் சரி மிக கடினமான ஒன்றாய் இருக்கும்.சைக்கிளிங் அப்படி அல்ல...பெருமளவு சோர்வாகாமல் செய்யும் உடற் பயிற்சி இது.அவ்வப்போது ரெஸ்ட் எடுத்து கொண்டு பயணித்தால் எவ்வளவு தொலைவும் பயணிக்கலாம்

Happy Cycling !

****
தொடர்புடைய பதிவுகள் :

முதல் மாரத்தான் அனுபவங்கள் 

மராத்தான் ..சில தவறான புரிதல்கள்

உடல் எடை குறைப்பு: உணவாலா? உடற் பயிற்சியாலா: ஒரு நேரடி அனுபவம்

சென்னையின் மாபெரும் - விப்ரோ மாரத்தான்.. சில பாசிட்டிவ் & நெகட்டிவ்

முதல் அரை மாரத்தான் -கற்றதும் பெற்றதும்
Related Posts Plugin for WordPress, Blogger...