குமுதம் அரசு பதில்களில் வீடுதிரும்பல்

அரசு பதில்கள் - எஸ். ஏ. பி அவர்களால் துவக்கப்பட்டு ஓஹோ என்று கொடி கட்டி பறந்தது. அண்ணாமலை-ரங்கராஜன்- சுந்தரேசன் என மூன்று பேரால் பதில் தரப்படுகிறது அவர்களின் முதல் எழுத்து சேர்த்தே "அரசு " என சொல்லி வந்தனர். ஆனால் எஸ். ஏ. பி அவர்கள் மறைவுக்கு பின் தான், அரசு பதில்கள் இதுவரை சொன்னது எஸ். ஏ. பி மட்டுமே என தெரிய வந்தது.

வீடுதிரும்பல் பற்றி குறிப்பிட்ட இந்த வார குமுதம்

***************

அரசு பதில்களில் கேள்வி இடம் பெறுவது ஒரு காலத்தில் பெரிய விஷயம் (இப்போது எப்படி என தெரியலை). எனது அண்ணனின் கேள்வி இதில் ஒரு காலத்தில் அடிக்கடி வரும்.

தற்போதைய குமுதம் பழைய குமுதம் போல் அல்ல என்பதை எல்லோருடனும் சேர்ந்து நானும் ஒப்பு கொள்ளத்தான் வேண்டும். இருந்தாலும் இன்னமும் விகடன் மற்றும் குமுதம் தான் தமிழில் அதிகம் விற்பனையாகும் பத்திரிக்கைகள் என்பதை மறுக்க முடியாது

நண்பர் கஸாலி நேற்று போன் செய்து குமுதம் அரசு பதில்களில் வீடுதிரும்பல் பற்றி எழுதியிருக்கு என்றார். ஆச்சரியமாய் இருந்தது. ஜென் கதை நீங்கள் எதோ ப்ளாகில் எழுதிருக்கீங்க போல. அதை அப்படியே எடுத்து போட்டுட்டு நன்றி வீடுதிரும்பல் என போட்டுருக்காங்க என்றார்.

புத்தகம் வாங்கி பார்த்ததும் கூட ஆச்சரியம் குறைய வில்லை !

வாசகர் ஒருவர் ஜென் கதை சொல்ல சொல்லி கேட்க, நமது பதிவில் வந்த ஜென் கதையை ஒரு வார்த்தை கூட மாற்றாமல் அப்படியே பயன்படுத்தி விட்டு கடைசியில் நன்றி வீடுதிரும்பல் என போட்டுள்ளனர்

இந்த ஜென் கதை நிச்சயம் நான் காது வழியே கேட்டது தான். மனதில் பதிந்து போன கதை. ப்ளாக் துவங்கிய ஆரம்ப கட்டத்தில் திரட்டிகளில் இணைக்காத போதே இங்கு பகிர்ந்தது. பின் நட்சத்திர வாரம் சமயம் மீண்டும் மீள் பதிவாய் வந்தது

சுஜாதா சொன்னது போல் பத்திரிக்கையில் பெயர் என்பதே ஒரு மகிழ்ச்சி. அதை விட குமுதம் போன்ற பத்திரிகையில் நம் ப்ளாகை கவனிக்கிறார்கள் என்பது தான் மிகப்பெரிய ஆச்சரியம் + மகிழ்ச்சி.

வெறுமனே வீடுதிரும்பல் என்று சொன்னாலே நாம் தான் என்கிற அளவு இன்னும் பிரபலம் ஆகலை. எனவே குமுதத்தில் வலைப்பதிவு (ப்ளாக்) எனவும் குறிப்பிட்டிருக்கலாம் !

இதுவரை இட்லிவடை மற்றும் கேபிள் சங்கர் போன்ற சிலரைத் தான் அரசு பதில்களில் மேற்கோள் காட்டியதாக அறிகிறேன்.(தவறாய் இருந்தால் திருத்துங்கள் )

குமுதத்தில் சுட்டி காட்டிய கதை இதோ உங்களுக்காக:


ஒரு டீக்கடைக்காரனிடம் ஒரு மல்யுத்த வீரன் எப்போதும் டீ அருந்துவான். ஒரு முறை டீ கடை காரனுக்கும் மல்யுத்த வீரனுக்கும் தகராறு வந்து விட்டது. அப்போது மல்யுத்த வீரன் டீக்கடைக்காரனை மல்யுத்த சண்டைக்கு அழைத்தான்... அவர்கள் இனத்தில் மல்யுத்த சண்டைக்கு ஒருவன் அழைத்தால் நிச்சயம் ஒப்புக்கொள்ள வேண்டும்; இல்லா விடில் அது பெரும் அவமானம். எனவே டீக்கடைக்காரன் ஒப்பு கொண்டான்.

ஆனால் இதில் எப்படி நாம் ஜெயிக்க போகிறோம் என பயந்தான். அறிவுரைக்காக ஒரு ஜென் துறவியை நாடினான்.

அவனது கதை முழுதும் கேட்ட அவர், " சண்டைக்கு இன்னும் எத்தனை நாட்கள் உள்ளன" என்று கேட்டார். " 30 நாட்கள்" என்றான் அவன். " இப்போது நீ என்ன செய்கிறாய்?"  " டீ ஆற்றுகிறேன்" " அதையே தொடர்ந்து செய்" என்றார் அவர்..

ஒரு வாரம் கழித்து வந்தான் டீக்கடைக்காரன்.. " இன்னும் ஈடுபாடோடு, இன்னும் வேகமாய் டீ ஆற்று" என்றார் ஜென் துறவி..

இரண்டு வாரம் ஆனது.. அப்போதும் அதே அறிவுரை.

போட்டி நாள் அருகில் வந்து விட்டது.. டீக்கடைக்காரன் நடுக்கத்துடன் ஜென் துறவியிடம், " நான் என்ன செய்ய வேண்டும்?" என்று கேட்டான்.. "போட்டிக்கு முன் ஒரு டீ சாப்பிடலாம் என நீ அவனை கூப்பிடு" என்றார் துறவி.

மல்யுத்த வீரன் குறிப்பிட்ட நாளன்று வந்து விட்டான்.. "வா.. முதலில் டீ சாப்பிடு" என்றான் கடை காரன். "சரி" என்று அமர்ந்தான் வீரன்... டீ ஆற்றும் வேகம் கண்டு மிரண்டு போய் விட்டான்.. இதற்கு முன்பும் அவன் டீ ஆற்றுவதை பார்த்திருக்கிறான் இப்போது என்ன ஒரு வேகம்! ஒரு சாதாரண டீ ஆற்றும் விஷயத்திலேயே இவ்வளவு முன்னேற்றம் என்றால், போட்டிக்கு எந்த அளவு தயார் செய்திருப்பான் என எண்ணுகிறான்.. போட்டியே வேண்டாம் என சென்று விடுகிறான்.
***
அநேகமாய் இந்த கதைக்கு விளக்கம் தேவை இல்லை.. எனினும் சில வரிகள்.. நாம் செய்யும் செயலையே ஈடுபாடோடு செய்யும் போது அந்த செயலும், நாமும் ஒரு உன்னத நிலையை எட்டுகிறோம் !

நன்றி குமுதம் ! நன்றி கஸாலி !

டிஸ்கி: இன்று முழு நாள் மீட்டிங். இந்த பதிவிற்காக யாரேனும் போன் செய்து கலாய்க்க போகிறீர்கள் எனவே தான் சொல்லி வைக்கிறேன். தொலை பேசி அணைக்கப்பட்டிருக்கும்.   மாலை ஆறு மணிக்கு மேல் தான் தான் இணையம் பக்கம் வருவேன். நன்றி !