சினிமா விமர்சனம் - Dude ! சில கேள்விகள்.. சில வருத்தங்கள்..

பிரதீப் ரங்கநாதன் முதல் மூன்று படங்களும் அட்டகாசமாய் தந்திருந்தார். இந்த தலைமுறையின் நாடி துடிப்பை நன்கு அறிந்தவராகவே அடையாளம் காணப்பட்டார். ஆனால்.. ஆனால்?

 
ஸ்பாய்லர் அலர்ட் - கதையின் சில மைய புள்ளிகள் பேசப்படும்.. கதை தெரிய வேண்டாம் என எண்ணினால் - அடுத்த சில பாராக்களை தவிர்த்து விடுதல் நலம் !

கே பாக்கியராஜின் அந்த ஏழு நாட்கள் - அப்டேட்டட் வெர்ஷன் தான் - Dude மையக்கதை ! அதன் கிளைமாக்ஸை மாற்றி - காதலனுடன் அந்த பெண் சென்றால் எப்படி இருக்கும்?

அப்படி செல்வது கூட தவறில்லை- எங்கேயோ சில இடங்களில் நடக்கவே செய்யும். பிடிக்காத ஒரு ஆணுடன் விருப்பமில்லாமல் ஒரு பெண் வாழ்வது பிற்போக்குத்தனம் என கொள்ளலாம்.

ஆனால் Dude ல் என்ன நடக்கிறது? பெண்ணின் காதலன் - திருமணத்திற்கு முன்பே - அவளை மணக்க போகிறவனிடம் மேடையில் வைத்து சொல்கிறான்.. நீ கல்யாணம் பண்ணிக்கோ- ஆனால் நாங்கள் ரெண்டு பேரும் ஒன்றாய் சேர்ந்து வாழ்ந்து கொள்கிறோம் என ! என்ன கருமம் இது !

இதை விட கொடூரம் - அந்த 3 பேரும் ஒரே வீட்டில் வாழ்வதாய் தான் காட்டுகிறார்கள் ! பழைய காதலன் மூலம் அந்த பெண் திருமணத்திற்கு பின் குழந்தையும் பெற்று கொள்கிறாள் !

இரண்டாம் பாதியில் ஹீரோவின் மற்றொரு நண்பன் அவனை பார்க்கும் போதெல்லாம் காறி துப்புவதை பல முறை காண்பிக்கிறார் இயக்குனர்; மக்கள் இதையே தான் நம்மை பார்த்து செய்ய போகிறார்கள் என அவருக்கு ஏன் தோன்றவே இல்லை?

சினிமா என்பது ஒரு மிகப்பெரிய மீடியா.. சினிமா பார்த்து நல்லதை எடுத்து கொள்கிறார்களோ இல்லையோ - கெட்ட விஷயம் சர்வ நிச்சயமாய் இளம் தலைமுறை சிலராவது எடுத்து கொள்வர்.

இதே கதை ஒரு நாவலாக எழுதப்பட்டால் கூட - அது நன்கு படித்த - யோசிக்கும் தன்மையுள்ள மனிதர்களிடம் மட்டும் சென்றிருக்கும். சினிமா எனும்போது ஜெனரேஷன் Z - இது எல்லாமே இயல்பு தான் என்ற முடிவுக்கு வர மாட்டார்களா?

இவை அனைத்துக்கும் அடிப்படை ஆணவ கொலை என்கிறார்கள். ஆணவ கொலை தவறு தான் ! ஆனால் இரண்டாம் பாதியில் ஒரு மணி நேரம் வாந்தி வர வைக்கும் காட்சிகளை வைத்து விட்டு கடைசி 10 நிமிடம் ஆணவ கொலைக்கு பயந்தே இப்படி செய்தோம் என முடிப்பது என்ன நியாயமோ?

எனக்கு வருத்தமான இன்னொரு விஷயம் - இது பிரதீப் ரங்கநாதன் படம் + நீண்ட விடுமுறை என்பதால்- ஏற்கனவே போட்ட காசை எடுத்துவிட்டனர்; நிச்சயம் சில கோடி லாபத்துடன் அடுத்த 10 நாட்களுக்கு திரை அரங்கில் ஓடும் .. இது இயக்குனர் கீர்த்திஸ்வரன் மற்றும் பிரதீப்பிற்கு தாங்கள் செய்த தவறை உணர முடியாமல் செய்துவிடும் ..

பணம் தேவை தான் அதற்காக எப்படியும் சம்பாதிக்கலாமா பிரதீப் & கீர்த்தீஸ்வரன்? அடுத்த தலைமுறைக்கு எப்படி வேண்டுமானாலும் வாழலாம் என சொல்லி கொடுத்து/ கெடுத்து தான் சம்பாதிக்க வேண்டுமா?

பிரதீப் மற்றும் கீர்த்திஸ்வரன் - தங்கள் சோசியல் மீடியாவில் மிக மகிழ்வாக வெற்றியை கொண்டாடுகின்றனர்; இத்தகைய இயற்கைக்கு எதிரான படங்கள் தான் ஓடும் என ஒரு க்ரூப் நிஜமாகவே ரூம் போட்டு யோசிக்க வைத்து விடலாம்- இந்த படம் !

இந்தியாவை உலக அரங்கில் பலரும் மதிக்க ஒரு முக்கிய காரணம் -நமது குடும்ப அமைப்பு; திருமணத்திற்கு பின் - ஒரு மனைவி - ஒரே குடும்பம் என பெரும்பான்மை மக்கள் வாழ்வது பிற்போக்கு தனம் அல்ல ! அது தான் இந்தியாவை மதிக்க வைத்திருக்கிறது

இப்படி எல்லாம் நடக்கவே இல்லையா? எடுத்தால் என்ன தப்பு என்றால்- மாஸ் மீடியாவில் எதை எடுக்க வேண்டும் என ஒரு சுய கட்டுப்பாடு படைப்பாளிக்கு வேண்டும். குடும்ப உறவுகளில் கூட சில நேரம் - தவறான உறவுக்குள் சிலர் போயிருக்க கூடும்.. அதனை glorify / justify செய்து முழுசாய் ஒரு படம் எடுத்தால் - இன்னும் எத்தனையோ பேருக்கு இது தவறில்லை என்ற எண்ணம் வர வைக்கும். சிந்துசமவெளி என்றொரு படம் இப்படி குடும்ப உறவை தவறாக காட்டி எடுக்கப்பட்டு பலரும் அதனை கடுமையாய் கண்டித்தனர்; இக்காலத்தின் சிந்துசமவெளி - Dude !

சாதாரண பார்வையாளராக - நாம் செய்ய கூடியது ஒன்று தான்.. தயவு செய்து புறக்கணியுங்கள் இத்தகைய படைப்புகளை !

அண்மை பதிவுகள்:

என் இனிய ஸ்நேகா....

சூப்பர் சிங்கர் சீசன் 11- ஒரு பார்வை

சைக்கோ, Chappak, பக்ரீத் - விமர்சனங்கள்

சைக்கோ 

இன்று மாலை விஜய் டிவியில் ஒளிபரப்பாக உள்ளது சைக்கோ

த்ரில்லர் வகை படங்கள் பிடிக்கும் என்பதால் பார்த்தேன்.

பெண்களை தொடர்ந்து கொள்ளும் ஒரு சைக்கோவை - physically challenged ஒரு ஆணும் பெண்ணும் சேர்ந்து பிடிக்கும் கதை.

கண் தெரியாத ஹீரோ நீண்ட தூரம் கார் ஓட்டுவது போன்ற லாஜிக் மீறல்களை கூட பொறுத்து கொள்ளலாம். அத்தனை கொலைகள் செய்தவனை -அவன் ஒரு குழந்தை என்ற ரீதியில் கடைசி நிமிடம் பேசுவதை தாங்கவே முடியவில்லை. அன்புக்கு ஏங்குகிறான் என்பதை establish செய்ய எந்த காட்சியும் அமைக்கப்படவில்லை

கடைசி இரு நிமிடத்தையும், சற்று கோர காட்சிகளையும் பொறுத்து கொண்டு த்ரில்லர் விரும்பிகள் மட்டும் காணலாம்

Chappak -ஹிந்தி 

தீபிகா படுகோனே ஆசிட் விக்டிம் சர்வைவர் ஆக நடித்த இப்படம் உண்மை சம்பவங்களை அடிப்படையாக கொண்டது

அந்த பெண்ணின் போராட்டம் இண்டியன் பீனல் கோடில் ஆசிட் வீசுவோருக்கென்று தனி செக்ஷன் வரவும், தண்டனை அதிகமாகவும் காரணமாக அமைந்தது

தீபிகா அற்புதமான நடிப்பு ! படத்தின் தயாரிப்பாளர்களில் இவர் ஒருவர். சின்ன பட்ஜெட்டில் எடுக்கப்பட்டு ஓரளவு லாபமும் சம்பத்தாதிருக்கிறது இப்படம்

இரண்டே மணி நேரம் கொண்ட இப்படம் அவசியம் பார்க்க வேண்டிய ஒன்று !

பக்ரீத் - தமிழ் 

சென்ற ஆண்டு இறுதியில் ஒரு தமிழ் சானலில் 2019ல் வெளிவந்த நல்ல சிறு படங்கள் என ஒரு 10 படங்களை கூறினர் .. அதில் ஒரு படமாக பக்ரீத் இடம் பெற்றிருந்தது

படம் ஒட்டகம் வளர்க்கும் ஒரு குடும்பத்தின் கதை. ஒட்டகம் எதிர் பாராத விதமாக இக்கும்பத்திடம் வந்து சேர்கிறது. அதற்கு ஒரு முறை உடல்நிலை சரியில்லாமல் போக, மருத்துவர் அது ராஜஸ்தானில் இருப்பது தான் சரி, இங்கு தட்பவெப்பம் ஒத்து கொள்ளாது என சொல்ல, ஹீரோ விக்ராந்த் அதனை ராஜஸ்தான் அழைத்து செல்வதும், அவர் அதனை அங்கேயே விட்டாரா என்பதும் தான் படம்

படத்தின் சுவராஸ்யங்களில் ஒன்று .. துவக்கத்தில் நெகட்டிவ் ஆக காட்டப்படும் சில பாத்திரங்கள் - பின் அவர்களின் நல்ல தன்மையில் வெளிப்படுத்துவது தான்

நாய் , பூனை, கிளி என செல்ல பிராணிகள் விரும்பும் இவ்ருக்கும் இந்த படம் நிச்சயம் பிடிக்கும்

ஓ மை கடவுளே & 375 - இரு நல்ல படங்கள் விமர்சனம்

நாடு முழுதும் கரோனா பற்றியே பேச்சிருக்க, நாம் சில நல்ல படங்கள் பற்றி பேசுவோம்

ஓ மை கடவுளே

நல்லதொரு நாட்..அதனை அழகாக திரைக்கதையாக்கியிருக்கிறார்கள். அசோக் செல்வன் மற்றும் ரித்திகா - Just perfect ! வாணி போஜன் தான் மிக சுமாரான பேர்பார்மன்ஸ் ..

நாம் வாழும் வாழ்வில் விருப்பமே இன்றி எதோ வாழ்ந்து கொண்டிருக்கிறோம். உண்மையில் நாம் எவ்வளவு கொடுத்து வைத்தவர்கள் என்பதை நாம் உணர்வதே இல்லை.

போலவே, நம் மீது அன்பு செலுத்துவோரை ரொம்ப ஈசியாக எடுத்து கொள்கிறோம். அவர்களின் அன்பும் அதன் ஆழமும் நமக்கு புரிவதே இல்லை

கடவுள் என்கிற சுவாரஸ்ய பாத்திரம் மூலம் வாழ்வை மறுபடி வேறு மாதிரி வாழ்ந்து பார்க்க வாய்ப்பு தருவதே செம கான்செப்ட். அதனை வீணடிக்காமல் ரசிக்கும் வண்ணம் திரைக்கதை செய்துள்ளனர்.

அவசியம் பாருங்கள்.. இந்த கடவுளை !

Section 375 (ஹிந்தி)

ஒரு அட்டகாசமான படம் ! கோர்ட் ரூம் டிராமா !

375 என்பது இந்தியன் பீனல் கோட் செக்ஷனை குறிப்பது. கற்பழிப்பு குறித்த சட்டப்பிரிவு.

ஒரு நடிகர் - ஓர் இளம்பெண்ணிடம் தவறாக நடந்ததாக, கற்பழித்ததாக வழக்கு பதிவு செய்யப்படுகிறது

விசாரணை- வாக்கு வாதங்கள் - இவை தாண்டி இறுதியில் உண்மை தெரியும் போது திடுக்கிட்டு போவோம்...

375 செக்ஷனில் இருக்க கூடிய ஓட்டைகளை எடுத்து காட்டும், இந்த பற பற படத்தை காண தவறாதீர்கள் !

பிகில் - சினிமா விமர்சனம்

அட்லீ படங்களின் ரசிகனல்ல நான். ஆயினும் பிகில் என்னை கவர்ந்தது. மிக எளிய காரணம். பெண்களுக்கும் கனவு என ஒன்று இருக்கலாம்; அதை அவர்கள் தொடரவேண்டும் - திருமணம், ஆசிட் அட்டாக் போன்ற எதுவும் அந்த கனவுகளுக்கு தடையாய் இருக்க கூடாது என்று தெளிவாய் சொன்ன கருத்து தான் நிச்சயம் படத்தை ஆவரேஜ் என்று சொல்லாமல் "குட்" என்று சொல்ல வைக்கிறது.

ரொம்ப சுமாரான முதல் பாதி; வெறித்தனம் பாட்டு அமர்க்களம் என்றால்- அதை படமாக்கிய விதம் - குறிப்பாய் நடனம் இன்னும் நன்றாய் இருந்திருக்கலாம் (விஜய் அட்டகாசமாய் ஆடக்கூடியவர்; அவருக்கு  எக்ஸர்சைஸ் செய்யும் வகை ஸ்டெப் எதற்கு !) சிங்கப்பெண்ணே  மற்றும் மாதரே பாடல்கள் படமாக்கம் ரசிக்கும் வண்ணம் உள்ளது.

காமெடி என்று எதோ முயற்சிக்கிறார் இயக்குனர். அதுவும் எடுபடலை. இடை இடையே சண்டைகள் வேறு (நிறைய அனாவசியம்)

முதல் பாதி மோசமா என்றால் - வழக்கமான ஸ்டார் படம் (ரஜினியின் பழைய மசாலா படங்கள்) போல தான் இருந்தது.

இடைவேளைக்கு சற்று முன் லேசாக முக்கிய விஷயத்தை தொடுகிறார் இயக்குனர்

செகண்ட் ஹாப் நிச்சயம் என்னை முழுதும் திருப்தி படுத்தியது. குறிப்பாக திருமணம் ஆனபின் வந்து ஆடும் காயத்ரி - ஆசிட் அட்டாக்கில் மீண்டு ஆட வரும்  பெண் இருவர் பகுதியும் சரியான விதத்தில் எமோஷனல் ரீச் ஆகிறது.

பிற்பாதியில் சில ரசிக்க வைக்கும் சீன்கள் வந்த வண்ணம் உள்ளன - டில்லி போலீஸ் ஸ்டேஷனில்  விஜய் செய்யும் அடாவடி  - மேட்ச்கள் (தோற்கும் படி சென்று ஜெயிக்கும் வழக்கமான பாணி எனினும்) ..

படத்திற்கு மிக்ஸட் ரிவியூ வருவதை உணர முடிகிறது. இணையத்தில் அதிகமாய் விஜய் ஹேட்டர்ஸ் முடிந்த பங்கை செய் கிறார்கள். ஆனால் படம் பெண்களுக்கு நிச்சயம் பிடிக்க வாய்ப்புகள் அதிகம். பெண்களுக்கு பிடிக்கும் படம் ஹிட் ஆகவே செய்யும் ..

பாலசோவில் முதன் முறை படம் பார்த்தோம். அட்டகாசமான திரை அரங்கம். தியேட்டர் காம்ப்ளெக்ஸ்  வியக்க வைக்கிறது; ஸ்னேக்ஸ் மிக ரீஸன்பில் விலை; (நாங்கள் வழக்கமாய் செல்லும் PVR -ல் Snacks கொள்ளை விலை.

எலைட் ஆடியன்ஸ். விஜய் வரும்போதும் சரி, ஏ ஆர் ரகுமான் திரையில் வரும்போதும் சரி- எண்ணி நான்கு பேர் கை  தட்டினார்கள்.

அதை விட இன்னொரு விஷயம்: படம் போட்ட பின் பல நிமிடம் சத்தம் தான் வந்தது; திரையில் ஒன்றுமே தெரியலை. மக்கள் சத்தம் போடாமல் அமைதியோ அமைதி காத்தனர்.

டயலாக் எல்லாம் துவங்கிய பின் சிலர் கத்த, நிறுத்தி விட்டு, முதலில் இருந்து படம் போட்டனர் !


பிகில்

அதிக எதிர்பார்ப்பின்றி செல்லுங்கள். நிச்சயம் ஒரு முறை காண தகுந்த படம் தான் !

அசுரன் சினிமா விமர்சனம்

எழுத்தாளர் பூமணியின் வெக்கை நாவல் - வெற்றி மாறன்- தனுஷ் கூட்டணியில் அசுரத்தனமாக வந்துள்ளது ..

1960-70களில் நடந்த கதை. சாதி பிரச்சனை, நில மீட்பு போன்றவை பின்புறமாய் இருந்தாலும் ஒரு குடும்பத்தின் வலி நெஞ்சை தைக்கும்படி பளிச்சென்று பதிகிறது.

நாவல் வாசிக்க வில்லை; மூலக்கதை என்று தான் போடுகிறார்கள். நிச்சயம் கமர்ஷியல் விஷயங்கள் சேர்த்து தான் தந்துள்ளார் இயக்குனர். அதனால் தான் படத்தை ரசித்து பார்க்க முடிகிறது.

இன்றைக்கும் நேற்றைக்கும் சென்று வரும் திரைக்கதை நம்மை பதை பதைக்க வைக்கிறது. தனுஷ் (சிவசாமி) குடும்பத்துடன் சேர்ந்தே நம்மை பயணிக்க வைக்கிறார் இயக்குனர்

சரியான காஸ்டிங்.. தனுஷை கல்யாண வயதில் மகன் உள்ள ஒரு தந்தையாக துவக்கத்தில் ஏற்று கொள்ள சிரமமாயிருந்தாலும் போக போக அற்புத நடிப்பால் நம்மை அசர அடிக்கிறார்...சிறிதும் மிகை படுத்தல் இன்றி அவர் தந்துள்ள நடிப்பு .. அற்புதம் !

இடைவேளையில் வரும் சண்டை காட்சி .. அமர்க்களம். இண்டெர்வெல் முடிந்து   வந்ததும் பஞ்சமி நில பிரச்சனை மற்றும் தனுஷின் குடும்பம் குறித்த பிளாஷ் பேக் நம்மை பெரிதும் தாக்குகிறது..  பிளாஷ்பேக்  முடிந்ததும் மெயின் கதைக்குள் நாம் வரவே நேரமாகிறது.. இரண்டாவது பிளாஷ் பேக் அந்த அளவு தாக்கி விடுகிறது. 

இப்படியெல்லாம் கூட நடக்குமா என்போர் பஞ்சமி நிலமீட்பு என்றும் கீழ வெண்மணி என்றும் கூகிளில் தேடி பாருங்கள். படத்தில் காண்பித்தது ஒரு துளி தான் என்று தெரிய வரும்.

மஞ்சு வாரியர் , தனுஷின் இளைய மகன், ஆடுகளம் நரேன்.. அனைவரையும் விட வக்கீலாக வரும் பிரகாஷ் ராஜ்  அனைவரும் நேர்த்தியான நடிப்பு (படத்தில் பிரகாஷ் ராஜ்  பெயர் சேஷாத்ரி.. தாழ்த்தப்பட்ட மக்களுக்கு வாதாடும் வக்கீல் ஒரு மேல் சாதி காரர் என்பதும் ஒரு குறியீடு )

படம் எத்தனையோ விஷயங்களை சொல்லாமல் சொல்கிறது; உதாரணத்திற்கு ஒன்று: பிள்ளைகள் பல நேரம் பெற்றோர் சொல் கேட்பதே இல்லை; ஆனால் பெற்றோர் ஒவ்வொரு முறையும் அவர்களின் நல்லதற்கு மட்டுமே தான் சொல்கிறார்கள். அது அவர்களுக்கு அப்போது புரிவதே இல்லை ! போலவே பெற்றோர் தம் குழந்தைகளுக்காக எந்த வித தியாகமும் செய்வார்கள் என்பதுவும் படம் போகிற போக்கில் சொல்லி செல்கிறது..

ஜீவி பிரகாஷ் குமாரின் பின்னணி இசை நம்மையும் இரண்டு பேரை அடிக்கலாமா என்கிற விதத்தில் உசுப்பேற்றுகிறது..

தனுஷ் வேலைக்கு சேர்க்கும் ஆள் மிக சரியாக வளர்ந்து அவருக்கே எதிராக திரும்பும் cliche,  சற்றே அதிகமான வன்முறை, மனதில் பதியாத பாடல்கள் என சிற்சில குறைகள் இருந்தாலும் - அவை யாவும் வெற்றி மாறனின் கதை சொல்லும் பாங்கு  மற்றும் அவரது அசாத்திய நேர்த்தியின் (Perfection) முன் அடிபட்டு போய்  விடுகிறது.

 இடைவேளையிலேயே என்னா மாதிரி நடிகன்யா தனுஷ்.. என்ன ஒரு அற்புத இயக்குனர்யா வெற்றிமாறன் என பிரமித்து போயிருந்தேன். படம் முடிந்து வரும்போதும் மீண்டும் அதே எண்ணம் தான் எட்டி பார்த்தது !

இறுதியில் தனுஷ் தன் மகனிடம்

"நம்ம கிட்டேர்ந்து அவங்க நிலத்தை பிடுங்கலாம். ஆனா படிப்பை பிடுங்க முடியாது; நல்லா படிச்சுக்க ; படிச்சு நீ ஒரு பதவிக்கு வந்தா - அவங்க நமக்கு பண்ண விஷயங்களை நீ பண்ணாதே " என்பதில் தேவர் மகன் சாயல் மிக லேசாக இருந்தாலும் (போய் புள்ள குட்டிகளை படிக்க வைங்கய்யா) - படத்திற்கு அதை விட அருமையான முடிவும், செய்தியும் இருக்க முடியாது .

அசுரன் .. அசத்தல் !

கோமாளி சினிமா விமர்சனம்

16 வருடங்கள் கோமாவில் இருக்கும் (ஜெயம்) ரவி திடீரென ஒரு நாள் விழிக்க இத்தனை வருடத்தில் நடந்த மாறுதல்களை எப்படி எதிர்கொள்கிறார் என்பதே கோமாளி

பிளஸ் 

ட்ரைலர் மட்டும் பார்த்து பல்பு வாங்கிய படங்கள் நிச்சயம் எல்லோருக்கும் இருக்கும்.  நானும், பெண்ணும் ட்ரைலர் பார்த்து விட்டு காமெடி படம் என்று டிக்கெட் போட்டோம் !  எந்த ரிவியூவும்  இல்லாம, ட்ரைலர் பார்த்து போறோம்..சொதப்பாம இருக்குணும் என்று சொல்லியபடி இருந்தேன்..

காமெடி !  அது தான் படத்தின் பிளஸ். முதல் பாதியில் சிரிக்க  வைக்க எத்தனையோ சூழல்கள்.. அனைத்தையும் முடிந்தவரை சரியே பயன்படுத்தியுள்ளார் இயக்குனர்.

வாட்ஸ் அப், பேஸ் புக் என பலவற்றை கிண்டல் அடித்தாலும், கூகிள் மேப்பை கிண்டலடிக்கும் போது தியேட்டர் குலுங்குகிறது

ஐ. டி வேலை செய்வோர், கூவத்தூர் ரிசார்ட் என பல விஷயங்கள் மக்கள் ரசிக்கும் வண்ணம் நக்கல் அடிக்கிறார் இயக்குனர்

இறுதியில் சென்னை வெள்ளத்தில் சொல்கிற மெசேஜ் - தியேட்டரில் மக்களிடம் நன்கு எடுபடுவதை காண முடிந்தது..

சில நெருடல்கள் 

ஒரு படம் நிச்சயம் கதை என ஒன்று  சொல்லியே ஆகணுமா?

கருத்து ? அது இருந்தே தான்  தீரணுமா?

இயக்குனர் அப்படித்தான் நினைக்கிறார் போலும்.

உள்ளத்தை அள்ளித்தா என்று ஒரு படம் - கதை என்று பேருக்கு எதுவோ ஒன்று இருக்கும்.. காமெடி மட்டும் காட்சிக்கு காட்சி சிரிக்க வைக்கும்..

கிட்டத்தட்ட அந்த அளவு அமர்க்களமாய் இப்படத்தை கொண்டு சென்றிருக்கலாம்.. அழகான ஒரு பிளாட் கிடைத்து காமெடியும் இயக்குனருக்கு நன்றாகவே வருகிறது.. காமெடியில் முழுக்க பவுண்டரி, சிக்ஸர் என அடித்திருந்தால் இது ஒரு  மறக்க முடியாத படமாகியிருக்கும் .. ஆனால் இயக்குனரின் "கதை சொல்கிறேன்- கருத்து சொல்கிறேன்" என்ற "நல்லெண்ணத்தால்" அது நடக்காமல்  போகிறது.

மொத்தத்தில் 

இரண்டரை மணி நேர படத்தில் 45 நிமிடமாவது சிரிப்புக்கு காரண்டி.. அந்த நேரம்  இன்னும் அதிகமாய் இருந்திருக்கலாம்.. அது தான் வருத்தமே !

அதிக எதிர்பார்ப்பின்றி பார்த்தால், ஆங்காங்கு மனம் விட்டு சிரிக்கலாம் !

அண்மை பதிவு: நேர்கொண்ட பார்வை விமர்சனம்  இங்கு

நேர்கொண்ட பார்வை விமர்சனம்

இந்தியில்  வெளியான பிங்க் தமிழில்  "நேர்கொண்ட பார்வை " யாக !

கதை 

ஒரு பார்ட்டியில், சில இளம் ஆண்களும், பெண்களும் குடித்து விட்டு  பேசிக்கொண்டிருக்க, இளைஞன் -ஒரு பெண்ணிடம் தகாத முறையில் நடக்க முயல- அவள் பாட்டிலால் ஓங்கி அடித்து விடுகிறாள். பையன் பெரிய  இடம்.போலீஸ் கேஸ் ஆனபின், எல்லாம் தலை கீழ் ஆகிறது ...பெண்களுக்கு ஆஜர் ஆகி வாதிடுகிறார் அஜீத். நீதி கிடைத்ததா என்பதை இறுதி பகுதி கோர்ட் காட்சிகளால் சொல்கிறது

பிங்க் Vs நேர்கொண்ட பார்வை 

இந்த ஒப்பிடலை தவிர்க்க முடியாது.

இரண்டையும் பார்த்தோரில் சிலருக்கு பிங்க் ஏற்படுத்திய  தாக்கம் அதிகமாக இருக்கும் ! காரணம்.. கதை மற்றும் முதல்  முறை பார்க்கும் போது - அது தரும் எழுச்சி. Freshness !

தமிழில் நமக்கு பெரும்பாலும் என்ன  நடக்கும் என தெரிந்து விடுவது சிறு குறை. ஆயினும், சப் டைட்டில் படிக்கும் பிரச்சனை இன்றி நேரடியே ரசிக்க முடிவதால்,  பலருக்கும் தமிழ் version பிடிக்கவே செய்யும்

பிளஸ் 

அஜீத் !  இப்படத்தில் அஜீத் இல்லாவிடில் இந்த அளவு ரீச் மற்றும் வெற்றி கிடைத்திருக்காது. ஒரு பெரிய நடிகர் இந்த செய்தியை சொன்னதால் தான் அது  பேசப்படுகிறது. ரொம்ப subdued  ஆக - underplay செய்து நடித்துள்ளார் அஜீத்

இடைவேளை காட்சி பட்டாசு ! அஜீத் ரசிகர்களால்  சீட்டில் அமரவே முடியாத படி அந்த 10-15 நிமிடம் ரணகளப்படுகிறது. இப்பகுதி முழுக்க தமிழில் அஜீத்திற்காக மட்டும் சேர்க்கப்பட்டது !    அட்டகாசம் !

பின்னணி இசை - அடிநாதமான அற்புத கதைக்கு அடுத்து ரொம்பவும் அசத்துவது பின்னணி இசை தான். இண்டெர்வெல் பிளாக்கிற்கு தரும் நரம்பு புடைக்க வைக்கும் இசை - எமோஷனல்- த்ரில் காட்சிகளுக்கு தரும் இசை - என ஒவ்வொன்றும் ரசிக்க  வைக்கிறது.பாடல்கள் சுமார் தான் !

ஷ்ரத்தா ஸ்ரீநாத் - அட்டகாசமான role - முழுதும் உள்வாங்கி அனாயாசமாக நடிக்கிறார். பாத்திரமாக மட்டுமே பார்க்க முடிகிறது

இயக்கம் - இன்று 10 படம் வந்தால், 1 அல்லது 2 தான் போட்ட காசை எடுக்கிறது.இந்த சூழலில் வினோத் என்ற இயக்குனர் ஒன்றொக்கொன்று சம்பந்தமே இல்லாத ஜானரில் 3 படமெடுத்து மூன்றும் ஹிட் ஆவதெல்லாம் கிட்டத்தட்ட இமாலய சாதனை ! (முதல் 2 - சதுரங்க வேட்டை, தீரன் அதிகாரம்  ஒன்று). உண்மையை சொல்ல வேண்டுமெனில் அவை இரண்டும் இப்படத்தை விட இன்னும் அசத்தியதன் காரணம் - freshness தான். இப்படத்தில் தமிழுக்கு  தேவையான விதத்தில் மிக சிறு மாறுதல்கள் செய்ததும், முக்கிய செய்தியை எவ்விதத்திலும் பாழாகாமல் சரியே சேர்த்த விதத்திலும் வினோத் வெல்கிறார்

எனக்கு தெரிந்து இதற்கு  முன் முதல் 3 படங்களும் ஹிட் ஆன இயக்குனர்கள் - பாரதி ராஜா மற்றும் ஷங்கர்.வினோத்தை அவர்கள் லெவலில் நிச்சயம் வைக்க முடியாது. ஆனால் தமிழில் நம்பிக்கை தரும் இளம் இயக்குனர் பட்டியலில் அவசியம் சேர்கிறார்

சில சிறு குறைகள் 

பிக் பாஸ் புகழ் அபிராமி இப்படத்திலும் அழுகிறார். மற்ற இரு பெண்களை விட மிக, மிக  முதிர்ந்தவராய்  தெரிகிறார்.

ரங்கராஜ் பாண்டே - எப்படி இத்தனை பவர்புல் பாத்திரம் ஒரு புதியவருக்கு தந்தாரோ இயக்குனர். பாண்டே தன்னால் இயன்ற வரை  செய்திருந்தாலும், அஜீத் எதிரில் இத்தனை புதியவர் எனும்போதே முடிவு யாவருக்கும் தெரிந்து விடும். பிரகாஷ் ராஜ், நாசர் போன்ற வலுவான நபர் நடித்திருக்க வேண்டிய பாத்திரம் இது.

கோர்ட்டில் - வேறு   வழக்குகளே இல்லையா? வந்ததும் முதல் வேலையாய் இந்த வழக்கை கூப்பிடுகிறார்கள்.  இந்த வழக்கு முடிந்ததும்  பல நேரம் நீதிபதி எழுந்து சென்று விடுகிறார் !

பெண்களுக்கான கையேடு என அஜீத் அவ்வப்போது சொல்வது " பெண்களை சமூகம் எப்படி பார்க்கிறது" என்ற எள்ளலுடன் கூடிய விஷயம் என எத்தனை பேருக்கு புரிந்திருக்கும் !. அவற்றை சிலர் சீரியஸாக கூட எடுத்திருக்கலாம் !

நிறைவாக

ஒழுக்கம் என்பது இரு பாலாருக்கும் பொது - அது பெண்களுக்கு மட்டுமே ஆனது  அல்ல -

ஒரு பெண் நோ என்று சொன்னால் - அதற்கு மேல் தொடர்வது யாராயினும் கூடாது

இந்த இரண்டு செய்தியும் மிக தெளிவாய் வந்து சேர்கிறது !

படம்  பெண்கள் அனைவரையும்  கவர்வது - வெளிப்படையாய் தெரிகிறது. பெண்கள் விரும்பும் படம்  வெற்றியடைந்தே தீரும்.

பிங்க் பார்க்காதோர் - மிஸ் பண்ணவே பண்ணாதீர்கள் ! ரொம்ப ரொம்ப ரசிப்பீர்கள் !

பிங்க் பார்த்தோறும் கூட - அஜீத்தின் அதிரடி + டயலாக் இரண்டிற்காகவும் நிச்சயம் காணலாம்  !

பிங்க் -  இந்தி பட விமர்சனம் : இங்கு 

கொலைகாரன் சினிமா விமர்சனம்

கதை 

முதல் காட்சியில் ஒரு கொலை நடக்கிறது - அடுத்த காட்சியில் ஒருவர் சரண்டர் ஆகிறார்..

போலீஸ் அதிகாரி அர்ஜுன் துப்பறியும் போது மீண்டும் மீண்டும் முடிச்சுகள் விழுகின்றன

கடைசி 15 நிமிடத்தில் தான் முழு கதையும் புரிபடுகிறது...

திரைக்கதை 

த்ரில்லர் கதைக்கு - திரைக்கதை மிக முக்கியம்.

2 டூயட் - யோசிக்காமல் தூக்கியிருக்கலாம் (படத்தின் நீளம் குறைவு.. அது இன்னும் குறைந்திருக்கும் )

சிக்கலான கதையை புரிந்து கொள்ள - சாதாரண பார்வையாளன் சற்று சிரமப்பட வேண்டியுள்ளது

கொலை - யார் செய்தார் - எப்படி செய்தார் என ஒரு லாஜிக் - தொடர்பாக சில காட்சிகள் வருகின்றன... பின்  அதற்கு மாற்றாக இன்னொரு லாஜிக்.. காட்சிகள் உடனே மாறும்போது சற்றே குழுமபித்தான் போகிறோம். படத்தின் அடிநாதம் மற்றும் பிளஸ் ஆக இருக்க வேண்டிய இந்த விஷயம் சிறிது குழப்பம் விளைவிப்பது தான் பிரச்சனையே

நடிப்பு 

அர்ஜுன் தான் படம் முழுதும்  ஷார்ப் ஆன நடிப்பால் கவர்கிறார். விஜய் ஆண்டனிக்கு எவ்வித முகபாவமும் காட்டாமல் இறுக்கமாய் இருக்கும் பாத்திரங்கள் .....தானாய் . வருகின்றனவா...அல்லது டிசைனே அப்படியா தெரியவில்லை.

புதுமுக ஹீரோயின் அழகு ! குறிப்பாக அந்த மூக்கு !

இசை, இயக்கம் இன்னபிற 

இசை சற்றே இரைச்சல் . இயக்கம் - குழப்பத்தை குறைத்து சுவாரஸ்யம் தந்திருந்தால் பெரும் வெற்றிப்படமாகியிருக்கும்

த்ரில்லர் விரும்பிகள் - ஒரு வித்தியாச அனுபவத்திற்காய் ஒரு முறை காணலாம் இந்த கொலைகாரனை !

தடம்- வெள்ளை பூக்கள் - K 13 - மூன்று த்ரில்லர் படங்கள் ஒரு பார்வை

க்ரைம் த்ரில்லர் மிகப் பிடித்த ஒரு genre  ஆக மாறி வருகிறது. மலையாள படங்கள் தான் இந்த ஆர்வம் வர காரணம். அவ்வகையில் இவ்வருடம் தமிழில் வெளிவந்த 3 க்ரைம் த்ரில்லர்கள் பற்றிய ஓர் பார்வை..

வெள்ளை பூக்கள் 

நடிகர் விவேக்கை ஹீரோவாக - ஒரு துப்பறியும் நிபுணராக வடிவமைத்துள்ளார் இயக்குனர். பார்க்க வித்யாசமாக உள்ளது. அவரும் முடிந்த வரை ஜஸ்டிபை செய்துள்ளார்.

அமெரிக்காவில் தொடர் கொலைகள்.... இவற்றை செய்வது ஒரே ஆளா, ஒரு கூட்டமா.. தமிழகத்தில் இருந்து ரிட்டையர் ஆகி - அமெரிக்கா சென்ற விவேக் - இதனை கண்டறிகிறார்.

நல்ல விஷயங்கள் முதலில்...

அமெரிக்காவின் அழகை காமிரா அள்ளிக்கொண்டு வந்துள்ளது.

அந்த கில்லரை சத்தியமாக நம்மால் கணிக்க முடியாது. இத்தனைக்கும் நம் கண் முன்னே பலமுறை இருக்கும் ஒரு நபர். திரைக்கதையில் மற்ற ஆட்கள் மீது சந்தேகம் வரும்படி செய்தாலும், இந்த நபரை அழகாக ஒதுக்கி விடுகிறார்கள். கடைசி 10 நிமிடத்தில் எல்லா முடிச்சுகளுக்கும் உள்ள தொடர்பு, கொலைக்கான காரணம் இவற்றை சொல்லும்போது அனைத்துக்கும் உள்ள லிங்க் புரிகிறது.

படத்தின் பெரும் பலவீனம் - மிக மிக மிக மெதுவாக செல்வது. விவேக், சார்லி, போலீஸ் ஆபிசர் என பலரும் பல காட்சிகளில் நடந்து கொண்டே இருக்கிறார்கள். கொஞ்ச நஞ்சமல்ல.. சில பல கிலோ மீட்டர்கள் !

இறுதி காட்சியில் விடை தெரியும் வரை குழப்பமாகவே செல்கிறது.. சற்று தெளிவில்லாமலும் . திரைக்கதையில் கவனம் செலுத்தியிருந்தால் - இன்னும் ஷார்ப் ஆக இருந்திருக்கும்

நேரம் இருப்பின், ஒரு முறை - பொறுமையாய் காணலாம் ..

K -13

த்ரில்லர் படங்களில் ஒரு நல்ல விஷயம் - படம் சுமார் என்றால் கூட - சஸ்பென்ஸ் மட்டுமே இறுதி வரை நம்மை பார்க்க வைத்து விடும். என்ன தான் சொல்றானுங்க பார்க்கலாம் என.. அத்தகைய ஒரு சுமார் ரக த்ரில்லர் தான் K -13

வித்யாசமாக செய்ய நினைத்த முயற்சி தான். குறிப்பாக படம் முடிந்து விட்டது என நினைத்த பின் வரும் கடைசி 2-3 நிமிடங்கள் அனைத்தையும் தலை கீழ் ஆக்குவது சூப்பர். ஆனால் அந்த இறுதி சில நிமிடங்களுக்காக படம் முழுதும் பொறுத்துக்கொள்ள வேண்டியுள்ளது..

தடம் 

இந்த வருடத்தில் மட்டுமல்ல, இதுவரை தமிழில் வந்த க்ரைம் த்ரில்லர்களில் -one of the  best  என நிச்சயம் கூறலாம்.

ரொம்ப வித்யாசமான கதை- அதைவிட வித்யாசமான திரைக்கதை- எல்லாவற்றுக்கும் மகுடம் வைப்பது போல் கிளைமாக்ஸ் - படம் பார்த்து முடித்ததும்.... செய்த அடுத்த வேலை - யார் இயக்குனர் - இவர் இதற்கு முன்  என்ன படம் எடுத்தார் - என தேடி தேடி படித்தது தான்

க்ரைம் த்ரில்லருக்கு ஒரு திரைக்கதை எப்படி இருக்கவேண்டும் என பாடமே எடுக்கிறது இப்படம். போலவே கிளைமாக்ஸ் டுவிஸ்ட். அமர்க்களம்.

அருண்விஜய்க்கு அற்புதமான வாய்ப்பு. மனிதர் நன்றாக பயன்படுத்தியுள்ளார்.

படத்தில் ரொம்பவும் ஆச்சரியப்படுத்திய விஷயம் சோனியா அகர்வால் காரெக்டர். கணவனை இழந்த இவர் - தினம் கிளப்புக்கு சென்று சீட்டாடுகிறார். மகனை அருகில் வைத்தபடியே. இத்தனைக்கும் அவர் பாத்திரம் பணக்காரர் கூட கிடையாது. அவருக்கு ஒரு அடிக்ஷன். அது தேவையாக இருக்கிறது  !

கதை மற்றும் அதன் நெளிவு சுளிவு பற்றி நிறைய சொல்லி நீங்கள் படம் பார்க்கும் போது உங்கள் சுவாரஸ்யத்தை கெடுக்க விரும்ப வில்லை;

இந்த வருடத்தின் சிறந்த படங்களில் ஒன்று.. தவற விடாமல் பாருங்கள் !

மிஸ்டர் லோக்கல் சினிமா விமர்சனம்

திமிர் பிடித்த பணக்கார ஹீரோயினை -  அடக்கி ஒடுக்கும் மிடில் கிளாஸ் ஹீரோவின் கதை..எம்ஜியார், ரஜினி துவங்கி எத்தனையோ ஹீரோக்கள் செய்த ஓர் டெம்ப்லேட்  தான் ..ஒரே வித்யாசம்..இதுவரை வந்த எந்த படங்களிலும் இல்லாத - மரண மொக்கையாக வந்துள்ளது மிஸ்டர் லோக்கல் !

நானும் ஒரு காட்சியாவது சுவாரஸ்யாமாக அல்லது குறைந்த பட்சம் சிரிக்க வைக்கும் படி இருக்காதா - என கடைசி வரை பார்த்தேன்.. ஊஹூம்..  சிவகார்த்திகேயன் போல அரை டஜன் காமெடியன்கள் இருந்தும் சிரிப்பு துளி கூட வரலை...

லாஜிக். . அப்படின்னா?? மியூசிக்....காது கிழிய கொடுக்கும் சவுண்ட் தானே இருக்கு.. இருக்கு !

இத்தகைய படத்தை பார்த்து தியேட்டரில் ஓடும் என பணம் போடும் டிஸ்ட்ரிபியூட்டர்களை என்னவென்று சொல்வது ! ஐயோ பாவம் !

நயன் - சிவா என மார்க்கெட் உள்ள இருவர் இருக்கும்போது குறைந்த பட்ச சுவாரஸ்யம் +காமெடி இருந்தாலே  தப்பித்திருக்கலாம்.ராஜேஷ் சரக்கு தீர்ந்து விட்டதா? ஓடிய படங்கள் எல்லாம் சந்தானத்தால் மட்டும் தானா?

சிவகார்த்திகேயனுக்கு வழக்கமாய் ஜால்றா அடிக்கும் டிவி சானல் ஒன்று - சிவாவின் படங்களில் சிறந்த  அறுவை -சீம ராஜாவா -மிஸ்டர் லோக்கலா என பட்டிமன்றம் வைக்கலாம். நிச்சயம் இப்படம் தான் ஜெயிக்கும்

கடைசியாய் இந்த அளவு ரம்ப படம் என்ன பார்த்தோம் என நினைவில்லை ..கூட ஒரு சிவகார்த்திகேயன் fan ..அதனால் செல்லும்படி ஆனது ..ஹூம்

டிவியில் போட்டால் கூட தயவு செய்து பார்க்காதீர்கள். பொன்னான 3 மணி நேரம்,  மின்சாரம் இரண்டும் save ஆகும் ; தலைவலி யில் இருந்து தப்பலாம் ..

உங்களுக்கு யாரேனும் எதிரிகள் இருந்தால், யாரையும் வசமாய் பழி வாங்க நினைத்தால்   - இப்பட டிக்கெட் வாங்கி தரவும்...சீக்கிரம்.. சீக்கிரம்...படம் தியேட்டரை விட்டு போகும் முன் !

சூப்பர் டீலக்ஸ் சினிமா விமர்சனம்

வெவ்வேறு தளங்களில் பயணிக்கும் 4 கதைகள்... ஓரிரு புள்ளிகளில் அவை சந்திக்கின்றன...அதற்கு மேல் கதையை சொல்வது சரியாய் இருக்காது

சாதாரண மனிதர்கள் வாழ்வில் - ஒரே நாளில் நடக்கும் சற்றே அசாதாரணமான சம்பவங்கள் தான் படம்.

முதல் பாதி பல இடங்களில் சன்னமாய் சிரிக்க வைத்தது. பாத்திரங்கள் அனைவரும் ஒவ்வோர் பிரச்சனை அல்லது சிக்கலில் இருக்கிறார்கள். ஆனாலும் எல்லா சூழலிலும் புன்னகைக்க வைக்கும் படி பல சம்பவங்கள் நடந்த வண்ணமே உள்ளது

"ஆம்பளைன்னா அப்படி தான் இருப்பான். எப்படி ரெண்டாவது பொண்டாட்டி கட்டிட்டு வந்துட்டான் பாத்தியா ?" என விஜய் சேதுபதி பற்றி (புரியாமல்) உளறும் தாத்தா, மிஷ்கின் மற்றும் அவரின் உதவியாளர் பேசும் பிரார்த்தனை வசனங்கள் (நாங்க சாட்சி )...

பல காட்சிகளில் காட்சிக்கு சம்பந்தம் இல்லாமால் - டிவி அல்லது தெருவில் ஒலிக்கும் ஒலி - மிகுந்த முரணாக சிரிப்பை வரவைக்கிறது.. வயசு பசங்க அடி வாங்கும்போது டிவியில் ஜெமினி கணேசன் " அம்மா எனக்கு வேலை கிடைச்சிருச்சுமா" என சீரியஸாக பேசி கொண்டிருக்கிறார்.. பழைய பட்டு புடவைங்க உங்க வீட்டுக்கே வந்து வாங்கிக்கிறோம் என சீரியஸ் காட்சியில் ஒலிக்கும் குரல்.. என முதல் பாதியில் பல இடங்கள் புன்னகைக்க வைக்கின்றன

இதே பாத்திரங்கள் ... பிற்பகுதியில் பிரச்சனைகள் சந்திக்கும் போது எந்த காமெடியும் இன்றி சீரியஸாக படத்தை தருகிறார் இயக்குனர். இது தான் பெரும் ஏமாற்றத்தையம், வறட்சியையும் தருகிறது

முதல் பகுதி போல் பிற்பகுதியில் ஆங்காங்கு காமெடி - ரசிக்கும்படி வைத்திருந்தால் இப்படம் மறுபடி பார்க்க மாட்டோமோ என எண்ண வைத்திருக்கும்

நல்ல விஷயங்களுக்கு மறுபடி வருவோம்..

விஜய் சேதுபதி, சமந்தா, காயத்ரி, அஸ்வந்த் (சிறுவன்), மிஷ்கின் என பல்வேறு நடிகரின் பாத்திரம் மற்றும்  நடிப்பு ரசிக்க வைக்கிறது

குறிப்பாய் விஜய் சேதுபதி மகனாக வரும் ராசு குட்டி அசத்துகிறான். தந்தையிடம் அவன் கேட்கும் பல கேள்விகள் ஷார்ப்

பாட்டு மற்றும் சண்டை இல்லாமல் 2 மணி நேரம் 50 நிமிட படமெடுக்க எவ்வளவு தைரியம் வேண்டும் !!

நெகட்டிவ் 

காமெடியால் முதல் பாதி போனது தெரியா விட்டாலும் இரண்டாவது பகுதியில் சில காட்சிகள் தேவைக்கும் மேல் நீள்வது அலுப்பை ஊட்டுகிறது

பக்ஸ்  எப்படி ஒரே நேரம் போலீஸ் ஸ்டேஷனில் இருக்கிறார்  .. சமந்தாவையும் நாள் முழுதும் பின் தொடர்கிறார்..??

கெட்ட வார்த்தைகள் பாகத் பாசில் உள்ளிட்ட சிலர் சகஜமாக பேசிய வண்ணம் உள்ளனர். குறைத்திருக்கலாம்

கிளைமேக்ஸ் எந்த விதத்திலும் மனதில் பதிய வில்லை. நிச்சயம் பெட்டர் ஆக முடித்திருக்கலாம் 

மொத்தத்தில்

முதல் பாதி அமர்க்களம். இரண்டாம் பாதி ஏமாற்றம் !

பேட்ட சினிமா விமர்சனம்

 ஷங்கரின் சிவாஜிக்கு பிறகு பக்கா ரஜினி ஸ்டைலில் ஒரு படம்.

பழி வாங்கும்  கதை தான். ஆனால் சொன்ன விதம் வித்யாசம்.

வாவ்.. என்ன ஒரு துவக்கம் !

முதல் பாதி அட்டகாச விருந்து.  அனிருத் பாடல்கள் படத்தோடு சேர்ந்து பார்க்கும்போது ரசிக்கவைத்தது

டார்ஜிலிங்கில் எடுக்கப்பட்ட முதல் பாதி கண்ணுக்கு குளிர்ச்சி. மெயின் பிளாட்டிற்கு வராவிட்டாலும் கூட முதல் பாதி மிக மிக ரசிக்க வைக்கிறது.

 சிம்ரன் வீட்டில் கலக்கும் ரஜினி -  பாபி சிம்ஹா அனுப்பும் ஆட்களை அடித்து நொறுக்கி விட்டு - அவர் வீட்டிற்கு நேரே சென்று பேசிவிட்டு - வெளியே வந்து அடிவாங்கியோரை நலம் விசாரிக்கும் பாங்கு.. என முதல் பாதியில் ரசித்து சிரிக்க பல காட்சிகள்.. ரஜினி படத்தை ரசிக்க கதையே தேவையில்லை - நல்ல காட்சிகள் போதும் என சொல்கிறது முதல் பாதி

ஆவரேஜ் செகண்ட் ஹாப் 

இரண்டாம் பாதியை- மட்டுமே முழு படமாய் எடுக்கலாம். அவ்வளவு விஷயம் இரண்டாம் பாதியில் வைத்ததால் நீண்ட படமாக தோன்றுகிறது.

முதல் பாதி மிகுந்த நேரமெடுத்து ஷாட் பை ஷாட்டாக செதுக்கி இருக்கிறார் இயக்குனர். இரண்டாம் பாதியில் வரும் பிளாஷ் பேக் காட்சிகள் குறித்து அவ்விதம் சொல்ல முடியாது.

மேலும் பிளாஷ் பேக் முடிந்தவுடன் கிளைமாக்ஸ் மூட் வந்துவிடுகிறது. பின் படம் நீள்வது சற்றே அலுப்பு தட்டுகிறது

கிளைமேக்சில் வைத்த டுவிஸ்ட் இல்லாவிடில் இது கார்த்திக் சுப்புராஜ் படம் என்பதே மறந்திருக்கும். இயக்குனர் - எழுத்தாளர் சுஜாதா ரசிகர் போலும். முடிவை நம் ஊகத்திற்கு விடுகிறார். அடுத்த பார்ட் கூட எடுக்க வசதியாக ஒரு கேள்விக்கு பதில் சொல்லாமல் படத்தை முடிக்கிறார்.

பிற பாத்திரங்கள் 

சிம்ரன் கொஞ்சமே வந்தாலும் கவர்ந்து விடுகிறார்.

த்ரிஷா தான் மிக பாவம்.. ரஜினியுடன் நடித்தார் என்பதை தவிர மற்ற படி சொல்லி கொள்ள ஒன்றுமே இல்லாத ஒரு பாத்திரம். சசிகுமாரும் - சோ - சோ தான்.

வில்லனை இன்னும் கெத்தாய் காட்டியிருக்கலாம். ரஜினி கூட அவரை சுள்ளான் என்று தான் பல முறை அழைக்கிறார். தனுஷ் போன்ற உடல்வாகு கொண்ட நவாஸுதீன்.. நரித்தனத்தில் மட்டுமே வெல்கிறார்.

விஜய் சேதுபதி பாத்திரத்தை பரிதாபப்படும் படி செய்து விட்டனர்.

உண்மையில் ரஜினியை ப்ரமாண்டப்படுத்த மட்டுமே பிற பாத்திரங்கள்.. மற்றபடி அவர்களுக்கு பெரிதாக individuality ஏதும் இல்லை !

அவ்வப்போது பழைய பாடலை பாடும் ரஜினியின் ரேடியோவே ஒரு பாத்திரம் போல தான் வருகிறது. இந்த ரேடியோ அளவு கூட மற்ற எந்த பாத்திரமும் ரசிக்க வைக்கவில்லை என்பதே உண்மை !

இயக்கம் 

ரஜினியை மட்டுமே மையப்படுத்தினாலும் இது ஒரு டைரக்டர் படம் தான் !

எங்கெங்கு கைதட்டல் கிடைக்கும் ..எதனை மக்கள் ரசிப்பார்கள் என யோசித்து செய்த விதத்தில் வெல்கிறார் கார்த்திக் சுப்புராஜ்.

முதல் பாதி முழுதும் லேசான சிகப்பு டோன்  ரசிக்க வைக்கிறது. ஒளிப்பதிவு - லொகேஷன் அனைத்தும் அசத்துகிறது முதல் பகுதியில் !

சரியான பன்ச் டயலாக் அனைத்தும் டிரைலரில் வைத்து விட்டார். அந்த டயலாக் ஏற்கனவே பரிச்சயம் ஆனதால் அவை வரும்போதெல்லாம் ரசிகர்கள் ஆர்பரிக்கின்றனர். இவ்விதத்தில் காலா போல ஏமாற்றவில்லை. பன்ச் எல்லாம் சரியான காட்சியில் தான் வைத்துள்ளார்

பேட்ட @ திண்டுக்கல் உமா தியேட்டர்

முதல் பாதி மாஸ் ....இரண்டாம் பாதி மரணம் என முகநூலில் எழுதினார் நண்பர் ஒருவர். இதில் கொஞ்சம் உண்மை உண்டு. 

இருப்பினும் பேட்ட - சினிமா ரசிகர்களுக்கு வேட்ட  தான் !

*****

அண்மை பதிவுகள்

2018 - சிறந்த 10 தமிழ் படங்கள்

கனா சினிமா விமர்சனம் 

கனா சினிமா விமர்சனம்

சென்ற வருடத்தின் டாப் 10 படங்களில் ஒன்று வருட இறுதியில் வந்துள்ளது - கனா !

இந்தியில் வெளியான சக் தே இந்தியா பாணி கதை தான்... ஒன்றுமில்லாத ஒரு டீமை ஒரு கோச் (அங்கு ஷாருக்- இங்கு சிவகார்த்திகேயன்) ஜெயிக்க வைக்கிறார்.

ஆனால் ஒற்றுமை அத்துடன் நின்று விடுகிறது. அக்மார்க் தமிழ் விஷயங்களோடு காமெடி- செண்டிமெண்ட் - சரியான காஸ்டிங் - இனிய பாடல்கள் என மிக ரசிக்கும் படி ஒரு படம் தந்துள்ளது கனா டீம்

கதை 

விவசாயி முருகேசன் (சத்யராஜ்) மகள் கௌசல்யா (ஐஸ்வர்யா ராஜேஷ்)..  அப்பாவின் கிரிக்கெட் ஆசையை நிறைவேற்ற தானும் ஒரு கிரிக்கெட் வீரர் ஆக எண்ணுகிறார். ஒரு பெண் கூட கிரிக்கெட் ஆடாத கிராமத்தில் ஆண்களுடன் ஆடி - பல்வேறு பாலிடிக்ஸ் கடந்து இந்திய அணி வரை நுழைவதும்  உலக கோப்பை விளையாடுவதும் ஒரு பகுதி கதை.

மற்றொரு புறம் விவசாயி முருகேசன் - விவசாயத்தில் படும் கஷ்டத்தை - தனது நிலத்தை / வீட்டை தக்க வைத்து கொள்ள போராடும் போராட்டத்தை மிக அருமையாக கொண்டு செல்கிறார் இயக்குனர்

திரைக்கதை மற்றும் இயக்கம் 

இப்படம் நம் மனதில் பதிய, ரசிக்க மிக முக்கிய காரணம் கிரிக்கெட் உடன் விவசாயத்தையும் சேர்த்து திரைக்கதை அமைத்த புத்தி சாலித்தனம் தான்.

கிரிக்கெட் - விவசாயம் இரண்டையும் தொடர்ந்து மாற்றி மாற்றி காட்சி படுத்துவது அழகாகவும் அலுக்காமலும்  படத்தை கொண்டுசெல்கிறது.

ரத்தம், சதை, நரம்பு இவை அனைத்திலும் கிரிக்கெட் வெறி ஊறிய ஒரு கிரிக்கெட் வெறியானாக இருந்தால்  மட்டும் தான் இப்படத்தின் சில காட்சிகளை காட்சிப்படுத்தியிருக்க முடியும்.

பிளாஷ்பேக்கில் நகர்கிறது கதை. கௌசல்யா லோக்கலில் பங்கு பெறும்  முதல் மேட்ச்  - அதில் ஒரு முக்கியமான கட்டத்தில் மேட்சை நிறுத்திவிட்டு நிகழ் காலத்திற்கு வருகிறார் பாருங்கள். அப்போது போலீஸ் ராமதாஸ் பேசும் வசனத்திற்கு தியேட்டர் குலுங்குகிறது. டிவியில் கிரிக்கெட் பார்க்கும்போது  மிக சுவாரஸ்ய கட்டத்தில் கரண்ட் போனால் எப்படி இருக்கும் - அதே மனநிலை தியேட்டரில் அப்போது....அந்த காட்சியெல்லாம் சொல்லி அடித்த சிக்ஸர் இயக்குனர்க்கு !

உலக கோப்பை போட்டியில் மேட்ச் டை ஆகி மீண்டும் - ஒரு சூப்பர் ஓவர் ஆடுவது போல் வைத்ததெல்லாம். - செம தைரியம்... எத்தனை மக்களுக்கு சூப்பர் ஓவர் கான்செப்ட் புரியும் என நினைக்காமல் - தில்லாக வைத்துள்ளார்.

கௌசல்யா உலக கோப்பை போட்டிக்கு தேர்வானாலும் - அணிக்குள் வராமலே இருக்க, செமி பைனலில்  அவளை ஆட வைக்கும்போது சிவா சொல்கிறார்.. அவளை இவ்வளவு நாள் ஒதுக்கி வைக்கலை..ஒளிச்சு வச்சிருந்தேன் ! அட்டகாசம் ..Goosebump moments !

ஆங்காங்கு வசனங்களும் தெறிக்க விடுகின்றன. "ஆசைப்பட்டா மட்டும் பத்தாது.. அடம் பிடிக்க தெரியணும்.." இது வசனம் மட்டுமல்ல.....படம் முழுதும் அடிப்படையாய் தொடர்ந்து வந்து கொண்டே இருக்கும் ஒரு முக்கிய செய்தி.

ஸ்போர்ட்ஸ் படத்திற்கான template அப்படியே இருப்பதால், சக் தே இந்தியா, டங்கல் போன்ற படம் பார்த்த மக்களுக்கு திரைக்கதையின் பல இடங்களை ஊகித்து விட முடியும்.. இது ஒன்று தான் படத்தின் மைனஸ்

நடிப்பு

படத்தின் வரவேற்புக்கு முக்கிய காரணம் சரியான காஸ்டிங்.

ஐஸ்வர்யா ராஜேஷ் - மிக சரியான தேர்வு; அவர் கௌசல்யாவாகவே தான் தெரிகிறார். அனைத்து உணர்ச்சிகளும் காட்டும் இவரது முகம் - இறுதி மேட்சில் மட்டும் இறுகி போகிறது (Focus !) கிளைமாக்சில் இவர் பேசும் வசனம் - மிக முக்கிய மெசேஜ் ! மக்கள் சரியாக உள் வாங்குகிறார்கள்...இப்படம் அவருக்கு ஒரு கோல்டன் ஆப்பர்ச்சுனிட்டி.. சரியாக பயன்படுத்தியுள்ளார் !

சத்யராஜ் - மிக நிறைவான நடிப்பு. போலவே அவரது மனைவி ரமா - அவருக்கு ஸ்கொப் சற்று குறைவு எனினும் தனது பங்கை மிக சரியாக செய்துள்ளார்

சிவா - முதன் முறை சீரியஸான பாத்திரம்..படத்தின் வியாபாரத்திற்கு இவர் முகம் நிச்சயம் உதவி விடுகிறது. இவர் சொல்லும் டெக்கினிக்குகள் குறைவுதான் எனினும் ஒவ்வொன்றும் சுவாரஸ்யம் !

படத்தின் இன்னொரு ஆச்சரியம் - மற்ற பாத்திரங்கள். ஒவ்வொன்றுக்கும் ஒரு தனித்துவம் இருக்கிற மாதிரி அமைத்த இயக்குனர்க்கு ஸ்பெஷல் ஷொட்டு.

ஐஸ்வர்யாவை ஒரு தலையாய் காதலிக்கும் பையனை ஒரு கட்டத்தில் அண்ணா என்று ஐஸ்வர்யா அழைப்பது, இறுதி மேட்சில்  பார்வையாளராக உட்கார்ந்து கொண்டு " கௌஷி வில் யூ மேரி மீ" (கோலி வில் யூ  மேரி மீ" - என பெண்கள் காட்டும் பேனர் போல) காட்டுவது என காமெடி பண்ணுகிறார். இவருடன் சச்சின் மற்றும் டெண்டுல்கர் என இருவர் கிச்சு கிச்சு மூட்டியபடி இருக்கிறார்கள் 

கிரிக்கெட் அணியில் கூட சில பெண்களை தனித்து தெரிய வைத்துள்ளார் இயக்குனர் ...



கௌஷி உடன் கிரிக்கெட் ஆடும் இளைஞர்கள் பாத்திரமும் மிக மிக அழகு !

இசை இன்ன பிற 

பாடல்கள் - படத்தோடு சேர்த்து ரசிக்கும் படி உள்ளது. குறிப்பாக வாயாடி பெத்த புள்ள;

ஒரு தலையாய் காதலித்து ஆடும் பாட்டை மட்டும்  கத்திரி போட்டிருக்கலாம் (நீளம் கருதி)

இறுதி மேட்ச்கள் - கிராண்டாக எடுத்துள்ளது அட்டகாசம்

பாடகர் - பாடலாசிரியர் என தமிழ் சினிமாவில்அறிமுகமான இப்பட இயக்குனருக்கு முதன் முறை படமியக்கும் வாய்ப்பு வந்துள்ளார் அவரது கல்லூரி நண்பரான சிவா..படம் முடிந்து இறுதி டைட்டில் கார்ட் ஓடும்போது மக்களிடம் எழும் தன்னிச்சையான கை தட்டல் ஒலி இருவரின் வெற்றியை காட்டுகிறது !

கனா -அவசியம் காணுங்கள் !

செக்கச் சிவந்த வானம்- விமர்சனம்

முதலில் இரு விஷயங்களை கூறி விடுகிறேன். நான் மணிரத்னம் படங்களை ரசிப்பவன்; மவுன ராகம், நாயகன், அலை பாயுதே போன்றவற்றை பல முறை பார்த்தவன்.இருப்பினும் பலரும் கொண்டாடும் செக்க சிவந்த வானம் - கவரவில்லை.

எனக்கு பிடித்ததா இல்லையா என்பது முக்கியம் இல்லை; படம் சர்வ நிச்சயமாய் ஹிட். திங்கள் மாலை காட்சிகள் - 3 நாள் முன்பே நிரம்பி விட்டது. (நாங்கள் பார்த்தது வேளச்சேரி PVR-ல் மாலை காட்சி ) போட்ட காசுக்கு மேல் 2 மடங்காவது வசூல் பார்ப்பர்

எச்சரிக்கை ... Spoiler alert ...

பல சஸ்பென்ஸ்கள் தெரிய வரும் வாய்ப்புண்டு; கதை தெரிய வேண்டாம் என நினைப்போர் அடுத்த பாராவை மட்டும் ஸ்கிப் செய்துவிடுங்கள்..

கதை 

ப்ரகாஷ் ராஜை அரவிந்த்சாமி போட்டு தள்றார்
அரவிந்த்சாமியை அருண் விஜய்  போட்டு தள்றார்
அருண் விஜயை சிம்பு போட்டு தள்றார்
சிம்புவை விஜய் சேதுபதி போட்டு தள்றார்

அப்ப.. விஜய் சேதுபதியை?

அவரை யாரும் போட்டு தள்ள முடியாது .. ஏன்னா அவர் ஒரு போலீஸ் !!

இப்படி ஒரே குடும்பத்தில் ஒருத்தரை ஒருத்தர் போட்டு தள்ளி ஜாலியா வாழுறாங்க ....

இதாங்க கதை !!

என்ன தலை சுத்துதா?

மேலே சொன்னதை தவிர்த்து ....

ஜோதிகாவை கொன்னு போட்டது யாரு, சிம்பு காதலி கதையை முடிச்சது யாரு, மன்சூரலி கான் , மற்றும் மாமா பாத்திரத்தை கொன்றவர்கள் யார் யார், கடைசியில் எத்தனை பேர் உயிர் தப்பிச்சாங்க னு - கரெக்ட்டா சொல்றவங்களுக்கு மெட்ராஸ் டாக்கீஸில் பரிசே தரலாம் !

திரைக்கதை 

கதை சஸ்பென்சோடு தான் நகர்கிறது...அடுத்து என்ன நடக்கும் என்ற ஊகத்துடனும் - பல முக்கிய சஸ்பென்ஸ்கள்க்கு  கிளைமாக்சில் விடை சொல்லப்படுகிறது.

பாடல்கள் எதுவும் முழுமையின்றி ஆங்காங்கு துண்டு துண்டாக ஒலிப்பதால் வேண்டிய இம்பாக்ட் கிடைக்கவில்லை

ரஹ்மானின் பின்னணி இசை கச்சிதம். இது இல்லாவிடில் படத்தை எப்படி உட்கார்ந்து பார்ப்போம் என  நினைத்து கூட பார்க்க முடியவில்லை

முக்கிய பாத்திரங்கள் எல்லோரும் கெட்டவர்கள் (பெண்களை தவிர்த்து) இந்த விஷயம் புதிது; படத்தின் பாதி வரை சஸ்பென்ஸ் மற்றும் பில்ட் அப் ஓகே ; பாதிக்கு மேல் தொடர் மரணங்கள் அலுப்பூட்டுகிறது

துப்பாக்கி தூக்கியவன் துப்பாக்கியால் தான் சாவான் என்ற பழைய செய்தியை சொல்ல ஒரு மணிரத்னம் படமா?

படம் தப்பிக்க காரணம் - முக்கிய பாத்திரங்களுக்கு தேர்வு செய்யப்பட்ட அர்விந்த் சாமி, விஜய் சேதுபதி, சிம்பு என புகழ் பெற்ற நடிகர்களும், அவர்களின் பாணியில் வலம் வருவதும் தான்.. மேலும் ரஹ்மான் இசை !

அதீத கொலைக்கு பெண்கள் உச் கொட்டுவது தியேட்டரில் தெளிவாய் கேட்கிறது

மொத்தத்தில் 

படத்தின் வெற்றியில் மணிரத்னம் மகிழலாம், மகிழட்டும். ஆனால் அவரிடம் இருந்து நாம் எதிர்பார்ப்பது நிச்சயம் நல்ல படங்களை..... இப்படி எதோ ஒரு விதத்தில் ஹிட் அடிக்கட்டும் என்ற ரீதியிலான மசாலா அல்ல !

காலா - நடிகையர் திலகம் விமர்சனங்கள்

ப்ளாக் வந்தபின்  இவ்வளவு பெரிய இடைவெளி வந்தது இப்போது தான். காரணங்கள் பல. சுய தொழில் தொடங்கிய பின் நேரமின்மை ஒரு காரணம். இன்னும் சிலவும் உண்டு....

தொலைபேசியிலும் மெயிலிலும் தொடர்பு கொண்டு எழுத சொன்ன ... நூற்று கணக்கான.. சரி விடுங்க... இரண்டு நண்பர்களுக்காக ... (ஒருவர் வேங்கடப்பன். மற்றொருவர் புதிதாக எழுத துவங்கியுள்ள செந்தில் குமார் என்கிற பதிவர் )

வாரம் ஒரு பதிவாவது எழுத ஆசை தான். பார்க்கலாம்

காலா 

காலா - ஒரு தோல்விப்படம் என்பது இந்நேரம் தெரிந்திருக்கும்.

காலா எனக்கு பிடிக்கவே செய்தது. அதன் முக்கிய காரணம் - பீஜேபி ஆதரவாளரான ரஜினியை வைத்தே - பீஜேபி செய்யும் பல செயல்களை படம் முழுதும் கிண்டல் செய்தது தான். வில்லன் நானா படேகர் செய்யும் அத்தனை விஷயமும்  அவர் எந்த கட்சியை சார்ந்தவர் என சொல்லிவிடுகிறது. மிச்சம் மீதி சந்தேகம் இருந்தால்  ரஜினி வாயாலேயே " சுத்தம் சுத்தம் னு சொல்லி ஏமாத்துறீங்க " என ஸ்வச் பாரத்தை கிண்டலடிக்கிறார்கள்.

ரஜினி படங்களை பெரும்பாலும் தியேட்டரில் பார்க்கும் நான் - ரஜினி தூத்துக்குடி சென்று வந்தபின்  பேசிய பேச்சினால் நிச்சயம் தியேட்டர் சென்று பார்க்க கூடாது என முடிவு செய்தேன். இதே வித உணர்வு நிறைய நண்பர்களிடம் இருந்தது

தூத்துக்குடி சென்று வந்து ரஜினி அவ்வாறு பேசியது மிக நல்லது ! அப்போது தான் அவர் யார் என மக்களுக்கு புரிந்தது. இல்லாவிடில் காலாவில் அவர் பேசியதை வைத்து ஏழைகளின் காவலர் என எம்ஜியார் போல ஒரு கூட்டம் பில்ட் அப் தந்திருக்கும்.

எல்லாத்துக்கும் போராட்டம்னா தமிழ் நாடு சுடுகாடு ஆகிடும் என திருவாய் அருளினார் ரஜினி. இந்த படமோ போராட்டத்தை மட்டுமே அடிப்படையாய் கொண்டது. "நம்ம உடம்பு தான் நமக்கு ஆயதம். அதை வச்சு போராடுவோம் " என மக்களை தூண்டும் சினிமா முகமும், ரஜினியின் நிஜ முகமும் படம் பார்க்கும் பல நேரங்களில் வந்து போனதுவும் படம் பிடிக்க காரணங்கள்.

ஹீரோ பில்ட் அப் சுத்தமாய் இல்லாமல் போனது (க்யா ரே செட்டிங்கா என அமர்க்களமாய் ட்ரைலரில் காட்டி விட்டு - அந்த காட்சியில் யாரோ சிலர் வந்து ரஜினியை காப்பாற்றுகிறார்கள் ) - முடிவில் ரஜினி இறந்தாரா இல்லையா என சாதாரண மக்களால் புரிந்து கொள்ள முடியாதது, மிக முக்கியமாக தூத்துக்குடியில் ரஜினியின் பேச்சு இவற்றால் படம் தோல்வியை தழுவினாலும் - படம் பார்க்கும் போது இந்திய, தமிழக, தூத்துக்குடி அரசியல் கண் முன்னே வந்து புன்னகையை தருவிக்கிறது. இந்த படம் பார்க்க அந்த காரணம் மட்டுமே போதும் !

இரவுக்கு ஆயிரம் கண்கள் 

கிரைம் த்ரில்லர் - ரொம்ப நீட்டி முழக்கி, சுற்று சுற்றென்று சுற்றுகிறார்கள். சஸ்பென்ஸ் தெரியும் நேரம் மட்டுமே ஆச்சரியம்.

ஹீரோயின் அழகு. ....ஆனால் எப்போதாவது தான் வருகிறார்.



பார்த்து 2 வாரம் ஆனபின் கதை என்ன என்றால் - மூளையை கசக்க வேண்டியுள்ளது.

த்ரில்லர் வகையறா விரும்புவோர் - 2 மணி நேரம் பொழுது போக வேண்டுமெனில் பார்க்கலாம்.

நடிகையர் திலகம் 

பள்ளியில் படிக்கும் போது பாசமலர் பார்த்து விட்டு கண்ணீர் விட்டிருக்கிறேன். துடுக்குத்தனமான பாத்திரங்களில் நடிக்கும் சாவித்திரி வாழ்வில் இத்தனை பிரச்னைகள்  இருந்திருப்பது இப்போது தான் தெரிகிறது



குறிப்பாக ஜெமினியின் பாத்திரம்.. உண்மையில் படத்தில் ரொம்ப அடக்கி வாசித்திருக்கிறார்கள். அவர்கள் குடும்ப நண்பரான ஆடிட்டர் ஒருவர் முகநூலில் ஜெமினி சாவித்ரியை எப்படி எல்லாம் கொடுமைப்படுத்தினார், சொத்துகளை அபகரித்தார் என எழுதியதை படிக்க மேலும் அதிர்ச்சி

சாவித்ரி கதையை நேரடியாய் சொல்லியிருக்கலாம். எனோ ஒரு ரிப்போர்ட்டர் பார்வையில் படம் செல்கிறது

கீர்த்தி மற்றும் துல்கர் இருவரும் அற்புத நடிப்பு. கீர்த்தி பல கோணங்களில் சாவித்ரியை நினைவு கூர்கிறார்.

திரை பிரபலங்கள் பலருக்கும் இருக்கும் பிரச்சனை தான். ஒரு காலம் வரை வாய்ப்புகள் நிறைய இருக்கும். பின்னர் வாய்ப்பு குறைந்ததும் தானாக சொந்த படம் எடுப்பார்கள். அது தோல்வியானால் சொத்தின் பெரும்பகுதி இழந்து விடுவார்கள். சாவித்ரிக்கும் அதுவே நிகழுகிறது.

கூடுதலாக இன்கம் டாக்ஸ் ரைட், விடாத குடிப்பழக்கம் - என தொடர் சோதனைகள்

ஒரு பிரபலத்தின் சிறிது சிறிதான முன்னேற்றம் மற்றும் அவர் வீழ்ச்சீ இரண்டும் சொல்கிறது படம்

சாவித்ரி என்றால் யார் என்றே தெரியாத என் மகள் மற்றும் அவள் தோழிகள் பலருக்கும் இப்படம் மிக பிடித்திருக்கிறது !

நல்ல சினிமா விரும்புவோர் அவசியம் பார்க்க வேண்டிய படம் !

வேலைக்காரன் - சினிமா விமர்சனம்

நீண்ட நாட்களாக எந்த சினிமாவும் பார்க்கவில்லை; வேலைப்பளு மற்றும் மகளின் தேர்வுகள் .. காரணம். பார்க்க வேண்டிய படங்கள் பட்டியலில் தீரன் அதிகாரம் ஒன்று மற்றும் அருவி.

மகள் தேர்வு முடிந்த அன்றே சென்ற படம் வேலைக்காரன்

"உலகத்தின் மிக சிறந்த சொல் செயல்" - இந்த ஒரு வரி போதும் - படத்தின் நோக்கத்தை பற்றி சொல்ல.

கதை 

கார்ப்பரேட் நிறுவனங்கள் விளம்பரம் மற்றும் தங்கள் மார்க்கெட்டிங் உத்திகளால் மக்களை சுரண்டுகிறார்கள் என உணரும் நாயகன் - அதனை எதிர்த்து வித்தியாச முறையில் நடத்தும் போராட்டமே வேலைக்காரன்

பிளஸ் 

வித்தியாச கதைக்களன்- மற்றும் எடுத்து கொண்ட விஷயத்தை விட்டு விலகாமல் செல்லும் திரைக்கதை

சிவா - சேரி பையன் - ஆபிஸ் ஊழியர் போன்ற இரு முகங்களும் apt ! வழக்கமாய் காமெடியிலேயே படத்தை ஓட வைத்து விடும் சிவா முதன்முறை சீரியஸ் பாத்திரம் எடுத்து அதற்கு தன்னால் முடிந்த நியாயமும் செய்துள்ளார்

கலை இயக்கம் - அட்டகாசம். அந்த சேரி முழுவதுமே செட்டிங் தான் .. கூவம் ஓடும் அந்த ஏரியாவை அமர்க்களமாக காட்டியுள்ளனர்.

படத்தில் சின்ன சின்ன திருப்பங்கள்,  சிறு சஸ்பென்ஸ்கள் வந்த வண்ணம் உள்ளன. அவை தெரியாமல் பார்த்தால் மட்டுமே  படத்தை ஓரளவு ரசிக்க முடியும் !

ஓரிரு பாடல்கள் (மட்டும்) நன்று. போலவே ஒரு டூயட் (அனாவசியம் !) தவிர பாடல்கள் மிக குறைவே. பின்னணி இசை பல இடங்களில் அசத்தல். எல்லா இடத்திலும் இசையை தட்டணும் என்றில்லாமல் சில இடங்களை சைலன்ட் ஆக விட்டிருக்கலாம். சிவா- நயன்தாரா பேசும்போது கூட பின்னால் எதோ ஒரு டமுக்கு டப்பா இசை ஓடுகிறது !

படத்தில் சண்டைகள் வைக்க எத்தனையோ காரணிகள் இருந்தாலும் - ஒரு மிக சின்ன சண்டை (நிஜமாகவே அவசியமானது) தவிர படத்தில் சண்டைகளே  இல்லை !  சண்டைகள் இல்லாத ஆக்சன் படம் என்பதே ஆச்சரியமாக தான் உள்ளது

பகத் பாசில் நிறைவான நடிப்பு. சூப்பர் மார்க்கெட்டில் - சிவாவிடம் பகத் பாசில் பேசும் காட்சி அட்டகாசம் ! ஏனோ அவர் பாத்திரம் பார்க்கும் போது தனி ஒருவன் அரவிந்த் சுவாமி நினைவுக்கு வருவதை தவிர்க்க முடியவில்லை.  ஆனால் அரவிந்த் சுவாமி ஏற்படுத்திய தாக்கம் இப்பாத்திரம்  ஏற்படுத்த வில்லை.

சீரியஸ் படத்தின் இடையே ரோபோ ஷங்கர் காமெடி அவ்வப்போது ரிலாக்ஸ் ஆக்குகிறது

தனி ஒருவன் ராஜாவின் அடுத்த படைப்பு இது. நல்ல விஷயம் சொல்ல நினைத்ததற்கு ஷொட்டு. ஒரு சில காட்சிகள் வெயிட்டாக வைத்திருக்கிறார். கிளைமாக்சில் பாடல் வைத்து படத்தை முடித்திருப்பது வித்யாசம் + நைஸ்.

படம் முடியும் போது " எங்களின் இந்த படம் கூட ஒரு மார்க்கெட்டிங் தான்..நல்லது நடக்கும் என்ற நம்பிக்கையில் செய்யும் மார்க்கெட்டிங்" என முடிப்பது புன்னகையை வரவைக்கிறது

மைனஸ் 

கார்ப்பரேட் கம்பெனிகள் அனைவருமே திருடர்கள் - அனைவரும் அதிக கெமிக்கல் கலந்து மக்கள் உடலை நாசம்  செய்கிறார்கள் என பொதுமை படுத்திய அடிப்படை விஷயம் பெரும் தவறு. ஓரிரு நிறுவனங்கள் அப்படி இருக்கலாம். அனைவரும் அல்ல

லாஜிக் மீறல்கள் 2 காட்சிக்கு ஒரு முறை கிண்டலடித்து சிரிக்க வைக்கின்றன. ஒரு சின்ன மிரட்டலுக்கு பயந்து இந்தியாவின் 5 பெரிய கம்பெனி ஓனரும் ஒட்டு மொத்தமாய் கம்பெனியை விற்க ஒத்து கொள்வது ; போர்ட் ஆப் டைரக்டர்ஸ் கோட் சூட்டுடன் கூட்டமாய் கம்பெனி வாசலில் நின்று பகத்திடம் " நீங்கள் தான் அடுத்த CEO" என சொல்வது  இப்படி பல காட்சிகள் வயிறு குலுங்க சிரிக்க வைக்கின்றன .. லாஜிக் ஓட்டையால் !

நயன் - அந்த மெச்சூர்ட் பாத்திரத்துக்கு தனியே பொருந்தினாலும் சிவாவுடன் சேர்த்து பார்த்தால் அக்கா மாதிரி உள்ளார். பரோட்டாவிற்கு தக்காளி சட்னி காம்பினேஷன் மாதிரி ரொம்ப சுமாராக உள்ளது இவர்கள் கெமிஸ்ட்ரி

 இவர்களில் யார் பரோட்டா ? யார் தக்காளி சட்னி ?

வசனம் ! இந்த படத்திற்கு வசனம் எழுதிய பேப்பரை விற்றால் ஒரு சின்ன பட்ஜெட் படம் எடுத்து விடலாம். நம் காது வலிக்கும் வரை பேசிக்கொண்டே இருக்கிறார்கள். சினிமா ஒரு விசுவல் மீடியம் - இவ்வளவு வசனம் தேவையா ? இடைவேளைக்கு முன் சிவா 20 நிமிடம் வீர பாண்டிய கட்டபொம்மன் போல் பேசுகிறார். வசனத்தாலேயே படம் பார்க்கும் பலர் தலை வலிக்குது - கொஞ்சமா பேசுங்கடா என்று கத்துகிறார்கள். தனி ஒருவன் போல் புத்திசாலித்தனமான காட்சிகளால் - சில விஷயங்களை ஜஸ்ட் லைக் தட் கடந்து போயிருக்கலாம். ஆனால் இங்கு கடைக்கோடி ரசிகனுக்கு தெளிவாக புரிய வேண்டுமென விம் வைத்து விளக்குகிறார்கள்

படம் பார்க்கும் போது ரசித்து பார்த்தாலும் பின்னர் யோசித்தால் இன்னும் பல லாஜிக் ஓட்டைகள் நினைவிற்கு வந்த வண்ணமே உள்ளது

பைனல் அனாலிசிஸ் 

படம் நிச்சயம் வெற்றி தான். போட்ட காசை எடுத்து விடுவார்கள் என்றே தோன்றுகிறது .. ஒரு வாரம் ஆனபின்னும் வியாழன் இரவு PVR -ல் 2 தியேட்டரும் ஹவுஸ் புல் !

குறைகள் சில இருந்தாலும் .. நிச்சயம் இது ஒரு காண வேண்டிய படைப்பு தான். தேவையில்லாத பொருட்களை வாங்கும் முன் சற்று யோசிக்க வைக்கும் பணியை இப்படம் ஓரளவேனும் செய்யும் என்றே நம்புகிறேன்

மேயாத மானும் எஸ் மது சாங்கும் - விமர்சனம்

கல்யாணம் முதல் காதல் வரை என்ற மிக சுமாரான சீரியலை ப்ரியா பவானி சங்கர் என்கிற ஒரே நபருக்காக கண்டு களித்தவன் நான். ஆனால் மேயாத மான் என்னை கவர ப்ரியா மட்டுமே காரணம் அல்ல !



ப்ரியாவை ரசிப்பது தற்காலிகம். நதியா துவங்கி அனுஷ்கா வரை எத்தனையோ தலைவிகள் மாறி விட்டார்கள். ஆனால் என்றும் மாறாமல் ரசிக்கும் விஷயம் நகைச்சுவை ! இப்படம் அந்த விதத்தில் தான் கவர்கிறது .

கதை 

இதயம் முரளி என்ற பெயரில் ஆர்கெஸ்டரா நடத்தும் வைபவ் ப்ரியாவை - கல்லூரியில் 3 வருடம் காதலித்து இன்றும் சொல்லாமலே இருக்கிறார் (இதுவும் நம்ம வழக்கம் தான்.. கல்லூரி காலத்தில் ).

அவருக்கு திருமணம் என்று தெரிந்து வைபவ் தற்கொலைக்கு செல்ல - அவர் நண்பர்கள் ப்ரியாவை விட்டு ஒரு முறை தொலை பேசியில் பேச வைக்கிறார்கள்.

பின் வைபவை கவனிக்க துவங்கும் ப்ரியா அவரை காதலிக்க ஆரம்பிக்க , காதல் - மோதல் என சென்று கடைசியில் சுபமாய் முடிகிறது படம்

ப்ளஸ் 

அட்ட கத்தி பார்ட் டூ போலவே செல்கிறது படம். அதே விதமான ஹியூமர். சில விஷயங்களை உரக்க சொல்லி சிரிக்க வைக்கிறார்கள். சில விஷயம் உற்று கவனித்தால் புன்னகைக்க முடியும்

ஹீரோ - ஹீரோயின் தவிர்த்து இரண்டாம் ஹீரோ மற்றும் ஹீரோயினுக்கு இதனை அற்புதமான பாத்திரம் மற்றும் ஸ்கொப் தந்த படம் தமிழில் கடைசியாய் எப்போது வந்தது என நினைவில்லை; வைபவ் தங்கை மற்றும் நண்பனுக்கிடையே வரும் காதல் - விவேக் பிரசன்னா -இந்துஜா இருவர் நடிப்பும் கச்சிதம்

வைபவ் - குடிகார காதல் தோல்வி பாத்திரத்துக்கு சரியாக பொருந்துகிறார். ப்ரியா முதல் படத்திற்கு நிச்சயம் நல்ல பெர்பாமன்ஸ். குறிப்பாக முகபாவங்கள் காட்சிக்கு தகுந்த படி மாறுவது ..கியூட். பாத்திரம் உணர்ந்து நடிக்கும் நல்ல தமிழ் நடிகைகள் லிஸ்ட்டில் இவரும் இணையட்டும் !



கதை எழுதி இயக்கிய இயக்குனர் ரத்னகுமார் .. ரொம்ப தெளிவாக ஜாலியான படம் தர முயன்றுள்ளார். திரைக்கதையில் வரும்  சின்ன சின்ன காட்சிகளையும் பின்னால் வசனத்தில் இணைத்து நேர்த்தியான திரைக்கதை மற்றும் பாத்திரங்களை படைத்துள்ளார்.

மைனஸ் 

படத்தின் நீளம் நிச்சயம் அதிகம். காமெடி இல்லாத மற்ற காட்சிகளில் கத்திரி வைத்திருக்கலாம்

மிக ஏழை பையன் -பணக்கார பெண்ணை கல்யாணம் செய்து கொண்டு எப்படி மகிழ்ச்சியாய் வைத்திருப்பான். அவளுக்கு மாப்பிள்ளையை விடுத்து வைபவ் மேல் காதல் வர என்ன காரணம் - இவை வலுவாய் இல்லை

எஸ். மது பாட்டை தவிர மற்ற பாடல்கள் கவரவில்லை.

ஏண்டி ஏண்டி எஸ் மது 

எஸ். மது பாட்டை பற்றி தனியே சொல்லியே ஆகணும் !

முதலில் பார்த்தது படத்தில் தான் என்பதால் விழுந்து விழுந்து சிரித்தேன். தனியாய் பார்த்தால் அவ்வளவு காமெடியாய் தோன்றுமா என தெரியவில்லை. படத்துடன், அந்த காட்சியுடன் மிக பொருந்தி போகிறது பாடல் !

எஸ். மது ; பி ஸ் சி, எம். பி.ஏ பார் - பிரண்ட் ஆப் ப்ரியங்கா; நம்பர் சிக்ஸ், குறுக்கு தெரு, சாந்தி காலனி சென்னை

என்ன இது அட்ரஸ் என்கிறீர்களா? இது தான் பாடலின் வரிகள் !
எப்படித்தான் இப்படி ஒரு காட்சி கன்சீவ் செய்தனரோ !

"பொண்ணுங்களை திட்டி பாடப்போறேன்" என்கிறான் காதலியுடன் சண்டை போட்டு விட்டு பாரில் தண்ணி அடிக்கும் ஹீரோ.

" ஒரு பொண்ணு ஏமாத்துனான்னு எப்படி எல்லா பெண்ணையும் திட்டலாம் " என்கிறான் நண்பன்

" மது (காதலி) வை திட்டி பாடுறேன் "

" ஊர்ல எத்தனையோ மது இருக்காங்க; அவங்க கோவிச்சிக்க மாட்டாங்களா? "

" சரி.. எஸ். மது - அவளை திட்டி பாடுறேன் "

" டெலிபோன் டைரக்டரியில்  எஸ். மதுன்னு நூறு பேர் இருக்காங்க "

இப்போ - வேற எந்த பெண்ணையும் குறிக்காமல் தன் காதலியை - அவளது அட்ரஸை சொல்லி பாடுகிறான் ஹீரோ.

எஸ் மது என்ற பெயரையும் அந்த அட்ரஸையும் திரும்ப திரும்ப சொல்வது செம காமெடியாக இருக்கிறது. நடன அமைப்புகளும் சிரிப்பை அதிகமாகவே ஆக்குகிறது ! ஒரு மினி கொலை வெறி சாங் என்றே சொல்லலாம் !

இசை அமைப்பாளர் சந்தோஷ் நாராயண் மற்றும் இயக்குனர் ரத்னகுமார் இருவருக்கும் இந்த வித்தியாச முயற்சிக்காக ஸ்பெஷல் பாராட்டு !

நமக்கு தான் இந்த பாட்டு புதுசு. இணையத்தில்  ஏராளமான மக்கள் பாட்டை சிலாகித்துள்ளனர்.

பாடலை இங்கு பாருங்கள் :




***

மேயாத மான் -  Watch it for the Humour without much expectation !

துப்பறிவாளன் - சினிமா விமர்சனம்

மிஷ்கினின் படங்கள் ஏறக்குறைய ஒரே ஜானரில் இருக்கும். இம்முறை த்ரில்லர் - அதிலும் குறிப்பாக துப்பறியும் கதையை கையில் எடுத்துள்ளார்.



கதை 

வித்தியாசமான துப்பறியும் நிபுணர் கணியன் பூங்குன்றன்  (விஷால்). - (இந்த பெயர் வைத்தமைக்கே இயக்குனருக்கு ஒரு ஸ்பெஷல் பாராட்டு. "யாதும் ஊரே யாவரும் கேளிர் என்ற புகழ் பெற்ற பாடலை எழுதியவர் கணியன் பூங்குன்றன் என்பது பலருக்கும் தெரியும். அவர் எழுதிய வேறு எந்த பாடலும் நம்மிடம் இல்லை; இந்த ஒரே பாடலில் மிக பெரும் பிரபலமானவர் கணியன் பூங்குன்றன் !)

விஷாலின் உன்னிப்பான பார்வை -எதையும் சட்டென ஊகிக்கும் திறன் இவை - மிக அழகாக சொல்லி கதை துவங்குகிறது.

ஒரு சிறுவன் தனது நாய் இறந்து விட்டது என அவன் சேமித்த 760 ருபாய் பணத்தை  எடுத்து வந்து தந்து துப்பறிய சொல்கிறான். அதை துப்பு துலக்கும் போது மிக பெரிய மர்ம கும்பலின் பின்னணி தெரிய வருகிறது !

பிளஸ் 

கதை முழுக்க முழுக்க விஷாலின் மீது தான் பயணிக்கிறது. அவரது அதீத புத்தி சாலித்தனத்தை நம்ப  சற்று சிரமமாய் இருந்தாலும் போக போக பழகி விடுகிறோம். உடல் மொழி மற்றும் நடிப்பில் விஷால் தன்னால் முடிந்த பங்களிப்பை தந்துள்ளார்.

வழக்கமாய் ஹீரோ அல்லது ஹீரோயினாய் வரும் சிலர் இதில் மர்ம கும்பல்- வில்லன் கூட்டமாய் வருகிறார்கள். அவர்களின் உடல் மொழி மற்றும் டீட்டையிலிங் சுவாரஸ்யம்.

குறிப்பாக வில்லன் - கொலை செய்யும் போது காபி குடிப்பதும், காபியை எவ்வளவு எளிதாக குடிப்போமோ அதே போல கொலையை செய்து விட்டு போவதும்...



 ஹீரோயினுக்கு அதிகம் வாய்ப்பில்லாத கதை - இருப்பினும் வந்த வரை மனதில் நிற்கிறார். துவக்கத்தில் இவரை பிக் பாக்கெட்டாய் காட்டி விட்டு - கிளை மாக்சிற்கு முன் கடைசியாய் இவர் அடிக்கும் பிக் பாக்கெட் கிளாஸ் !

காதல்- காமம்-பாடல்கள் இவை இன்றி படம் விறுவிறுப்பாக நகர்கிறது (கிளை மாக்ஸ் மட்டும் இன்னும் சுருக்கியிருக்கலாம் )

மைனஸ் 

குறைகள் அதிகமில்லை;

பத்து நிமிடத்திற்கொரு முறை யாரேனும் இறப்பது சற்று அயர்ச்சி தருகிறது. போலவே கிளை மாக்ஸ் இழுவையை சற்று கவனித்திருக்கலாம்

பைனல் அனாலிசிஸ் 

ஷெர்லாக் ஹோம்ஸ் கதையில் வரும் துப்பறியும் பாத்திரங்களின் அடிப்படையில் எழுதப்பட்ட கதை.

நிச்சயம் ஒரு சுவாரஸ்ய முயற்சி. த்ரில்லர் படம் விரும்புவோர் நிச்சயம் காணலாம் !

தமிழின் நம்பிக்கைக்குரிய இயக்குனர்களில் ஒருவரான மிஷ்கின் ஒரு நல்ல/ வெற்றி படம் தந்திருப்பதால் மகிழ்ச்சி !

பின்குறிப்பு: நான் வேலை பார்த்த நிறுவனத்தில் இருந்து விலகி, சொந்தமாய் கம்பெனி செகரட்டரி மற்றும் சட்ட ஆலோசகராக இயங்கி வருகிறேன். இதனால் பிளாகில் தொடர்ந்து கட்டுரைகள் எழுத இயலவில்லை; சுயமாய் பணி செய்யும்போது துவக்க காலத்தில் நேரம் கிடைப்பது கடினம். விக்ரம் வேதாவிற்கு பிறகு இந்த படம் தான் காணவே முடிந்தது. ஒன்றரை மாதத்தில் ஒரு ரெண்டரை மணி நேரம் பணியை தவிர்த்து ரிலாக்ஸ் ஆனது இப்படத்தில் தான். பதிவுகள் இயலும் போது மட்டுமே வரும். பொறுத்தருள்க !

விக்ரம் வேதா - சினிமா விமர்சனம்

தமிழ் சினிமா ரசிகர்களுக்கு சற்று வித்யாசமான கதைக்களம்..

சஸ்பென்ஸ் த்ரில்லர்... கடைசி வரை விடை தெரியாமல் செல்லும் கேள்விகள்.. அனைத்துக்கும் பதில் கிளைமாக்சில் தெரிவது எனும் இந்த பாணி மலையாளத்தில் மிக பிரபலம். மும்பை போலீஸ் என்கிற த்ரில்லர் அட்டகாச உதாரணம்.

கதை 

என்கவுன்ட்டர் ஸ்பெஷலிஸ்ட் மாதவன் - தாதா விஜய் சேதுபதியை கொல்ல நினைக்கிறார். அந்த முயற்சியில் இறங்கும் போது விஜய் சேதுபதியின் கடந்த காலமும் அதில் பல்வேறு மர்மங்களும் விரிகிறது ! கடைசி அரை மணியில் அனைத்து கேள்விகளுக்கும் விடை கிடைக்கிறது .



படத்தின் நிஜ டபிள்  ஹீரோ .. கதை மற்றும் திரைக்கதை.  மாதவன் மற்றும் விஜய் சேதுபதி இந்த திரைக்கதைக்கு பிக்ஸ் செய்ததும் இயக்குனர்கள் செய்த மிகசிறந்த விஷயம் !

மாதவன் -விஜய் சேதுபதி இருவரில் யார் அசத்தல் என சொல்வது சற்று கடினம். மக்கள் ஆரவாரத்துடன் ரசிப்பது விஜய் சேதுபதி என்றாலும் மாதவனின் நடிப்பும் கன கச்சிதம்

வசனங்கள் நச். "காந்தி பையன் காந்தி போல ஆனாரா?கோட்ஸே பையன் கோட்ஸேவா? "

இசை அமைப்பாளர் சாம் 2 பாட்டுகளிலும் பின்னணி இசையிலும் அசத்துகிறார். சர்வ நிச்சயமாக நல்ல எதிர்காலம் உண்டு.

கடைசி அரை மணி நேரம் அட்டகாச திரைக்கதை. கதை செல்லும் போக்கே சற்று திரும்புவதும், முதல் பாதியில் சாதாரணமாய் பேசப்பட்ட பல விஷயங்களுக்கு வேறு அர்த்தம் தெரிவதும்.. நைஸ் !

மாதவன் மனைவியாக வரும் ஷ்ரத்தா ..அழகு !



ஏற்கனவே தள்ளாடும் தமிழ் சினிமாவை GST வரி ஒரு  காட்டு காட்டி விட்டு போனது...

2017 ல் நன்றாய் ஓடிய படங்கள் என்றால் - தனுஷின் பவர் பாண்டி தவிர சொல்லி கொள்கிற மாதிரி வேறு எந்த படமும் இல்லை.

தியேட்டர் டிக்கெட் விலை 160-170 ஐ தாண்டியதால் மக்கள் பிக் பாஸ் பக்கம் ஒதுங்கி  விட்டார்கள்.இந்நிலையில் ஒரு படம் ஹிட் ஆகணும்.. தியேட்டர் நிறையனும் என்றால் - ரஜினி, அஜித், விஜய் போன்றோரின் படம் வந்தால் தான் சாத்தியம் என  நினைத்திருந்தேன்.ஆனால் விஜய்  சேதுபதி அந்த நல்ல காரியத்தை செவ்வனே செய்து முடித்து விட்டார் !

இயக்குனர்கள் புஷ்கர் - காயத்ரி இதுவரை ஓரம் போ - குவார்ட்டர் கட்டிங் போன்ற சுமாரான/ தோல்வி படங்களையே எடுத்தவர்கள்.. இம்முறை ஸ்க்ரிப்ட் மற்றும் நடிகர் தேர்வில் மிக அக்கறை எடுத்து - சொல்லி  அடித்து வெற்றி பெற்றுள்ளனர்.

மல்டிபிளக்சில் வார நாட்களிலும் மாலை காட்சி ஹவுஸ் புல் ஆக  ஓடுகிறது !(நாங்கள் பார்த்தது வேளச்சேரி PVR) ரொம்ப நாளைக்கு பிறகு தமிழில் ஒரு வெற்றிப்படம்

பி மற்றும் சி சென்டரில் படம் எப்படி ஓடும் என்பது சற்று கேள்விக்குறி தான். சென்னை போன்ற நகரங்களில் வெற்றி நிச்சயம்.

வித்தியாச/புத்தி சாலித்தன சினிமா விரும்புவோர் காண தவறாதீர்கள்.. விக்ரம் வேதாவை !

பாகுபலி -2 சினிமா விமர்சனம்

இந்திய திரை உலகில் இப்படி ஒரே படம் ...இரண்டு பாகங்கள் வந்திருக்குமா என தெரியவில்லை..பல செகண்ட் பார்ட் படங்கள் -முதல் படத்தின் வெற்றியால் அடுத்த சில ஆண்டுகள் கழித்து புதிதாய் - அதன் தொடர்ச்சியாய் வருவது போல புதிதாய் யோசித்து எழுதப்படும். இங்கு கதை எழுதிய போதே இரண்டு பாகம் என முடிவெடுத்து விட்டார் ராஜமவுலி. இதற்கு எவ்வளவு தைரியம் இருந்திருக்க வேண்டும் ! முதல் பாகம் தோல்வி என்றால் அடுத்த பாகம் பற்றி யோசித்திருக்கவே முடியாது !

நல்ல வேலையாக முதல் பாகம் வெற்றி..அதில் பதில் சொல்லாமல் விட்ட பல விஷயங்கள் -இரணடாம் பாகம் மேல் எதிர்பார்ப்பை கூட்டியும் விட்டது.

நிச்சயம் முதல் பாகத்தை விட அட்டகாசமான ஒரு படைப்பு.. பாகுபலி 2. முதல் பாகம் தந்த மகிழ்வை விட அதிக பட்ச சந்தோசம்..அனுபவத்தை தரவே செயகிறது (ஒரு சில விஷயங்களில் மட்டுமே முதல் பாகம் - இதை விட அருமை..என்னவென பின்னர் பார்க்கலாம் )

கதை

தந்தையை கொன்றவனை பழி வாங்கி, ராஜ்யத்தை மீண்டும் கைப்பற்றுவது தான் பாகுபலி 2

ஆனால் மேற்சொன்ன வரி -கடைசி 20 நிமிடம் மட்டுமே. 2 மணி நேரத்திற்கும் மேல் செல்லும் அமரேந்திர பாகுபலியின் கதை நெஞ்சை உருக்கி விடுகிறது

மேலோட்டமாக பார்த்தால் இப்படம் மகாபாரத்தில் இருந்து inspire ஆனதோ என யோசிக்க தோன்றுகிறது..ராஜ்யத்துக்காக சண்டையிடும் (ஒன்று விட்ட) சகோதரர்களின் போராட்டம் தான் இரு கதையிலும் மைய புள்ளி.



பிளஸ்

ஒன்றா இரண்டா..அடுக்கி கொண்டே போக வேண்டும்.

முதல் விஷயம்; கதை மற்றும் திரைக்கதை; அது பல்வேறு ஆச்சரியங்களை, துரோகங்களை, நேர்மையைச்  சொல்லி செல்கிறது. இந்த கதையால் தான் பிரம்மாண்டம் துவங்கி மற்ற அனைத்துமே சாத்தியம் ஆனது

அடுத்தது.. பிரபாஸ்..என்ன ஒரு அற்புதமான பாத்திரம்...அந்த தந்தையுடையது. சத்தியத்துக்காக  யாரையும் எதிர்க்கும், தன் ஆட்சியை கூட விட்டுத்தரும் இத்தகைய பாத்திரம்...வாவ் ! ப்ரபாஸ் அதற்கு மிக பொருத்தம்  !  சிரிப்பு, நக்கல், கோபம், ஏமாற்றம் இப்படி அத்தனை உணர்வுகளையும் காட்ட வேண்டிய கேரக்டர்..இதை விட அற்புத பாத்திரம் வாழ்நாளில் கிடைத்து விடாது

அனுஷ்கா .. அழகின் உச்சத்தில் படம் துவங்கி பெரும்பான்மை காட்சிகளும் எடுத்து விட்டனர். அனுஷ்கா கடைசியாய் அழகாய் இருந்த படம் " என்றே விளம்பரம் செய்யலாம் !

என்ன ஒரு அனாயசமான ஹீரோயின் அறிமுக காட்சி...அனுஷ்கா வரும் முதல் காட்சியிலேயே அசத்தி விடுகிறார். போலவே -தவறு செய்யும் எவரையும் எதிர்த்து கேட்கும் தைரியம்.. மாமியாருக்கும் இவருக்கும் நடக்கும் பல உரசல்களில் நெருப்பு பறக்கிறது

சத்யராஜ் - கட்டப்பா ஏன் பாகுபலியை கொன்றான் என்பதே முக்கிய பேச்சாக இருந்தாலும் இப்படம்   பார்த்து முடிக்கும் போது நீங்கள் கட்டப்பாவை வெறுக்க மாட்டீர்கள்;விரும்பவே செய்வீர்கள். படத்தின் மிக முக்கியமான, ரசிக்க வைக்கும் காரெக்டர் சத்யராஜுக்கு.  அட்டகாசமாய் செய்துள்ளார்.

ரம்யா கிருஷ்ணன் பாத்திரம் பல வண்ணங்களில் பயணிக்கிறது. பிறந்த குழந்தையை ராஜாவாக அறிவிக்கும் காட்சியெல்லாம் goosepumps வரவைக்கும் காட்சிகள். இது போன்ற கைதட்டல் வாங்க வைக்கும் காட்சிகள் (யானை மீது பிரபாஸ் ஏறும் காட்சி. சண்டைக்கு நடுவே சில நொடியில் அனுஷ்காவிற்கு 3 அம்புகள் விட சொல்லித்தரும் காட்சி) ஆங்காங்கு வந்த வண்ணமே உள்ளது ....





பின்னணி இசை நன்று

ஒளிப்பதிவு  ஒவ்வொரு ஷாட்டிலும் தெறிக்கும் பிரம்மாண்டம்.. இவை இரண்டையும் ரசிக்க தியேயேட்டரில் பார்த்தால் மட்டுமே சாத்தியம்

ராணா -  அட்டகாசமான உடல்- நரித்தந்திரம்.. இந்த பாத்திரத்துக்கு வேறு எவரும் பொருந்தியிருக்கவே முடியாது

நாசரின் கர்ஜனையும் தந்திரமும்..படம் நெடுகிலும் வருகிறது (கடைசியில் இவரை மட்டும் கொல்லாமல் விடுகிறார்கள் . அடுத்த பாகம் பற்றி மிக லேசான எண்ணம் இருக்குமோ என்னவோ )

பாடல் காட்சிகளில் மட்டுமே டப்பிங் படம் என தெரிகிறது; மற்ற காட்சிகளில் உதட்டசைவு மிக சரியாக பொருந்துகிறது. இரு மொழி படம் போல....தமிழ், தெலுகு இரண்டு வசனமும் பேசி நடித்த மாதிரி இருக்கிறது லிப் சிங்க் பார்க்கும் போது !

மைனஸ் 

இந்த படத்துக்கு மைனஸ் சொல்ல மனமே வரவில்லை; இருப்பினும் ஒரு தலைப்பட்சமாக - சும்மாவே படத்தை உயர்த்தி பிடிக்கிறேன் என நினைக்க கூடாது எனதற்காக மட்டுமே சில மைனஸ் சொல்கிறேன்

பாடல்கள் ரொம்ப சுமார் (முதல் பார்ட் பாடல்கள் நன்று ) போலவே போர் காட்சிகளிலும் முதல் பாகம் இதை விட அருமை. (இருப்பினும் மீண்டும் சொல்கிறேன் .....சந்தேகமே இல்லை..முதல் பாகத்தை விட இரண்டாம் பாகமே சிறந்தது )

முதல் பாதியில் வரும் அனுஷ்கா சம்பந்தமான இரு பாடல்களையும் வெட்டி கடாசி விடலாம்.போர் !! இந்த இடங்கள் படத்தின் வேகத்தை லேசாய் குறைக்கிறது 

பைனல் அனாலிசிஸ் 

இப்படத்துக்கு 120/ 150 ரூபாய் தருவதும் சரி - பாடம் காண 3 மணி நேரம் செலவிட்டதும் சரி.. தவறு என நினைக்க வாய்ப்பே இல்லை !

ராஜமவுலி.. இவரை எவ்வளவு பாராட்டினாலும் போதாது. இந்திய திரை உலகின் சிறந்த படங்களை பட்டியலிட்டால் பாகுபலியை ஒதுக்கி விட்டு பேசமுடியாது !

Awesome experience.. Emotional Roller coaster ride.. Cinema lovers.. Don't miss it.Watch it in theaters !

*****
அண்மை பதிவு

பவர் பாண்டி & காற்று வெளியிடை : சினிமா விமர்சனம்