வானதி டீச்சர்

        பாலு மகேந்திராவின் அழியாத கோலங்கள் பார்த்திருக்கிறீர்களா? பள்ளி மாணவர்களுக்கும்- ஆசிரியைக்கும் உள்ள அன்பை கவிதையாய் சொன்ன அற்புதமான படம் அது. படத்தில் வரும் ஷோபா டீச்சர் போல ஒவ்வொருவருக்கும் இளம் வயதில் ஒரு டீச்சர் இருந்தே தீருவார். எங்களுக்கு அது ..வானதி டீச்சர் !

ஆறாவது, ஏழாவது, எட்டாவது - மூன்று வருடமும் எங்களுக்கு அறிவியல் எடுத்தார். அறிவியல் கான்செப்டுகளுக்கும் எனக்கும் அன்று முதல் இன்று வரை காத தூரம். ஆயினும் அந்த மூன்று வருடமும் அறிவியலில் முதல் மார்க் எடுத்தேன் என்றால் அது வானதி டீச்சருக்காக !

எனது இரு அண்ணன்கள்- அக்கா அனைவரும் அதே பள்ளியில் படித்திருந்தனர். மூவரும் நன்கு படிப்பவர்கள் என்பதால் அதே குடும்பத்தை சேர்ந்த நானும் நன்கு படிப்பேன் என்பது அவர்களின் எதிர்பார்ப்பு. அது ஒரு சுமையாய் என் மீது இறங்கியது. அந்த நம்பிக்கையை காப்பாற்ற வேண்டியதாகி விட்டது !

அறிவியலுக்கு வானதி டீச்சர் என்றதும் அண்ணன்களும் அக்காவும் சொன்னது : " அப்டியா ..அப்ப அந்த பாடத்தை பத்தி கவலைப்பட வேண்டாம்" .

படம்: இணையத்திலிருந்து

வானதி டீச்சர் புடவை கட்டியிருக்கும் விதமே மிக கண்ணியமாய் இருக்கும். ரெண்டுங்கெட்டான் வயது பசங்க - அவங்க மனசில் சலனம் வரக்கூடாது என்கிற ஜாக்கிரதை உணர்வு அதில் இருக்கும்.

பாடத்தை தவிர வேறு விஷயம் பக்கம் அதிகம் போக மாட்டாங்க. ஆனா செம ஹியூமர் சென்ஸ் ! டக்குன்னு அந்த நேரத்துக்கு தகுந்த ஜோக் அடிப்பாங்க ! (வேறு சில டீச்சர்களும் ஜோக் அடிப்பார்கள் எனினும் அது தயாரிக்கப்பட்ட ஜோக்காய் இருக்கும். அந்த டீச்சர்கள் அடுத்தடுத்த வருஷமும் அந்த இடத்தில் அதே ஜோக்கை சொல்லிக் கொண்டு இருப்பார்கள். )

வானதி டீச்சரின் ஜோக் எல்லாருக்கும் புரிஞ்சிடாது. கொஞ்சம் உலக விஷயமும், புத்தக அறிவும் இருந்தால் தான் முழுசா புரியும். உதாரணமாய் அரசியல் வாதிகளுக்கு இருக்கும் பட்ட பெயரை வைத்து யாரையாவது கிண்டல் செய்வார்கள்.  அந்த நேரத்தில், அந்த இடத்தில் ஏன் அந்த பெயர் சொல்கிறார்கள் என்பது வகுப்பில் சிலருக்கு தான் புரியும்.

கிளாசில் தப்பு பண்ணாலோ, ஒழுங்கா பதில் சொல்லாட்டியோ டீச்சர் கிள்ளுவது பயங்கரமா வலிக்கும். வயிற்றில் உள்ள சதையை ரெண்டு விரலால் பிடிச்சு நல்லா கிள்ளுவாங்க. ஓரிரு முறை பாடம் நடத்தும் போது பக்கத்தில் பேசி அப்படி கிள்ளு வாங்கிருக்கேன். நன்கு வளர்ந்த பெரிய பையன்களை அப்படி கிள்ள மாட்டாங்க. "டீச்சர் நம்மளை கிள்ள மாட்டாங்க இல்ல" என்று சிரிப்பார்கள் அவர்கள். ஆனால் அவர்களுக்கு மட்டும் ஸ்கேல் பேசும் !

என்றைக்குமே பத்துக்கு மூன்று ஆசிரியர்கள் தான் நன்கு பாடம் நடத்துபவர்களாய் இருக்கிறார்கள். வானதி டீச்சர் நடத்தும் அறிவியல் பாடம் வீட்டில் நான் படித்த மாதிரி நினைவே இல்லை. கிளாசிலேயே நடத்தி, பாடத்தை முழுசாய் புரிய வைத்து அங்கேயே சொல்லியும் காட்டி விடுவோம். வீட்டில் படிக்க வேண்டிய அவசியமே இல்லை.

நம்மை விட பெரியவருக்கு நன்றி சொல்லணும்னா "Thank You" ன்னு சொல்லணும். நமக்கு சரி சமமான அல்லது குறைந்த வயது ஆட்கள் என்றால் " தேங்க்ஸ்" அப்படின்னு சொல்லலாம் என டீச்சர் சொல்லி தந்திருந்தார். ஒரு முறை அலமேலு என்கிற வயதான டீச்சர் தந்த ஒரு பொருளை திரும்ப தந்து விட்டு " தேங்க்ஸ் சொன்னேன்னு சொல்லிடு" என்றார் வானதி டீச்சர். வகுப்பில் எல்லாரும் பார்க்கும் போது டீச்சரிடம் கேட்டேன் " அலமேலு டீச்சர் உங்களை விட வயசானவங்க ஆச்சே. நீங்க எப்படி தேங்க்ஸ் சொல்லலாம்? தேன்க் யூ தானே சொல்லணும்?"

சிரித்து விட்டு டீச்சர் சொன்னார் : " நீ என்னை விட சின்னவன் இல்லையா? அதான் உன்னிடம் தேங்க்ஸ்ன்னு சொல்றேன்; நீ அவங்களிடம் சொல்லும் போது தேன்க் யூ ன்னு சொல்லிடு"

டீச்சர் முதலில் தவறு செய்து விட்டு அப்புறம் சமாளித்தார் என்றாலும், அவர் சமாளித்த விதம் அவ்வளவு அழகாய் இருந்தது !

எனது அக்காவிற்கு மருத்துவ படிப்புக்கு சீட் கிடைத்த போது வானதி டீச்சரை பார்த்து ஸ்வீட் கொடுத்து வர டீச்சர் வீட்டுக்கு என்னை அனுப்பியது இன்னும் நினைவில் இருக்கு.

முதல் முறை அப்போது தான் அவர்கள் வீட்டுக்கு செல்கிறேன். மிக சிறிய வீடு. இனிப்பை பெற்று கொண்ட அவர்களுக்கு அவ்வளவு மகிழ்ச்சி ! தான் அறிவியல் சொல்லி கொடுத்த பெண் இன்று டாக்டர் ஆக போகிறார் என்று ஆனந்தம் அவர்கள் பேச்சில் தெரிந்தது. வகுப்புகளில் டீச்சர் அவ்வளவு மகிழ்ச்சியாய் இருந்து நான் பார்த்ததில்லை.

அதன் பின் அவ்வப்போது டீச்சருக்கு எங்கள் ஊர் லைப்ரரியில் கதை புத்தகம் எடுத்து தர அவர்கள் வீட்டுக்கு போவேன். டீச்சருக்கு ஒரே மகன். என்னை விட நான்கைந்து வயது சிறியவன். கணவர் எதோ ஒரு நிறுவனத்தில் வேலை பார்த்து வந்தார்.

சுஜாதா மற்றும் பட்டுக்கோட்டை பிரபாகர் இருவரின் கதைகளை தான் டீச்சர் மிக விரும்பி படிப்பார். இந்த இருவர் எழுதிய புத்தகங்களை தான் எடுத்து வர சொல்லுவார். சுஜாதா புத்தகங்கள் நான் அதிகம் வாசிக்க ஆரம்பித்ததும் இந்த கால கட்டத்தில் தான்.

பொதுவாய் ஒரு வருடம் முடிந்து அடுத்த வகுப்பு போகும் போது சென்ற வருடம் ஏழு "ஏ' வில் அறிவியல் எடுத்தவர்கள் இவ்வருடம் ஏழு " பி" க்கு அறிவியல் எடுப்பார்கள். எட்டாவது செல்லும் போது அப்படி பார்த்தால் வானதி டீச்சர் எடுக்க மாட்டார்; வேறு யாரோ வரவேண்டும். இதை ஏழாவது படிக்கும் போதே ஒரு முறை கேட்டோம் " அடுத்த வருஷம் நீங்க வர மாட்டீங்களா டீச்சர் ? " " ஆமா அடுத்த வருஷம் வேற டீச்சர் அறிவியலுக்கு வருவாங்க " என்றார்.

ஆனால் எட்டாவது அறிவியல் முதல் வகுப்புக்கு டீச்சரே வந்த போது சந்தோஷத்தில் திக்கு முக்காடி போனோம். பள்ளியில் எப்படி அந்த முடிவு எடுத்தார்களோ தெரியாது ஆனால் டீச்சர் எங்கள் வகுப்புக்கு அவர்கள் தான் எடுக்க வேண்டும் என்று கேட்டு வாங்கி கொண்டு வந்ததாக நாங்கள் உறுதியாக நம்பினோம்.

அந்த பள்ளியை விட்டு ஒன்பதாம் வகுப்பு நான் வேறு பள்ளிக்கு மாறி விட்டேன். அதன் பின் டீச்சரை பார்ப்பது, பேசுவது எல்லாம் குறைந்து விட்டது. ஆனால் நண்பர்கள் நந்து, மதுவிடம் டீச்சர் பற்றி அவ்வப்போது விசாரிப்பேன்

எனக்கு திருமணம் நிச்சயமான போது, நண்பர்கள் அனைவரும் வெளியூரில் செட்டில் ஆனதால் ஊரில் பத்திரிக்கை வைக்க நான் செல்லவே இல்லை. அப்பாவும் கூட டீச்சருக்கு நியாபகமாய் பத்திரிகை வைத்திருக்க வாய்ப்பே இல்லை. ஆனாலும் வெளியூரில் திருமணமாகி பின் நானும், என் மனைவியும்  ஊரில் இருந்த சில மணி நேரங்களில் சரியாக வீட்டுக்கு வந்து டீச்சர் என்னை ஆசிர்வாதம் செய்தார்கள். என்னிடம் இருக்கும் டீச்சரின் ஒரே புகைப்படம் அன்று எடுத்தது தான். எனக்கு மனைவியுடன் டீச்சர் காலில் ஆசி வாங்கிய போது ஏனோ அழுகையே வந்து விட்டது. ஒரு நல்ல மாணவன் - நல்ல ஆசிரியரின் மனதில் என்றும் இருப்பான் என்பதை, டீச்சர் என்னை அன்று வாழ்த்த வந்தது உணர்த்தியது .

டீச்சரை கடைசியாய் நான் பார்த்தது அன்று தான். அவர்களை பார்த்து 15 வருடத்துக்கு மேல் ஆகிவிட்டது. அதன் பின் டீச்சரின் கணவருக்கு விபத்தில் கால்களை அகற்றும் படி ஆனது. டீச்சர் அந்த கஷ்டமான காலத்தை தாண்டி வந்தார் என்று நண்பர்கள் மூலம் அறிந்தேன். எனக்கு அந்த தகவல் பல மாதங்கள் கழித்து தான் சென்னையில் தெரிந்தது. டீச்சர் இன்று ரிட்டையர் ஆகி விட்டார். இப்போது எங்கள் ஊரில் வசிக்க வில்லை. எங்கு வசிக்கிறார் என தெரியாது.

இப்போது நரைத்து போய்,வயதான தோற்றத்தில் வானதி டீச்சர் இருக்கலாம். அவரை அப்படி பார்க்க விரும்பாததே கூட நான் பல ஆண்டுகளாய் பார்க்க முயலாததன் காரணமாய் இருக்க கூடும். இன்றும் வானதி டீச்சர் என்றால் எட்டாம் வகுப்பு கிளாஸ்ரூமில் அவர் கரும்பலகை அருகே நிற்கிற சித்திரம் தான் நினைவுக்கு வருகிறது !

இந்த முறை ஊருக்கு செல்லும்போது டீச்சர் எங்கு வசிக்கிறார் என நிச்சயம் விசாரிக்க வேண்டும் என தோன்றுகிறது. டீச்சரை பார்க்கும் வாய்ப்பு கிடைத்தால் " உங்களை பற்றி நான் எழுதியிருக்கேன்" என சொல்லணும்;  பின் அவர் விரும்பினால் இந்த பதிவின் பிரிண்ட் அவுட் அவருக்கு தரவேண்டும். வாசித்தால் மகிழ்வார் என்று நினைக்கிறேன்.

ஆண்டவன் அந்த வாய்ப்ப்பை தருகிறானா என்று பார்ப்போம் !

இந்த களிமண்ணை ஒரு உருவமாய் மாற்றிய எத்தனையோ கைகளில் வானதி டீச்சரின் கையும் ஒன்று ! அவர் சொல்லிகொடுத்த விஷயத்துடனே இப்பதிவை முடிக்கிறேன் :

தேன்க் யூ டீச்சர் !

வெறும் 6 லட்சம் முதலீட்டில்- 5 கோடி சம்பாதித்தவர் பேட்டி

டைம்ஸ் ஆப் இந்தியா பத்திரிக்கையில் ஒரு பேட்டி படித்து அசந்து போனேன்

வெறும் 6 லட்சம் முதலீட்டில்- 5 கோடி சம்பாதித்த ரமேஷ் பக் ஷி ஷேர் மார்கெட் பற்றி சொல்லிய பல விஷயங்கள் அவசியம் பகிர தோன்றியது !

ரமேஷ் பக் ஷி

டைம்ஸ் ஆப் இந்தியாவில் ஆங்கிலத்தில் வந்த கட்டுரை இது. தமிழாக்கம் மட்டும் அடியேன்  :)

இனி ரமேஷ் பக் ஷி பேசியது
*********
எனக்கு 30 வயதாக இருக்கும்போது நான் ஷேர் மார்க்கெட்டில் முதலீடு செய்ய துவங்கினேன். குடும்பத்துக்கான மாதந்திர செலவுகள், இன்சூரன்ஸ் ப்ரீமியம் போன்ற செலவுகள் போக மீதம் இருக்கும் பணத்தில் 30 % பிக்சட் டெபொசிட் போன்றவற்றிலும், மீதம் இருக்கும் பணம் ஷேர் மார்க்கெட்டிலும் முதலீடு செய்வேன்

என் வாழ்க்கையின் பல்வேறு நிலைகளிலும் - நான் முதலீடு செய்த 2 கம்பனிகளின் ஷேர்கள் தான் உதவின அவை - ஹிந்துஸ்தான் யூனி லீவர் மற்றும் மெட்ராஸ் சிமெண்ட் ஆகிய நிறுவன பங்குகள்

ஹிந்துஸ்தான் யூனி லீவர் பங்குகளை முதன்முதலாக 64,000 ரூபாய்க்கு வாங்கினேன். அடுத்த 20 வருடம் அதனை நான் விற்கவே இல்லை. இந்த 20 வருடத்தில் நிறுவனம் பலமுறை இலவச போனஸ் ஷேர்கள் வழங்கியது. அவை எல்லாம் சேர்ந்து நான் 35,000 ஹிந்துஸ்தான் யூனி லீவர் ஷேர்கள் வைத்திருந்தேன். மெட்ராஸ் சிமெண்ட் நிறுவன பங்கும் ஏறக்குறைய இதே கதை தான்

இந்த இரண்டு பங்குகளும் எனக்கு கறவை மாடுகள் போல வேண்டிய போதெல்லாம் பணம் தந்தன. 3 குழந்தைகள் படிப்பு மகள் திருமணம், ஆஸ்பத்திரி செலவுகள் என எல்லாவற்றுக்கும் - இவற்றை கொஞ்சம் கொஞ்சமாய் விற்று தான் சமாளித்தேன்

கடந்த 40 வருடங்களில் வேறு பல பங்குகளும் வாங்கி விற்றுள்ளேன். ஆனால் எந்த ஷேர் வாங்கினாலும் 3 குறைந்தது முதல் 5 வருடங்கள் வைத்திருந்து அதன் பின் தான் விற்பேன்

இந்த 40 வருடங்களில் எத்தனையோ முறை பல பங்கு மார்க்கெட் ஊழல்கள் வந்து போய் விட்டது. இவை வரும் நேரத்தில் பங்குகள் விலை மிக குறைந்து நம் மன நிம்மதி தற்காலிகமாக குலைந்து போகும் !

தற்போதைய ஷேர் மார்க்கெட் முற்றிலும் வேறு விதமாய் இருக்கிறது. இப்போது நான் முற்றிலும் தவிர்ப்பவை பொது துறை நிறுவன பங்குகள் மற்றும் நிறுவனங்கள் வெளியிடும் IPO - க்களை.

ஒரு போதும் நான் ஷேர்களை அன்றே வாங்கி அன்றே விற்கும் வேலையில் இறங்கியதில்லை. அ து சூதாட்டம் போல

பொதுவாக ஷேர் மார்கெட் பற்றி சொல்லும்போது ஒன்று சொல்வார்கள் : உங்களின் எல்லா செலவுகளும் போக - மீதமுள்ள பணத்தில் - உங்கள் வயது என்னவோ - அத்தனை சதவீதம் பிக்சட் டெபாசிட் போன்றவற்றில் முதலீடு செய்யணும் மீதம் ஷேர் மார்க்கெட்டில் முதலீடு செய்யணும் என்பார்கள். அதாவது வயது அதிகமாக, ஆக ஷேர் மார்கெட் முதலீட்டை குறைத்து கொண்டு பிக்சட் டெப்பாசிட் போன்றவற்றில் அதிகம் முதலீடு செய்யணும் என குறிப்பது இதன் அர்த்தம். ஆனால் என் விஷயத்தில் நான் இதற்கு நேர் மாறாக செய்கிறேன். எனக்கு இப்போது வயது 80. நான் எனது மீதமுள்ள வருமானத்தில் 80 % ஷேர் மார்கெட்டில் சேமிக்கிறேன் மீதம் 20 % தான் பிக்சட் டெபொசிட் அல்லது கடன் பத்திரங்களில் சேமிக்கிறேன்

இந்த வயதிலும் ஷேர் மார்க்கெட்டில் பணம் முதலீடு செய்வதால் என் மனது மிக விழிப்புடன் இருக்கிறது. இது உடல் நிலையை நன்கு வைத்து கொள்ள உதவுகிறது மேலும் எனது சொத்து மதிப்பு ஏறி இறங்குவதில் பாதிக்காமல் இருக்க கற்று கொள்வது வாழ்க்கையில் ஏற்ற இறக்கங்களை ஏற்று கொள்ளும் மன பக்குவத்தை தருகிறது
*********
அவரது பேட்டி இங்கு முடிகிறது. இனி எழுதுவது மோகன் குமாராகிய எனது கருத்து :

ஷேர் மார்க்கெட்டின் மிக முக்கியமான நன்மை - அதன் liquidity - தான். உங்களுக்கு வேண்டிய நேரம் வேண்டிய அளவு ஷேர்களை விற்கலாம். ஒரு நிலம் வாங்கி வைத்திருந்தால் அவசரத்திற்கு விற்பதில் சிரமம் இருக்கும். அதே இடத்தில் நிலம் வாங்க விருப்பமுள்ள ஆள் கிடைக்கணும்; விலை படியனும்; எல்லாம் முடிந்து விற்று முடிக்க சில வாரங்கள் அல்லது மாதங்கள் ஆகலாம். ஆனால் ஷேர் மார்க்கீட்டில் நீங்கள் முதலீடு வைத்திருந்தால் அன்றைக்கே கூட விற்று விட முடியும்

ஆனால் ஷேர் மார்க்கெட்டில் தனி நபர்கள் பலரும் பணத்தை இழக்கவே செய்கின்றனர். ஷேர் மார்க்கெட்டில் உண்மையில் நன்கு பணம் செய்பவர்கள் Financial Institution என்று சொல்லப்படுகிற நிறுவனங்கள் தான்.

தனி நபர்கள் செய்யும் மிக பெரிய தவறு உடனே லாபம் பார்க்க நினைப்பது

இந்த பேட்டி மூலம் நாம் எடுத்து கொள்ள வேண்டிய ஒரே விஷயம் - ரமேஷ் - ஒவ்வொரு பங்கையும் பல வருடங்கள் பொறுமையாக விற்காமல் வைத்திருந்தது தான். நல்ல நிறுவன பங்கை வாங்கி, சில வருடங்கள் அதனை விற்காமல் பொறுமையாக வைத்திருந்தால் நிச்சயம் 3 - 5 வருடங்களில் நல்ல விலைக்கு செல்லும். இது முதலீட்டாளர்கள் அனைவருமே ஒப்பு கொள்ளும் விஷயம் !
*****
பின்குறிப்பு:

இந்த பதிவு பற்றி நண்பர் ஸ்ரீராம் நாராயணன் கூகிள் பிளஸ்சில் எழுதியது முக்கிய தகவல் என்பதால் பதிவில் சேர்க்கிறேன் :

பேட்டியில் கற்க வேண்டியது நிறைய இருக்கு

1. சேமிப்பு அவசியமல்ல இன்றியமையாது
2. பங்குச்சந்தை ரேஸ் மைதானமல்ல, காலையில் பத்து ரூபாய் எடுத்துச் சென்று சாயங்காலம் 100 ரூபாயோடு திரும்ப
3. don't put all eggs in one basket முதலீட்டை Equity & Bond / FD என்று இரண்டாக பிரிக்கவேண்டும். அதிக ஈக்விட்டியில் ஆரம்பித்து மெதுவாக பாண்ட் / ஃபிக்ஸ்ட் டெபாசிட் பக்கம் நகர ஆரம்பிக்கணும். ரிட்டையர்மெண்ட்டுக்கு முன் பெருமளவு ஈக்விட்டியிலிருந்து வெளியே வந்து விடணும் (due to very high volatility)
4. Do not try to time the market - no one has ever done it
5. Do your research before buying a stock and Stay with your choice for a long time.

மூணு வருசம் வச்சிருந்தா லாபம் நிச்சயம் என்பதெல்லாம் கிடையவே கிடையாது, மேலும் ஷேர் என்பது 100 % லிக்விட் அசெட்டும் கிடையாது. நீங்க வச்சிருக்கும் ஷேரை வாங்கறதுக்கு ஆள் இருக்கும் வரையே அது லிக்விட்.

ஷேர் மார்க்கெட்டில் தனி மனிதர்கள் பணம் இழக்கிறார்கள் நிறுவனங்கள் லாபம் அடைகின்றன என்பதை உண்மை இல்லை என்று சொல்ல மாட்டேன் ஆனால் அது தவறான பார்வை. இதில் வித்தியாசம் எமோசன். நம் பணத்தை கையாளும் போது எடுக்கும் முடிவுகள் பெரும்பாலும் எமோசனலாக எடுக்கப்பட்டைவையாக இருக்கும். அதே இரு ஃபண்ட் மேனேஜர் செய்யும் போது லாஜிகலாக இருக்கும். நாமும் லாஜிகலாக தெரிவு செய்து தொடர்ந்து லாஜிகலாக செயல் பட்டால் (hold, buy more, sell etc) history proves that you can gain in Stock market. ஆனால் நாம் செய்வதோ வாட்சப்ல சொல்லிட்டான், ஃபேஸ்புக்ல சொல்லிட்டான், பக்கத்து வீட்டுக்காரன் சொல்லிட்டான் மார்க்கெட் விழும்னு அதனால நான் விக்கறேன் என்று முடிவு பண்றோம்.. பிரச்சனை நம்மிடம் மார்க்கெட்டில் இல்லை

அவர் சொல்லாமல் விட்டது போதிய அறிவும் நேரமும் இல்லாதவர்கள் மியூச்சுவல் ஃபண்ட்களில் முதலீடு செய்வது நலம்.

****
அண்மை பதிவு:

குற்றம் 23- சினிமா விமர்சனம் 

படிப்பில் ஜெயிப்போர் வாழ்வில் தோற்கிறார்களா? ஸ்டேட் பஸ்ட் மாணவன் பேட்டி

மாநிலத்தில் முதல் மாணவனாய் வந்த ஸ்ரீநாத் பேட்டி தொடர்கிறது.

முதல் பகுதி : இங்கே

*****
நாங்கள் பேசிக்கொண்டிருக்கும் அந்த அறையில் ஒரு ஷெல்ப் - அது முழுக்க ஸ்ரீநாத் வாங்கிய பரிசு பொருட்கள், கோப்பைகள் என நிரம்பி வழிகிறது.

" ஸ்டேட் பர்ஸ்ட் வந்ததுக்கு என்ன பரிசு அம்மா - அப்பா வாங்கி தந்தாங்க? "

" கம்பியூட்டர் பழசாயிடுச்சு. அதனால் புது கம்பியூட்டர் வாங்கி தந்தாங்க. அப்புறம் நிறைய ஷீல்ட் வந்துட்டதால அதை வைக்கிறதுக்கு இதோ இந்த தனி ஷெல்ப் வாங்கி தந்தாங்க"

"டென்த் படிக்கும்போது வேற பொழுதுபோக்கு ஏதும் கிடையாதா ?"

அப்படி எல்லாம் இல்லை; வாலிபால் கிரிக்கெட் ரெண்டுமே சின்ன வயசிலிருந்து தொடர்ந்து ஆடுறேன். இரண்டிலும் தஞ்சை டிஸ்ட்ரிக்டுக்காக ஆடிருக்கேன். பத்தாவதில் கூட மேட்ச் ஆட போனேன் டீச்சர்கள் " ஸ்ரீநாத் மேட்ச் போவதால் மார்க் குறைய கூடாது பாத்துக்க என சொல்லிட்டு அனுமதிச்சாங்க "

" இவ்ளோ ஏன் அங்கிள் .. இங்கிலீஷ் ஒன் பரீட்சை முடிஞ்சு அடுத்த நாள் இங்கிலீஷ் டூ பரீட்சை. நான் மறுநாள் பரீட்சை வச்சிக்கிட்டு ஈவனிங் போயி கிரிக்கெட் ஆடிட்டுருன்தேன். எங்க ஏரியாவில் ஒரு ஸ்கூல் டீச்சர் இருக்கார் கரக்ட்டா அவர் பார்த்துட்டு திட்டினார்"

"பொதுவா பத்தாவதில் முதல் ரேன்க் வருபவர்கள் + 2 வில் மறுபடி முதல் மார்க் வாங்குவதில்லை. இது ஏன்னு நினைக்கிறே ?

ஸ்டேட் பஸ்ட் வந்தோன நிறைய பேர் பாராட்டி பாராட்டி கொஞ்சம் ஓவர் கான்பிடெண்ட் ஆகிடுராங்கன்னு நினைக்கிறேன். அத்தோட ஸ்டேட் பஸ்ட் வாங்க நிறைய உழைப்போட கொஞ்சோண்டு லக்கும் வேணும் அங்கிள். அந்த லக் ஒரு தடவை வரலாம் மறுபடி அதே ஆளுக்கு இன்னொரு தடவை லக் அடிக்கிறது கஷ்டம் தானே?"

முதல்வருடன் பரிசு வாங்குகிற மாதிரி அங்கிருக்கும் படத்தை பார்த்து விட்டு அந்த அனுபவம் பற்றி கேட்க,

முதல்வருக்கு இடப்பக்கம் முதலாவதாக ஸ்ரீநாத்

" முதல் மூணு ரேன்க் வாங்கியவர்கள் முதல்வர் கையால் பரிசு வாங்குவார்கள். என்னை தவிர ரெண்டாவது ரேன்க் வாங்கிய 6 பேர், மூணாவது ரேன்க் வாங்கிய 15 பேர் என அன்னிக்கு மொத்தம் 22 பேர் வந்திருந்தாங்க. முதல்வர் கிட்டே எப்படி நடந்து போகணும், எப்படி கை நீட்டி பரிசு வாங்கணும் என ரிகர்சல் எல்லாம் ரொம்ப நேரம் நடந்தது.

முதல்வர் எங்களை வந்து பார்த்து பரிசுகளை கொடுத்தார் ஒரு நிமிஷம் போல தான் அவர் கூட இருக்க முடிந்தது; வேறு விழா இருந்ததால் கிளம்ப வேண்டியாகிடுச்சுன்னு நினைக்கிறேன் "

உனக்கு அண்ணன் தம்பி யாரும் இருக்காங்களா ?

எனக்கு ஒரே அண்ணன். இஞ்சினயரிங் முடிச்சிட்டு வேலைக்கு போயிட்டான். அண்ணன் என் அளவு அதிகமா மார்க் வாங்கலை ஆனா அவன் செம புத்திசாலி. எதையும் உடனே கத்துப்பான் சுவிம்மிங், கார் டிரைவிங் இப்படி எதுவுமே டக்கன்னு கத்துக்கிட்டான். அவன் தான் எனக்கு பெரிய இன்ஸ்பிரேஷன்

அண்ணனை பற்றி பேசும்போது அன்பும், மகிழ்ச்சியும் நிரம்ப கண்கள் விரிய பேசுகிறான்

படிப்பில் ஜெயிப்பது ஒரு பக்கம். வாழ்க்கையில் ஜெயிப்பது என்பது இன்னொரு பக்கம். நமக்கு தெரிஞ்ச பிசினஸ் அல்லது பொது உலகில் பிரபலமா இருக்கவங்க யாரும் படிப்பில் முதல் மார்க் வாங்கினவங்க இல்லை. அதே போல் மாநிலத்தில் முதல் மார்க் வாங்கியவங்க அப்புறம் என்ன ஆனாங்க அப்படின்னும் தெரியவே இல்லை. இல்லியா ? இது ஏன்னு நீ யோசிச்சிருக்கியா ?

ம்ம் மே பீ படிப்பு, படிப்புன்னு அவங்க மத்த விஷயத்தில் கான்சென்ட்ரேட் பண்ணாம இருந்திருப்பாங்களோ என்னவோ ? தெரியலை அங்கிள்.

என்னை பொறுத்த வரை நிச்சயம் எஞ்சியரிங் சம்பந்தமா படிக்க போறேன். அது என்ன படிப்பு அப்படிங்கறது நான் அதுக்கான என்ட்ரன்ஸ்சில் வாங்குற மார்க் பொறுத்து தெரியும்

இன்னொண்ணு : நிச்சயம் படிச்சு முடிச்சு வேலைக்கு போனபிறகு மத்தவங்களுக்கு என்னால முடிஞ்ச உதவி பண்ணனும்னு யோசனை இருக்கு. அது என்ன விதமானதுன்னு தெரியலை. ஆனா நிச்சயம் எதோ ஒண்ணு செய்வேன்.

(அலாக்ரிட்டி என்ற நிறுவனத்தில் பணி புரியும் போது அதன் தலைவரான அமோல் கர்னாட் (சமீபத்தில் தான் புற்று நோய்க்கு இரையானார்) சொல்வார்: " முதல் ரேன்க் வாங்குறவங்க ஆபிசில் ஜெயிக்க மாட்டாங்க என்று சொல்வது ரொம்ப பெரிய தப்பு ! முதல் ரேன்க் வாங்குவது சாமான்ய விஷயம் இல்லை. அதுக்கு எவ்வளவு உழைப்பு, டிசிப்ளின், Focus எல்லாம் வேணும் ! அப்படிப்பட்டவன் கம்பனிக்காக கண்டிப்பா நல்லா உழைக்கவும் தான் செய்வான். அவனால் கம்பனியில் ஷைன் பண்ண முடியலை என்றால் நம்ம சிஸ்டத்தில் தான் எதோ தப்பு !" )

அரசு தேர்வில் நல்ல மார்க் எடுக்க பொதுவா என்ன செய்யணும் ?

நான் என்ன செஞ்சேன்னு சொல்றேன். கிளாசில் நன்கு பாடம் கவனிச்சுடுவேன் அது ரொம்ப முக்கியம். டவுட் வந்தா உடனே எழுந்து கேட்டுடுவேன். சில டீச்சர்ஸ் Flow போயிடும்னு கடைசியா கேட்க சொல்லுவாங்க அப்போ மட்டும் கடைசியா கேட்பேன். இல்லாட்டி தனியா பார்த்தாவது கேட்பேன். நான் டியூஷன் ஏதும் போகலை அதனால் கிளாசில் சொல்லி கொடுப்பது தான் முக்கியம் (முதல் ரேன்க் வாங்கியவன் டியூஷன் ஏதும் போகலை என்கிற தகவல் ஆச்சரியமா இருந்தது )

தினம் கொஞ்ச நேரம் கிளாசில் கவனிச்சதை மறுபடி ஒரு தடவை படிச்சு பார்ப்பேன். சனி, ஞாயிறு நல்லா படிப்பேன். பாடத்தை முதல் முறை படிக்கும் போது கதை புக் படிக்கிற மாதிரி படிச்சு அதில் என்ன இருக்குனு தெரிஞ்சுப்பேன். பள்ளிகளில் வைக்கிற டெஸ்ட், அது டெய்லி டெஸ்ட்டாஇருந்தாலும் அதுக்கு ஒழுங்கா படிச்சிடுவேன்

எல்லா பரிட்சையும் டைம் சரியா மேனேஜ் பண்ணி எழுதணும். அது ரொம்ப முக்கியம். முப்பது நிமிஷம் முன்னாள் எல்லா கேள்வியும் எழுதி முடிக்க திட்டம் போடணும். அப்போ தான் 15 நிமிஷம் முன்பாவது முடிக்கலாம். அந்த 15 நிமிஷம் திரும்ப படிக்க, அண்டர்லைன் செய்ய யூஸ் ஆகும்.

பிளாக், ப்ளூ , வயலட் - இந்த மூணு பேனா மட்டும் வச்சிருப்பேன்; பளுவில் எழுதுவேன் சில நேரம் தலைப்பு ( Heading ) மட்டும் பிளாக் கலரில் தருவேன். வயலட் கலர் முக்கிய பாயிண்ட்ஸ் அண்டர்லைன் செஞ்சு காட்ட பயன்படுத்துவேன்

எழுதும் போது ஒண்ணு 1,2,3 ன்னு பாயிண்ட் வைஸ் எழுதணும். இல்லாட்டி குட்டி குட்டி தலைப்பு போட்டு அதற்குள் மற்ற விஷயங்கள் எழுதணும். அப்ப தான் திருத்துரவங்களுக்கு ஈசியா இருக்கும்

அந்த கேள்விக்கு சம்பந்தமான எல்லா ரிலவன்ட் பாயிண்ட்டும் எழுதிடணும். எதையும் மிஸ் பண்ண கூடாது. அதே நேரம் தேவையில்லாத கதையும் விட கூடாது. எவ்ளோ எழுதுறோம் என்பது முக்கியமே இல்லை. சரியா எழுதுறோமா என்பது தான் முக்கியம்

(ஸ்ரீநாத்தை விட ஓரிரு வயது சிறியவளான என் பெண்ணும் உடன் வந்திருந்தாள். " நீ ஸ்ரீநாத் மாதிரி பஸ்ட் வரணும்னு இல்லை; ஆனா நல்ல மார்க் வாங்க உனக்கு சில ஐடியா கிடைக்கலாம்" என்று சொல்லி தான் அழைத்து சென்றிருந்தேன். பதிவு சம்பந்தப்பட்ட விஷயங்களில் பல அடி தூரம் தள்ளியே நிற்கும் அவள், படிப்பு சம்பந்தப்பட்ட பேட்டி என்பதால் தானாகவே வந்தாள். நிச்சயம் அவளுக்கு இந்த குறிப்புகள் உபயோகமாக இருந்திருக்கும் )

எந்த ஒரு ஸ்டூடன்ட் நினைச்சாலும் ஸ்டேட் பஸ்ட் வர முடியுமா?

இண்டரஸ்ட்டும், Focus ம் இருந்தால் நிச்சயம் நல்ல மார்க் யாரும் வாங்கலாம். டெண்தை பொறுத்த வரை ஹார்ட் வொர்க் பண்ணா யார் வேண்ணா ஸ்டேட் பஸ்ட் வரலாம்னு சொல்லலாம். ஆனா + 2 வில் Basic Potential -ம் கொஞ்சம் வேணும். அப்போ தான் நல்லா படிக்க முடியும்; மார்க் வாங்க முடியும்னு தோணுது

நிச்சயமா ஸ்டேட் பஸ்ட் வாங்க ஏற்கனவே சொன்ன மாதிரி முதல்ல ஹார்ட் வொர்க். அப்புறம் கொஞ்சம் அதிர்ஷ்டம் ரெண்டும் வேணும்.

****
பேசி முடித்து, புகைப்படம் எடுத்து கொண்டு விடை பெற்றேன்.

ஸ்ரீநாத்: தற்போது போனிலும், மெயிலிலும் என்னோடு தொடர்பில் இருக்கிறான். தஞ்சையில் எனக்கு கிடைத்த இன்னொரு நண்பன் !

பத்தாம் வகுப்பில் அதிக மார்க் வாங்குவது எப்படி? மாநிலத்தில் முதல் மாணவன் ஸ்ரீநாத் - பேட்டி

சமீபத்தில் தஞ்சை சென்ற போது அண்ணனும் நானும் பைக்கில் சென்று கொண்டிருக்கிறோம். வண்டியை திடீரென நிறுத்திவிட்டு " அங்கே பார்" என்றார் அண்ணன்.

ஒரு வீட்டின் காம்பவுண்டுக்குள் இரண்டு சிறுவர்கள் கிரிக்கெட் ஆடி கொண்டிருந்தனர். " ஸ்ரீ .. இங்கே வா " என்று கூப்பிட்டார். " என்ன அங்கிள்" என்ற படி கிரிக்கெட் பேட்டுடன் ஓடிவந்தான் அந்த சிறுவன்.

" அந்த 3 மார்க் என்ன ஆச்சு? ".

சற்று தயக்கத்துடன் " தமிழில் 97 தான் போடுவாங்க அங்கிள்; புல் மார்க் போட மாட்டாங்க " என்றபடி வெட்கத்தில் நெளிந்தான்.

அண்ணன் அந்த சிறுவனை எனக்கு அறிமுகபடுத்தினார் " இவன் பேரு ஸ்ரீநாத்; போன வருஷம் ஸ்டேட் பஸ்ட். 497 மார்க். 4 சப்ஜெக்டில் செண்டம். தமிழில் 97. இதுவரை 496 தான் அதிகபட்ச மார்க்கா இருந்தது. இவன் பண்ணது தான் தமிழக ரிக்கார்ட்" என்று என்னிடம் சொல்லிவிட்டு " இங்க்லீஷில் எப்படிப்பா நூறு மார்க் போட்டாங்க? ஆச்சரியம்தான்" என அவனிடம் பேச ஆரம்பித்திருந்தார் அண்ணன்.

மாநிலத்தில் முதல் மார்க் , இதுவரை யாரும் செய்யாத படி -497 மார்க் வாங்கியவன், ரொம்ப ஜாலியாக தன்னை விட 2 வயது இளையவனுடன், சுவற்றை ஸ்டம்ப் ஆக்கி கிரிக்கெட் ஆடிய விதத்தில் நிச்சயம் ஒரு பதிவுக்கான செய்தி இருந்தது.

" தம்பி நான் ஒரு Blog வச்சிருக்கேன். அதில் ஒரு ஆர்ட்டிகிள் எழுதணும். உன்கிட்டே பேசணுமே "

"சரி அங்கிள். நான் அப்புறம் உங்க வீட்டுக்கு வர்ரேன் "

இப்படி சொல்பவர்கள் அநேகமாய் டிமிக்கி கொடுப்பார்கள் என அவனது போன் நம்பர் வாங்கி கொண்டு விடைபெற்றேன்.

போகும்போது அண்ணன் சொன்னார் " நான்,  ஸ்ரீநாத் எல்லாம் ஏரியாவில் ஒண்ணா கிரிக்கெட் ஆடுவோம். ஸ்ரீநாத் ஸ்டேட் பஸ்ட் வந்த அன்னிக்கு குடும்பத்தோட அவன் வீட்டுக்கு போய்ட்டோம். ஒரே கொண்டாட்டமா இருந்தது. ஏரியா முழுக்க அங்க வந்துடுச்சு "

வெளியே சென்ற வேலை முடிந்து வீட்டுக்கு வந்த பின் ஸ்ரீநாத்தை தொலைபேசியில் " ஸ்ரீநாத் நாம மீட் பண்ணலாமா?" என அழைக்க, " அங்கிள் நான் கிளம்பி அங்க வரவா? " என்றான் " வேண்டாம் ஸ்ரீநாத்; நானே உங்க வீட்டுக்கு வர்ரேன்; உங்க வீடு தான் தெரியுமே "

மாநிலத்தில் முதல் மாணவன் என்கிற தலைக்கனம் சிறிதும் இல்லாமல் " நான் அங்கே வரட்டுமா அங்கிள்? " என்றதிலேயே ஸ்ரீநாத்தை பற்றி அறிந்து கொள்ள முடிந்தது. நேரில் பேசிய பின் இன்னும் நிறையவே... !
********
ஸ்ரீநாத்தின் அப்பா பேங்கில் வேலை பார்க்கிறார். அம்மா ஹவுஸ் வைப். நான் சென்ற போது இருவருமே வீட்டில் தான் இருந்தனர். வீட்டு ஹாலில் அமர்ந்து நாங்கள் பேச துவங்க, " ரூமுக்குள் போய் உட்கார்ந்து பேசுங்க எங்க முன்னாடி பேசினா ஸ்ரீநாத் பேச தயக்க படலாம் " என ஸ்ரீநாத் அறைக்குள் அமர்ந்து பேச சொல்கிறார்கள்.

நாங்கள் பேசும்போது அவனோடு கிரிக்கெட் விளையாடிய சிறுவனும் உடன் இருந்தான். கேஷுவலாக பேச துவங்கினோம்

"உன்னோட சின்ன வயசு படிப்பெல்லாம் எப்படி இருந்தது? "

" ஏழாவது வரை நவபாரத் மெட்ரிகுலேஷனில் படிச்சேன். அப்போ முதல் ரேன்கேல்லாம் வரமாட்டேன். ஆனா மூணு ரேங்கிற்குள் நிச்சயம் வருவேன். எட்டாவது வரும்போது தான் பொன்னையா ராமஜெயம் பள்ளிக்கு வந்தேன். அப்பலேந்து +2 வரை அங்கு தான் படிக்கிறேன். பொன்னையா ராமஜெயம் காலேஜ் கூட இருக்கு; Prist University ன்னு சொல்லுவாங்களே அது தான் "

" ஸ்டேட் பஸ்ட் வாங்கனும்னு aim பண்ணி படிச்சியா?" 

" நிச்சயமா இல்லை. எங்க ஸ்கூலில் பாயிஸ் செக்ஷன் தனி. அடுத்த தெருவில் கேர்ள்ஸ் செக்ஷன் இருக்கு. எப்பவும் பாயிஸ் செக்ஷன் முதல் மார்க் வருதா இல்லை கேர்ள்ஸ் செக்ஷன் முதல் மார்க் வருதான்னு போட்டி இருக்கும். நாங்கல்லாம் பாயிஸ் செக்ஷன் தான் வரணும்னு நினைப்போம். அப்படி தான் ஆரம்பத்தில் நினைச்சேன்".

"நான் டென்த் படிச்ச வருஷம் தான் சமசீர் கல்வி முதல் முறையா அறிமுகம் ஆனது. எங்களுக்கு ஆகஸ்ட் மாசம் தான் புக் வந்தது. அதற்கு பிறகு தான் பாடங்கள் விரைவா நடத்தப்பட்டது"

டென்த் வந்த பிறகு தொடர்ந்து எல்லா பரிட்சையிலும் ஸ்கூல் பஸ்ட் வாங்கிட்டு இருந்தேன். கடைசி ரிவிஷனில் 490 மார்க்குக்கு மேல் வாங்கும்போது தான் " தஞ்சை மாவட்டத்தில் முதல் மார்க்" வாங்க வாய்ப்பு இருக்குமோ என தோணுச்சு. ஆனா ஸ்டேட் பஸ்ட் பத்தி எப்பவும் நினைக்கலை; எனக்கே ரொம்ப ஆச்சரியம் தான் அது "

ரிசல்ட் வந்த அன்னிக்கு என் நண்பன் வீட்டிலே கம்பியூட்டரில் எங்க மார்க் பாத்துக்கிட்டு இருந்தோம். அவன் மார்க் பார்த்துட்டு, அடுத்து என் மார்க் பார்த்தால் 4 செண்டம்; மொத்தம் 497 என தெரிந்தது. இவ்ளோ மார்க் இதுவரை யாரும் எடுத்ததில்லையே என நினைச்சிட்டு இருக்கும் போது அருகில் இருந்த அவன் வீட்டு டிவி யில் " மாநிலத்தில் முதல் மாணவன் தஞ்சையை சேர்ந்த ஸ்ரீநாத் " என்று அனவுன்ஸ் செய்தார்கள். மார்க் பார்த்த அடுத்த நிமிஷமே டிவி மூலம் நான் ஸ்டேட் பஸ்ட்டுன்னு தெரிய வந்தது

" உடனே ஸ்கூல்க்கு போயிட்டேன். நிறைய டிவி, பத்திரிக்கை எல்லாம் அங்கே வந்துட்டாங்க. ஸ்கூலில் எல்லாருக்கும் செம மகிழ்ச்சி. பசங்க என்னை அப்படியே தூக்கிட்டாங்க"

" அடுத்த ரெண்டு நாள் ரொம்ப excited -ஆ இருந்தது அங்கிள். அப்போ நடந்த விஷயங்களை இன்னும் நம்பவே முடியலை; நிறைய விஷயம் ஞாபகத்தில் கூட இல்லை ஒரு மாதிரி பாதி நினைவோட தான் இருந்தேன் "

ரெண்டு நாளில் நிறைய டிவி காரர்கள், பேப்பர் காரர்கள் வீட்டுக்கு வந்தாங்க போனில் பேசினாங்க.

"+2 விற்கு பின் நீ என்ன படிக்கணும்னு பிளான் பண்ணிருக்கே ? "

"+ 2 வில் மேக்ஸ் குரூப் எடுத்திருக்கேன். IIT போகணும்கிறது தான் முதல் பிளான். அது கிடைக்காட்டி N .I .T அல்லது பிட்ஸ் பிலானி இதில் ஏதாவது கிடைச்சா நல்லாருக்கும். அதுவும் இல்லாட்டி அண்ணா யூனிவர்சிட்டியில் எஞ்சினியரிங் எடுப்பேன்" 

"இப்போதைக்கு IIT உள்ளிட்ட இடங்களுக்கான என்ட்ரன்ஸ் தேர்வுக்கு தயார் செஞ்சுகிட்டு இருக்கேன். அம்மா அப்பாவுக்கு நான் CBSE -ல் படிச்சிருந்தா IIT மாதிரி கோர்ஸ் போக ஈசியா இருக்கும்னு சற்று வருத்தமா இருக்கு. ஸ்டேட் போர்ட் என்பதால் நான் மிக அதிக மார்க் எடுக்கணும் என்ட்ரன்சில் ".

"எனக்கு எப்பவும் பிசிக்ஸ் , கெமிஸ்ட்ரி தான் ரொம்ப பிடிக்கும். IIT -ல் படிச்சிட்டு ரிசர்ச் சயின்டிஸ்ட் ஆகணும்னு ஆசை.அதுக்கு அதிக பணம் கிடைக்காதுன்னு சில பேர் சொல்றாங்க அதை பத்தி கவலையில்லை எனக்கு பிடிச்ச வேலை செய்யணும் அதான் முக்கியம் "

"டென்த் படிக்கும் போது தினம் எவ்ளோ நேரம் படிப்பே ? "

"தினம் 3 மணி நேரம் படிப்பேன். பரீட்சை நேரம் என்றால் மட்டும் 6 மணி நேரம் படிப்பேன். பள்ளி நாட்களிலும் சரி, தேர்வின் போதும் சரி 6 மணி நேரம் தூங்குவேன்". 

"இப்போ + 1 வந்துட்டே; அடுத்த வருஷம் மறுபடி முதல் ரேன்க் வாங்கணும்னு பிரஷர் இருக்கா? "

"வீட்டில் நிச்சயமா கொஞ்சம் கூட இல்லை; பள்ளியிலும் வெளியிலும் தான் நிறைய பிரஷர் வருது. பாக்கிறவங்க எல்லாம் " +2 வில் பஸ்ட் வந்துடுவே தானே-ன்னு கேட்குறாங்க "

"பாடத்தை தாண்டி தவிர வேற ஏதும் படிப்பியா ?"

"அறிவியல் சம்பந்தமான புக்ஸ் (சில பேர்கள் சொல்கிறான்) படிப்பேன் அப்துல் கலாம் புக்ஸ் நிறைய படிச்சிருக்கேன்" (அவனது அறையில் படிப்பை தாண்டி நிறைய புத்தகங்கள் கிடக்கிறது)

"உனக்கு நண்பர்கள் உண்டா? நல்லா படிக்கும் ஸ்டூடண்ட்ஸ் கொஞ்சம் தனிமை விரும்பிகளா இருப்பாங்க இல்லியா ?"

"அப்படியெல்லாம் இல்லை, எனக்கு ஏகப்பட்ட நண்பர்கள் இருக்காங்க".

அதுவரை கூடவே இருந்து நாம் பேசுவதை உன்னிப்பாக கவனித்த மாணவனை அறிமுகம் செய்கிறான். " இவன் எனக்கு ரெண்டு வருஷம் ஜூனியர். எப்பவும் என் கூட தான் கிரிக்கெட் விளையாடிட்டு இருப்பான். என் வகுப்பிலேயே நிறைய நண்பர்களும் கூட உண்டு, 

இந்த பையனும் IIT படிக்க தான் பிளான் பண்றான். " IIT ல் சீட் கிடைப்பது ரொம்ப கஷ்டம்டா; கிடைக்காட்டா நீ என்ன பண்ணுவே ? " ன்னு ஒரு தடவை கேட்டேன். " அடுத்த வருஷம் இன்னும் நல்லா தயார் செஞ்சுட்டு மறுபடி எழுதுவேன் " அப்படிங்கறான். எவ்ளோ உறுதியா இருக்கான் பாருங்க
****
சம்பிரதாயமான கேள்விகள் முடிந்து, embarassing கேள்விகளுக்குள் அடுத்து நுழைந்தோம் ..

பதிவு பெரிதாக செல்வதால், இதன் தொடர்ச்சி ஓரிரு நாளில்  வெளிவரும்..



நாளைய பதிவில்....

டென்த்தில் முதல் மார்க் வாங்குவோர்,  +2 வில் முதல் மார்க் வாங்குவதில்லையே ஏன்?

டென்த் முழு ஆண்டுபரீட்சைக்கு முதல் நாள் கிரிக்கெட் ஆடி மாட்டி கொண்ட ஸ்ரீநாத்

வாலிபால் மற்றும் கிரிக்கெட் - தஞ்சை மாவட்டத்தை பத்தாவது படிக்கையிலும் represent செய்து ஆடிய ஸ்ரீநாத்

மாநிலத்தில் முதல் மார்க் வாங்கியோர், வாழ்க்கையில் பெயர் சொல்லும் பிரபலமாக வந்துள்ளனரா? இல்லையெனில் ஏன்?

***

பேட்டியின் 2-ஆம் பாகம் இக்கேள்விகளுக்கான விடையுடன் ஓரிரு நாளில்  வெளியாகும்

நைட் ஷிப்ட் வேலை - விரிவான அலசல்

பல வித மனிதர்களை - அவர்கள் வாழ்க்கை, வேலை குறித்த கேள்விகளோடு வீடுதிரும்பல் மூலம் அவ்வப்போது சந்தித்து வருகிறோம். சென்னை பஸ் கண்டக்டர் பேட்டி வாசித்தது உங்களுக்கு நினைவிருக்கும். அந்த வரிசையில் இரவு நேர பணி செய்யும் ஒரு நண்பர் மூலம் இந்த பணியின் சங்கடங்கள் குறித்து விரிவாய் அறிய முடிந்தது. நமக்கு நன்கு அறிமுகமான பதிவர் மெட்ராஸ் பவன் சிவகுமார் தான் நமது கேள்விகளுக்கு மிக அழகாய் பதில் அளித்துள்ளார். இதோ நைட் ஷிப்ட் வேலை குறித்த அவரது பேட்டி:

**************

நீங்கள் எதனால் இரவு நேர பணியை தேர்ந்தெடுத்தீர்கள்? 

இரவுப்பணியை 90 சதவீதத்திற்கும் மேற்பட்டோர்(நான் உட்பட)விரும்பி தேர்ந்து எடுப்பதில்லை. இந்திய – அமெரிக்க நேர வித்யாசம் ஒன்றே இதற்கு முக்கிய காரணம். அதிர்ஷ்டம் உள்ள சிலருக்கு பகல் பணி கிடைப்பது உண்டு. உதாரணத்திற்கு சிங்கப்பூர் போன்ற க்ளயன்ட் இருக்கும் அணிகளை சொல்லலாம்.

எத்தனை வருடமாக இரவு நேர பணி செய்கிறீர்கள்? தொடர்ந்து எத்தனை வருடம் ஒருவரால் இரவு நேர வேலை செய்ய முடியும்?

நான்கைந்து ஆண்டுகள் இரவுப்பணியில் வெரைட்டி வெரைட்டி ஷிப்ட்களை செய்து உள்ளேன். தொடர் இரவுப்பணி செய்தால் கஷ்டம்தான். ஜிம் பாடி என்றால் இரண்டு ஆண்டு. பிஞ்சு பாடி என்றால் ஓராண்டு தாங்கும். அதன் பின் உடல்நிலை படிப்படியாக மோசமாகும். பிரஷர் இல்லாத டீமில் இரவுப்பணி என்றால் மேலும் ஓராண்டு மைலேஜ் தரும் நம்ம பாடி.

இரவு நேர பணியாளர்கள் பொதுவாய் என்ன விதமான வேலை செய்கிறார்கள்?

எனக்கு தெரிந்து வாய்ஸ் மற்றும் நான் வாய்ஸ் என இருவகை இரவுப்பணிகள் உண்டு. வாய்ஸ் ப்ராசஸ் செய்பவர்கள் பொதுவாக அமெரிக்க எசமான்/நுகர்வோர் கேட்கும் துறை சார்ந்த சந்தேகங்களை போனில் பேசியே தீர்த்து வைப்பார். இதில் இன்னொரு வகை கலக்சன் போஸ்டிங். அதாவது கம்பேனிக்கு காசு தராமல் இழுத்து அடிக்கும் வெளிநாட்டவரை போனில் தாஜா/எச்சரிக்கை செய்து பணம் வாங்குதல். நான் வாய்ஸ் துறையில் இருப்பவர்கள் தப்பு செய்தால் மெயிலில் மட்டுமே திட்டு வாங்குவர். வாய்ஸ் ப்ராசஸ் என்றால் போனிலேயே கும்பாபிஷேகம் நடத்தப்படும்.

இரவிலேயே வெவ்வேறு ஷிப்ட் உள்ளதா? என்ன அது?

இரவுப்பணியில் கூட நேர வித்யாசங்கள் உண்டு. இரவு 12, 4 மற்றும் காலை சூரியன் வரும் வரை கல் உடைக்கும் வண்ணம் வெவ்வேறு ஷிப்ட்கள் உண்டு. அதிகாலை கோழி கூவும் முன் துவங்கும் ஆஸ்திரேலிய ஷிப்ட், நள்ளிரவு நாய் ஊளையிடும்போது துவங்கும் கர்ண கொடூர ஷிப்ட், அனைத்திலும் மேலாக இரவு 10 அல்லது 11 மணிக்கு துவங்கி காலை 7வரை கதற கதற அடிக்கும் ஷிப்டும் உண்டு. இதற்கு க்ரேவ்யார்ட் ஷிப்ட் என்று பெயர் வைத்து உள்ளனர். அடியேன் இந்த ஷிப்டில் பல மாதங்கள் கல் உடைத்து உள்ளேன்.

சிலர் இங்கிலாந்து நேரம் என மதியம் 1 மணிக்கு சென்று விட்டு இரவு பன்னிரண்டு மணிக்கு வருகிறார்கள். இவர்கள் பாடு சற்று தேவலாம் என சொல்லலாமா?

நீங்கள் சொல்வது சரிதான். இதற்கு யு.கே ஷிப்ட் என்று பெயர். மதிய உணவு நேரத்திற்கு பின் தொடங்கி அதிகபட்சம் இரவு ஒரு மணிக்குள் முடிந்துவிடும். ஆறு மணி நேரம் நிம்மதியான உறக்கம். அதிகாலையில் அரக்க பரக்க எழுந்திரிக்க வேண்டாம் என்பதால் பலருக்கு பிடித்த ஷிப்ட் இதுதான். குறிப்பாக இந்த ஷிப்ட் துவங்கும் மற்றும் முடியும் நேரத்தில் ட்ராபிக் தொல்லை இல்லாமல் இருப்பது மற்றொரு ப்ளஸ்.

துவக்கத்தில் இரவு விழித்து பகலில் தூங்குவதில் என்ன சிரமம் (உடல் மற்றும் மன ரீதியாக) இருந்தது? அது எப்போது சரியானது அல்லது பழகி போனது?

நினைவு தெரிந்த நாள் முதல் இரவு ஒன்பது மணிக்கு முன் தூங்கி அதிகாலை ஐந்து மணிக்கு துயில் எழுந்த எனக்கு முதலில் முழு இரவுப்பணி (இரவு 11 முதல் காலை 7) கிடைத்தபோது சங்கடமாகத்தான் இருந்தது. பல ஆண்டுகள் விளையாட்டில் நித்தம் ஈடுபட்டவன் என்பதால் உடல் ரீதியாக பிரச்னை பெரிதாக இருந்ததில்லை. அதே சமயம் மனரீதியான பிரச்னை வீட்டில் இருந்தது. “சிவா நைட் ஷிப்ட் போயிட்டு வந்து தூங்கிட்டு இருக்கு போல?” என்று அம்மாவிடம் கேட்டுவிட்டு “நேத்து நாட்டார் கடைல உளுந்து வாங்கனேன். இன்னைக்கு அந்த சீரியல் என்னாச்சி?” என்று பக்கத்து வீட்டு ஆன்ட்டிகள் உரக்க பேசி தூக்கத்தை கெடுக்கும்போது அறைக்கதவை படாரென சாத்தி, கோபத்தில் கத்தி உள்ளேன் பலமுறை.

அம்மன் கோவில் லவுட் ஸ்பீக்கர், பக்கத்து வீட்டு டி..வி.சத்தம், நன்றாக தூங்க ஆரம்பிக்கும் நேரத்தில் காலிங் பெல் அடிக்கும் குரியர் ஆட்கள், சேல்ஸ்மேன்கள்...இம்சைக்கா பஞ்சம்..

இரவில் வேலைக்கு நடுவே ஓரிரு மணி நேரம் தூங்க அனுமதி உண்டா?

பெரும்பாலான ஆபீஸ்களில் தூங்க அனுமதி இல்லை. கேப்டீரியாவில் வேண்டுமெனில் சில நிமிடங்கள் குறட்டை விடலாம். வேலை செய்யும்போதே தூங்கி வழியும் ஆட்கள் பலர் உண்டு. அரை தூக்கத்தில் அண்ணன்கள் இருக்கும்போது மவுஸ், கீபோர்ட் போன்றவற்றை ஒளித்து வைத்து விடுவோம். அது தெரியாமல் அவர்கள் வெறும் டெஸ்க்கில் டைப் செய்தல், மாவு பிசைவது போல மவுஸ் இருந்த இடத்தை கையால் ஆட்டுதல் போன்றவற்றை செய்வதை கண்டால் சிரிப்பை அடக்க முடியாது.

பகல் நேரம் நன்றாய் தூங்க முடியுமா? பல்வேறு சத்தங்களும் வெளிச்சமும் இருக்குமே? பகலில் தூங்க தூக்க மாத்திரை உபயோகிப்போர் உள்ளனரா?

ப்ளாட் சிஸ்டம், பங்களாவில் தங்கும் அப்பர் மிடில் கிளாஸ் மற்றும் பணக்கார ஊழியர்கள் பெரும்பாலும் நிம்மதியாக தூங்கலாம். சாதாரண வீடுகளில் தங்கி இருப்போர் ட்ராபிக் சத்தம், வீட்டில் இருப்போர் நடமாட்டம், வெளிச்சம் போன்றவற்றை தாங்கி தூங்கி ஆக வேண்டும். இல்லாவிடில் மறுநாள் ஆபீசில் வேலை செய்ய முடியாத அளவிற்கு கண்ணை சொக்கும். தூக்க மாத்திரை உபயோகிப்போர் மிகவும் குறைவுதான்.

இரவு நேரம் பணி என்பதால், ஐந்து நாள் பகலில் தூங்குவோர் வார இறுதியில் எப்படி தூங்குவார்கள்?

சனி, ஞாயிறு இரண்டு நாட்களிலும் அவ்வளவு லேசில் தூக்கம் வந்து விடாது. நள்ளிரவை தாண்டியே விழித்து பழக்கப்பட்ட பாடி ஒத்துழையாமை இயக்கத்தை வீக்கெண்டிலும் விடாமல் பின்பற்றும். இதை நான் டைப் செய்வது கூட சனி இரவு 11மணிக்கு பிறகுதான்.

உங்கள் அலுவலகத்தில் பெண்கள் இரவு நேர டியூட்டி செய்கிறார்களா? ஆண்களுக்கும் அவர்களுக்கும் உடல் அல்லது மன ரீதியாக இரவு நேர பணியில் வேறுபாடுகள் உண்டா?

நிறைய அலுவலகங்களில் பெண்கள் இரவுப்பணியை செய்ய ஆரம்பித்து ஆண்டுகள் சில ஆகின்றன. சோர்வின் காரணமாக மயக்கம் போட்டு விழும் பெண்களும் உண்டு.பெண்கள் இரவுப்பணி வேலைக்கு சேர்ந்த சில மாதங்களுக்கு பின் மிகவும் சோர்ந்து மேலதிகாரிகளிடம் வேறு ஷிப்ட் கேட்பதும், கைக்குழந்தையை பராமரிக்க நேரம் ஒதுக்க வேலையை ராஜினாமா செய்வதும் அடிக்கடி நடக்கும்.

இரவு நேர பணியில் stress-அதிகம் என்பதால், stress relief ஆக ஆண்-பெண் செக்ஸ் அலுவலகத்திலேயே மிக எளிதாக நடக்கும் என்று ஒரு கருத்து நிலவுகிறதே. இது எந்த அளவுக்கு உண்மை?

மிக எளிதாக நடக்க வாய்ப்பே இல்லை. இது குறித்து எவருடனும் நேரடி விவாதம் செய்ய தயார். நிர்வாகத்திற்கு தெரியாமல் சில ஆர்வக் கோளாறுகள் சேட்டை செய்வது நிஜம்தான். நிறைய டீம்கள் வேலை செய்யும் ஒரு சில அலுவலகத்தின் சாக்கடை கழிவுகளை அகற்றுகையில் கிலோ கணக்கில் காண்டம்கள் இருந்தது செய்தியாகவே வந்துள்ளது. வாய்ப்பு கிடைத்தால் வாலிபால் ஆடாதவன் எந்த துறையில்தான் இல்லை? சாப்ட்வேர் துறை ஆட்களை மட்டும் அடிக்கடி குறிப்பிட்டு பேசுவது சரியென்று தோன்றவில்லை.

உங்களுக்கு தெரிந்த கணவன் - மனைவி - ஒருவர் இரவிலும் மற்றவர் பகலிலும் வேலை பார்க்கிறார்களா? குடும்பத்தை அவர்கள் எப்படி சமாளிக்கிறார்கள்?

இரவு பகல் என வெவ்வேறு வேலை நேரத்தில் இருக்கும் கணவன் மனைவிக்கு பெரிதாக பிரச்னைகள் குறைவு. ஒரே ஷிப்டில் இருந்தால் மண்டை காய்ச்சல் அதிகம். சோர்வாக வீட்டுக்கு வந்த உடன் யார் சமைப்பது, இதர வேலைகளை செய்வது என்று.

திருமணத்தின் போது இரவு நேர வேலை என்பதால் மாப்பிள்ளை அல்லது பெண் வீட்டார் யோசிக்கிறார்களா? மணம் முடிக்க மறுக்கிறார்களா?

உண்மைதான். இரவுப்பணி செய்யும் நபர்களுக்கு கல்யாணம் செய்வது என்பது மன்மோகன் வாயில் இருக்கும் கொழுக்கட்டையை பிடுங்குவதை விட கடினமான செயல். கல்யாணம் நிச்சயம் ஆனதும் பெரும்பாலான பெண்கள் வேலையை ராஜினாமா செய்து விடுவார்கள். ஆண்கள் “கல்யாணம் நடக்குற ஒரு நாளைக்கு முன்னாடி இருந்து எனக்கு பகல் ஷிப்ட் ஆரம்பம் மாமா. உங்க திரிஷாவை எனக்கே தாங்க” என்று அல்வா கிண்டுவார்கள். தாலி கட்டிய மறுநாள் நைட் ஷிப்டுக்கு கிளம்புவார் புது மாப்ளே. இது ஜகஜம்தான் சார்.

இரவு நேர வேலையில் நல்லது எது? கெட்டது எது?

திருவிளையாடல் தருமி டைப் கேள்வி..ரைட்டு. நல்லது என்றால் நைட் ஷிப்டுக்கு கிடைக்கும் அதிக சம்பளம்தான் வேறொன்றும் இல்லை. கெட்டது என்றால் அதே சம்பளத்தை சில ஆண்டுகளில் டாக்டருக்கு மொய் வைக்கும் நிலை வருவதுதான். “ராத்திரி பூரா இத்தனை வருஷம் நாயா உழைச்சனே? அதுக்கு பிரமோஷன் இல்லையா எசமான்?” என்று அப்ரைசல் நேரத்தில் மேனேஜர் சட்டையை பிடித்து யூனியன் தலைவர்(உதாரணம்: ‘துலாபாரம்’ ஏ.வி.எம்.ராஜன், ‘பாசமலர்’ ஜெமினி ) ரேஞ்சுக்கு டயலாக் பேசினால் பருப்பு வேகாது.

இரவு நேர வேலை செய்வோர் வார இறுதி நாட்களை எப்படி கழிக்கிறார்கள்? நீங்கள் எப்படி கழிக்கிறீர்கள்?

இரவு நேரத்தில் வேலை செய்வோர் அதிகபட்சம் சனி அன்று மதியம் அல்லது மாலை வரை நன்றாக ஓய்வு எடுப்பர். நல்ல பிள்ளைகள் ஏதோ ஒரு கோர்சில் சேர்ந்து சனி, ஞாயிறு அன்றும் படித்து கொண்டே இருக்கும். சுமாரான வசதி உள்ளவர்கள் டாஸ்மாக் பாரில், டப்பு பார்ட்டிகள் பப்பில் (தற்காலிக) தோழிகளுடன் சனி இரவில் புரியாத பாஷையில் ஓடும் பாட்டுக்கு மொக்கையாக மூவ்மெண்ட் போட்டு ஆடுவர். நான் கெட்ட பயக்கம் இல்லாத பயபுள்ள என்பதால் அடிக்கடி தியேட்டரில் டென்ட் அடிப்பேன். சினிமா இஸ் மை passion.

சம்பளம் குறைவாக இருந்தாலும் இரவு வேலையை விட்டு விட்டு பகல் நேர வேலைக்கு வரவே பலரும் விரும்புவதாக சொல்கிறார்களே உண்மையா?

முற்றிலும் சரி. 

பல ஆண்டுகள் நைட் ஷிப்ட் மட்டுமே செய்து, தொப்பை விழாத அதிசய பிறவிகளும் உண்டு. அவர்கள் எல்லாம் பிரம்மனால் ஸ்பெஷலாக ஆர்டர் செய்து அனுப்பப்பட்ட ஆஜானுபாகுக்கள்.  இது மிக குறைந்த சதவீதமே

ஆரம்பத்தில் அதிக சம்பளத்திற்கு ஆசைப்பட்டு விட்டில் பூச்சிகளாக இரவுப்பணிக்கு வருவோர் கொஞ்ச காலம் கழித்து குறைவான சம்பளம் கிடைத்தால் போதும். இந்த 'பேய் பங்களா'வை விட்டு ஓடணும்டா சாமி என்றுதான் நினைப்பார்கள்.  இது தான் பெரும்பான்மையானவர்கள் நிலை !

*******

பெயில் குறித்து : நீங்கள் அறிய வேண்டிய அனைத்தும் ...

தொடர்புடைய முந்தைய பதிவுகள்:

வாரண்ட் இன்றி போலிஸ் எப்போது கைது செய்யலாம்

நீங்கள் கைதானால் உங்கள் உரிமைகள்

**************
வழக்குகளை அதன் தீவிரத்தை பொறுத்து பெயிலில் வரக்கூடிய வழக்கு என்றும் பெயிலில் வர முடியாத வழக்கு என்றும் பிரிக்கலாம்.

பெயிலில் வரக்கூடிய வழக்குகள்

இவை பெரும்பாலும் சிறு குற்றங்களாகும். இத்தகைய குற்றங்களில் காவல் துறை அதிகாரியே காவலில் உள்ளவரை பெயிலில் விடுவிக்கலாம். ஜாமீன் தருவோர் இன்றி கூட குற்றம் சாட்டப்பட்டவரிடமே ஜாமீன் பெற்று கொண்டு அவரை பெயிலில் விடலாம்

பெயிலில் விடுவிக்க முடியாத வழக்குகள்

"பெயிலில் விடுவிக்க முடியாத " என்பதன் பொருள் காவல் துறை அதிகாரியால் பெயிலில் விட முடியாது அதை ஒரு நீதிபதி தான் செய்ய முடியும் என்பதுதான்.

நீதிபதி குற்றவாளி குறித்த முதற்கட்ட முடிந்த பின் அவரை பெயிலில் விடுவிக்க கூடும். அவர் தான் குற்றம் புரிந்தார் என்பதற்கு நியாயமான காரணம் இல்லை என்பதாலும் வழக்கு முடிவதற்கு இடையிலும் பெயிலில் செல்ல நீதிபதி அனுமதிப்பார்

                                                       

பெயிலில் விட  மறுக்க  போலிஸ் பொதுவாக கூறும் காரணங்கள்

 1. குற்றவாளி விசாரணையின் போது ஆஜராக மாட்டார்

2. சாட்சிகள் அல்லது முக்கிய சாட்சியங்களில் அவர் குறுக்கிடுவார்

3. பெயிலில் வந்த பிறகு அவர் மேலும் குற்றம் புரிவார்

 4. காவல் துறையின் விசாரணை இன்னும் முடியவில்லை

 5. திருட்டு போன பொருட்கள் இன்னும் கைப்பற்ற படவில்லை

 6. குற்றம் புரிய பயன்படுத்திய ஆவணங்கள் இன்னும் கைப்பற்றபட்வில்லை

 7. சக குற்றவாளிகள் இன்னும் தலைமறைவாக உள்ளனர்

 குற்றம் சாட்டப்பட்டவர் போலீசார் கூறும் இத்தகைய கூற்றுகளை மறுக்கவேண்டும். அவற்றை மறுக்கவிடில் பெயில் கிடைப்பது கடினம்

பெயிலில் வர மனு

குற்றம் சாட்டப்பட்டவர் தனக்கு பெயில் அப்ளிகேஷன் போட ஒரு வழக்கறிஞரை நியமிப்பது மிக நல்லது. அதற்கான மனு அவர் நீதிபதியின் முன் தரவேண்டும் (பெரும்பாலும் வெளியில் இருக்கும் நண்பர் அல்லது உறவினர் வழக்கறிஞரை பார்த்து விட்டு, அதற்கான கையெழுத்து மட்டும் குற்றம் சாட்டப்பட்டவரிடம் வாங்குவர் )

வழக்கறிஞரை அமர்த்திக்கொள்ள இயலாதென்றால் குற்றம் சாட்டப்பட்டவரே நீதிபதிக்கு மனுசெய்யலாம் (பொது மக்களுக்கு சட்ட நுணுக்கங்கள் தெரியாது என்பதால் தானே வாதிடுவதை பொதுவாய் தவிர்ப்பது நல்லது)

பெயில் மனுவில் பொதுவாய் கீழ்க்காணும் காரணங்கள் சொல்லபடுகின்றன

1. பெயிலில் செல்லாவிடில் தனது வேலையை இழக்க நேரிடும்

2. தான் மட்டுமே குடும்பத்தில் சம்பாதிக்கும் நபர் என்பதால், தனது குடும்பம் பாதிக்கப்படுகிறது

3. காவலில் இருப்பவருக்கு உடல்நலமில்லை, சிகிச்சை எடுப்பது வெளியில் தான் சாத்தியம்

பெயில் மறுப்பும் மேல் முறையீடும்

பெயிலில் விட நீதிபதி மறுத்தால் அதற்கான காரணங்களை அவர் தனது தீர்ப்பில் கூறவேண்டும். அதன் அடிப்படையில் தான் குற்றம் சாட்டப்பட்டவர் உயர் நீதிமன்றத்தில் மேல் முறையீடு செய்ய முடியும்.

ஒருவரது பெயில் தள்ளுபடி ஆனால் அதே நீதிமன்றத்தில் சில காலம் கழித்து மீண்டும் மனு போடலாம் அல்லது உயர்நீதி மன்றத்தில் அப்பீல் செய்யலாம்

ஆண்டிசிபேட்டரி பெயில் (Anticipatory Bail)

ஒருவர் தன் எதிராளிகளால் பொய்யான வழக்கு தன் மீது போடப்பட்டு சில நாட்களாவது தன்னை சிறை வைக்க முயல கூடும் என எண்ணினால் ஆண்டிசிபேட்டரி (Anticipatory Bail ) பெயில் கேட்டு மனு செய்ய சட்டத்தில் இடமுண்டு

இதற்கான மனுவை அவர் மாவட்ட நீதிமன்றம் அல்லது உயர் நீதி மன்றத்தில் தாக்கல் செய்யலாம். வாரன்ட் இல்லாமல் போலிசால் கைது செய்யப்பட்டால் , அவர் ஜாமீன் தர தயார் என்றால் அவரை ஜாமீனில் விட வேண்டும் என்று இந்த ஆண்டிசிபேட்டரி (Anticipatory Bail ) பெயில் மூலம் நீதிமன்றம் உறுதி செய்கிறது .

*********
அண்மை பதிவுகள் :

வானவில் + தொல்லை காட்சி: எஸ். ரா Vs சாரு, நீயா நானா, பியா இன்னபிற

உணவகம் அறிமுகம் : சுக நிவாஸ் லஸ் கார்னர்

ஷெல் பெட்ரோல் பங்க் - வித்யாசமான அனுபவம்

பெட்ரோல் பங்குகளில் நம்மை பல விதமாய் ஏமாற்றுவது பற்றி இந்த கட்டுரையில் எழுதியதை நீங்கள் வாசித்திருக்கலாம். நல்ல பெட்ரோல் பங்க் கிடைப்பதே மிக அதிசயம். அப்படி ஒரு நல்ல பங்க் பற்றியும் அங்கு கிடைக்கும் வித்தியாச அனுபவம் பற்றியும் இப்பதிவு....

##########

ஷெல் பெட்ரோல் பங்குக்கு சென்றுள்ளீர்களா? இங்கு கிடைக்கும் அனுபவம் மற்ற பெட்ரோல் பங்கிலிருந்து முற்றிலும் வேறாய் இருக்கும். வாங்க ஷெல் பெட்ரோல் பங்கிற்குள் நுழைவோம்.

எல்லா பெட்ரோல் பங்கிலும் இரண்டு புறமும் நுழையலாம். இங்கு குறிப்பிட்ட ஒரு பக்கம் மட்டும் தான் நுழைய முடியும். நுழைகிற இடத்தில் ஸ்பீட் பிரேக்கர் போட்டு வேகமாய் வண்டி ஓட்டி வர முடியாத படி செய்துள்ளனர்.

இங்கு ஆண், பெண் ஊழியர் அனைவரும் சிகப்பு சட்டை நீல பேன்ட் அணிந்து "சட்டையை இன்" செய்து கொண்டு தலையில் தொப்பியுடன் தான் இருப்பர். இதில் மாறுதலே இருக்காது. 

பெட்ரோல் நிலையத்துக்குள் நுழைந்த பின் யாருக்கும் செல்போன் பேசவோ, உபயோகிக்கவோ அனுமதி இல்லை. நீங்கள் பேசினால், ஒரு சில நொடிகளில் உங்களை ஒருவர் அணுகி, " செல்போன் பேசாதீர்கள், அணைத்து விடுங்கள் " என்பார்.

பெட்ரோல் போட நெருங்கியதும், பெட்ரோல் போடும் நபர் உங்களுக்கு இரு கையும் கூப்பி " வணக்கம் சார்" என சொல்வார். பின் நீங்கள் வண்டி மீது அமர்ந்திருந்தால், உங்களை வண்டியை விட்டு இறங்க சொல்லுவார். வண்டியில் அமர்ந்த படியே யாருக்கும் பெட்ரோல் போடவே மாட்டார்கள். அடுத்து " டேன்க் பில் பண்ணிடலாமா?" என்பார். இருந்தாலும் விடாமல் இதே கேள்வி கேட்கிறார்கள். அவங்க கேட்பதால் நாம் டேன்க் பில் பண்ணிட போறாமா என்ன? இருக்க காசுக்கு தானே போட முடியும்? .

அடுத்தது தான் முக்கிய கட்டம். நான் தொடர்ந்து ஷெல் போக அதுவே காரணம். பல கடைகளில் பெட்ரோல் போட ஆரம்பித்ததும் "0 " விலிருந்து முதல் ஜம்பே இருபது அல்லது முப்பது ரூபாய்க்கு இருக்கும் (அளவில் 0. 20 அல்லது 0. 30 லிட்டராவது சாபிட்டுருவாங்க). இங்கு மீட்டர் "0 " விலிருந்து தொடர்ந்து ஜம்ப் ஆகாமல் ஓடுவதை காணலாம். மற்ற பெட்ரோல் பங்குகளை விட இங்கு போடும்போது மயிலேஜ் அதிகம் வருவதை அனுபவத்தில் உணர்ந்துள்ளேன்

பெட்ரோல் போடுவதற்கு முன்  நீங்கள்  பணம்  குடுத்தால் வாங்கி கொள்ளவே மாட்டார்கள். பெட்ரோல் போட்டு முடித்த பின் மட்டுமே பணம் வாங்குவர். மீண்டும் உங்களுக்கு ஒரு கும்பிடு போட்டு " ப்ரீ ஏர் செக் அப் பண்ணிக்குங்க சார்" என்று சொல்லி அனுப்பி வைப்பார்கள். 

உண்மையிலே இங்கு ப்ரீ ஏர் செக் அப் தான். காற்றடிக்க எந்த பணமும் வாங்குவதில்லை. இதனாலேயே அங்கு சற்று கூட்டம் அதிகமாய் இருக்கும். சில நேரம் இங்கு காற்றடிப்பேன். கூட்டம் அதிகமெனில் சென்று விடுவேன்.

செல்போன் பேச விடாமல் தடுப்பது, வண்டியிலிருந்து இறங்கிய பின் தான் பெட்ரோல் போடுவோம் என்பது போன்றவை சிலருக்கு எரிச்சல் தரும் எனினும், நானும் முன்பு ஒரு பெட்ரோல் நிறுவனத்தின் லீகல் டீமில் இருந்ததால், இது ஏன் செய்கிறார்கள் என தெரியும். " பாதுகாப்பு உணர்வு" தான் ( Safety ) இத்தகைய முன் ஜாக்கிரதை செயல்கள் செய்ய ஒரே காரணம். இவை நமக்கும் நல்லதே !

துவக்கத்தில் தொடர்ந்து ஷெல் மட்டுமே சென்று வந்த நான், பின் மற்ற இடங்களை விட இங்கு லிட்டருக்கு ஏழெட்டு ரூபாய் விலை அதிகமான பின் செல்வதில்லை. ஆனால் இப்போது பெட்ரோல் விலை மிகவும் ஏறிய பின், வெளி மார்கெட்டில் என்ன விலையோ அதே விலைக்கு (same price no change )  ஷெல்லில் பெட்ரோல் கிடைக்கிறது. இதற்காக வெளி மார்கெட் விலை; எங்கள் விலை என இரண்டையும் எழுதி; வெளியிலும் இங்கும் பெட்ரோல் ஒரே விலையே என்ற பெரிய போர்டு எல்லா ஷெல் ஷோ ரூமிலும் வைத்துள்ளனர். ஆனாலும் மக்களுக்கு  ஷெல்லில் பெட்ரோல் விலை அதிகம் என்று எண்ணம் உள்ளது. ஷெல் பெட்ரோல் பங்குகளில் அதிக கூட்டம் இல்லாததே இதை சொல்கிறது. 

நல்ல குவாலிட்டி பெட்ரோல், சரியான அளவில் கிடைப்பதால்.. .. ஷெல் பெட்ரோல் பங்கை நிச்சயம் நாடுங்கள் ! மைலேஜ் கவனித்து பார்த்தால், நிச்சயம் எனக்கு நன்றி சொல்வீர்கள் !

உயில் - FAQ

உயில் என்பது என்ன ?

ஒரு மனிதர் - தனது வாழ் நாளுக்கு பின் தனது சொத்து  மற்றும் வங்கி கணக்கில் உள்ள பணம் உள்ளிட்ட அனைத்தும் யார் யாருக்கு தர வேண்டும் என விரும்புகிறாரோ - அதனை எழுதி வைப்பது தான் உயில். உயிருடன் இருக்கும் போது எழுதப்படும் இந்த தனி மனிதரின் விருப்பம் - அவரது மறைவுக்கு பின் தான் அமல் படுத்தப்படும்.

சுய  சம்பாத்தியத்தில் வந்தவை மட்டும் தான் உயில் எழுத முடியுமா ?

சுய  சம்பாத்தியத்தில் வந்தவை மற்றும் தனது பெற்றோர் மூலம் - சட்டப்படி ஒருவருக்கு வந்த சொத்துக்கள் இவற்றை உயில் மூலம் மாற்றம் செய்ய முயும்.

வயதானவர்கள் மட்டும் தான் உயில் எழுதுவது அவசியமா ?

அப்படி இல்லை. மரணம் எப்போது வேண்டுமானாலும், எந்த வடிவிலும் ஒருவருக்கு வரக்கூடும் என்பதால் - மத்திய வயதில் இருப்போரும் கூட உயில் எழுதி வைப்பது நல்லது. உயில் எழுதாத பட்சத்தில் - உங்கள் உறவினர்களில் - நீங்கள் விரும்பாத  சிலருக்கு கூட உங்கள் சொத்தில் ஒரு பகுதி செல்லக்கூடும். மாறாக நீங்கள் சம்பாதித்த சொத்தை நீங்கள் விரும்பினால் - ஒரே ஒரு  நபருக்கு கூட செல்லுமாறு உயில் மூலம் செய்யலாம்.  மேலும் உங்கள் சொத்தில் ஒரு பங்கை உங்கள் காலத்துக்கு பின் Charity - க்கு செல்ல வேண்டுமென நினைத்தால் - அது உயில் எழுதி வைத்தால் தான் சாத்தியமாகும். இல்லாவிடில் வாரிசு தாரர்கள் மட்டுமே சொத்தை பிரித்து கொள்வர்.

ஒரு உயில் எப்படி எழுதப்பட வேண்டும் ? அதனை ரிஜிஸ்தர் செய்வது எப்படி ?

உயில் ஒரு மனிதனின் விருப்பம் என்ற அளவில் - எப்படி /  எந்த format -ல்  வேண்டுமானாலும் எழுதப்படலாம்.

உயிலை ரிஜிஸ்தர் செய்வது சட்டப்படி கட்டாயம் இல்லை. ஆயினும் - அதன் நம்பகத்தன்மையை சிலர் சந்தேகிக்கலாம் என்ற அளவில் - ரிஜிஸ்தர் செய்வது நல்லது.

தனது உயிலை ஒருவர் எழுதி முடித்து விட்டு தனது கையொப்பம் இட்டபின் - கட்டாயம் இருவர் சாட்சி கையெழுத்திட வேண்டும். இப்படி சாட்சி கையெழுத்திடுவோர் - தங்கள் முன் உயிலை எழுதியவர் கையொப்பம் இட்டார் என்பதற்கு மட்டுமே கையெழுத்து இடுகிறார்கள். உயிலை முழுவதும் அவர்கள் வாசிக்க வேண்டுமென்று அவசியம் இல்லை.

இதன் பின் உயில் சப் ரிஜிஸ்தர் அலுவலகத்தில் ரிஜிஸ்தர் செய்யலாம். உயிலை ரிஜிஸ்தர் செய்ய மிக மிக குறைந்த கட்டணமே (அதிக பட்சம் ரூ. 500 ) வாங்கப்படுகிறது.

நாம் ஒரு  முறை எழுதிய உயிலை மாற்றி எழுத முடியுமா ? ஒருவர் பல உயில் எழுதினால் - எது எடுத்து கொள்ளப்படும் ?

ஒருவர் எத்தனை முறை வேண்டுமானாலும் உயிலை மாற்றி எழுதலாம். எந்த உயில் கடைசியாக ஒருவரால் எழுதப்பட்டதோ, அதுவே  அவரின் இறுதி உயிலாக எடுத்து கொள்ளப்படும்

உயிலை முழுவதும் மாற்றி எழுதாமல் சில பகுதிகளை மட்டும் மாற்ற முடியுமா ?

முடியும். குறிப்பாக ஒருவர் உயில் எழுதிய பின்  புதிதாக வேறு சொத்துகள் வாங்கியிருக்கலாம். அல்லது ஏற்கனவே எழுதிய ஒரு சொத்தை - இன்னொருவருக்கு மாற்றி எழுதலாம். இந்நேரங்களில் உயிலின் ஒரு பகுதியில் மட்டும் மாற்றம் செய்யப்படும். அல்லது புதிதாக உள்ள சொத்து யாருக்கு சேரவேண்டும் என எழுதப்படலாம். இதற்கு "Codicil " என்று பெயர். உயில் மற்றும் Codicil இரண்டும் சேர்ந்து ஒருவரின் உயிலாக கொள்ளப்படும்

ஒருவருக்கு உயில் மூலம் எழுதி வைத்த சொத்தை, உயில் எழுதியவர் பின்னர் விற்க முடியுமா ?

உயில் என்பது ஓருவரின் இறப்புக்கு பின் தான் நடைமுறைக்கு வருகிறது. எனவே - அவர் இறக்கும் வரை அந்த சொத்தை அவர் என்ன வேண்டுமானாலும் செய்யலாம். அதனை அவர் தாரளாமாக பிறருக்கு விற்கலாம். அல்லது வேறு யாருக்கேனும் கூட மாற்றி எழுதலாம்

இஸ்லாமியர்கள் தங்கள் சொத்து முழுமையும் உயில் மூலம் எழுத முடியுமா ?

முடியாது. ஒரு இஸ்லாமியர் தனது சொத்தில் மூன்றில் ஒரு பங்கை மட்டுமே உயில் மூலம் எழுத முடியும். மீதமுள்ள 2/3 பங்கு - அவரது வாரிசு தாரகளுக்கு இஸ்லாமிய சட்டத்தின் படி தான் சென்று சேரும்.

உயிலை நடைமுறைப்படுத்த கோர்ட் அனுமதி பெறவேண்டுமா ?

உயிலில் உள்ள விஷயங்களை கோர்ட் ஒரு முறை அங்கீகரிக்கும் வழக்கம் இந்தியாவில் மும்பை, கொல்கத்தா மற்றும் சென்னையில் உள்ள சொத்துக்களுக்கு மட்டும்  அவசியமாகும். போலவே இந்த 3 நகரங்களிலும் இருந்தபடி ஒருவர் உயில் எழுதினர் எனில் - அவர் உயில் மூலம் எழுதும் சொத்து வேறு ஊரில் இருந்தாலும் கூட கோர்ட் அப்ரூவல் பெறுவது அவசியமாகிறது. இந்த நடைமுறையை ப்ரொபேட் என்று அழைப்பார்கள்.

ப்ரொபேட் தேவைப்படும் நேரங்களில் சம்பந்தப்பட்டவர்கள் கோர்ட்டுக்கு விண்ணப்பித்து ப்ரொபேட் பெற்றபின் தான் சொத்து - சட்டப்படி அவருக்கு வந்து சேரும்

Executor மற்றும் Beneficiary என்பவர்கள் யார்?

தனது சொத்துக்களை உயில் மூலம் எழுதி வைக்கும்  நபர் Testator எனப்படுவார்.

சொத்தில் யார் யாருக்கெல்லாம் உரிமை/ பங்கு உள்ளதாக அவர் குறிப்பிடுகிறாரோ அவர்கள் Beneficiary எனப்படுவர்.

ஒருவர் எழுதிய உயிலை அவரது மரணத்துக்கு பின் நிர்வகித்து அனைவருக்கும் உயிலில் உள்ளபடி சொத்துக்கள் சென்று சேரும்படி நடவடிக்கை எடுப்பவர்  Executor என அழைக்கப்படுவார்.

ஒருவர் தனது உயிலிலேயே - Executor யார் என குறிப்பிடுவது மிகவும் நல்லது

நாம் எழுதும் உயில் யாருக்கும் தெரியாமல் இருக்குமாறு பார்த்து கொள்ளும் வசதி உள்ளதா ?

ஆம்; அப்படியொரு வசதி இருக்கிறது. எந்த சப் ரிஜிஸ்தர் அலுவலகத்தில் உயிலை நாம் பதிவு செய்கிறோமோ, அங்கேயே குறிப்பிட்ட தொகை செலுத்தினால், சப் ரிஜிஸ்தர் அதனை பத்திரமாக பாதுகாப்பார். அவர் ரீசீப்ட்- டை நமது வாரிசு தாரர்களிடம்  தந்து வைத்து விடலாம். நமது இறப்பிற்கு பின் அந்த ரீசீப்ட் மற்றும் நமது இறப்பிற்கான சான்று காட்டி - நமது வாரிசு தாரர்கள் நமது உயிலை பெற்று கொள்ளலாம்

சட்டத்தில் இப்படி ஒரு வசதி இருந்தாலும், இதனை நமது மக்கள் அதிகம் பயன்படுத்தவில்லை என்பதும் குறிப்ப்பிட வேண்டும்.
***************

 உங்களின் வசதிக்காக - மாதிரி உயில் (Draft Will) கீழே தரப்பட்டுள்ளது

WILL

This is the last will and testament executed on this 20th day of December, 2013 by me Mr.V Ramesh, S/o Mr. Venkatram, Hindu aged 62 yrs,

Out of my own free will and in a full disposing state of mind without any coercion, undue influence from anybody

I am now aged about 42 years old and I am anxious that after my life time all my properties whether movable or immovable belonging to me should devolve smoothly according to my desires set out in this Will, so that there may not be any complications.

I acquired the properties more fully described in the schedule by way of Purchase from….& the said properties are in my exclusive enjoyment and I have been enjoying them without any interruption from any body.

I give, devise and bequeath the immovable properties property more fully described in the schedule hereunder to my wife Mrs. Geetha Ramesh Daugther of Mr…..Hindu aged about 40 years residing presently residing at …….. and the said Mrs. Geetha Ramesh shall be the absolute owner of the property after my life time.

In the event of my wife predeceasing me, I give, devise and bequeath the said property to my son Mr. Ganesh absolutely.

I possess a fixed deposit of Rs. ………in Indian Bank, Guindy branch. I give, devise and bequeath the said Fixed deposit absolutely in favor of my son Mr. Ganesh and he will have unfettered discretion to do whatever he likes with the said Fixed deposit as and when they devolve on him.

I give, devise and bequeath whatever properties movable or immovable wherever situated and which are not specifically set out in this Will to be taken absolutely by both of son and wife equally.

I appoint my son Mr. Ganesh to be the Executor and Trustee of this Will.

This Will shall come into effect after my death.

I reserve my right to alter or revoke this Will.

Thus I have executed this Will as set out above out of my own free Will and with a full disposing state of mine.

Signed by the TESTATOR and acknowledged by him to be his last Will and Testament in the presence of us, both of us being present at the same time, who at his request, in his presence and in the presence of each other, have subscribed out names as witnesses.


WITNESSES:                                                          TESTATOR                 

வக்கீல் படிப்பு- வேலை வாய்ப்பு - ஓர் அலசல்

ப்ளஸ் டூ தேர்வு முடிவுகள் - மே 17 அன்று வெளியாகிறது. பெற்றோர் பலரும் தங்கள் மகனை என்ன படிப்பில் சேர்க்கலாம் என யோசித்து வருவார்கள்.

பலரின் தேர்வு இஞ்சினியரிங் அல்லது மருத்துவமாக தான் உள்ளது. ஆனால் இவற்றை தவிர பல அற்புத கோர்ஸ்கள் உள்ளன..

அடுத்த இரு வாரங்களுக்கு அப்படி சில படிப்புகள் பற்றி எழுத உத்தேசம்.....

முதலாவதாக நான் படித்த சட்ட படிப்பு (இது ஒரு மீள் பதிவு; இந்த வரிசையில் அடுத்து வர உள்ளவை - புதிதாய் எழுதப்படுபவை)

*********

இந்தியாவில் சட்ட படிப்பு இரு விதமாய் உள்ளது. ப்ளஸ் டூ முடித்து விட்டு நேரே BL படித்தால் ஐந்து வருட படிப்பு. BA, B.Sc, B.Com என ஏதேனும் ஒரு டிகிரி முடித்து விட்டு படித்தால் மூன்று வருடம். (ஆம் எந்த டிகிரி படித்தாலும், BL - மூன்று வருட படிப்பில் சேர்ந்து படிக்கலாம்). தமிழ் நாட்டில் சென்னை, திருச்சி, மதுரை, திருநெல்வேலி, செங்கல்பட்டு, கோயம்புத்தூர் ஆகிய இடங்களில் அரசு சட்ட கல்லூரிகள் உள்ளன. சேலத்தில் தனியார் கல்லூரி உள்ளது. இந்திய அளவில் புனே மற்றும் பெங்களுருவில் சில சிறந்த சட்ட கல்லூரிகள் (National Law school) உள்ளன.

சென்னையில் அரசு சட்ட கல்லூரி தவிர BA BL - Honours என்கிற கோர்ஸும் உள்ளது. இது பாரிஸ் கார்னர் சட்ட கல்லூரி வளாகத்தில் இல்லை. சென்னை தரமணி ரயில் நிலையம் அருகே உள்ளது. இந்த படிப்பிற்கு மிக நல்ல மதிப்பு உள்ளது. இங்கு படித்தால் உடனடி வேலை வாய்ப்பு கிடைக்கிறது

தேர்வு முறை

அரசு சட்ட கல்லூரிகளில் சில ஆண்டுகளுக்கு முன்பு வரை நுழைவு தேர்வு முறையில் மாணவர்கள் தேர்வானார்கள். இப்போது முழுக்க முழுக்க + 2 மதிப்பெண் மட்டுமே கணக்கில் எடுக்கப்படுகிறது . 

தமிழக சட்ட கல்லூரிகளை பொறுத்தவரை - அரசு கல்லூரிகள் எனில் + 2 வில் 80 முதல் 90 % வரை மொத்த மதிப்பெண் எடுத்தால் சீட் கிடைக்கும்.

மேலே சொன்ன சென்னை School of Excellence , தரமணி கல்லூரியில் 85 முதல் 90 % மதிப்பெண் என்றால் சீட் கிடைக்க வாய்ப்புகள் அதிகம்.

அரசு கல்லூரி மற்றும் School of Excellence இரண்டிலுமே + 2 வில் எந்த பாட திட்டத்தில் படித்திருந்தாலும் - சேரலாம்.. காமர்ஸ் க்ரூப் தான் படித்திருக்க வேண்டும் என்ற அவசியமில்லை; கணிதம்- இயற்பியல்- கணினி அறிவியல்- உயிரியல் போன்ற பிரிவில் படித்த மாணவர்கள் கூட சட்டம் படிக்கலாம் (நானே அப்படி + 2வில் கணிதம் மற்றும் உயிரியல் படித்த மாணவன் தான்)

செலவு

அரசு சட்ட கல்லூரியில் படித்தால் செலவு மிக குறைவே. கல்லூரிக்கான செலவு (Term fees, exam fees, etc) வருடத்திற்கு 5000-க்குள் அடங்கி விடும். ஹாஸ்டலில் தங்கி படித்தால் அதற்கான செலவு அந்தந்த ஊர் பொறுத்து இருக்கும்.

School of Excellence , தரமணியில் ஆண்டுக்கு 50,000 முதல் 60,000 வரை செலவாகும்

பிற மாநில கல்லூரிகள்

முழு நேர மாணவனாக இல்லாமலே சட்டம் படிப்பதற்கு ஆந்திரா மற்றும் கர்நாடகாவில் நிறைய கல்லூரிகள் உள்ளன. இங்கு தரபடுவது LLB என்ற பட்டம் . BL - LLB இரண்டும் சமமே. சட்ட படிப்பு தமிழகத்தில் BL என்றும், பிற மாநிலங்களில் LLB என்றும் அழைக்க படுகிறது.

ஆனால் இந்த கல்லூரிகள் தனியார் என்பதால் costly-ஆக இருக்கும்; தோராயமாக வருடத்துக்கு ருபாய் 30,000 ஆகலாம். தேர்வு எழுத நீங்கள் அந்த ஊருக்கு சென்றாக வேண்டும். (இது தொலை தூர கல்வி அல்ல என்று அறிக).

சில யூனிவர்சிட்டிகள் தொலை தூரத்தில் படிக்க BGL என்ற படிப்பு வைத்துள்ளனர். இது கோர்ட்டுக்கோ, வேலைக்கோ எந்த விதத்திலும் உதவாது. வேலைக்காக அல்லது வேலை உயர்வுக்காக படிக்கிறீர்கள் என்றால், இதனை படிப்பதை தயவு செய்து தவிர்க்கவும். BGL-க்கு பெரும்பாலும் நல்ல வேலை கிடைக்காது

வேலை வாய்ப்புகள்

1 . வழக்கறிஞர் ஆக Practise செய்வது:

BL முடித்தவர்களில் 50 சதவீதத்திற்கும் குறைவானோர் தான் கோர்ட் சென்று Practise செய்கிறார்கள் என்பது தங்களுக்கு தெரியுமா? இருப்பினும் BL முடித்து அதிக அளவு சதவீதத்தினர் ( 40 to 50% ) வழக்கறிஞர் தொழில் செய்கிறார்கள் என்ற அளவில் இதனை முதலில் பார்ப்போம்.

பெரும்பாலும் முதலில் யாரேனும் ஒரு வழக்கறிஞரிடம் ஜூனியராக பணி புரிய வேண்டும். இது அந்தந்த ஊருக்கு ஏற்ப டிஸ்ட்ரிக்ட் கோர்ட், ஹை கோர்ட், சுப்ரீம் கோர்ட் என மாறுகிறது. டிஸ்ட்ரிக்ட் கோர்ட், ஹை கோர்ட்டில் பெரும்பாலான ஜூனியர் வழக்கறிஞர்கள் குறைவான சம்பளமே வாங்குகின்றனர். சில ஆண்டுகள் இப்படி கஷ்ட ஜீவனம் தான். பின் தனக்குள்ள தொடர்புகளை வைத்து சுமாராக ஐந்து ஆண்டுகளில் தனியாக Practise செய்யலாம்.

நாங்கள் படித்த காலத்திலேயே " சீக்கிரம் நிறைய கேஸ் வரணும்னா தந்தை வக்கீலா இருக்கணும் இல்லாட்டி மாமனார் வக்கீலா இருக்கணும்" என்பார்கள். இது ஓரளவுக்கு உண்மை தான். முதல் தலை முறை வக்கீல்கள் தனியே சம்பாதிக்க நிறைய ஆண்டுகள் தேவை படுகிறது.

வக்கீலாக ப்ராக்டிஸ் செய்வது எனில் அதில்-

சிவில் Side  (கொடுக்கல் வாங்கல்- சொத்து சம்பந்தமான பிரச்சனைகள்)
கிரிமிநல்  Side  ( அனைத்து வித கிரைம்கள்- திருட்டு, கொலை, etc )
கம்பனி சட்டம் ( கம்பனிகள் மீது போடப்படும் வழக்குகள்)
இன்கம் டேக்ஸ், சேல்ஸ் டேக்ஸ் போன்ற பிரிவு
குடும்ப நீதிமன்றம் (விவாகரத்து போன்றவை)

என எந்த பக்கம் நாம் ப்ராக்டிஸ் செய்ய போகிறோம் என்பதை முடிவு செய்ய வேண்டும். இதனை உடனே செய்ய வேண்டும் என்றில்லை; படிக்க துவங்கிய பின் நமக்கு எந்த துறையில் ஆர்வம் இருக்கிறதோ - அதில் நுழையலாம்.

2. பெரிய Law firm களில் இணைந்து பணியாற்றுவது:

இந்தியாவில் பல சிறப்பான Law firm-கள் உள்ளன. உதாரணத்துக்கு சில: AZB Partners, Kochar and Co, Amarchand Mangal Das. சென்னையிலேயே Fox Mandal Associates, King and Partridege போன்றவை..

இந்த Law firm-களில் ஜூனியராக அல்லது முழு நேர ஊழியராக சேர்ந்தால் துவக்கதிலேயே ஓரளவு நல்ல சம்பளம் கிடைக்கும். மேலும் போக போக, நாம் செய்யும் வேலைக்கு சதவீத  (Percentage) அடிப்படையில் பணம் தருகின்றனர். இதன் மூலம் சில வருடங்களிலேயே மாதம் லட்ச ருபாய் சம்பாதிக்கும் வக்கீல்கள் பலர் உள்ளனர்.

நல்ல Law firm-ல் நுழைய சரியான reference தேவை. அதாவது அங்கு உங்களை சேர்த்து விடும் விதமான நபரை நீங்கள் அறிந்திருக்க வேண்டும்!!

3. நிறுவனங்களில் வேலை :

இந்தியாவில் லட்சக்கணக்கான கம்பனிகள் உள்ளன. அவற்றில் ஆயிரக்கணக்கானவை பெரிய கம்பனிகள். இவற்றில் Law officer,  Legal Manager, AGM, GM என பல்வேறு பதவிகளில் BL முடித்தவர்கள் வேலை செய்கின்றனர். துவக்க சம்பளமே ஓரளவு decent ஆக இருக்கும். போக போக நிச்சயம் சம்பளம் கூடும். ரிஸ்க் இல்லாமல் குறிப்பிட்ட வருமானம் விரும்புவோர் நிறுவனங்களில் பணி செய்யலாம்.

மேலும் தற்போது Legal Process Outsourcing என்கிற தொழிலும் அதிகரித்து வருகிறது. இது பற்றி சுருக்கமாய் சொல்ல வேண்டுமெனில் அமெரிக்கா போன்ற நாடுகளில் உள்ள லீகல் வேலைகள் இங்கு Outsource செய்யபடுகின்றன ( IT Outsourcing போலவே). இதனாலும் BL-க்கு வேலை வாய்ப்பு அதிகமாகிறது.

இவை தவிர BL முடித்தோர் Civil services (IAS, IPS, etc ), பிற அரசு வேலை என பல இடங்களில் உள்ளனர்.

ஒரு நல்ல வக்கீலுக்கு (கோர்ட்/ அலுவலக வேலை எதுவாக இருந்தாலும்) முக்கிய தேவை எழுத்தாற்றல் (Drafting skills) மற்றும் பேச்சாற்றல்.. இப்படி எழுத்து மற்றும் பேச்சில் ஈடு பாடு இருந்தால் நிச்சயம் நீங்களோ உங்களுக்கு தெரிந்தவருக்கோ இந்த படிப்பை சிபாரிசு செய்யலாம்.
*************
அண்மை பதிவுகள் : 

24- தமிழில் ஒரு ஹாலிவுட் முயற்சி - சினிமா விமர்சனம்

வானவில்: கேப்டன் பேச்சு - வோட்டுக்கு காசு- கருத்து கணிப்புகள்

ஆலப்புழா - எப்போது செல்லலாம்? எங்கு தங்கலாம்? FAQ

ஆலப்புழா குறித்தான முந்தைய பதிவை அடுத்து - பல நண்பர்களும் எப்போது செல்லலாம்; எங்கு தங்கலாம் என பல கேள்விகளை மெயிலில் கேட்டனர்' ; எனவே இப்பதிவை கேள்வி - பதில் பாணியில் தந்துள்ளேன்

******************
முந்தைய பதிவுகள் :

ஆலப்புழா - படகு சவாரி ஸ்பெஷல் படங்கள்

ஆலப்புழா படகு சவாரி - பயண அனுபவம்

****************
ஆலப்புழா செல்ல சிறந்த நேரம் எது ?

ஆலப்புழா செல்ல - எல்லா மாதமும் ஓகே என்றாலும், மிக சரியான நேரம் நவம்பர், டிசம்பர் ஜனவரி மாதங்கள் தான். நாங்கள் சென்ற போது இருந்த கலங்கிய நீர் - சென்று கடலில் சேர்ந்து விட, மழை பெய்ததில் சேர்ந்த நல்ல நீர் அப்போது இங்கிருக்கும் ; மேலும் மழை முடிந்து கிளைமேட் கூட ரசிக்கும் படி இருக்கும்.

**********
கேரளாவில் நாம் 4 நாள் சுற்று பயணம் செய்கிறோம் - என்றால்- அதில் 1 நாள் இந்த படகு சவாரி செய்வோம்; அந்த 1 நாளைக்கு நாம் ஹோட்டலை காலி செய்யாமல் - அதற்கான வாடகையும் கொடுக்கணும்; படகுக்கான வாடகையும் கொடுக்கணும் ; இது இரட்டி செலவாச்சே ?

உண்மை தான்; இதை தவிர்க்க பலரும் - தங்கள் பயணத்தில் எடுத்தவுடன் - அதாவது ரயிலில் இறங்கியவுடன் நேராக படகு சவாரி செல்ல துவங்கி விடுவார்கள்; மூட்டை முடிச்சு ​+ முழு லக்கேஜுடன் படகில் ஏறி அங்கேயே குளித்து விட்டு பயணம் தொடர்வார்கள் அல்லது உங்கள் கேரள பயணத்தின் இறுதியில் - நீங்கள் தங்கிய ஹோட்டல் அரை காலி செய்து விட்டு ஹவுஸ் போட் வந்து விடலாம். அங்கிருந்து நேரே உங்கள் ரயில் பிடிக்கிற மாதிரி திட்டமிட்டு கொள்ள வேண்டும்

**********
ஒரு நாள் இரவு மட்டும் படகில் தங்குகிறோமே ; அப்போது படகு தொடர்ந்து இயங்கி / நகர்ந்து கொண்டிருக்குமா?

இல்லை; மாலை ஆறு மணியளவில் படகு நிறுத்தப்பட்டு விடும். பேக் வாட்டர்ஸ் பின்னணியில் ஒரு சின்ன கிராமத்தில் நமது படகும், போலவே இன்னும் பல படகுகளும் நிற்கும். மாலை 6 - 7 வெளிச்சம் இருக்கும் போதே ஒரு ரவுண்ட் கிராமத்தை சுற்றி வந்து விடுதல் நலம். பின் இரவு சாப்பாடு - நல்ல நட்பு வட்டம் இருந்தால் - போட்டில் மாலை அல்லது இரவு- உங்களுக்குள் சில விளையாட்டுகள் நடத்தி மகிழலாம்.

**********
படகில் பயணித்தவாறே சன்ரைஸ் அல்லது சன் செட் பார்க்க முடியுமா?

அதற்கான வாய்ப்புகள் மிக குறைவு; மாலை 6 மணிக்குள் படகை நிறுத்தி விடுவதால் - சன் செட் பார்க்க முடிவதில்லை ; காலை நாம் குளித்து , சாப்பிட்டு முடித்த பின் தான் படகை மீண்டும் இயக்குவார்கள்; அதற்குள் நிச்சயம் சன் ரைஸ் முடிந்திருக்கும்

சில படகு சவாரி இணைய தளங்கள் - சன்ரைஸ் & சன் செட் பார்த்து என்ஜாய் செய்யலாம் என விளம்பரம் செய்கின்றன; இது மார்கெட்டிங் ஜிம்மிக் தான். அப்படி விளம்பரம் செய்யும் ஆட்களிடம் கேட்டு உறுதி படுத்தி கொள்ளலாம்
**********
இந்த படகு சவாரியை "நான்வெஜ்" சாப்பிடும் ஆட்கள் தான் அதிகம் என்ஜாய் செய்வார்கள் என்பது உண்மையா?

என்னை பொறுத்த வரை இது முழுக்க, முழுக்க உண்மை; படகு சவாரியில் அந்த வித்யாச பின்னணிக்கு அடுத்து நம்மை பெரிதும் ஈர்ப்பது - அங்கு சாப்பிடும் சாப்பாடு !

நாங்கள் தங்கிய கிராமத்தில் கண் முன்னே - உயிர் மீன் பிடித்து ஒரு கிலோ நூறு ருபாய் என 2 கிலோ வாங்கினோம்; அங்கிருக்கும் ஒரு வயதான பெண்மணி அதை கிளீன் செய்ய வாங்கியது வெறும் 50 ரூபாய் ; 2 கிலோவிற்கும் அதிகமாக இருக்கும் மீன்களை அவ்வளவு அருமையாக - ஒண்ணரை மணி நேரம் செலவழித்து புளி போட்டு தேய்த்து சுத்தமாக தந்தார்

செல்லும் வழியில் ஒரு மீன் கடைக்கு படகுக்காரர்கள் கூட்டி சென்றனர்; அங்கு நம்ம ஊர் விலையில் மீன்,  நண்டு விற்கின்றனர். வேறு வழியின்றி அங்கு நண்டு வாங்கினோம். (கிராமத்தில் இப்படி அருமையான மீன் கிடைப்பது தெரிந்திருந்தால் வாங்கியிருக்க மாட்டோம்)



இரவு சாப்பாடு - சிக்கன் குழம்பு; நண்டு மசாலா ; மீன் வறுவல் - இவை மூன்றும் 5 கிலோ இருக்கும் ; வெறும் 10 பேர் - இந்த 5 கிலோவையும் சாப்பிட்டு காலி செய்தோம். சப்பாத்தி, சாதம் போன்றவை இருந்தும் அதை - செகண்டரி ஆக்கி விட்டு- மெயின் கோர்ஸ் ஆக நான்வெஜில் புகுந்து விளாசினோம்; அவ்வளவு அருமையான சாப்பாடு ! அனைவரும் வெரி ஹாப்பி ! மறு நாள் யாருக்கும் எதுவும் வயிற்றுக்கு பிரச்சனை வரலை .. சிறுவர்கள் உட்பட !



நமக்கு வேண்டிய மெனு முன்பே சொல்லி விட முடியுமா?

உங்கள் படகு சவாரிக்கு ஒரு நாள் முன்பு அவர்களுக்கு போன் செய்து - உங்களுக்கு வேண்டிய சமையலை பற்றி பேசலாம்; எத்தனை பேர் வர போகிறார்கள்; அதில் எத்தனை பேர் வெஜ் எவ்வளவு பேர் நான் வெஜ் போன்ற தகவல்கள் சொல்லலாம் ; மலையாள குண்டு அரிசி வேண்டாம்; தமிழக அரிசி வேண்டும் என்றால் சொல்லி விடலாம் (நாங்கள் அப்படி தான் சொல்லியிருந்தோம்) ; மீன் - தேங்காய் எண்ணையில் பொறிக்கலாமா, நல்ல எண்ணையில் தான் பொறிக்கனுமா என்கிற வரைக்கும் instructions - தரலாம். மேலும் பசங்களுக்கு போர் அடித்தால் பார்க்க - DVD Player வேண்டும்; ஆடியோ சிஸ்டம் வேண்டும்; மீன் பிடிக்க தூண்டில் வேண்டும் போன்றவை முன்பே சொன்னால் எடுத்து வைப்பார்கள் ; இவற்றிற்கு சார்ஜ் கிடையாது
***********
படகு சவாரிக்கு எவ்வளவு நாள் முன்பு புக்கிங் செய்யணும்?

சென்னை டு ஆலப்புழா தினமும் ஒரு ரயில் (Chennai - Alleppey Express/16041)- இரவு 8.45 க்கு சென்ட்ரலில் இருந்து செல்கிறது ; இதில் ரயில் டிக்கெட் போடுவது தான் முதலில் செய்ய வேண்டிய வேலை; செல்ல; திரும்ப - இரண்டிற்கும் ரயில் டிக்கெட் - ஒரு சில மாதங்கள் முன்பு புக்கிங் செய்வது அவசியம். மற்றபடி போட் புக்கிங் ஒரு வாரம் முன்பு செய்யலாம். ஆளப்புழாவில் 2000 படகுகள் இருப்பதால் படகிற்கு தட்டுப்பாடு இல்லை; சில நேரம் ரொம்ப நெருக்கத்தில் நீங்கள் - 4 அல்லது 5 படுக்கை உள்ள படகு கேட்டால் - குறிப்பிட்ட நிறுவனத்திடம் அது ஏற்கனவே புக் ஆகியிருக்கலாம் ; எனில் வேறு நிறுவனத்தை தொடர்பு கொள்ளனும்

**********
ஒரு நாள் போல படகில் இருக்கிறோமே.. மொத்தம் எவ்வளவு தூரம் பயணம் செய்வோம்?

கேட்க சற்று காமெடியாய் தான் இருக்கும்; மொத்தம் - 20 அல்லது 30 கிலோ மீட்டர் தான் பயணிப்போம். 15 கிலோ மீட்டர் போல சென்று விட்டு அதே 15 கிலோ மீட்டர் திரும்ப வருவோம் அவ்வளவு தான்

இந்த பேக் வாட்டர் - ஆலப்புழா முதல் கோட்டயம் வரை நீள்கிறது ; இதன் மொத்த நீளம் - 22 கிலோ மீட்டர். பெரும்பாலான படகுகள் - ஆலப்புழா முதல் குமரக்கோம் வரை மட்டுமே பயணிக்கிறது
**********
கப்பலில் பயணிக்கையில் - வரும் சிக்நெஸ் போல் இதில் வர வாய்ப்புண்டா ?

நிச்சயம் இல்லை; பயணிக்கும் தூரமே குறைவு; மேலும் ஓரிரு மணி நேரத்துக்கு ஒரு முறை ப்ரேக் விடுகிறார்கள்; படகை நிறுத்தி இறங்கி நடந்து விட்டு வருகிறோம்
*********
படகில் விபத்து என அவ்வப்போது கேள்விப்படுகிறோமே ?
ஆம் ரெண்டு வகை ரிஸ்க் இருக்கிறது ஒன்று - அசம்பாவிதமாய் படகு கவிழ்ந்து - சிலர் இறப்பது. அடுத்து இரவு நேரம் படகுகள் வரிசையாய் நிறுத்தி விட்டு தூங்கும் நேரம் - தீ விபத்து நடந்து அது மற்ற இடங்களுக்கும் பரவி ஓரிரு முறை விபத்து நிகழ்ந்துள்ளது

கார் அல்லது பஸ்-சில் செல்லும்போது நடக்கும் விபத்து போல் தான் இதுவும் ! லைப் ஜாக்கெட் போன்றவை உள்ளதா அவை சரியாக வேலை செய்கிறதா என்று வேண்டுமானால் கேட்கலாம் ; வேறு ஏதும் நாம் செய்ய முடியும் என தோணலை !
**********
இந்த படகுகளுக்கு எப்படி புக் செய்வது?

சென்னையில் உள்ள கேரளா டூரிசம் மூலம் நாங்கள் புக் செய்தோம்; அரசு அங்கீகரித்த போட் ஆப்பரேட்டரை அறிமுகம் செய்தனர்; பாதி பணம் இங்கேயே கட்டி விட்டோம். ஆனால் இப்படி இன்னொரு ஆள் மூலம் செல்லும்போது சற்று விலை அதிகமாக வாய்ப்பு உண்டு ; போனில் இரண்டு அல்லது மூன்று நிறுவனத்திடம் பேசி - பார்கயின் செய்தால் நிச்சயம் நல்ல ரேட் கிடைக்கும்

1. நாங்கள் சென்ற நிறுவனம்: http://www.cheravallyhouseboats.com/

தொலைபேசி :
94468 55869
94471 37104
94465 37146

2. நண்பர் ஸ்கூல்பையன் சென்றது : http://www.lakeslagoons.com/

3. பதிவர் கிரி தந்த நிறுவன தகவல்கள்:

Angel Queen Travels

Mobile: +91 98475 04216
Mail ID: angelqueentours@yahoo.com
http://www.angelqueencruise.com

ஒரே ஒரு தனி குடும்பம் சென்றால் - கணவன் - மனைவி- 2 குழந்தைகள் ஒரு நாள் படகு சவாரி + 3 வேளை சாப்பாட்டுக்கு 10,000 போல் வாங்குவார்கள். குடும்பங்கள் அதிகம் சேரும்போது விலை கணிசமாய் குறைய வாய்ப்புண்டு. காரணம் படகு ஒன்றே; படகில் வேலை செய்வோரும் அதே அளவே !

*********
ஆலப்புழா தவிர நாங்கள் கொச்சின் மற்றும் அதிரப்பள்ளி நீர் வீழ்ச்சி சென்று வந்தோம்.

ஆலப்புழா பற்றி வேறு ஏதேனும் கேள்விகள் இருந்தால் பின்னூட்டத்தில்
கேளுங்கள் !

சோக்கி தானி -சென்னையில் ராஜஸ்தான்... படங்கள் & வீடியோவுடன்

சோக்கி தானி - இந்த ஹிந்தி வார்த்தைக்கு அர்த்தம் - அழகான கிராமம்.

ஸ்ரீபெரும்புதூர் குவீன்ஸ்லேந்து அருகே அமைக்கப்பட்டுள்ள ராஜஸ்தான் கிராமம் தான் சோக்கி தானி. அண்மையில் இங்கு நாங்கள் சென்று வந்த போது கிடைத்த அனுபவம் இங்கு உங்களுக்காக :

நுழைவாயில் 

சோக்கி தானி துவக்கி சில வருடங்கள் ஆகிறது. அண்மையில் நல்ல பிரபலம் ஆகி வருகிறது. சென்னையிலிருந்து பெங்களூர் செல்லும்  சாலையில் குவீன்ஸ்லேந்து தாண்டி இரண்டு கிலோ மீட்டர் தூரம் பயணிக்க வேண்டும். பின் லெப்ட் எடுத்து சற்று கிராமம் போல் இருக்கும் சாலைகளில் பயணித்தால் சோக்கி தானி வந்தடையலாம்



ராஜஸ்தான் கிராமம் - அவர்களின் பாரம்பரிய விளையாட்டுகள் - உடைகள் - ஒட்டகம் உள்ளிட்ட விலங்குகள் இவற்றுடன் ஒரு மாலையை செலவிடுவது ... அவ்வளவு தான் விஷயம் !

நுழையும் போதே பீ பீ - டும் டும் அடித்து வரவேற்கிறார்கள். அழகிய புல்வெளி அங்குள்ள ரசிக்கத்தக்க பொம்மைகள் மனதை கவர்கின்றன. பில் போடும் இடத்தில் - ஒருவர் டிக்கெட் வாங்க மற்றவர்கள் காத்திருக்க வேண்டுமே என அந்த நேரத்தையும் இனிதாக்க - அவ்விடத்தை ராஜஸ்தான் பாத்திரங்கள் -தலைப்பாகை என அசத்தியிருக்கிறார்கள். வரும் அனைவரும் இந்த இடத்தில் அமர்ந்து படம் எடுக்காமல் செல்வதில்லை

நுழையும் இடம் துவங்கி இந்த ஹால் வரை உள்ள வீடியோ காணுங்கள்.



டிக்கெட் ஒருவருக்கு ரூ. 600. 9 வயதுக்குட்பட்ட சிறுவர்களுக்கு ரூ. 400. 10 அல்லது 11 வயது குழந்தையோ என சந்தேகம் வந்தால் - குழந்தையின் வயதுக்கான சான்று கேட்கிறார்கள். இல்லையேல் முழு டிக்கெட் தான்.

இந்த 600 ரூபாய்க்கு அனைத்து விளையாட்டுகளும் இலவசம். மேலும் இரவு உணவும் இந்த விலையில் அடங்கும்,

டிக்கெட் வாங்கும்போதே நீங்கள் எந்த நேரம் சாப்பிட விரும்புகிறீர்கள் என கேட்டு நமது டிக்கெட்டில் குறித்து விடுகிறார்கள். மாலை 7.30, 8.15 ஆகிய நேரங்களில் உள்ள இரவு உணவு - முதலில் நிறைந்து விடுகிறது. சினிமா தியேட்டர் போல இரவு உணவு நேரங்களை எழதி - "Full " என்று போட்டு  வைக்கின்றனர்.6.30 முதல் சாப்பாடு துவங்கி விடுகிறது எனினும் அவ்வளவு சீக்கிரம் சாப்பிட இயலாது - மேலும் நாம் உள்ளே வந்தே கொஞ்ச நேரம் தான் ஆகியிருக்கும்

இந்த் 600 ரூபாய் தவிர நாம் செலவு சென்று செய்ய வேண்டியது - நாமாக விரும்பி செய்யும் சில விஷயங்கள் தான். உதாரணமாக கூல் ட்ரிங்க்ஸ், ஐஸ் க்ரீம் போன்றவை ....இது தவிர படகு சவாரி, ஒட்டக பயணம், மாட்டு வண்டி சவாரி அனைத்தும் இலவசமே

உள்ளே நுழைந்ததுமே கயிற்று கட்டில்  நம்மை வரவேற்கிறது; இங்கு முழுவதுமே பல இடங்களில் கயிற்று கட்டில்  உண்டு. பலரும் அதில் ரொம்ப ஹாயாக படுத்த வண்ணம் ரிலாக்ஸ் செய்வதை காண முடிந்தது



ஒரு சின்ன குடிசை போல அமைப்பு- அதில் ஒரு பழைய கார் நிறுத்தபட்டுள்ளது... வித்யாசமாக உள்ளது.

நுழைந்த உடனே படகு சவாரி - சின்ன குளம் போன்ற இடத்தில் நடக்கிறது. கொடுமை என்னவென்றால் - ஒரே ஒரு படகு மட்டுமே; அதில் 4- 5 பேர் மட்டுமே செல்ல முடியும்.



பயணம்  2-3 நிமிடம் மட்டுமே. ஒரே படகு என்பதால் ஏராளமான மக்கள் காத்திருந்து செல்கிறார்கள். குறைந்தது அரை மணி நேரம் காத்திருக்க வேண்டியுள்ளது ; சற்று தாமதாமாக சென்றால் இதனை தவிர்த்து விடுதல் நலம்.



அருகிலேயே பொய்க்கால் குதிரை டான்ஸ். யார் வேண்டுமானாலும் பொய்க்கால் குதிரை உடையுடன் டான்ஸ் ஆடலாம். நம்ம டான்ஸ் பாருங்கள்






ராஜஸ்தான் பிங்க் சிட்டி என்பதால் இங்குள்ள சுவர்கள் கூட பிங்க் நிறத்தில் உள்ளன.

அதனை தாண்டி சற்று தூரம் சென்றால் - அவர்களது பாரம்பரிய இசையை இருவர் இசைக்க - மக்கள் பொறுமையாய்  அமர்ந்து கேட்ட வண்ணம் உள்ளனர்.



இன்னும் சற்று தூரம் சென்றால் - அனைத்து விளையாட்டுகளும் நடக்கும் முக்கிய இடத்துக்கு வந்து விடுகிறோம். ஒரு பக்கம் குதிரை சவாரி- மாட்டு வண்டி சவாரி- இன்னொரு பக்கம் ஒட்டகம் மேல் அமர்ந்த படி வித்தியாச பயணம். அனைத்தும் அருகருகே நடக்கின்றன. இதில் ஒட்டக சவாரிக்கு தான் காத்திருக்கும் நேரம் சற்று அதிகம். இப்படத்தில் மக்கள் காத்திருப்பதையும், ஒட்டகம் வந்து நின்று அதன் மேல் மக்கள் ஏறுவதையும் காணுங்கள்



தவற விடக்கூடாதது ஒட்டக சவாரி. ஒட்டகம் மேல் அமர்ந்து போவது மிக வித்யாச அனுபவம் தருகிறது. யானை மேல் அமர்ந்து சவாரி சென்றிருக்கிறேன். ஒட்டகம் இதுவே முதல் முறை. மிக உயரத்தில் இருக்கிறோம் என்பது ஒரு புறமிருக்க, ஒட்டகத்தின் எலும்பு நம்மை குத்துகிறது. அத்துடன் ஒட்டகம் ஒவ்வொரு அடி எடுத்து வைக்கும் போதும் நாம் மேலும் கீழுமாய் ஏறி, ஏறி இறங்குவோம். இது தான் செம ஜாலியாய் உள்ளது . காத்திருக்கும்போது ஒட்ட்டகத்தை காண சற்று கஷ்டமாக தான் உள்ளது. 2 ஒட்டகங்கள்... இத்தனை  பேரை மாறி மாறி ஏற்றி கொண்டு விடாமல் சவாரி செல்கிறது

மாட்டு வண்டி மற்றும் குதிரை வண்டியில் ஒரே நேரத்தில் 5 பேர் ஏறலாம் என்பதால் அதிக காத்திருப்பு இல்லை.

மாஜிக் ஷோ என ஒன்று நடத்துகிறார்கள். மிக சுமார் தான்



2-3 இடங்களில் ராஜஸ்தான் இசை போல இசைத்து கொண்டு - அவர்கள் உடை அணிந்த பெண்மணிகள் நடனம் ஆடுகிறார்கள். நாமும் சென்று ஆடலாம். அனேகமாய் பெண்கள் தான் இவர்களுடன் சென்று இணைந்து ஆடுகிறார்கள்



கிளி ஜோசியம் ஒரு புறம் நடக்கிறது... ஹிந்தியில் மட்டுமே ஜோசியம் சொல்வதால் நமக்கு மாலும் நஹி ஹை.



அனைத்து விளையாட்டுகள் நடக்கும் இந்த இடத்தில் அற்புதமான ஏலக்காய் டீ இலவசமாய் தருகிறார்கள். சூப்பர் டேஸ்ட்.  நான் மட்டுமல்ல, ஹவுஸ் பாசும் - 2 முறை விரும்பி குடித்தார். சுண்டல் போன்ற ஸ்நாக்ஸ் கூட இந்த இடத்தில் இலவசமாக தொடர்ந்து தந்த வண்ணம்  உள்ளனர்.

நம்மை ரிலாக்ஸ் செய்ய ஹெட் மசாஜ் - அதுவும் இலவமாக செய்கிறார்கள்.



2 நிமிடம் போல தான் செய்கிறார் (தலையில் சிறிது கூட முடி இல்லாத இன்னொரு நபர் ஹிந்தியில் பேசியதால் பேச்சு சுவாரஸ்யத்தில் அவருக்கு 10 நிமிடத்துக்கு மேல் மகிழ்ச்சியாய் மசாஜ் செய்தார்.... )

பொம்மலாட்டம், நெருப்புடன் செய்யும்  சாகசங்கள், அந்தரத்தில் கயிற்றின் மேல் நடக்கும் சிறுவன், நமக்கு ராஜஸ்தான் உடை அணிந்து  புகைப்படம் எடுப்பது என ஏராள விஷயங்கள் உள்ளன. நேரம் தான் போத மாட்டேன் என்கிறது.



மாலை 4 மணிக்கு திறந்து இரவு 9.30 க்கு மூடுகிறார்கள். நாம் 4- 4.30 செல்வது போல் பார்த்து கொள்ள வேண்டும். அப்போது தான் அனைத்தையும் காண முடியும்.

மெகந்தி போடுகிறார்கள் .......

கயிற்றின் மேல் நடக்கும் சிறுவன் 

இறுதியாய் உணவகம். ஏற்கனவே நமக்கு சொல்லப்பட்ட உணவு நேரத்தின் போது நாம் அவ்விடத்துக்கு வரவேண்டும் (எல்லாம் பக்கம் - பக்கம் தான். ; 10- 15 நிமிடம் தாமதமாகலாம். பிரச்சனை இல்லை) நாம் புக் செய்த டிக்கெட்டை பத்திரமாக வைத்திருந்து இங்கு காட்ட வேண்டும்.

நான்கைந்து சாப்பிடும் அறைகள்  அமைத்துள்ளனர்.அவை மட்டும் ஏ. சி போருதப்பட்டவை. அறைக்கு வெளியே காத்திருக்க மறுபடியும் கயிற்று கட்டில்கள் !




சிறுவர்கள் மற்றும் பெரியோர் சைக்கிள்கள் வாடகைக்கு கிடைக்கிறது. அரை மணி நேரம் எடுத்து கொண்டு அந்த ஏரியாவை ஒரு ரவுண்ட் அடிக்கலாம் ( சிறுவர்களுக்கு 20 ரூபாயும், பெரியோருக்கு 50 ரூபாயும் வாங்குகிறார்கள்.. ); போலவே சைக்கிள் ரிக்ஷாவும் ஓட்டி பார்க்கலாம்



தரையில் மெத்தை போட்டு சாப்பாடு பரிமாறுகிறார்கள். முதலில் தரும் இனிப்புகள் அருமை. பின் சப்பாத்தி பூரி போன்றவை .. அதற்கு 5-6 சைட் டிஷ்கள். ஒவ்வொன்றையும் வைக்கும் போது அதன் பெயரை சொல்லியபடியே பரிமாறினாலும் நமக்கு தான் அந்த பெயர்கள் புரிய மாட்டேன் என்கிறது

உணவில் முதலில் சொன்னபடி இனிப்பு மற்றும் பூரி போன்றவை தான் ஓகே. சாத வகைகள் ரொம்ப சுமார். அநேகமாய் 20 வகை உணவுகள் பரிமாறுகிறார்கள். நாம் கொஞ்சம் சாப்பிட்டு பார்த்து பிடித்ததை மட்டும் உண்ணலாம். மற்றதை விட்டு விடலாம்





இதே இடத்தில் சோக்கி தானியின் உரிமையாளர்களில் ஒருவரை சந்தித்து சற்று பேசிக்கொண்டிருந்தேன்.

இதே கான்செப்ட் டில்லி, மும்பை உள்ளிட்ட 15 இடங்களில் உள்ளதாம். சென்னையில் இது துவங்கி  15 மாதம் ஆகிறது என்றும் வார நாட்களில் 150- 200 பேர் வருவதாகவும் வார இறுதியில் குறைந்தது 1000 பேர் வருவதாகவும் கூறினார். இது முழுக்க முழுக்க ரிலாக்ஸ் செய்து கொள்கிற இடமென்றும்,  இங்கும் வந்து விட்டு அவசர, அவசரமாக பார்க்க கூடாது - நிதானமாய் ஒவ்வொன்றாய் பார்க்க வேண்டும் என்றும் சொன்னார்.



மக்கள் கூட்டம் 8- 8.30 க்கு மேல் வெகுவாக குறைந்து விடுகிறது. 9.30 வரை இருக்கலமேன்றாலும் 9 மணிக்கு மேல் அங்கிருப்போர் மிக குறைவே.

சென்னையில் குவீன்ஸ் லேண்ட், போன்ற பிக்னிக் ஸ்பாட்டுகளுடன் இந்த சோக்கி தானியும் புது வரவு. அவசியம் ஒரு முறை விசிட் செய்யுங்கள்.. ஒரு வித்தியாச அனுபவத்துக்காக !