தெனாலி ராமன் - சினிமா விமர்சனம்

வடிவேலு நடித்து சில ஆண்டுகள் கழித்து ஒரு படம்... அதுவே முதல் நாள் - முதல் காட்சி பார்க்க காரணம்...

நாகேஷ், கவுண்டமணிக்கு பிறகு என்னை அதிகம் கவர்ந்த - அவர்களை விடவும் இப்போது நான் அதிகம் ரசிக்கும் காமெடியன் வடிவேலு. இன்றைக்கும் சிரிப்பொலி மற்றும் ஆதித்யாவில் அவரது காமெடி பார்த்து விழுந்து விழுந்து சிரிப்பது தொடர்கிறது.

ஜெ -வை ஒரு தேர்தலில் எதிர்த்தார் என - ஒட்டுமொத்த சினிமா உலகமும் மார்க்கெட் உச்சத்தில் இருந்த அவரை ஒதுக்கி வைததது காலக்கொடுமை ! நம்ம ஊரில் தான் இப்படிப்பட்ட விஷ(ய)மெல்லாம் நடக்கும்..

இருக்கட்டும் தெனாலி ராமனுக்கு வருவோம்..

ஒரு ஊரில் ஒரு ராஜா.. .(நம்ம வடிவேலு) செம ஜாலியாக வலம் வருகிறார். மக்கள் கஷ்டம் அவருக்கு தெரியாததால் புரட்சி படை ஒன்று அவரை கொல்ல நினைக்கிறது. இன்னொரு வடிவேலு அந்த புரட்சி படையை சேர்ந்தவர்... அரண்மனைக்குள் வந்து ராஜாவையும் மாற்றி, மக்களையும் எப்படி காக்கிறார் என்பது கதை...


ஹலோ.. நான் சொன்னது 23- ஆம் புலிகேசி கதை மட்டுமல்ல ... தெனாலி ராமன் கதையும் இதே தான் !

அவுட்லைன் மட்டும் அப்படியே வைத்து கொண்டு - நாம் சிறுவயதில் கேட்ட தெனாலி ராமனின் குட்டி கதைகளை மானாவாரியாகமிக்ஸ் பண்ணி அடித்துள்ளனர்!

துவக்கம் ஓரளவு ரசிக்க வைத்தாலும் போக போக தெரிந்த காட்சிகள்; அதை ஜவ்வு மாதிரி இழுப்பது..என நோகடித்து விடுகிறார் புது இயக்குனர்.

" எல்லாம் நன்மைக்கே " என்று ஒரு கதை நாம் கேள்விபட்டிருப்போம்.. வேட்டைக்கு போகும் முன் - ராஜா கை வெட்டுப்பட - அதனால் காட்டு வாசிகள் அவரை கொல்லாமல் விடும் கதை.. படம் முடியும் தருவாயில் இதனை 15 நிமிடம் பிளாஸ்பேக்காக ஓட்டுகிறார்கள் .. முடியல ! (அதில் 10 நிமிடம் செம தூக்கம் ....)

வடிவேலு இல்லாமல் வேறு யார் நடித்திருந்தாலும் படத்தை முழுதும் பார்க்கவே முடியாது; நாங்கள் பார்த்த தாம்பரம் வித்யா தியேட்டரில் இடைவேளைக்கு பின் கால் வாசி மக்கள் அப்பீட் ஆகி விட்டார்கள் ;

ஹீரோயின் பார்க்க மட்டும் அழகு. அப்பா போல இருக்கும் வடிவேலுவுடன் அவர் ஜோடி போட்டு பாடுவதெல்லாம் (ஆணழகா... என ஒரு பாட்டு.. யாரு... வடிவேலு !!) நெளிய வேண்டியிருக்கிறது. இமான் இசையில் பாடல்கள் ஸெல்ப் எடுக்க வில்லை. பின்னணி இசை ஓகே,

படத்தின் மிக பெரிய மைனஸ்.. எல்லா காட்சிகளும் ஊகிக்கும் படியோ, முன்பே தெரிந்தோ இருப்பது தான். மேலும் காமெடி என அவர்கள் செய்வதெல்லாம் நமக்கு பெரிய அளவு சிரிப்பை வரவழைக்க வில்லை; வடிவேலு மேனரிசம் மற்றும் நடிப்பு சிறு புன்முறுவலை நம்முள் வரவழைக்கிறது .. அவ்வளவே!

கிளை மாக்ஸ் ஆரம்பிக்கிறது என நினைக்கும்போது திடீரென படத்தை முடித்து டைட்டில் போடுகிறார்கள்... ஜாலியான அல்லது இன்னும் சற்று வெயிட் ஆன கிளை மாக்ஸ் வைத்திருக்கலாம்.

இந்திர லோகத்தில் அழகப்பன் அளவு மோசமில்லை என்றாலும் தியேட்டரில் காசு கொடுத்து பார்க்கும் அளவு வொர்த் இல்லை.. விரைவில் டிவியில் போடும்போது நிதானமாக பார்த்து கொள்ளலாம்...

நிற்க. என்னுடன் 13- 15 வயது பசங்க மூவரை அழைத்து சென்றிருந்தேன். அவர்களுக்கு படம் மிகவும் பிடித்திருந்தது !!

வடிவேலு என்கிற மனிதரின் திறமை சற்றும் குறையாமல் அப்படியே இருக்கிறது.. அவரை காமெடி காரக்டர்களில் தமிழ் சினிமா தொடர்ந்து பயன்படுத்திக்கொள்ள வேண்டும்..தெனாலி ராமன் படம் சொல்லும் சேதி இதுவே !

தெனாலி ராமன் குழந்தைகளுக்கான படம் தான்.. கூடவே நாமும் ரசிக்கும் படி எடுத்திருக்கலாம் ! ஹூம் !