வானவில்: மங்காத்தா: வடகரை வேலன்:பதிவர் இதழ்

பார்த்த படம்: மங்காத்தா

நிறைய எதிர்பார்ப்போடு பார்த்தேன் மங்காத்தா. ஒரு வேளை அது தான் தவறோ என்னவோ? படம் என்னை மட்டுமல்ல, என் கூட பார்த்த யாருக்குமே அதிகம் பிடிக்க வில்லை. ஹீரோ வழக்கமான நல்லவனாய் இல்லாமல் முழுக்க முழுக்க கெட்டவனாய் இருப்பது வித்யாசம் தான். அஜித் நடிப்பு, சிரிப்பு மற்றும் டான்ஸ் ரசிக்க முடிகிறது. ஆனால் கதை தலை சுற்ற வைக்கிறது. பல விஷயங்கள் புரிய வில்லை. படம் முடியும் போது தான் அவை ஓரளவு புரிகிறது. அதற்குள் தலை வலி வந்து விடுகிறது. இடைவேளைக்கு பின் அஜீத் பேசும் வசங்களில் பாதிக்கு மேல் சென்சார் கட் செய்திருப்பதிலேயே பட குழுவினரின் சமூக அக்கறை தெரிகிறது. படம் நிச்சயம் ஹிட் என்பதை மறுப்பதற்கில்லை. அதற்கு முக்கிய காரணம் அவர்கள் ரிலீஸ் செய்ய தேர்ந்தெடுத்த நேரம் ! ஐந்து நாள் விடுமுறையில் ரிலீஸ் செய்து நல்ல அறுவடை செய்து விட்டார்கள். மேலும் படம் சற்று வித்யாசமாக இருக்கவும் ஹிட் ஆகி விட்டது. விஜய்யின் குருவி, அஜீத்தின் ஆஞ்சேநேயா போன்ற படங்கள் அளவு அறுவை இல்லா விடினும், முழுக்க என்ஜாய் செய்து பார்க்க முடிய வில்லை.

வாசித்த விஷயம் : நண்பர் வடகரை வேலன் பஸ்ஸில் பகிர்ந்தது :

//நேற்றிரவு 10.30 அளவில் அம்மா பாத்ரூமில் தவறி விழுந்து மேல் நெற்றியில் நல்ல அடி. 4 அங்குலநீளத்தில் அரை அங்குலம் ஆழமான காயம். ரத்தம் கொட கொடவென கொட்டியது. அருகில் இருந்த மருத்துவமனைக்கு அழைத்துச் சென்றால் ரத்தம் கசிவதைப் பார்த்தவர்கள் “இங்கே ட்ரீட் பண்ண முடியாது ” என்றார்கள்.

மருத்துவமனையில் அட்மிட் செய்து சிகிட்சை செதோம். தையல் போட்டு விட்டு டாக்டர் சொன்னது , “பெரிய அள்வில் பாதிப்பில்லை, இரண்டு நாட்கள் பார்க்கலாம் வீக்கம் ஏதுமில்லை என்றால் ஒண்ணும் பிரச்சினை இருக்காது” ஸ்கேன் செய்து பார்த்ததில் பெரிதாக ஏதும் இல்லை.

நல்லவேளையாக பாத்ரூம் கதவு திறந்திருந்ததால் சரியான நேரத்திற்கு சிகிட்சை அளிக்க முடிந்தது. பூட்டி இருந்திருந்தால் ? நினைக்கவே பயமாக இருக்கு.

முடிந்த வரை பெரியவர்களுக்குத் தனி பாத்ரூம் வசதி செய்து கொடுத்து உள்பக்கம் தாளிட வேண்டாம் எனச் சொல்வது நல்லது. அல்லது பாத்ரூம் கதவு பிவிசியில் போடலாம் எளிதில் உடைத்து உதவ முடியும்.//

கடைசி இரு வரிகள் அனைவரும் அவசியம் அறிய வேண்டியது. இங்கு பகிர காரணமும் அதுவே.

சென்னை ஸ்பெஷல் : அசோக் நகர் ஆஞ்சநேயர் கோயில் 

அசோக் பில்லரில் இருந்து ஐந்து நிமிட நடையில் அடைய முடியும் இந்த கோயிலை. பெரிய உயரத்துக்கு நிறைந்து இருப்பார் ஆஞ்சநேயர். பாச்சிலர் ஆக அசோக் நகரில் இருந்த போது அடிக்கடி செல்வது வழக்கம்.

நல்ல பிரசாதம் இலவசமாய் கிடைக்கும் !! வேண்டுதலை நிறைவேற்றும் சக்தி வாய்ந்த அனுமார் என்று கேள்விபட்டுள்ளேன். நீங்களும் ஒரு முறை சென்று பாருங்கள் !!

ஆனந்த் எஸ்.எம்.எஸ் கார்னர்

ஆனந்த் என்று ஒரு நண்பர். என்னோடு பத்து வருடங்களுக்கு முன் பணி புரிந்தவர். இப்போது எனக்கு எக்ஸ்- கொலிக் ஆன போதும், பல ஆண்டுகளாக தினம் காலை ஒரு நல்ல எஸ். எம். எஸ் அனுப்புவார். நம்பிக்கை தரும் விதத்தில் இருக்கும் இந்த எஸ்.எம்.எஸ்ஸில் பலவற்றை டெலிட் செய்ய முடியாமல் மொபைலில் வைத்திருக்கிறேன். சிலவற்றை இங்கு பகிர்கிறேன். ஆனந்த் நிச்சயம் இவற்றை தானாக எழுதுவதில்லை. அவருக்கு இதே போன்ற எஸ். எம். எஸ் அனுப்பும் நண்பர்கள் உள்ளனர். ஆனந்த் என்கிற நல்ல மனிதருக்காக இந்த பகுதிக்கு ஆனந்த் எஸ்.எம்.எஸ் கார்னர் என்றே பெயரிட்டுள்ளேன்

We came to earth with no friends and enemies. Situation only makes people good or bad. Forgive people who hurt you. Nothing is much greater than that in life.

பதிவர் நடத்தும் மாத இதழ் : தென்றல்

பதிவர் குடந்தைமணி தென்றல் என்கிற மாத இதழ் ஒன்றை துவங்கியுள்ளார். இதில் பல்வேறு பதிவர்களின் படைப்புகள் வெளிவந்துள்ளன. அவற்றில் பல அவர்கள் ப்ளாகுகளில் வந்தவை. சம்பந்தப்பட்ட பதிவரிடம் அனுமதி பெற்று வெளியிட்டுள்ளார் குடந்தைமணி. வீடு திரும்பலில் அவ்வப்போது பகிர்ந்த "சட்ட சொல்" பல இந்த ஆகஸ்ட் மாத இதழில் வெளிவந்துள்ளது. ஆனால் கடைசி பக்கத்தில் நமது ப்ளாக் முகவரி தரும் போது சிறு குழப்பம் நிகழ்ந்து விட்டது. நண்பரிடம் போனில் சொன்னதும், அடுத்த முறை சரி செய்து விடுவதாய் சொன்னார். பதிவர் ஒருவர் இத்தனை முயற்சி எடுத்து புத்தகம் கொண்டு வருவது மகிழ்ச்சி தரும் விஷயம். வாழ்த்துக்கள் அன்புமணி. தொடருங்கள் !!

ரசித்த பாடல் :"மாசமா " (எங்கேயும் எப்போதும்) 

"இவ்வளவு சுவாரஸ்யமான காட்சிப்படுத்தல், சமீபத்தில் தமிழில் வேறு பாடலில் பார்க்கவில்லை" என சென்ற பதிவில் தான் "கோவிந்தா" பாடல் குறித்து சொல்லியிருந்தேன். எழுதி அடுத்த சில நாட்களிலேயே அந்த பாட்டை விட, அல்லது அதற்கு சமமான ரசனையுள்ள இன்னொரு பாடலையும் பார்க்க முடிந்தது. மாசமா என்கிற இந்த பாட்டும் கூட எங்கேயும் எப்போதும் படத்தில் இடம் பெற்ற பாடல் தான். படம் வெளியாகும் முன்னே பார்த்த இந்த இரு பாடல்கள் வைத்தே இயக்குனர் மீது மிகுந்த அபிமானம் வந்து விட்டது.

வெறும் தலையாட்டலை வைத்தே ஒரு பாடல் முழுதும் ரசிக்க வைக்க முடியுமா? முடியும் !! அது தான் இந்த பாடலில் நடந்துள்ளது. பாடல் பிடிக்க இன்னொரு காரணம்: பாடல் ஐந்தாண்டுகள் நான் கல்லூரியில் படித்த, சுற்றி திரிந்த திருச்சியில் எடுக்க பட்டது. திருச்சி சாலைகளை, ஆர்ச்களை, மலைக்கோட்டைக்கு அருகில் படிக்கட்டுகளுடன் கூடிய சாலைகளை பாடலில் பார்க்க செமையாக உள்ளது !

எனக்கு வந்த கனவு

எங்கள் வீட்டில் எனக்கு பெண் பார்க்கிறார்கள். (கனவில் எனக்கு கல்யாணம் ஆகலீங்கோ!!) முதல் முறை பெண்ணை தூரத்திலிருந்து பார்த்து "ஓகே" சொல்லி விடுகிறேன். அடுத்த முறை அதே பெண் என்னை பார்க்க அலுவலகம் வருகிறது. (இத பாருடா!) நான் அப்போது டைடல் பார்க்கில் உள்ள ஒரு அலுலகத்தில் வேலை பார்க்கிறேன். (க்கும்!!) என்னை பார்க்க வந்த பெண்ணை ரிசப்ஷனில் அமர்ந்திருக்கும் போது பார்த்து விட்டு அதிர்ந்து போகிறேன். பெண் செம குண்டாக, கிராமத்து பெண்ணாய் இருக்கார். "தூரத்திலிருந்து பார்த்து சரி என சொன்னது தப்பா போச்சே; கிட்ட இருந்து பார்த்திருக்கணும்" என எண்ணிக் கொண்டு, அந்த பெண்ணை பார்க்காமல் நைசாக நழுவுகிறேன்.

எனது அண்ணன்- அண்ணியை பார்த்து "பெண்ணை எனக்கு பிடிக்கலை" என்கிறேன் "என்ன இப்படி சொல்றே; புடவை எல்லாம் எடுத்தாச்சு" என அண்ணி பட்டு புடவையை காட்டுகிறார். புடவை என்னவோ நல்லா தான் இருக்கு! அப்போது பெண்ணின் அப்பாவும் இருக்கிறார் . அவர் கிராமத்தில் பெரிய ஆள் ! அவரிடம் "கல்யாண வேலைகளை கொஞ்சம் ஸ்டாப் பண்ணுங்க, எனக்கு இப்போ கல்யாணம் வேண்டாம்னு நினைக்கிறேன்" என சொல்ல, அவர் என்ன சொன்னார் என கேட்பதற்குள் முழிப்பு வந்துடுச்சு !! கொஞ்ச நேரம் பயமாகிடுச்சு ! "டேய் உனக்கு கல்யாணம் முடிஞ்சு 13 வருஷம் ஆச்சு. பேசாம தூங்கு" என தனக்கு தானே சொல்லிட்டு மறுபடி "கொர்..கொர்.."

இந்த கனவை காலை எழுந்து, சமைத்தவாறே, ஹவுஸ் பாஸிடம் சொல்ல அவர் சொன்ன கமன்ட்: "பேசாம அந்த பெண்ணையே நீங்க கல்யாணம் பண்ணிருக்கலாம். செம மேட்சா இருந்திருக்கும் " :((