பதிவர் விழா உணவு :சென்ற ஆண்டு Vs இந்த ஆண்டு மெனு ! படங்களுடன்

சென்ற ஆண்டு இதே நாளில் ( 28 ஆகஸ்ட் 2012) சாப்பாட்டு பந்தி குறித்து எழுதிய இப்பதிவு - மிக அதிக நண்பர்களால் விரும்பி வாசிக்கப்பட்டது - அதற்கு முக்கிய காரணம் பின்னூட்டங்களில் ராஜி என்கிற எங்கள் அக்கா (அக்காவா? தங்கையா ?) அடித்த ரகளை.... 

அவர் எழுதிய பின்னூட்டங்களை வாசிக்க மறவாதீர்கள்... அதற்காகவே பழைய பின்னூட்டங்களுடன் சேர்த்து பப்ளிஷ் செய்கிறேன்.....

பதிவின் இறுதியில் இந்த ஆண்டு சாப்பாட்டு மெனுவும் விரிவாக உள்ளது !

*********
2012 சென்னை பதிவர் மாநாட்டில் கலக்கிய பதிவர்கள் சிலரையும், மாநாட்டின் சாப்பாட்டு பந்தியையும் பார்க்கலாம்.

பின்னூட்ட புயல் நீங்களா நானா - திண்டுக்கல் தனபாலன் Vs ரமணி

கேபிள்-சிபி இரு பதிவுலக மலைகளுக்கிடையே   வீடுதிரும்பல் மோகன்

போட்டோ எடுக்கும் வரை சாதாரணமாய் இருக்கும் சிபி, போட்டோ எடுக்கிறார்கள் என்றதும் நொடியில் கூலிங் கண்ணாடி எடுத்து போடுவது பார்க்க ஜாலியா இருக்கு

ஒவ்வொரு பதிவரும் உள்ளே நுழையும் போது வீடியோவில் தன்னை அறிமுகம் செய்த  பின்னரே நுழைந்தார்கள்.
இங்கு பிலாசபி மற்றும் கோவை நேரம் ஜீவா

ரெண்டு மூணு செட் டிரஸ் வைத்து கொண்டு மண்டபத்திலேயே அடிக்கடி கெட் அப் மாற்றினார் கோவை நேரம் ஜீவா !

பிலாசபிக்கு திருமணம் பிக்ஸ் ஆகிடுச்சு. செப்டம்பர் முதல் வாரம் நிச்சயதார்த்தம். அடுத்த வருட மே மாசம் கல்யாணம். சாருக்கு பத்து நிமிஷத்துக்கொரு முறை போன் வரும். ஓரமா போய் நின்னு 15 நிமிஷம் பேசுவார் ! மேடம் ரொம்ப ஸ்ட்ரிக்ட்டு :))

நாய் நக்ஸ், மணிஜி, கோவை நேரம், ஆரூர் மூனா

அநியாய பாசக்காரர் நாய் நக்ஸ் அண்ணே. வீட்டில் செஞ்ச மீன் எடுத்துட்டு வந்து, சாப்பிடாட்டி ஊட்டியேவிடுவாராம் (நான் வெஜ் சாப்பிடுறவங்களுக்கு தான் !)

ஜாக்கி மேடைக்கு சென்ற போது ஒரு வாசகர் செமையா விசில் அடிச்சார். ஜாக்கி புதியவர்கள் எதை வேணா எழுதுங்க; தைரியமா எழுதுங்க என சொல்லிவிட்டு அமர்ந்தார்

ஜாக்கி பேசுவதை புன்னகையுடன் கேட்கிறார் பட்டிக்காட்டான் ஜெய் 

சித்தூர் முருகேசன், கேபிள், ரோஸ்விக், மோகன்குமார் 

இவங்க எல்லாருமே பிரபல பதிவர்கள் தான்.. விழா குழு ..ஒரு பகுதி 

விழா குழு இன்னொரு பகுதி

****

இனி சாப்பாட்டு பந்தியில் எடுத்த படங்கள்  

எனக்கு தெரிந்த வரை இது தான் மெனு; ஏதும் தவறு என்று யாரேனும் சொன்னால் திருத்தி கொள்கிறேன்

தக்காளி சூப்
சாலட்
கோபிமஞ்சூரியன்
சப்பாத்தி, குருமா
வடை
காய்கறி
உருளை கிழங்கு சிப்ஸ்
சாம்பார் சாதம் ( பிசிபெல்லா பாத்)
வெஜிடபிள் பிரியாணி
தயிர் சாதம்
ஊறுகாய்
மைசூர் பாகு ( சூப்பரா இருந்தது. ரெண்டாவது கேட்கலாம் என்ற ஆசையை அடக்கி கொண்டேன்)
ஐஸ்கிரீம்
***
இவை தவிர காபி, டி, பொவண்டோ, போண்டா போன்றவை அவ்வப்போது நிகழ்ச்சி அரங்கிலேயே சப்ளை ஆனது !

LK, பலாபட்டறை ஷங்கர், மக்கள் சந்தை - சீனிவாசன் & அருணேஷ்

முதல் பந்தியில் சாப்பிட்டு முடித்த பின்னும் நண்பர்கள் மிக பெரிய கூட்டமாய் பின்புறம் நின்று அதிக நேரம் பேசி களித்தனர்

தம்பி வடை இன்னும் வரலை- சிவாவிடம் பேசும் சிரிப்பு போலிஸ். அருகில் பெஸ்கி.

கருண், சீனா ஐயா, கணக்காயன் ஐயா

"நிறைய தண்ணி குடிச்சுக்குங்க; மதியம் நிறைய பேச வேண்டியிருக்கும்"
சுரேகாவிடம் சொல்லும் ரோஸ்விக்

ஐயாக்கள் ராமானுசம், சென்னைப்பித்தன், நடனசபாபதி

தானே பரிமாறுகிறார் காடரிங் உரிமையாளர் &  பதிவர் ஆயிரத்தில் ஒருவன் மணி     

(ஆயிரத்தில் ஒருவன் மணி அவர்கள் இன்று நம்மிடையே இல்லை.. அவருக்கு மவுன அஞ்சலி மட்டுமே  2013-விழாவில் நம்மால் செலுத்த முடிகிறது !

சிரித்தபடி கரண்டியும் கையுமாய் இருக்கும் சிராஜுதீனை இன்று தான் முதலில் பார்த்தேன். பம்பரமாய் சுற்றி பந்தியிலும், விழாவிலும் அனைத்து வேலைகளும் செய்தார். மிக மகிழ்ச்சி சிராஜுதீன் !

சீனு மற்றும் அவர் நண்பர்கள், சிராஜுதீன், சிவா, பிலாசபி

ஆரூர் மூனா, மதுமதி, அரசன், ரஹீம் கஸாலி

உணவு ஒரு வேளை பற்றாமல் போனால் என்ன செய்வது என்பதால், விழா குழுவினர் மட்டும், மற்ற அனைவரும் சாப்பிட்டு முடித்ததும் தான் சாப்பிட வேண்டும் என பேசி வைத்திருந்தோம். அதன் படி கடைசியாய் சாப்பிடும் விழா குழுவினர் சிலர்..மேலே உள்ள இரு படங்களில் !

 *************************

2013 பதிவர் சந்திப்பில் பப்பே முறையில் வழங்கப்படும் மதிய உணவு வகைகள்
அசைவம்

பைனாப்பிள் கேசரி
கிராண்ட் தாஜ் சிக்கன் பிரியாணி 

தயிர் பச்சடி
கத்திரிக்காய் சட்னி
சிக்கன் டிக்கா
தயிர் சாதம்
ஐஸ்கிரீம் 50 கிராம் கப்
வாழைப்பழம்
பீடா

சைவம்

பைனாப்பிள் கேசரி
வெஜ் சாலட்
கிராண்ட் தாஜ் வெஜ் பிரியாணி
தயிர் பச்சடி
கத்திரிக்காய் சட்னி
பொட்டேட்டோ சிப்ஸ்
தயிர் சாதம்
ஐஸ்கிரீம் 50 கிராம் கப்
வாழைப்பழம்
பீடா

***

அட்ரா சக்க ! அட்ரா சக்க ! அட்ரா சக்க !  சிக்கன் பிரியாணியா !!! ரைட்டு !
***
அண்மை பதிவு :

வீடுதிரும்பல் மோகனின் வெற்றிக்கோடு - புத்தகம் வெளியாகும் கதை 

உணவகம் அறிமுகம் - ரத்னா கபே, வேளச்சேரி

பேச்சிலராக திருவல்லிகேனியில் இருந்த போது ரத்னா கபேயில் சாப்பிட்டிருக்கிறேன். குறிப்பாக அப்போது சற்று செலவு சுருக்கமாக செய்யவேண்டும் என்பதற்காக அவர்களின் ஸ்பெஷல் உணவான இட்லி சாம்பார் ரெகுலராய் சாப்பிடுவது வழக்கம்.

ரொம்ப வருடங்கள் கழித்து மீண்டும் ரத்னா கபே.. இம்முறை - குடும்பத்துடன்.

காலத்திற்கு தகுந்தபடி இவர்களும் மாறுகிறார்கள். உள்ளே நுழைந்து அமர்ந்ததுமே பல காம்போ பேக்குகள் நம் கருத்தை கவர்கின்றன. குறிப்பாக 5 வித தோசை - மசாலா தோசை, பொடி தோசை , ஆனியன் தோசை உள்ளிட்ட 5 வகைகள் ஒரே ஆர்டரில் தருகிறார்கள். செம சுவாரஸ்யம் !

நம்ம ஆர்டருக்கு வருவோம்.

நாங்கள் ஆர்டர் செய்தது :

சாம்பார் இட்லி
கைமா இட்லி
பரோட்டா (ஹீ ஹீ )
பூரி
பன்னீர் தோசை
***

ரத்னா கபே வந்துட்டு சாம்பார் இட்லி சாப்பிடாமல் போவதா? இரண்டு இட்லிகளை சாம்பாரில் நன்கு முழுக வைத்து எடுத்து வந்தார்கள். சுட சுட சுவையான சாம்பார்.. அடடா ! சாம்பார் இட்லி ரத்னா கபே போல் எங்கும் வராதுங்க சார் !

கைமா இட்லி என்பது வேறொன்றும் இல்லை. குட்டி குட்டி இட்லிகளை நன்கு பிரை செய்து தருகிறார்கள். மொறு மொறு வென crispy - ஆக இருக்கு.

பரோட்டா சிறிய அளவே ஆயினும் முறுகலாக இருந்தது & குருமா மற்ற இடங்களை விட வித்தியாச சுவை. இரண்டுமே அசத்தல்.

பன்னீர் தோசை - மசால் தோசை டைப் தான். மசாலாவிற்கு பதில் உள்ளே பன்னீர் இருக்கும். ஒவ்வொரு சட்னியும் ஒன்றோடு ஒன்று போட்டி போட்டது

அனைத்து உணவும் முடித்ததும் ஒரு காபி வாங்கி சாப்பிட்டோம். அடடா .. கும்பகோணம், தஞ்சாவூர் காபி போல அவ்வளவு சுவை !

மேலே சொன்ன அனைத்தும் மிகுந்த சுவையுடன் சாப்பிட்டும் பில் - 250 தான் வந்தது !( Non ஏ. சி )

ரத்னா கபே - திருவல்லி கேணி, போரூர், வேளச்சேரி என 4 இடங்களில் இருக்கு. அவசியம் ஒரு முறை சென்று பாருங்கள் !

உணவகம் அறிமுகம் - திண்டுக்கல் வேலு பிரியாணி

வேளச்சேரியில் ஷாப்பிங் முடித்து இரவு பத்து மணியளவில் டின்னர் சாப்பிட கடை தேடினோம். ஒரு வழியாக திண்டுக்கல் வேலு பிரியாணி கடைக்கு வந்து சேர்ந்தோம்.

                                    

வேளச்சேரி ரயில் நிலையம் மிக அருகே உள்ளது திண்டுக்கல் வேலு பிரியாணி கடை. மேம்பாலத்திலிருந்து பார்த்தாலே கடையின் போர்டு பெரிதாக தெரியும்.

டேஸ்டுக்காக ஒரு பிரியாணியும், பெண் சாப்பிடும் விதம் வேறு சில உணவுகளும் ஆர்டர் செய்தோம்

வேலு பிரியாணி என்று பெயர் உள்ளதே தவிர மற்ற வகை உணவுகள் தான் நிறையவே உள்ளது.

நாங்கள் சாப்பிட்டவை

சிக்கன் பிரியாணி -1
எக் பிரைட் ரைஸ்
சிக்கன் கொத்து பரோட்டா
எக் நூடுல்ஸ்

பரோட்டா, சப்பாத்தி போன்ற எதற்கும் குருமா தர மாட்டார்களாம் ! சைட் டிஷ் தனியாக ஆர்டர் செய்ய வேண்டும் என்றனர். சைட் டிஷ் ஒவ்வொன்றும் 150 முதல் 200 வரை விலை !

சீக்கிரமே உணவுகளை தந்து விட்டனர்

பிரியாணி ரொம்ப சுமார் தான். எக் பிரைட் ரைஸ் மற்றும் கொத்து பரோட்டா தான் நன்றாக இருந்தது. நூடுல்ஸ் ஜஸ்ட் ஓகே

ஒவ்வொரு ஐட்டமும் 120 முதல் 150 ரூபாய் ரேஞ்சில் இருக்கிறது (நான், ரொட்டி தவிர்த்து ). விலை சற்று அதிகம் தான். விலைக்கேற்ற தரம் இருக்கிறது என்று சொல்ல முடியாது

ஹோட்டல் தூரத்தில் இருந்து பார்க்கும்போது மெயின் இடத்தில் இருக்கிற மாதிரி தெரிந்தாலும், அருகில் போனால் சூழல் சற்று சரியில்லை. அருகிலேயே கால்வாய் ஓடுகிறது. (மினி கூவம் !! )

ஒரு இடத்தின் சுத்தத்தை அறிய அங்கு டாய்லெட் எப்படி வைத்துள்ளனர் என்பதை வைத்து அறியலாம் ! ஹோட்டலில் சாப்பிடும் அரை நீட்டாக இருந்தாலும், டாய்லெட் மோசமாக வைத்துள்ளனர். மாடியில் ஹோட்டல்- டாய்லெட் கீழே தரை தளத்தில் மட்டுமே; அதுவும் மோசமான நிலையில் :(

வேலு பிரியாணி - Value for money அல்ல !

உணவகம் அறிமுகம் - வேளச்சேரி 25 ரூபா உணவு கடை

உடுப்பி கிருஷ்ணா போளி ஸ்டால் என்பது அந்த கடை பெயர். வேளச்சேரி விஜய நகர் பேருந்து நிலையத்துக்கு அருகில் உள்ளது.



பெயரில் தான் போளி ஸ்டாலே ஒழிய - சுற்று வட்டம் முழுக்க டிபன் மற்றும் வெரைட்டி ரைஸ் வகைகளுக்கு தான் இக்கடை மிக பிரபலம் ! கூட்டம் எப்போதும் இருக்கும் கடை இது !


கடையின் சிறப்பே 25 ரூபாயில் - சப்பாத்தி , பரோட்டா, ஸ்பெஷல் தோசை துவங்கி - மதியம் பல வெரைட்டி ரைஸ் வகைகளும் வழங்குவது தான்.

சின்ன கடை என்றாலும் - ஏராளமான உணவு வகைகள் இங்கு இருக்கும். பொங்கல், பூரி, கிச்சடி, ஏழெட்டு வகை தோசைகள் (ஆனியன் தோசை, பொடி தோசை, etc ), இட்லி, கேசரி - என சுவர் முழுதும் வரிசை வரிசையாக - இங்கு கிடைக்கும் உணவுகளை லிஸ்ட் செய்துள்ளனர்

வேளச்சேரி சுற்றி ஏராள ஐ. டி மற்றும் BPO நிறுவனங்கள் உள்ளன இங்கு பணிபுரியும் பேச்சிலர்களுக்கு இந்த கடை செம அட்ராக்ஷன். இங்கு உட்கார்ந்து சாப்பிடும் வசதி கிடையாது.



கடையின் இரண்டு பக்கமும் தட்டை மேலே வைத்து விட்டு நின்று கொண்டே சாப்பிடும் படி ஏற்பாடு செய்துள்ளனர். மக்களும் எந்த கம்பிலேயிண்ட்டும் இன்றி நின்றவாறு சாப்பிட்டு விட்டு செல்கிறார்கள்

காலை டிபன் - 6.30 முதல் 10.30 வரை
லஞ்ச் - மதியம் 12 முதல் 3 வரை
மாலை 4 to 6.30 ஸ்நாக்ஸ் (வடை, போண்டா வகையறாக்கள் )
7 முதல் 10 வரை இரவு உணவு

- என காலை ஆறு முதல் - இரவு 10.30 வரை நான் ஸ்டாபாக இயங்கும் கடை இது !

என்ன ஒன்று - சுற்றுப்புற சுத்தம் மட்டும் இன்னும் சற்று improve செய்யலாம் !

இங்கு வெவ்வேறு தருணங்களில் - பொங்கல் (நெய் !!!) , தோசை, கிச்சடி ( காய்கறிகள் நிறைய) , சாம்பார் சாதம், வடை, போண்டா உள்ளிட்டவை சாப்பிட்டுள்ளேன். கொடுத்த காசுக்கு வயிறும் மனதும் நிறையும் !

மேலதிக தகவல்கள் :

உடுப்பி கிருஷ்ணா போளி ஸ்டால்
17, டான்சி நகர் , இரண்டாவது தெரு
தரமணி லிங்க் ரோடு , வேளச்சேரி
(விஜய நகர் பேருந்து நிலையத்துக்கு மிக அருகில் )

உணவகம் அறிமுகம் : White pepper ரெஸ்டாரன்ட், வேளச்சேரி

வேளச்சேரி - விஜய நகர் பேருந்து நிலையத்திலிருந்து குரு நானக் மற்றும் பீனிக்ஸ் மால் செல்லும் சாலையில் உள்ளது இந்த உணவகம்.

சைனீஸ், இந்தியன், தந்தூரி வகைகள் என்ற அறிவிப்பு பலகை பார்த்து விட்டு சற்று தயக்கத்தோடு தான் உள்ளே நுழைந்தோம். ஆனால் எங்களை முழுவதும் திருப்தி படுத்தி விட்டது இங்குள்ள உணவுகள்..

ஞாயிறு மாலை என்பதால் நல்ல கூட்டம். உள்ளே நுழையும் போது அதிர்ஷ்டவசமாக இடம் கிடைத்து விட்டது. எங்களுக்கு பின்னாலேயே வந்த இரு குழுக்கள் சற்று காத்திருக்க வேண்டியதாயிற்று.

அகலம் அதிகமில்லாத குறுகலான கடை. ஆனால் வால் போல் நீளமாக இருக்கிறது. 15 குழுக்களாவது அமர்ந்து சாப்பிட மேசைகள் உள்ளன

நாங்கள் ஆர்டர் செய்தது :

மஷ்ரூம் சூப்
சிக்கன் டிக்கா ரோல்
பட்டர் நான்
தந்தூரி பரோட்டா
கடாய் பன்னீர்
பிரைட் ரைஸ்...

உணவை ஆர்டர் செய்து விட்டு காத்திருக்கும் போது அங்கு சாப்பிடும் மக்களை கவனிக்கிறேன். நண்பர்களோடு வந்து சாப்பிடும் ஐ. டி இளைஞர் கூட்டம், குடும்பத்தோடு வந்துள்ள மக்கள், மெல்லமாய் பேசியவாறு தேவைக்கதிகமாக சிரிக்கும் காதலர்கள்.. என எல்லா வித மக்களையும் இந்த
ரெஸ்டாரன்ட் கவர்ந்துள்ளது தெரிந்தது.

சூப்புக்கு சைட் டிஷ் போல பீட்ரூட்டை நீளமாக நறுக்கி மூன்று பீஸ் வைத்திருந்தனர். கூடவே ஒரு முழு மிளகாய் வேறு ! எப்படி மிளகாயை அப்படியே கடிக்க முடியும் என தயக்கம் இருந்தாலும் அது குடை மிளகாய் போல அதிக காரம் இன்றி சூப் உடன் சேர்ந்து கடித்து சாப்பிட நன்றாகவே இருந்தது

சிக்கன் டிக்கா ரோல் - இங்கு தான் முதன் முதலில் சாப்பிட்டு பார்த்தோம். பிஸ்சா போல ஒரு சமாச்சாரமாக தான் அது தெரிந்தது. பிஸ்சா மாதிரி ஒரு வஸ்து உருண்டையாக ஒரு ரோல் போல இருக்க, அதனுள்ளே சிக்கன் ஸ்டப் செய்திருந்தனர். நல்ல டேஸ்ட்.

பட்டர் நான் & காடாய் பன்னீர் - செம சுவையாக இருந்தது.

இங்குள்ள அனைத்து உணவுகளிலும் குறிப்பிட்டு சொல்லும் வித்தியாசம் ஒன்று உண்டு - அவர்கள் சாப்பாட்டில் பலவற்றை முழுசாய் போட்டு விடுகிறார்கள். கடாய் பன்னீரில் காஞ்ச மிளகாய் முழுசாய் (காம்புடன்) கிடக்கிறது. போலவே தனியா கூட அரைத்து தூளாக போடாமல் முழுசாய் போட்டுள்ளனர் !

எப்பவும் போல அனைத்து உணவையும் ஆளுக்கு கொஞ்சம் என ஷேர் செய்து சாப்பிட்டு முடித்தோம்.

பின் கடைசியாய் எங்கள் பெண் பலூடா ஆர்டர் செய்தாள். அவளுக்கு மட்டும் ஒரே ஒரு பலூடா ஆர்டர் செய்தோம்.

வந்த பின் கொஞ்சம் சாப்பிட்டு பார்க்க ஹவுஸ் பாஸ் தனக்கும் வாங்கி தந்தால் தான் ஹோட்டலை விட்டு வருவேன் ; இல்லா விட்டால் வர மாட்டேன் என்று அடம் பிடிக்க, அவரை அங்கேயே விட்டு செல்ல நல்ல வழி அது தான் என்றாலும், அதை சொல்ல மனமின்றி இன்னொரு பலூடா ஆர்டர் செய்தேன்.

"அடடா பலூடான்னா இது தான் பலூடா ! பேஷ் ! பேஷ் ! ரொம்ப நல்லாருக்கு !" என காசு செலவான கவலையை மறந்து நான் சொல்ல

" ஆமாங்க இனிமே இந்த வழியா போனா, இங்கே வந்து வெறும் பலூடா மட்டுமாவது சாப்பிட்டுட்டு போகணும் " என்றார் ஹவுஸ் பாஸ் !

அவர் சொன்னா அப்பீல் ஏது?

**********
மேலதிக தகவல்கள்: 

White pepper ரெஸ்டாரன்ட்
100 Feet Byepass Road
வேளச்சேரி

வீடுதிரும்பல் பரிந்துரை : ஒரு முறை நிச்சயம் செல்லலாம் !

உணவகம் அறிமுகம் : அம்மா உணவகம்

என்னுடன் அலுவலகத்தில் பணிபுரிந்த நண்பர் அனந்து முக நூலில் நான் உணவகம் அறிமுகம் லின்க் தரும்போதெல்லாம் " அம்மா உணவகம் சென்று விட்டு எழுதுங்கள்" என்று கேட்ட வண்ணம் இருந்தார். அவரின் விருப்பத்திற்கிணங்க இதோ அம்மா உணவகம்...

உணவக வாசலில் போர்டு 

காலை நேரம் கிண்டி BSNL - அலுவலகத்தில் ஒரு வேலை விஷயமாக சென்று கொண்டிருக்க, ஆலந்தூரில் இந்த அம்மா உணவகம் கண்ணில் பட்டது. BSNL அலுவலகம் திறக்க நேரமாகும்; உள்ளே போய் பார்க்கலாம் என்று நுழைந்தேன்.

நல்ல விஸ்தாரமான பெரிய இடம். சமையல் அறை , ஸ்டோர் ரூம், சாப்பாட்டு அறை என தெளிவாக போர்டு மாட்டி வைத்துள்ளனர்.

சாப்பாட்டுக்கு டோக்கன் வாங்க பெரிய கியூ நிற்கிறது. உள்ளே எட்டி பார்த்தால் சாப்பாடு வாங்க இன்னோர் பெரிய கியூ. டோக்கன் வாங்கும் கியூவில் நானும் இணைந்தேன். ஒரு இட்லிக்கு ஒரு சீட்டு என நீங்கள் நாலு இட்லி சாப்பிட்டால் நாலு சீட்டு தனித்தனியே தருகிறார்கள். (காகிதம் தான் வீணாகிறது. ஒரே காகிதத்தில் நான்கு இட்லிக்கும் எழுதி தரலாம். ஒரு பக்கம் மரங்களை அழிக்க கூடாது என்று சொல்லி விட்டு, இவ்வளவு காகிதம் அழிக்கணுமா என்றும் கேள்வி எழுகிறது)

வீட்டில் சாப்புடற மாதிரி யாரும் 3 இட்லி, நாலு இட்லி சாப்பிடுவதில்லை. பலரும் 6, 8 அல்லது 10 இட்லி வாங்கி கொண்டிருந்தார்கள். நான் ஏற்கனவே காலை சாப்பிட்டு விட்டதால் 2 இட்லி மட்டும் கேட்க, நம்மை " 2 இட்லியா ?" என ஒரு மாதிரி பார்த்தவாறு டோக்கன் தந்தனர்

அடுத்து இட்லி வாங்கும் கியூ . " செயின்ட் தாமஸ் மவுண்டில் இருந்து இங்கு வர்றேன். அந்த பக்கமும் ஒரு கடை போட்டா நல்லாருக்கும். சீக்கிரம் போட்டுருவாங்கன்னு நினைக்கிறேன் " என்று சொல்லியபடி இருந்தார் நமக்கு பின்னால் இருந்தவர்

ஒரு பக்கம் இட்லி வாங்கும் கியூ என்றால், நடு நடுவே இட்லி தட்டை கொண்டு வந்து நீட்டி எக்ஸ்ட்ரா சாம்பார் வாங்கி செல்வோருக்கும் தாரளமாக சாம்பார் ஊற்றுகிறார்கள்.

நமக்கான 2 இட்லியை வாங்கும் போது " சட்னி ஏதும் கிடையாதா? சாம்பார் மட்டும் தானா? "என்று கேட்க வார்த்தையில் மிக தன்மையாக " ஆமாங்க சாம்பார் மட்டும் தான் " என்கிறார் உணவு தரும் பெண்மணி. தட்டை எடுத்து கொண்டு சாப்பிடும் இடத்திற்கு வருகிறேன். நிறையவே டேபிள், சேர்கள் போடப்பட்டிருந்தாலும் அவையெல்லாம் ஹவுஸ் புல். ஓரமாய் நின்று கொண்டு சாப்பிடும் மக்களுடன் இணைந்தேன்

இட்லியும் சாம்பாரும் எந்த குறையும் சொல்ல முடியாத படி அருமையாய் இருந்தது. அவ்வப்போது சாப்பிட்ட தட்டை எடுத்தபடியும், தண்ணீர் ஊற்றியபடியும் இருக்கிறார்கள் பெண்கள்.

அங்கிருக்கும் ஒருவரிடம் பேசியபோது " இப்பல்லாம் தினம் 2 வேளையும் இங்கே தான் சார் சாப்பாடு. மதியம் சாம்பார் சாதம் வந்து சாப்பிட்டு பாருங்க. செம சூப்பரா இருக்கும் " என்றார்.

சுட சுட இட்லி, திக்கான சாம்பார், அருமையான குடிநீர், குறைவான விலை என அம்மா உணவகம் அடிச்சு தூள் கிளப்புது.....

இந்த அரசு செய்யும் அரிதான நல்ல காரியங்களில் ஒன்று இந்த அம்மா உணவகம்....

நிற்க இந்த பதிவிற்கு இரண்டாம் பாகமும் உண்டு.. மதிய சாப்பாடு பற்றி என்று நினைக்கிறீர்களா? நிச்சயம் இல்லை.. ! என்ன என யோசித்தவாறு இருங்கள்.. சில நாட்களில் பகிர்கிறேன் !

உணவகம் அறிமுகம் திருநெல்வேலி : A -1 ஹோட்டல்

நண்பர் வேங்கடப்பன் குடும்பமும் நாங்களும் செமையாய் சுற்றி விட்டு நெல்லை வர, அதன் பின் சமையலை ஆரம்பித்தால், சோர்வாக இருக்கும் - ஹவுஸ் பாஸ்களுக்கு கஷ்டம் ; So இரவு சாப்பாடை பார்சல் வாங்க முடிவு செய்தோம்.

உணவகம் அறிமுகம் தொடர்ந்து எழுதுபவன் என வேங்கடப்பன் நல்ல ஹோட்டலுக்கு அழைத்து செல்ல வேண்டுமென்பதில் குறியாக இருந்தான். அதன்படி நாங்கள் சென்றது - A -1 ஹோட்டல். அட ஹோட்டல் பெயரே அது தாங்க !

திருநெல்வேலி டவுனில் பெருமாள்புரம் ரவுண்டானா அருகே உள்ளது இந்த ஹோட்டல். உரிமையாளர் இங்குள்ள கார்பரேஷன் கவுன்சிலர் என்று அறிகிறேன்

மாலை மட்டுமே திறந்திருக்கும் இந்த கடையின் ஸ்பெஷாலிட்டி ஹீ ஹீ நம்ம புரோட்டா தாங்க !



அமர்ந்து சாப்பிட இடம் 10 X 10 அளவில் ! புரோட்டா போட, பார்சல் கட்டி கேஷ் வாங்க முன்புறம் இன்னொரு 10 X 10 இடம் அவ்வளவு தான் கடை !

உள்ளே உட்கார சிறிதும் இடமில்லை. ஹவுஸ் புல் !  சாப்பிடுவதற்கு சமமாக பார்சல் வாங்கி போகும் கூட்டம் இன்னொரு பக்கம்.

வீச்சு பரோட்டா, கொத்து பரோட்டா, சிக்கன் 65 என நிறைய பார்சல் வாங்கி கொண்டு கிளம்பினோம். 

நீங்கள் செல்லும்போது "சாதா குருமா" வுடன் ஸ்பெஷல் குருமாவும் தாங்க என உரிமையாய் கேட்டால் மட்டும் இன்னொரு வகை குருமா கொடுப்பார்கள். முதல் குருமா அருமை என்றால் இரண்டாம் குருமா தாறு மாறு !



வீட்டுக்கு வந்து பார்சல் எல்லாவற்றையும் பிரித்து குருமாவை தனித் தனி பாத்திரத்தில் ஊற்றி விட்டு நிமிர்ந்தால் சிக்கன் 65 பாதி காலி. பசங்க புகுந்து விளையாடிட்டாங்க அட பாவிகளா. எங்களுக்கும் குடுங்கடா என வாங்கி சாப்பிட வேண்டியாதாயிற்று.

பரோட்டாவை பிய்த்து போட்டு குருமாவை ஊற்றி சாப்பிட்டோம். அடடா சான்சே இல்லை. சொர்க்கம் ! சூப்பர் டேஸ்ட் என்பதால் சற்று அதிகம் சாப்பிடுற மாதிரி ஆகிடுச்சு.

நிற்க. பரோட்டா, சிக்கன் 65, கொத்து பரோட்டா என பல வகை உணவுகள் 6 பேருக்கு வாங்கியும்,  வயிறு நிரம்ப சாப்பிட்ட பின்னும் பில் 300 ரூபாயை தாண்ட வில்லை என்பது குறிப்பிடத்தக்கது !

நெல்லை காரர்கள் கொடுத்து வைத்தவர்கள் !
****************

மேலதிக தகவல்கள் :

உணவகம் பெயர்: A -1 ஹோட்டல்

முகவரி: பெருமாள் புரம் ரவுண்டானா அருகில், திருநெல்வேலி  

நேரம்: மாலை மட்டும்

ஸ்பெஷல்: பரோட்டா, வீச்சு, கொத்து பரோட்டா சிக்கன் 65, மஜ்ரா சிக்கன், ஜிஞ்சர் சிக்கன்

உணவகம் அறிமுகம் - வசந்தபவன் திருநெல்வேலி

திருநெல்வேலி சென்று நாங்கள் இறங்கும் போது மணி மதியம் மூன்று. நாகர்கோவிலில் இருந்து கிளம்பும் போது மதியம் ஒண்ணரை. அப்போதே சாப்பிட்டு விட்டு பஸ் ஏறலாம் என்றால், " சாப்பிட்டு விட்டு பஸ்ஸில் ஏறினால் நல்லாருக்காது ; அங்கு போய் சாப்பிடலாம்" என மனைவி மற்றும் மகள் கூறி விட்டனர்

திருநெல்வேலியில் நண்பன் வேங்கடப்பன் வந்து காரில் அழைத்து கொள்வதாக சொல்லியிருந்தான். சாப்பிட வில்லை என்றால் வீட்டில் சமைப்பார்கள் என்பதால், சாப்பிட்டு விட்டு ஏறியதாக அவனிடம் பொய் சொல்லியாச்சு. திருநெல்வேலி வந்த இறங்கியதும் பசி வயிற்றை கிள்ளியது

கன்யாகுமரியில் சாப்பிட்டு மோசமான அனுபவம் இருந்தமையால் பஸ்ஸில் வரும்போதே அருகில் விசாரித்து வைத்திருந்தோம் " பஸ் ஸ்டாண்ட் அருகில் இருக்கும் வசந்த பவன் செல்லுங்கள்" என கூறியிருந்தனர். இறங்கியதும் நல்ல ஹோட்டல் என மறுபடி விசாரித்த போதும் அதே ஹோட்டல் பெயரே சொல்லப்பட்டது.

நல்லவேளையாக சாப்பாடு காலியாகமல் இருந்தது. நாங்கள் சாப்பாடு சாப்பிட, பெண் மட்டும் டிபன் சாப்பிட்டாள் (அவள் பரோட்டா சாப்பிடும் போது மட்டும் பாதி பிடுங்கி விட்டேன் ).

பஸ் ஸ்டாண்ட் உள்ளே மற்றும் அதன் அருகே இருக்கும் ஹோட்டல்கள் தரத்தில் அதிகம் கவனம் செலுத்துவதில்லை. முக்கிய காரணம் அவர்களுக்கு ரெகுலர் கஸ்டமர்கள் வர போவதில்லை. எல்லாமே எப்போதோ ஒரு முறை வருவோர் தான். ஆனால் அதனை மீறி இங்கு சாப்பாடு அட்டகாசமாய் இருந்தது

50 ரூபாய்க்கு - அற்புதமான சாம்பார் (ஒவ்வொரு ஊருக்கும் ஒரு வித்யாசம் இருக்கு; இங்கே உள்ள சாம்பார் தனி ருசி ), இரண்டாம் முறை கேட்டு வாங்கி சாப்பிடும் அளவில் மோர் குழம்பு, ரசம், ருசித்து சாப்பிட காய்கறிகள் என அட்டகாசமாய் இருந்தது. கொடுத்த 50 ரூபாய்க்கு செம வொர்த் !

நிற்க. மகள் சாப்பிட்ட பரோட்டாவிற்கு வருகிறேன். மதிய நேரம் அங்கிருந்த பலரும் ஒன்று லஞ்ச் அல்லது பரோட்டா சாப்பிட்டு கொண்டிருந்தனர். அதற்கான குருமா ஸ்மெல் " வா வா " என்று அழைத்தது. பெண்ணிடமிருந்து பாதி பரோட்டா கேட்டு வாங்கி நிறைய குருமா ஊற்றி சாப்பிட்டு பார்த்தேன்.. அடடா ! டேஸ்ட் .. ஏ ஒன் ! பாதி பரோட்டா தர பெண் அழுது தீர்த்தாள் . ரெண்டும் அவளே சாப்பிடணுமாம் !

சில இடத்தில் மட்டும் தான் சாப்பிட்டு முடித்து விட்டு பில் தந்து விட்டு வரும்போது மிக நிறைவாய் கொடுத்த காசு வொர்த் என்ற எண்ணம் வரும்.. அது திருநெல்வேலி வசந்த பவனில் வந்தது !
****
மேலதிக தகவல்கள் 

உணவகம் பெயர்: வசந்த பவன்

இடம்: பேருந்து நிலையம் அருகில், திருநெல்வேலி

ஸ்பெஷல்: மதிய உணவு மற்றும் பரோட்டா

உணவகம் அறிமுகம்: திருச்சி PLA கிருஷ்ணா இன்

திருச்சி மெயின் பஸ் ஸ்டாண்ட் அருகிலேயே உள்ளது PLA கிருஷ்ணா இன் ஹோட்டல். சமீபத்தில் மதிய சாப்பாட்டுக்கு 3 குடும்பங்களாக இங்கு சென்றோம்.

உள்ளே நுழைந்ததும் அட்மாஸ்பியரே அசத்துகிறது. சாப்பாட்டு அறையின் வேலைப்பாடுகள், சேர், சோபா, நமக்கு வைக்கும் செப்பு டம்ளர் என ஒவ்வொன்றும் பார்த்து பார்த்து செய்திருந்த நேர்த்தி , அறையின் அழகான லைட்டிங் என அசத்தலாய் இருந்தது. சாப்பாடு அன் லிமிட்டெட். நிச்சயம் இந்த 3 ஸ்டார் ஹோட்டல் அட்மாஸ்பியருக்கு குறைந்தது 200 ரூபா வாங்குவார்கள் என நினைத்தால் 100 ரூபாய் தான் !

முதலில் சப்பாத்தி வருகிறது. அதற்கான குருமா ஏ. ஒன். தேங்காயை தாராளமாய் அரைத்து விட்டிருந்தனர் (வீட்டில் என்றால் ஏன் எவ்வளவு என்போம்; எப்பவோ ஒரு முறை ஹோட்டலில் என்றால் சாப்பிடலாம்) ஏலக்காய் போன்ற சமாச்சாரங்கள் போட்டு குருமா வாசனையாகவும், டேஸ்ட்டியாகவும் இருந்தது. நம் கூட வந்த மக்கள் - ஆள் ஆளுக்கு குருமா இன்னொரு கப் கேட்டு வாங்கி அடித்து கொண்டிருந்தனர்

சாம்பார், ரசம் போன்றவை வழக்கம் போல் தான் எனினும் சாப்பாட்டில் என்னை ரொம்ப கவர்ந்தது மூணு விஷயங்கள்

முதலில் அப்பளம் - பெரிய்ய்ய சைசில் பார்க்கவே காமெடியா இருந்தது

அடுத்து - வற்றல் குழம்பு - அமர்க்களம்.

கடைசியாய் - பாயசம் - நாங்கள் சென்ற அன்று பால் பாயசம் ரொம்ப அருமையாய் இருக்க, இன்னொரு முறை பாயசம் மற்றும் அப்பளம் கேட்டு வாங்கி அப்பளத்தை தூளாக்கி பாயசத்தில் போட்டு ஒரு வெட்டு வெட்டினேன்.

அனைத்து ஐட்டம்களும் அன் லிமிட்டெட் தான். அதனால் பசியும், திறமையும் உள்ளவர்கள் வீடு கட்டி அடிக்கலாம்.

ஆண்களுக்கு சமமாக நிறைய பெண்களும் இங்கு உணவு பரிமாறுகிறார்கள்.
உணவு பரிமாற குறைந்தது 15 நிமிடமாவது காத்திருக்க வேண்டியுள்ளது அது மட்டுமே மைனஸ்

கார் பார்க்கிங் ஏரியா தாரளமாக இருக்கு. இங்கு லாட்ஜிங்கும் உள்ளது. ரொம்ப டீசண்ட் ஆக இருக்கும் என்றும், தங்கும் இடமாகவும் இது பாப்புலர் ஆகி விட்டதென்றும் கூட வந்த திருச்சி நண்பர்கள் கூறினர்.

திருச்சி பக்கம் சென்றால் நம்பி ஒரு முறை சாப்பிடலாம் !

மேலதிக தகவல்கள் : 

ஹோட்டல் பெயர்: PLA கிருஷ்ணா இன்

திருச்சி மத்திய பேருந்து நிலையம் அருகில்

இணைய முகவரி : http://www.plakrishnainn.com/abouthotel.aspx

உணவகம் அறிமுகம்: ஹோட்டல் Subway, சேமியர்ஸ் ரோடு

சேமியர்ஸ் ரோடு மூப்பனார் மேம்பாலம் மிக அருகே உள்ளது சப் வே என்கிற இந்த ஹோட்டல். நல்ல பசி நேரத்தின் மதியம் இங்கு ஒதுங்கினோம் (நல்ல ஹோட்டல் அருகில் எங்கிருக்கு எனக்கேட்க, இங்கு போக சொன்னவர் மூப்பனார் மேம்பாலம் அருகே இருந்த டிராபிக் காவலர்)

சப்வே என்கிற பெயரே சற்று ஈர்த்தது. ஹோட்டலின் அட்மாஸ்பியரும் கூட சற்று வித்யாசமாக தான் இருக்கு. உட்கார்ந்தால் நம்மை பாதி விழுங்கும் தனி தனி சோபா ஒவ்வொருவருக்கும் உள்ளது. எனக்கு முன் ஒருவர் உணவு வாங்கி கொண்டிருக்க நான் காத்திருக்கும் நேரத்தில் அங்கு ஒட்டியிருந்த தாள்களை கவனித்தேன்

எப்படி ஆர்டர் செய்யணும் என்கிற தலைப்பில் ( How to Order ) இருந்த போஸ்டர் பல விஷயங்களை உணர்த்தியது.

     

முதலில் எந்த பிரேட் என முடிவு செய்யணுமாம். அடுத்து சீஸ் போன்றவை தேவையா இல்லையா என முடிவெடுக்கணுமாம். என்ன சைஸ், காய்கறி எது சேர்க்கணும்  என முடிவெடுத்துவிட்டு குக்கீஸ், கூல் டிரிங்க்ஸ் போன்றவை சொல்லணுமாம்.

" ஏங்க நிஜமாவே சாண்ட்விட்ச் தவிர வேறு ஏதும் இல்லையா? " என்று கேட்க " வித வித சான்ட்விச் தான் இருக்கு" என்றார் சிப்பந்தி ! என்னென்ன இருக்கு என்று கேட்க அவர் சொன்ன பெயர்கள் எதுவுமே அவை என்ன வித சான்ட்விச் என்று உணர்த்தவில்லை

" உங்க கடையில் நன்றாக இருக்கும் வெவ்வேறு வித சான்ட்விச் 3 தாருங்கள் " என்று ஆர்டர் செய்து விட்டு காத்திருந்தேன்

3 வித சாண்ட்விச் தயார் செய்து தந்தார். அவர் தயார் செய்யும் விதம் பார்த்த படி இருந்தேன். மூன்றுக்கும் ஒரே வித பிரெட் தான் எடுத்தார். சீஸ் கட்டிகள் உள்ளே வைத்து சூடு பண்ணினார் (அப்போ தானே சீஸ் கட்டிகள் உருகி கரைந்து விடும் !) வெங்காயம் முட்டைகோசு உள்ளிட்ட சமாச்சாரங்கள் அனைத்துக்கும் தூவினார். பின் கடைசியாய் சேர்த்த விஷயம் தான் மூன்றையும் வேறு படுத்தியது

ஒவ்வொன்றையும் இரண்டாக கட் செய்து தர சொன்னேன் அப்போது தானே நாங்கள் மூவரும் மூன்றையும் ருசி பார்க்க முடியும்?

நாங்கள் சாப்பிட்ட 3 சாண்ட்விச்சில் இரண்டு சான்ட்விச் டேஸ்ட் மிக நன்றாக இருந்தது. என்னடா சாப்பாடு இது; சான்ட்விச்; கூல் ட்ரிங்க்ஸ் இதெல்லாம் அமெரிக்க வாழ்க்கைக்கு தானே ஒத்து வரும்; வயிறு எப்படி நிரம்பும் என்ற யோசனை முதலில் இருந்தாலும் வயிறு சீக்கிரமே அனைவருக்கும் நிரம்பி விட்டது. ஒரு சான்ட்விச் நிச்சயம் ஒருவருக்கு போதுமானது !

வழக்கமான சான்ட்விச் ( 6 இன்ச் அகலம்) நூறு ருபாய்; அதை போல இரு மடங்கு சான்ட்விச் - 160 ரூபாய் தான். குழுவாய் செல்லும்போது இப்படி பெரிய சான்ட்விச் வாங்கி கட் செய்து சாப்பிடுவது தான் புத்திசாலித்தனம் !

சாண்ட்விச்சை விட அதன் பின் சாப்பிட்ட சாக்லேட் குக்கீஸ் மிக சுவையாய் இருந்தது

நிற்க சாப்பிட்டு முடித்து கை கழுவ, வாஷ் பேசின் என்பதே அங்கு இல்லை. கேட்டால் டிஷ்யூ பேப்பரில் துடைத்து கொள்ளுங்கள் என்கிறார்கள். நமக்கு இதெல்லாம் சரிப்படாது; கை கழுவணும் என்றால் ரெஸ்ட் ரூமை காட்டி, அங்கு தான் வாஷ் பேசின் இருக்கு என்றனர்.

மொத்தத்தில் : வித்யாசமான அனுபவத்துக்காக ஒரு முறை செல்லலாம். நிச்சயம் ரீபீட் ஆடியன்ஸ் ஆக முடியாது !

***
முகவரி: 

ஹோட்டல் Subway
சேமியர்ஸ் ரோடு, நந்தனம்

Phone:  9840987653, 64600555, 65681557
***
அண்மை பதிவுகள்:


தொல்லைகாட்சி - குஷ்பூ - ஜோடி பொருத்தம் - டாடி ஒரு சந்தேகம்

விஸ்வரூபம் ஏமாற்றியதா? விமர்சனம்

உணவகம் அறிமுகம்: தேவர் ஹோட்டல், தஞ்சாவூர்

தஞ்சையில் இருக்கும் அருமையான ஹோட்டல்களில் ஒன்று தேவர்ஸ் ! எதனால் அந்த பெயர்; வைத்து நடத்துபவர்கள் அந்த சாதியினரா என்ற விஷயமெல்லாம் தெரியாது ! அந்த அரசியலுக்கு போகாமல், வாங்க ஹோட்டலுக்கு போவோம் !

தஞ்சையிலேயே ரெண்டு மூணு பிராஞ்ச் இருந்தாலும் ராஜப்பா நகர் பிராஞ்ச் தான் சிறந்தது ! காலை 8 மணி முதல் 11 வரை அல்லது மாலை 8 டு 10 சென்று பாருங்கள். நூறு பேர் அமர்ந்து சாப்பிட கூடிய இந்த ஹோட்டலில் அமர இடம் இருக்காது. காத்திருந்து தான் அமரணும் !

அண்ணன் வீட்டுக்கு செல்லும்போது குடும்பத்துடன் கோவில் அல்லது வேறு இடம் சென்று விட்டு வந்தால், இங்கு வந்து தான் குடும்பத்துடன் சாப்பிடுவோம்.

டிபன் வகைகளில் பொங்கல் தான் இங்கு ஸ்பெஷல் (விலை: ரூ. 35); சமீபத்தில் காலை ஆறு மணிக்கு இங்கு சாப்பிட சென்றோம். சுட சுட தந்த பொங்கல் "வாரே வா" என்று இருந்தது. அதிகம் நெய் இன்றியும் கூட தொடும்போதும், சாப்பிடும் போதும் ...வழு வழு என வழுக்கி கொண்டு ஓடும் ! முந்திரி நிறைய போட்டு இருந்தாலும் கூட சாப்பிட்டு முடித்து வயிறு ரொம்ப full ஆன மாதிரி இருக்காது. இங்கு பொங்கல் சாப்பிட்டும் மதியம் சரியான நேரத்தில் பசி எடுப்பது ஆச்சரியம் !

சாம்பார் சின்ன வெங்காயம் நிறைய உரித்து முழுசாய் போட்டு அசத்துவார்கள். தேங்காய் சட்னி பல இடங்களில் சற்று புளித்து போன மாதிரி ஆகிடும். இங்கு கொஞ்சம் கொஞ்சமாய் ஒவ்வொரு மணி நேரத்துக்கும் ஒரு முறை அரைப்பார்கள் போலும் ! எப்போதும் பிரெஷ் - ஆய் மட்டுமின்றி அட்டகாசமாயும் இருக்கும் தேங்காய் சட்னி !

பூரி சுட சுட எடுத்து வந்து மிக ஹைஜினிக் ஆக போர் ஸ்டெப்ஸ்  மூலம் பரிமாறுவார்கள். As usual...  அருமை !

"எக்சல் அடை" என சொல்லி  இரண்டு  அடை தருவார்கள். இந்த இரு அடையும் ஒன்றாய் சாப்பிட்டால் வேறு ஏதும் சாப்பிட முடியாது. வயிறு நிரம்பி விடும் !

மதிய சாப்பாடு - பல நேரம் இங்கு பார்சல் வாங்கி சாப்பிட்டுள்ளோம். ஒரு பார்சல் சாப்பாடு வாங்கினால் மிக தாராளமாய் இரண்டு பேரால் சாப்பிட முடியும் ! தஞ்சை அண்ணன் வீட்டில் தான் எங்க குடும்பத்தினர் கெட் டுகெதர் (மூன்று சகோதரர், ஒரு சகோதரி குடும்பங்கள்) எப்போதும் நடக்கும். வீட்டில் எத்தனை பேர் உள்ளனர் என கணக்கு எடுத்து வரும் எண்ணை இரண்டால் வகுத்து தான் பார்சல் சாப்பாடு வாங்குவது வழக்கம்.

 வார இறுதியில் இங்கு கிடைக்கும் பருப்பு உருண்டை குழம்பு மிக பிரசித்தம். வீடுகளில் மட்டுமே செய்கிற இந்த பருப்பு உருண்டை குழம்பு மிக அருமையாய் இருக்கும் என்றார் அண்ணன். ஒருமுறை அதையும் ஒரு கை பாக்கணும் !

தஞ்சை செல்லும்போது அவசியம் சாப்பிட்டு பாருங்கள் !

கடை: தேவர் ஹோட்டல்
வகை: சைவம்
முகவரி: ராஜப்பா நகர், மெடிக்கல் காலேஜ் ரோடு, தஞ்சாவூர்
***
அண்மை பதிவு


தொல்லை காட்சி: சிவகார்த்தி- லொள்ளு சபா- சூப்பர் சிங்கர் T -20 பைனல்

உணவகம் அறிமுகம்: சுக நிவாஸ், லஸ் கார்னர்

மயிலாப்பூரில் அவ்வப்போது ஷாப்பிங் செல்வது வழக்கம். அப்படி செல்லும்போதெல்லாம் நாங்கள் சாப்பிடும் இடம்: லஸ்ஸில் இருக்கும் சுக நிவாஸ் தான். மதிய சாப்பாடு, மாலை ஸ்நாக்ஸ், இரவு டிபன் என விதம் விதமாய் இங்கு சாப்பிட்டுள்ளோம். விகடனில் வட்டியும் முதலும் தொடரில் ராஜூ முருகன் கூட இக்கடையில் சாப்பிட்டது பற்றி குறிப்பிட்டுள்ளதை நீங்கள் கவனித்திருக்கலாம்)

மிக பழமையான கடை இது. ஹோட்டலில் அமர்ந்து சாப்பிடும் போது அங்கு மாட்டியுள்ள பழைய காலத்து சென்னை படங்கள் மிகவும் ஈர்க்கின்றன.



சுதந்திரத்துக்கு முன் இந்த ஹோட்டல் இருந்த அதே இடத்தின் போட்டோ, அப்போதைய லஸ் கார்னர் போட்டோ, அதில் மனிதர்கள் அணிந்துள்ள உடைகள் - இவற்றை அங்கு செல்லும் ஒவ்வொரு முறையும் சில நிமிடமாவது பார்ப்பது வழக்கம்.

கடைக்கு வெளியே ஐந்து ரூபாய் டீ என்ற போர்டு யாரையும் உள்ளே வர செய்கிற ட்ரிக் !  ஐந்து ரூபாய் டீ மிக சிறிய கோப்பையில் தான் தரப்படும். ரெகுலர் டீ என்றால் பதினைந்து ருபாய். ஒரு முறை மூன்று டீ குடித்து விட்டு பில்லில் நாற்பத்தைந்து என்று பார்த்து அதிர்ச்சியாகி வெளியே ஐந்து ரூபாய் என போட்டிருக்கே என கேட்க அப்புறம் தான் இந்த விஷயம் தெரிந்தது. அதிலிருந்து தெளிவாய் " குட்டி கப் - அஞ்சு ரூபா டீ " என கேட்டு வாங்கிடுறது வழக்கம்

இந்த கடையின் முக்கிய விசேஷமே இங்கு கிடைக்கும் காம்போ பேக்குகள் தான். 3 பஜ்ஜி + டீ, மற்றும் வடை, போண்டா என பல நல்ல காம்போ மாலை நேரங்களில் கிடைக்கும் . மதிய நேரத்திலும் கூட பிரைட் ரைஸ், சப்பாத்தி உள்ளிட்ட காம்போ-க்கள் உண்டு.

சுட சுட போடப்படும் வெங்காய பஜ்ஜி எப்பவுமே அருமை ! வடை, போண்டா போன்றவை மாலை நேரங்களில் சுட சுட கொடுப்பார்கள்.

மதிய லஞ்சில் சாம்பார் மற்றும் வத்தல் குழம்பு ஐயர் வீட்டு ஸ்பெஷல் ஆக செமையாக இருக்கும். அதெப்படி வத்தல் குழம்பு இது போன்ற சில இடங்களில் மட்டுமே அவ்வளவு திவ்யமா இருக்கோ தெரிய வில்லை.



இங்குள்ள டிபன் வகைகளில்,  நமது ஆல்டைம் பாவரைட் உணவுகளான பரோட்டா மற்றும் அடை ஆகியவை விரும்பி சாப்பிடுவேன்

விலை - நிச்சயம் மிடில் கிளாஸ் மக்களின் பர்சை பதம் பார்க்காத அளவில் இருக்கும்.

லஸ் கார்னர் சென்றால் இந்த புராதான ஹோட்டலை ஒரு முறை விசிட் அடியுங்கள். சென்னையின் அற்புத பழைய படங்களுடன் நல்ல உணவை ரீசனபில் விலையில் சாப்பிட்டு வாருங்கள் !

*********
அண்மை பதிவு:

வானவில் + தொல்லை காட்சி: எஸ். ரா Vs சாரு, நீயா நானா, பியா இன்னபிற

உணவகம் அறிமுகம்: தலப்பாக்கட்டி வேளச்சேரி

தலப்பாக்கட்டு என்கிற பிரியாணி கடை ஒவ்வொரு ஏரியாவிலும் நான்கைந்து இருக்கிறது. இவையெல்லாம் தாங்களாகவே அந்த பெயர் வைத்து கொள்ளும் கடைகள் ! ஆனால் தலப்பாக்கட்டி என்கிற பெயரில் உள்ளது நிஜ தலப்பாக்கட்டி க்ரூப் தான். சென்னையில் எக்மோர், வேளச்சேரி உள்ளிட்ட சில இடங்களில் இவர்கள் கடை உள்ளது. மேலும் சில மால்களிலும் கூட இவர்கள் பிரான்ச் இருப்பதாக அறிகிறேன்.

முதலிலேயே ஒன்றை சொல்லி விடுகிறேன்: நண்பர் கேபிளுக்கு தலப்பாக்கட்டி பற்றி பெரிதாய் நல்ல அபிப்ராயம் இல்லை. போலவே நமது நண்பர் மெட்ராஸ்பவன் சிவாவும் போரூரில் உள்ள ஒரு mall-ல் இவர்கள் பிரியாணி சாப்பிட்டு விட்டு " மட்டன் பிரியாணி என்று சொல்லி போடுறாங்க. காசு மட்டும் நிறைய வாங்குறாங்க; ஆனா உள்ளே மட்டன் பீசை இல்லை" என்று வருத்தப்பட்டார்.

நான் சாப்பிட்டது மூன்று முறை - வேளச்சேரி - தலப்பாக்கட்டியில். மூன்று முறையும் எனக்கு பிடித்தே இருந்தது. ஒவ்வொரு பிரான்ச்சுக்கும் சுவை, அளவு எல்லாம் மாறுமா என்று தெரியலை. இங்கு பார்ப்பது வேளச்சேரி தலப்பாக்கட்டியில் சாப்பிட்ட அனுபவம் மட்டுமே !
**
முதல்முறை நண்பர் - ரகுவுடன் சென்று சாப்பிட்டேன். கடை காலை பதினோரு மணிக்கு துவக்குகிறார்கள். மதியம் ஒரு மணிக்கு மேல் வார நாளிலும் கூட்டம் அதிகம் வந்துடுது என்பதால் பன்னிரெண்டரைக்கே சென்று விட்டோம்.

இருவருக்கும் அரை பிளேட் சிக்கன் பிரியாணி மற்றும் சிக்கன் க்ரேவி ஆர்டர் செய்தோம்.

பிரியாணி வருவதற்குள் அங்குள்ள ambience வெகுவாக கவர்ந்தது. முதன் முதல் 1957-ல் திண்டுக்கல்லில் இவர்கள் கடை துவக்கியது , அப்போது எப்படி பிரியாணி தயாரித்தார்கள் போன்ற பழங்கால படங்கள் பார்க்க சுவாரஸ்யமாய் இருக்கிறது.

நாகசாமி நாயுடு என்பவர் 1957-ல் துவக்கிய ஆனந்த விலாஸ் பிரியாணி ஹோட்டல். நாகசாமி நாயுடு எப்போதும் தலையை சுற்றி "தலைப்பா " (டர்பன்) கட்டியிருப்பாராம். அதனால் இவர் துவக்கிய ஹோட்டல் பெயரும் பிற்காலத்தில் தலப்பக்காட்டி பிரியாணி ஆனது. இவர்கள் பறக்கும் சிட்டு என்கிற சீராக சம்பா அரிசியை வைத்து மட்டுமே பிரியாணி தயார் செய்கிறார்கள் போன்ற விபரங்கள் அங்கள்ள படங்கள் மற்றும் வரிகள் மூலம் அறிய முடிகிறது.

பிரியாணி மற்றும் க்ரேவி வந்து சேர்ந்தது. பிரியாணிக்கு தொட்டு கொள்ள அருமையான குருமா வேறு அவர்கள் தருகிறார்கள். எனவே நாங்கள் க்ரேவி வாங்கியிருக்கவே வேண்டாம் !

நிச்சயம் மற்ற கடை பிரியாணிகளை விட (இவர்களின் பிற பிரான்ச்சும் சேர்த்து சொல்கிறேன்) இவர்கள் சுவை வித்யாசமாகவும், அருமையாகவும் இருக்கிறது. பிரியாணி வரும் முன் சுவாரஸ்யமாய் பேசி கொண்டிருந்த நானும் ரகுவும் பிரியாணி சாப்பிட ஆரம்பித்ததும் காரியத்தில் கண்ணாய் இருந்தோம்.

சிக்கன் பீஸ்கள் எதுவும் சக்கையாக இல்லாமல் அற்புதமாய் இருந்தது. அவர்கள் இலவசமாய் தரும் க்ரேவி கூட சூப்பர் !

அரை பிளேட் பிரியாணியில் வயிறு நிரம்பி விடுகிறது. அதற்கு மேல் எதுவும் சாப்பிட வில்லை.

வேளச்சேரியில் இருக்கும் பதிவர் ரகு இங்கு அடிக்கடி சாப்பிட ஒரே ஒரு காரணம் சொன்னார் : " மத்த இடத்தில் பிரியாணி சாப்பிட்டா நைட்டு வரை வயிறு மந்தமா இருக்கும். நைட்டும் ஒழுங்கா சாப்பிட முடியாது. இங்கு சாப்பிட்டா நைட்டு வழக்கம் போல பசிக்க ஆரம்பிச்சுடும். அத்தோட எப்பவும் வயிறை பதம் பாத்ததே இல்லை "

உண்மை தான் ! அதன் பின் குடும்பத்துடன் இரு முறை சென்றபோதும் அவர்களும் மிக என்ஜாய் செய்தனர். அம்முறை மட்டன் பிரியாணி டேஸ்ட் செய்தோம். நன்றாகவே இருந்தது.

சிற்சில விமர்சனங்கள் இருந்தாலும் மக்கள் வெளியில் காத்திருந்து இடம் காலியான பின் சாப்பிட்டு செல்கிறார்கள்.

தலப்பாக்கட்டி பிரியாணி- வேளச்சேரியில் ஒரு முறை சாப்பிட்டு பாருங்கள் !
***
மேலதிக தகவல்கள்:

முகவரி :
38/1 பை பாஸ் ரோடு
வேளச்சேரி, சென்னை-42

Wesbite: http://www.thalappakatti.com

பிரியாணி விலை:

சிக்கன் அரை பிளேட் :  Rs.142  (Parcel: Rs. 150)
மட்டன் அரை பிளேட் :  Rs.155  (Parcel: Rs.165)
 ******************
டிஸ்கி 

கார்பரேட் கல்ச்சர் - நமக்கு நல்லது செய்கிறதா? கெடுதல் செய்கிறதா? இந்த வார நீயா நானா தலைப்பு -

நானும் அலவலக நண்பர்கள் சிலரும் பேசியுள்ளோம் ; இன்று இரவு 9 மணிக்கு விஜய் டிவியில் வரவுள்ளது (ப்ரோமோ வர ஆரம்பித்து விட்டதாக உடன் கலந்து கொண்ட நண்பர் சொன்னார்; பயணத்தில் இருப்பதால் ப்ரோமோ இன்னும் நான் பார்க்கலை )

ஒவ்வொரு அணியிலும் பேசிய ஒருவருக்கு Best participant - என பரிசு கொடுப்பார்கள்; கார்பரேட் கல்ச்சர் - நல்லது செய்கிறது என்று பேசிய அணியில் அப்பரிசு எனக்கு கிடைத்தது

ஷூட்டிங் அன்று மாலை ஊருக்கு போக வேண்டிய அவசரம்; பாதியில் கிளம்ப பார்த்தேன். Break விடாததால் தொடர்ந்து இருக்க வேண்டியதானது ; சீக்கிரம் கிளம்பினால் கிப்ட் கிடைச்சிருக்காது ! கிப்ட் - டேபிள் டாப் வெட் கிரைண்டர் என்று சொன்ன நினைவு ; அட்டை தான் அப்போது தருவர் ; கிப்ட் பின் அனுப்புவர் போலும்; நிகழ்ச்சி முடிந்து அவசரமாய் ஓடியவனை சட்டையை பிடித்து அட்ரஸ் கொடுத்துட்டு போங்க என்றதால் பரிசை நிஜமா அனுப்புவாங்கன்னு நினைக்கிறேன் :)

எங்கள் அணியில் பேசியதை விட எதிர் அணியில் பலர் நன்கு பேசியுள்ளனர் நான்கைந்து பேர் கணினி துறைக்கு முழுக்கு போட்டு விட்டு விவசாயம் செய்கிறார்கள்; எதிர் அணியில் பலரும் 10 வருடம் வேலை பார்த்த பின் கார்பரேட் வேண்டாம் என்று உதறி தள்ளி தற்போது விவசாயம் உள்ளிட்ட வேறு தொழில் செய்கிறார்கள். குறிப்பாய் கெளதம் என்ற இளைஞர் கதை அவசியம் கேளுங்கள் ! Inspirational !!

இப்போல்லாம் ரெண்டு மணி நேரம் ( 9 to 11) நீயா நானா ஓட்டுறாங்க. முடிந்த வரை மட்டுமாவது பாருங்க;

இணையத்தில் நிகழ்ச்சி லிங்க் கிடைத்தால் பின் பகிர்கிறேன்

இன்று இரவு 9 மணி - விஜய் டிவி பாருங்கள் ! உங்கள் கருத்துகளை பின் சொல்லுங்கள் !

நன்றி !

உணவகம் அறிமுகம் : ஸ்பைஸ் மாஸ்டர்ஸ் வேளச்சேரி

இந்த கடையை அது கையேந்திபவனாக இருந்த காலத்திலிருந்து அறிவேன். கடந்த சில ஆண்டுகளில் செம வளர்ச்சி ! கையேந்தி பவனில் இருந்து மாறி தரை தளத்தில் அமர்ந்து சாப்பிடும் கடையை மாற்றினார்கள். இப்போது மாடி கட்டி அங்கு ஏ. சி ரெஸ்டாரன்ட் கொண்டு வந்துள்ளனர். இவை அனைத்தும் இரண்டு அல்லது மூன்று ஆண்டுகளில் நிகழ்ந்துள்ளது ! என்னா வளர்ச்சி !

வேளச்சேரியில் தங்கியிருக்கும் ஆயிரக்கணக்கான பேச்சிலர்களுக்கென ஏராளமாய் சிறு கடைகள் உள்ளன. அப்படி ஒரு கடையாக வந்தது தான் இந்த கடையும். கடையின் சிறப்பம்சமே விலை மிக குறைவு டேஸ்ட் மிக அருமையாய் இருக்கும் என்பது தான்.

மதிய சாப்பாடு 55 ரூபாய். லிமிட்டட் சாப்பாடு என்றாலும், அவர்கள் தரும் உணவுக்கு மேல் நாம் சாப்பிடவே முடியாது

சப்பாத்தி, குருமா, இரண்டு காய்கள், சாம்பார், கார குழம்பு (அல்லது மோர் குழம்பு), ரசம், மோர் மற்றும் ஒரு ஸ்வீட். இதில் சாம்பார் மற்றும் கார குழம்பு அருமையாய் இருக்கும். ரசம் சில நேரம் சுமார் தான்  !

டிபன் வகைகளில் இவர்களது வெஜிடபிள் பிரியாணி Very டேஸ்ட்டி .

கொத்து பரோட்டா அல்லது சில்லி பரோட்டா இவற்றுக்கு நானும் எனது பெண்ணும் விசிறிகள்.

பரோட்டாவை பிய்த்து போட்டு கைமா செய்து , நிறைய குருமா ஊற்றி நம் கண் முன்னே கல்லில் போட்டு சற்று வேக வைத்து தருவார்கள். குருமா நன்கு பரோட்டவிற்குள் சென்று ஊறி , அதன் சுவையை கூட்டி விடும். ஒரு கொத்து பரோட்டா வாங்கி சாப்பிட்டால் வேறு எதுவுமே சாப்பிட வேண்டாம் !

மாலை வேளைகளில் கிடைக்கும் போண்டா, வடை மற்றும் வடக்கத்திய ஸ்நாக்ஸ் வகைகளும், பில்டர் காபியும்  பலமுறை சுவைத்து ரசித்திருக்கிறோம் .

முன்பு பேச்சிலர் ஆண்கள் மட்டுமே வந்த காலம் மாறி இப்போது குடும்பங்களும் கூட நிறைய பேர் வந்து சாப்பிடுகிறார்கள்

மிக ரீசனபில் விலையில் நல்ல சுவையுடன் இருப்பதால் நாங்கள் மிக அதிக முறை செல்லும் ஹோட்டல்களில் இதுவும் ஒன்று !
****
முகவரி:

ஸ்பைஸ் மாஸ்டர்ஸ்
பைபாஸ் ரோடு
வேளச்சேரி (மோகனா மோட்டார்ஸ் அருகில்).

உணவகம் அறிமுகம்: செலிபிரேஷன்- வேளச்சேரி

வேளச்சேரியில் ஏற்கனவே "பபே " சாப்பாட்டுக்கு பெயர் போனது " பிளமிங்கோ ஹோட்டல்". இது பற்றி இங்கு ஏற்கனவே எழுதி உள்ளோம். இப்போது அதற்கு போட்டியாய்,  விஜயநகர் சிக்னல் நேர் எதிரே  செலிபிரேஷன் என்கிற இந்த கடை வந்துள்ளது.

வாசலில் பேருந்துகளும், ஷேர் ஆட்டோக்களும் நிற்பதால் காரில் வருவோர் அவற்றை தாண்டி வண்டியை உள்ளே எடுத்து செல்ல பிரம்ம பிரயத்தன படவேண்டும் ! பார்க்கிங் ஓரளவு இருக்கு. ஆனால் பஸ் ஸ்டாண்ட் ஒட்டி இருப்பதாலும் ஷேர் ஆட்டோக்கள் வழி விடாமல் நிற்பதாலும் இந்த பிரச்சனை !

வேளச்சேரியின் பல்வேறு இடங்களில் " 250 ரூபாய்க்கு நான் வெஜ் பபே" என போர்டு வைத்துள்ளனர். இங்கு கடை வெளியிலும் கடை பெயரை விட இந்த போர்டு தான் பெரிதாக ஈர்க்கிறது.

ஹோட்டலுக்குள் ஆம்பியன்ஸ் நன்றாக இருக்கிறது. ஹோட்டல் மாடியில் மூன்னூறு பேர் அமரும் படி மினி ஹால் தயாராகி வருகிறது.

சரி நாம் சாப்பாட்டுக்குள் செல்வோம்

நான் வெஜ் தான் மெயின். இவ்வளவு பணம் தந்து நான் வெஜ் ஒரு கை பார்க்கணும் என்று தான் மக்கள் வருகிறார்கள். துரதிர்ஷ்ட வசமாய் நானும், உடன் வந்த தேவாவும் புரட்டாசி என்பதால் நான் வெஜ் பக்கம் செல்ல வில்லை.

வெஜ் மெனு இப்படி இருந்தது

வெஜ் சூப்
கோபி மன்ஜூரியன்
பிந்தி மசாலா
புல்கா / குல்ச்சா
பீஸ் புலாவ்
ஜீரா தால்
சாதம்
வெஜ் கறி
தயிர் சாதம்

**

இதில் நாங்கள் ரொம்ப ரசித்து சாப்பிட்டது கோபி மன்ஜூரியன் மற்றும் பீஸ் புலாவ்.

கோபி மன்ஜூரியன் ஸ்பைசி ஆகவும் முறுகலாகவும் இருந்தது.

பீஸ் புலாவ் செம டேஸ்ட்டி ! வெஜ் கறியும் செம சுவை ! மெனுவில் காய்கறிகள் என்று தனியே ஏதும் இல்லாதது ஏமாற்றம்.

சூப் ஜஸ்ட் ஆவரேஜ் தான். தயிர் சாதமும் அப்படியே !

சாப்பிட்டு முடித்ததும் ஐஸ் கிரீம் மற்றும் புரூட் சாலட் ஒரு ரவுண்ட் !

நான் வெஜ் என்றால்

சிக்கன் பிரியாணி,
மீன் கறி,
நெத்திலி Fry,
சிக்கன் காடை

என செம வேட்டை இருக்கு ! நான் வெஜ் சாப்பிட்டு வந்த சில ஆபிஸ் நண்பர்கள் நன்றாய் இருப்பதாக சொன்னார்கள். நான் நான் வெஜ் சாப்பிட்டால் " வானவில்லில்" எப்படி இருந்தது என சொல்கிறேன் !

மொத்தத்தில்:
வெஜ் பபே - பொறுத்தவரை - பிளமிங்கோ தான் குட்- நான் வெஜ் பபே என்றால் மட்டுமே இங்கு வரலாம் என்று தோன்றுகிறது !

உணவகம் அறிமுகம் : மடிப்பாக்கம் துர்கா பவன்

"எந்தெந்த இடத்தையோ, ஹோட்டலையோ அறிமுகம் செய்கிறோம்; நம் வீட்டுக்கருகே இருக்கும் , நாம் அடிக்கடி உணவு வாங்கும் இடத்தை அறிமுகம் செய்யா விட்டால் எப்படி?"என நட்ட நடு ராத்திரி மனசாட்சி கேள்வி கேட்டதால் இதோ இந்த பதிவு ! (பய புள்ளை ஒரு பதிவு தேத்திட்டு பேச்சை பாரு !)

துர்கா பவன் ! சுத்த சைவ உணவகம் . மடிப்பாக்கம் பொன்னியம்மன் கோவில் அருகில் உள்ளது. கீழ்கட்டளை மெயின் ரோடிலிருந்து வேளச்சேரிக்கு செல்லும் பேருந்துகள் மடிப்பாக்கம் உள்ளே புகுந்து செல்லும். அப்போது பொன்னியம்மன் கோவில் என்கிற நிறுத்தத்துக்கு அருகில் தான் உள்ளது இந்த ஹோட்டல். பிரபல பதிவர் யுவகிருஷ்ணா வீடு இங்கிருந்து கூப்பிடும் தூரம் தான் !

இந்த இடத்தில் எப்போதுமே ஒரு ஹோட்டல் இருந்து வருவதை கடந்த பத்து வருடமாக கவனித்து வருகிறேன். ஆனால் இந்த ஹோட்டல் வந்து ஐந்து அல்லது ஆறு வருடம் இருக்கலாம்

பெயருக்கேற்ற படி இது சுத்த சைவ ஹோட்டல். இங்கு நாங்கள் குடும்பத்துடன் அமர்ந்து சாப்பிட்டது ஓரிரு முறை தான் இருக்கும். ஆனால் இங்கு பார்சல் வாங்கி சாப்பிட்டது குறைந்தது ஐம்பது முறைக்கு மேல் இருக்கும் !

பிரைட் ரைஸ், பரோட்டா மற்றும் இடியாப்பம் இங்கு நன்றாக இருக்கும்

***
நாங்கள் பெரிதும் விரும்புவதும், அடிக்கடி வாங்குவதும் இட்லி தான் !

சூடாய் இருக்கும் எதுவும் நம்பி சாப்பிடலாம் என்பது வீட்டம்மா அடிக்கடி சொல்வது. இட்லிக்கு தொட்டு கொள்ள சாம்பார் சூப்பர். (கொஞ்சம் எக்ஸ்ட்ரா கேட்டு வாங்கி, மறு நாள் காலை டிபனுக்கு வீட்டில் சட்னிக்கு பதில் இந்த சாம்பார் சுடவைத்து தொட்டு கொள்வது தொழில் ரகசியம் !) புதினா சட்னி ஒன்று எப்போதும் தருவார்கள் அதுவும் நன்றாய் இருக்கும்.

தேங்காய் சட்னி மட்டும் பார்சல் வாங்கி வீட்டுக்கு வந்து சாப்பிட்டால் தேறவே தேறாது. அதுக்குள் புளிப்பு சுவை வந்துடும்.

இடியாப்பம் வீட்டில் செய்து சாப்பிடுவது கடினம் என நினைப்போர் அதனை prefer செய்வார்கள். இடியாப்பத்துக்கு தேங்காய் பால் தருவதில்லை. குருமா மட்டும் தான் !

போண்டா உள்ளிட்டவை மாலையில் சுட சுட போடுவார்கள் ! செமையாக இருக்கும் ! மாலை நேர வடை மற்றும் போண்டா மிஸ் பண்ணாமல் சாப்பிட வேண்டிய ஐட்டங்கள் !

பொங்கல் நெய் நிறைய ஊற்றி சூப்பராய் இருக்கும்.

உணவுகள் குறைந்த விலையுள்ள இந்த ஹோட்டல் மடிப்பாக்கம் காரர்கள் குடும்பத்தோடு அமர்ந்து சாப்பிடும் ஒன்றாய் உள்ளது.

மடிப்பாக்கம் பக்கம் வரும்போது இங்கே ஒரு முறை சாப்பிட்டு பாருங்க ! Cheap and Good !
****
டிஸ்கி : சென்னையில் நாளை மாலை ஐந்து மணிக்கு மெரீனா பீச் காந்தி சிலை அருகில் பதிவர் சந்திப்பொன்று நடக்க உள்ளது. கலந்து கொள்ள விருப்பமுள்ளவர்கள் கலந்து கொள்ளலாம். மேலதிக தகவலுக்கு இங்கே பார்க்கவும் !