Friday, May 17, 2013

உணவகம் அறிமுகம் - சூப்பர் ராயல் ரெஸ்டாரன்ட், பள்ளிக்கரணை


ள்ளிக்கரணை நூறடி ரோடு அருகில் காமாட்சி மருத்துவமனை to - பல்லாவரம் செல்லும் வழியில் - நல்லதொரு ஹோட்டல் இல்லை என்ற குறையை போக்கியுள்ளது இந்த சூப்பர் ராயல் ரெஸ்டாரன்ட்.

வந்து ஒரு வருடம் ஆகிறது. முதலில் காலை வேலை டிபன் மட்டும் போட்டு வந்தனர் பின் இரவு டிபனும் சேர்த்தனர் நான்கைந்து மாதமாக மதிய சாப்பாடும் துவக்கி விட்டனர்.




தமிழ் சினிமா போல 4 நண்பர்கள் சேர்ந்து நடத்தும் கடை இது. நால்வருமே வெவ்வேறு பணியில் இருப்பவர்கள். ஒவ்வொருவருக்கும் ஒவ்வொரு வித டியூட்டி நேரம். ஒருவர் பகல் நேர வேலை; இன்னொருவர் யூ. கே ஷிப்ட், மற்றவர்க்கு இரவு பணி. தங்கள் வேலை நேரம் போக மாறி மாறி கடையில் இருந்து கவனிக்கிறார்கள். சனி ஞாயிறில் சில நேரம் மட்டும் கடை நடத்தும் நண்பர்களை இங்கு ஒன்றாக பார்க்க முடியும்

சேலம் அருகிலுள்ள ஆத்தூரை சேர்ந்த இவர்கள் - தங்கள் ஊர் சுவையில் உணவு வழங்குவது தான் சிறப்பு. குக், வேலைக்கான ஆட்கள் எல்லாமே அங்கிருந்து தருவித்ததால் இது சாத்தியமாகிறது

காலை நேரத்தில் வழக்கமான இட்லி, தோசை வகைகள், பூரி, பொங்கல். சப்பாத்தி போன்றவை கிடைக்கும். மதியம் சாப்பாடும் உண்டு. பிரியாணியும் உண்டு. இவர்களின் உணவுகளில் மக்கள் அதிகம் விரும்பி சாப்பிடுவதும், நிறைய மூவ் ஆவதும் பரோட்டா, சப்பாத்தி மற்றும் ரவா தோசை.

ஆனால் நான் விரும்பி செல்வது இரவு உணவுக்கு தான். குறிப்பாக இவர்களின் கொத்து பரோட்டா, முட்டை வீச்சு பரோட்டா மற்றும் கலக்கி ஆகியவை நான் விரும்பி சாப்பிடுபவை.



ஓபன் கிட்சன் என்பதால் அவர்கள் உங்களுக்கு உணவு தயாரிப்பதை நீங்கள் பார்க்க முடியும். கொத்து பரோட்டாவிற்கு - பரோட்டாவை நன்கு பிய்த்து போட்டு, நிறைய, நிறைய வெங்காயம் போட்டு, ஒரு முட்டையை உடைத்து ஊற்றி அவர்கள் தயார் செய்யும் லாவகம் எப்போதும் கவரும். குறிப்பாக பரோட்டவை எல்லோரும் தோசை கரண்டியால் கொத்துவார்கள். ஆனால் இங்கு அவர்கள் 2 டம்ளர் வைத்து கொண்டு , அதை திருப்பி பிடித்து கொத்துவார்கள்.

வெங்காயம் அதிகம் போட்டு, முட்டையும் கலந்து சுட சுட தயார் ஆகும் கொத்து பரோட்டா தான் அட்டகாசமாக இருக்கும் (விலை : 50)

முட்டை வீச்சு பரோட்டா - பெயருக்கேற்றபடி முட்டை போட்டு தயார் ஆகும் பரோட்டா. ஓரத்தில் முட்டையின் மஞ்சள் கரு தெரிய மெத்து மெத்தென்று தயார் ஆகி வரும். வெரி டேஸ்ட்டி !

இவர்களின் சைவ குருமா அந்த அளவு நன்றாக இல்லை என்பது தான் ஒரு குறை. சிக்கன் க்ரேவி காசு கொடுத்து வாங்கினால் தான் காம்பினேஷன் சரியே வொர்க் அவுட் ஆகும்.

இட்லி 5 ரூபாய்; பரோட்டா - 10 ரூபாய்; முட்டை வீச்சு - 20; ஆம்லெட் வகைகள் - 10; கொத்து பரோட்டா - 50 ரூ என இருக்கும் இவர்கள் விலை பட்டியல் நம் பர்சை பதம் பார்க்காத வண்ணம் இருக்கிறது. கூடவே இவர்களின் ஆத்தூர் சுவையும் சேர்ந்து கொள்ள கடையில் கூட்டம் அதிகமாகி கொண்டே போவதை தொடர்ந்து கவனிக்க முடிகிறது.

***********
பின்குறிப்பு :

அண்மையில் காலமான பதிவர் பட்டாப்பட்டி அவர்களுக்கு நினைவஞ்சலி செலுத்தும் விதமாக அவரது ஏழாம் நாள் காரியம் நடக்கும் நாளை (சனிக்கிழமை) பதிவுகள் வெளியிடவேண்டாம் என பதிவர் நண்பர்கள் வேண்டுகோள் விடுத்துள்ளனர். பிற நண்பர்களுக்கும் இந்த வேண்டுகோளை பகிர்கிறோம்.

பட்டாப்பட்டி அவர்களுக்கு அஞ்சலி; அவரது குடும்பத்தினருக்கு ஆழ்ந்த இரங்கல்கள் !

3 comments:

  1. அது என்னனே முட்டை வீச்சு நம்ம மேல வீசிருவங்கலோ

    ReplyDelete
  2. "என் நண்பர்கள் பிரபு,போன்ஸ் அவர்களுக்கு வாழ்த்துக்கள், வீடா முயற்சி விஸ்வரூப வெற்றி" - பார்த்தி

    ReplyDelete

Related Posts Plugin for WordPress, Blogger...