வானவில்-சூப்பர் சிங்கர் ஜூனியர் & நூறு பாலோயர்கள்!!

டிவி பக்கம்: சூப்பர் சிங்கர் ஜூனியர்

இந்த வாரம் முழுதும் சூப்பர் சிங்கர் ஜூனியரில் வாலண்டைன்ஸ் டே கொண்டாடினார்கள். இதில் காதலித்து மணமுடித்த சிலரை கூப்பிட்டு, குட்டி பசங்க முன் அவர்கள் பொன் மொழிகளை உதிர்த்தார்கள். சாருலதா மணி என்ற பாடகியும் அவர் கணவரும் அத்தனை குட்டி பசங்க முன் கட்டி பிடித்து முத்தம் குடுத்து.. ச்சே!! பசங்களுக்கு என்னென்ன கத்து குடுக்கிறது!! நான் காதலுக்கு எதிரி அல்ல.. ஆனால் எந்த வயதில் எதை செய்யணும் என்ற வரை முறை தெரியாமல் ஆடணுமா? ஆணோ பெண்ணோ 12 -13 வயதில் வயதுக்கு வந்து விடுவதால் உடனே பிள்ளை பெத்துக்க முடியுமா? அது போல் காதலும் வர வேண்டிய வயதில் வந்தால் போதும். ஏற்கனவே சின்ன பசங்களுக்கு மீடியாவில் உள்ள பல சேனல்கள் காமம் பற்றி சொல்லி தர, குழந்தைகள் நிகழ்ச்சியில் இப்படி செய்தது மனசுக்கு கஷ்டமாக இருந்தது!

பிடித்த விளம்பரம்

Airtel -க்கான விளம்பரம். Holidays -ல் செல்லும் குட்டி பையன் தன் அப்பாவின் டெலிபோன் எண்ணை நண்பர்கள் அனைவருக்கும் தரும் காட்சி.. அந்த குட்டி பையன் செம cute. நம்ம வீட்டுல உள்ள மாதிரி, விளம்பரத்தில் அப்பா ஏதும் பேசாமல் சும்மா பார்க்க மட்டும் செய்ய, அம்மாதான் பேசுவாங்க. நாக்கை ஓரமாக துருத்தி கொண்டு குட்டி பையன் குறும்பாய் ஒரு பார்வை பார்ப்பான். So nice ! பல முறை போடப்பட்டாலும் எங்கள் வீட்டில் அனைவரும் ஒரு புன்னகையோடு இந்த விளம்பரம் பார்ப்போம் !!

கொல்கத்தா - பஸ் விபத்தும், கிரிக்கட் வெற்றியும்

கொல்கத்தாவில் இந்தியா டெஸ்டில் வெற்றி பெற்ற அதே வியாழன் அன்று, மேற்கு வங்காளத்தில் ஒரு பஸ் விபத்தில் 30 பேருக்கும் மேல் இறந்துள்ளனர். முதல் செய்தி மகிழ்ச்சி என்றால் அடுத்த செய்தி துயரம். தமிழகத்திலேயே கூட ஆண்டுக்கு ஆண்டு சாலை விபத்துகள் பெருகி கொண்டே போவதாக தான் நேற்று படித்த செய்தி கூட செல்கிறது. பாத்து வண்டி ஓட்டுங்க நண்பர்களே..

வாரம் ஒரு சட்ட சொல் Accused Vs Convict

Accused என்றால் ஒரு Criminal வழக்கில் குற்றம் சாட்டப்பட்டவர்.
Convict எனில் நீதி மன்றத்தால் குற்றவாளி என தீர்ப்பு வழங்கப்பட்டு, தண்டனை பெறப்பட்டவர்.
பட்ட பகலில் ஒரு கொலை செய்தவர் ஆனாலும் கூட, நீதி மன்றத்தால் தீர்ப்பு வழங்க படும் வரையில் அவர் Accused தான். அவரை Convict என்று சொல்ல முடியாது.

நன்றி நண்பர்களே

நமது ப்ளாகின் Followers எண்ணிக்கை நூறை தாண்டியிருக்கிறது. இது மிகுந்த மகிழ்ச்சி தருகிறது. ஒரு வருடத்துக்கு முன்பே இந்த வலை பதிவு துவங்கினாலும், அடுத்த பத்து மாதங்களில் பத்து பதிவுகள் தான் எழுதினேன். நவம்பர் 2009-ல் தமிழ் மணம் மற்றும் தமிளிஷில் இணைத்த பின் தான் நிறைய பேர் படிக்கவும் பின்னூட்டம் இடவும் துவங்கினர். கிட்டதட்ட நூறு நாள்களில் நூறு பேர் Followers ஆகியிருக்கிறார்கள் என்றால் அது ஆச்சரியமாக தான் உள்ளது. என்னை பொறுத்த வரை ஒரு விஷயம் பிடித்தால் கட்டாயம் உடனே சொல்வேன். (பிடிக்கா விட்டால் அதே சூட்டில் சொல்வேனா என்றால் பல நேரம் இல்லை). ஒவ்வொரு மனிதனும் பாராட்டு மற்றும் recognition -க்கு ஏங்கவே செய்கிறான்.. இந்த ப்ளாகை தொடரும் அந்த 105 நண்பர்களுக்கும் பின்னோட்டம் இடும் அனைத்து நல் உள்ளங்களுக்கும் நன்றிகள் பல !!

சென்னை ஸ்பெஷல்

தி, நகர் வெங்கட் நாராயணா ரோடில் " திருப்பதி திருமலா தேவஸ்தானம்" சென்றுள்ளீர்களா? திருப்பதி போக முடியாதவர்கள் இங்கு சென்று வரலாம்!! பெருமாள் பெரிய அளவில் அழகாக காட்சி தருவார். ஒரு அருமையான கோவில். சனி கிழமைகளில் கூட்டம் எக்கசக்கம்!! இங்கிருந்து திருப்பதி தரிசனத்துக்கு கூட செய்யும் வசதி இருந்தது. தற்போது உள்ளதா தெரிய வில்லை. போலவே முன்பு ஒரிஜினல் திருப்பதி லட்டு இங்கேயே கிடைத்தது. அதுவும் தற்போது உள்ளதா என தெரியலை. யாருக்காவது தெரிந்தால் பின்னூட்டத்தில் எழுதுங்கள்..

அய்யா சாமி

அய்யா சாமி வீட்டில் பெரும்பாலும் அவர் தான் பால் காய்ச்சுவார். பாலை அடுப்பில் வச்சிட்டு பக்கத்திலேயேவாங்க அவ்ளோ நேரம் நிக்க முடியும்? அவரும் முடிஞ்ச வரை அங்கேயே தான் இருப்பார். இருந்தாலும் அவர் கொஞ்சம் நகரும் போது தான் பால் பொங்கி ஊத்தும்.. வாரத்தில் ஒரு சில நாளாவது இப்படி பால் காய்ச்சிறார் நம்மாளு.. அப்புறம்??? அவர் காய்ச்சப்படுவார்....