11-11-11 பற்றி 11 பதிவர்கள் ...

11/11/11....இந்த நாளுக்கு தான் என்னா பில்ட் அப்! இந்த தேதியில் தான் பிள்ளை பெற்று கொள்ள வேண்டுமென உலக அழகி ஐஸ்வர்யா ராய் இன்று பிள்ளை பெற்று கொள்கிறார் என்றால் பாருங்களேன் !

என்னை பொறுத்த வரை ஞாபகத்தில் இருக்கும் படி இன்று செய்த விஷயங்கள் இரண்டு.

1. அலுவலகத்தில் இன்று நடக்கும் ரத்த தான முகாமில் Blood donate செய்தது.

2. 11 /11 /11 பற்றிய இந்த பதிவை, 11 /11 /11 - 11.11-க்கு வெளியிட்டது. :)))

நமது பதிவர் நண்பர்கள் 11 பேரிடம் இது பற்றி கேட்ட போது அவர்கள் சொன்னது இதோ:

கேபிள் சங்கர்

11 பேரில் இவர் படம் தான் ஈசியா கிடைக்குது !!

11-11-11 என்ற இந்த சீக்வென்ஸ்.. ஆச்சர்யமான, எப்போதாவது நிகழ்கிற ஒன்று தான். வெளிநாட்டில் இம்மாதிரியான தேதிகளுக்கு, நாட்களுக்கு அவர்கள் கொடுக்கும் முக்யத்துவத்தின் காரணம் வேறு. அன்றைக்கு பிறந்த குழந்தைகள் உலகிலேயே தனித்து அறியப்படுவார்கள். அப்படி அறியப்பட வேண்டும் என்று ஆசைப் படுகிறார்கள். என் வாழ்க்கையில் இன்றைக்கு ஏதாவது ஒரு இன்ப அதிர்ச்சி கிடைத்தாலே ஒழிய, என்னை பொருத்தவரை 11-11-11 மற்றுமொரு நாளே..

ரேகா ராகவன்

11-11-11 இந்த தேதியைப் பற்றி நினைக்கும்போது என்னால் 10-10-10 என்ற தேதியையும் நினைக்காமல் இருக்க முடியவில்லை. ஏனெனில் அது என் அப்பா பிறந்த நாள். உலகெங்கிலும் உள்ள கர்ப்பிணிகள் இன்று அதாவது 11-11-11 தங்களுக்கு குழந்தை பிறக்க வேண்டும் என்று ஆசைப்படுகிறார்களாம். ஏனெனில் இது ஒரு சிறப்பு தினம் என்பதால். அந்த காலத்தில் இப்படியெல்லாம் நினைத்திருப்பார்களா என்பது தெரியாது. உலகில் எங்காவது இன்று பிறக்கும் குழந்தையின் கையிலோ காலிலோ கூடுதலாக ஒரு விரலோடு பிறந்தால் அது 11-11-11 அன்று 11 விரல்களோடு பிறந்த குழந்தை என்று கூடுதல் கவனத்தோடு கொண்டாடப்பட வாய்ப்புண்டு. பணக்காரர்களுக்கும் நடுத்தர வர்கத்தினர்களுக்கும் வேண்டுமானால் இன்று ஒரு மாறுப்பட்ட நாளாகத் தோன்றலாம், ஆனால் வீதியில், குடிசையில்,கிராமங்களில் அடுத்த வேலை உணவுக்கு என்ன செய்வது என்று கவலையோடிருக்கும் ஏழைகளுக்கு இது மற்றுமொரு நாளே!

பெஸ்கி

இதற்கடுத்து 12/12/12 அன்று தான் இது போல விசேஷ நாள் வரும். இந்த தலை முறை மக்கள் தான் இந்த இரு நாளையும் பார்க்க முடியும். அடுத்த முறை நூறு ஆண்டுகள் கழித்து இது போல வரும் போது நாம் யாரும் இருக்க போவதில்லை.

ரகு

ஒன்று க‌வ‌னித்தீர்க‌ளா? அடுத்த‌ வ‌ருட‌ம் டிச‌ம்ப‌ர் 12ம் தேதி வ‌ந்தால், 01/01/01 முத‌ல் 02 /02 /௦02, 03/03 / 03 என 12/12/12 வ‌ரை நாம் க‌ட‌ந்து வ‌ந்திருப்போம். நாளை நான் செய்ய‌ நினைப்ப‌து ஒன்றே ஒன்றுதான். காலை 11 ம‌ணி 11 நிமிட‌ங்க‌ள் 11 நொடிக‌ளை எப்ப‌டியாவ‌து மொபைல் கேம‌ராவில் சிக்க‌வைக்க‌ வேண்டும். ஒரு சூப்ப‌ரான‌ Palindrome கிடைக்கும்.

மிடில் கிளாஸ் மாதவி

அன்றும் வழக்கம் போலவே சூரியன் உதிக்கும்; வழக்கம் போலவே வேலைகளைப் பார்க்க வேண்டியதுதான்! அன்றைய தினம் குழந்தை பெற விரும்பக் காரணம், பிறந்த நாளை மறக்காமல் இருப்பதற்காக இருக்கலாம்!! :-)) (வாலண்டைன்ஸ் டேவில் கல்யாணம் செய்து கொள்வது போல!!)

சரவண குமரன்

எனக்கு அந்த தேதியுள் ஒரு ‘டபுள் பட்டை நாமம்’ - ஒரு குறியீடாக புலப்படுவதால், ஜாக்கிரதையாக இருக்கலாம் என்று தோன்றுகிறது. :-)

ஆதிமனிதன்

11/11/11 என்று தேதியை எழுதுவதற்கு வேண்டுமானால் பார்க்க வித்தியாசமாகவும் தனித்தும் தெரியும். அவ்வளவுதான். அதை தவிர அன்று பெரிதாக கொண்டாடுவதற்கு வேறு ஒன்றும் இல்லை. அதே போல் இந்த நாளெல்லாம் நினைத்து பார்த்து கொண்டாடுவதற்கு நம்மை போல் போன்றோர்களுக்கு தான் நேரம் இருக்கிறது. இல்லாதவர்களுக்கு எல்லா நாளும் கஷ்ட நாளே. மேலும் எங்களை பொறுத்தவரை அது ஒரு long weekend விடுமுறை நாள். ஆதலால் வழக்கம் போல் எங்கு செல்லலாம் என்ன செய்யலாம் என்று மட்டும் தான் நான் யோசித்துக் கொண்டிருக்கிறேன்.

பெயர் சொல்ல விருப்பமில்லை

போன வருஷம் தான் இப்படி ஒரு நாளை சொல்லி இது நூறு வருஷத்துக்கு ஒரு முறை தான் வரும்னாங்க. அது 20/10/ 2010 என நினைக்கிறேன். இப்போ இதா?

இன்னும் ஒன்பது நாள் வெயிட் செய்தால் 20/11/2011 வருமில்லையா? அன்று இரவு 20.21-க்கு பார்த்தால் 20/11/2011 - 20.11 hours என்று வரும். அதை கொண்டாடினாலாவது ஒரு அர்த்தம் இருக்கு.

என்னை பொறுத்த வரை எல்லா நாளுமே திரும்ப வராத விசேஷ நாள் தான். பிறருக்கு உதவ எல்லா நாளுமே ஏற்ற நாள் தான்.

ராஜூ

உங்களை அடையாளப் படுத்த மோகன் என்றும் என்னை அடையாளப் படுத்த ராஜு என்றும் பெயர் வைத்ததைப் போல, அந்த நாளை குறிப்பிட , 11-11-11 என்பது ஒரு அடையாளம் அவ்வளவே . மற்றபடி , அன்றைக்கும் வாயாலேயே சாப்பிட்டு , காலாலேயே தான் நடப்பேன்.

வெங்கட் நாகராஜ்

11/11/11 - தேதி நான் வித்தியாசமாய் ஒன்றும் செய்யப்போவதில்லை. ஒவ்வொரு நூற்றாண்டிலும் ஒரு முறை இது போல முதல் பன்னிரண்டு வருடங்களில் வரும். நூறு வருடங்களுக்கு ஒரு முறை தான் வரும் என்பது தவிர வேறு ஒன்றும் பெரிய விஷயம் இல்லை.

அதற்காக இயற்கைக்கு மாறாக அறுவை சிகிச்சை செய்து அன்று குழந்தை பெற்றுக்கொள்ள வேண்டும் என எண்ணுவதெல்லாம் தேவையில்லாதது என்பது என் எண்ணம்.

மக்கள் என்ன செய்யப்போகிறார்களோ இல்லையோ, இந்த மீடியாக்காரர்கள் எல்லோரும் சேர்ந்து இதைப் பெரிய விஷயமாக்கி விடுகிறார்கள் ! நாளை தில்லியில் கிட்டத்தட்ட 30,000 கல்யாணங்கள் நடக்கப்போகிறது எனச் சொல்லிக் கொண்டு இருக்கிறார்கள் !!!!

ராமலக்ஷ்மி

எங்கள் ஃபைனான்சியல் அட்வைசர் அவ்வப்போது வாழ்த்துக் குறுஞ்செய்திகள் அனுப்பியபடி இருப்பார், தன் சேவையை கஸ்டமர்களுக்கு அடிக்கடி நினைவுறுத்தும் விதமாக. இன்று அவர் அனுப்பியிருந்த செய்தி: “11.11.11.11.11.11. இனி நம் வாழ்வில் கிடைக்க வாய்ப்பில்லாத தருணம். கொண்டாடுங்கள் அதை”. கல்லூரிக்குக் கிளம்பிக் கொண்டிருந்த மகனிடம் அதை வாசித்துக் காட்டி, “இப்படி ஒரு தருணத்தை உருவாக்க ரொம்ப வசதியாய் ஆண்டில் இருந்த 20-யை உருகி விட்டார்கள் பார்” என்றேன். அதற்கு அவன் “அதை விடுங்கள். எந்த நொடியுமே வாழ்வில் திரும்பி வராத பொக்கிஷம்தான்” என்றான். சரிதானே:)? எல்லா நொடியையும் போற்றுவோம்!

இந்த வார பதிவுகள் சில:


சொர்க்கமே என்றாலும் நம்மூரை போல வருமா?

எஸ். ராமகிருஷ்ணன் சந்திப்பு படங்களுடன்

ஏழாம் அறிவு சறுக்கியது ஏன்?