வானவில் 80: பள்ளிகள் இப்படி செய்யலாமா?

பேஸ்புக் கிறுக்கல்கள்

பேஸ்புக்கில் அவ்வப்போது கிறுக்கி கொண்டிருக்கிறேன். அதிலிருந்து சில:
######

ஆபிஸ் அல்லது ஹோட்டலில் டேபிளில் தான் அமர்ந்து சாப்பிடுறோம். ஆனா வீட்டில் மட்டும் டைனிங் டேபிளை புறக்கணித்து தரையில் அமர்ந்து சாப்பிட்டால் தான் சாப்பிட்ட திருப்தி வருது. எனி சேம் பிளட்?
######
பெண்ணுக்காக டாக்டர் கிளினிக் சென்றிருந்தேன்.வெயிட்டிங் ஹாலில் 3 வயது குட்டி பையன் ஒருவன் விடாமல் பத்து நிமிடத்துக்கும் மேல் கட்டை விரல் சூப்பிக்கொண்டிருந்தான். செல்ல மகனை பார்க்காது பெற்றோர் பார்த்தது " செல்லமே" சீரியல் !

######

"அண்ணா நூலகத்தை இடமாற்றம் செய்தால் தீக்குளிப்பேன்; ஏன்னா எங்களுக்கு அண்ணா தான் முக்கியம். பெரியார் தான் முக்கியம்"

இதை சொன்னது கலைஞராம். எனக்கென்னவோ கவுண்டமணி பேசுன மாதிரியே இருக்கு !!

கிரிக்கெட் கார்னர்

ஆசிய கோப்பை கிரிக்கெட்டில் இந்தியா இரு வலுவான அணிகளை (இலங்கை, பாகிஸ்தான்) வென்றும் கூட பங்களாதேஷிடம் தோற்றதால் இறுதி போட்டி போகாமல் வெளியேறி விட்டது. இருந்தாலென்ன. சச்சின் நூறாவது செஞ்சுரி வந்துடுச்சு. பாகிஸ்தானை ஒரு மேட்சில் ஜெயிச்சாச்சு என திருப்தியுடன் திரும்பி இருப்பார்கள் நம் வீரர்கள்.

கிரிக்கெட்டில் மீண்டும் மேட்ச் பிக்சிங் தலை தூக்குகிறதோ என சந்தேகமாக உள்ளது. கிரிக்கெட்crazy நாடான பங்களாதேஷில் இந்த ஆட்டங்கள் நடப்பதால், அந்த அணி இறுதி போட்டி செல்ல உள்குத்து வேலைகள் நடந்திருக்க வாய்ப்புண்டு.

நிற்க நண்பர் ஒருவர் கமன்ட்:

சச்சின் செஞ்சுரி அடிச்சா மேட்ச்சில் நாம் தோற்போம்னு சொல்றாங்க. கோலி பெரிய செஞ்சுரி அடிச்சா, டோர்னமெண்டை விட்டே exit ஆகிடுறோமே !!

இடைத்தேர்தல் முடிவுகள்


சங்கரன் கோவில் இடைத்தேர்தலில் ஆளும் கட்சியே வென்றுள்ளது. தி.மு.க, ம. தி.மு.க, தே.தி.மு.க, இவை மூன்றின் ஓட்டுகளை கூட்டினால் கூட அ.தி.மு.க. வை தாண்ட முடிய வில்லை. இது எதை காட்டுகிறது? மக்கள் மின் வெட்டு, விலை வாசி உயர்வு இவை தாண்டியும் அ.தி.மு.க.விற்கு பெரு வாரியாக வாக்களிப்பது, ஆளும் கட்சி வந்தால் மட்டும் தான் நமக்கு ஏதேனும் நல்லது நடக்கும் என்கிற எண்ணமாய் இருக்ககூடும் என்றே தோன்றுகிறது  

பள்ளிகள் இப்படி செய்யலாமா?

பள்ளிகளுக்கு ஒன்பதாவது, பத்தாவது படிக்கும் மாணவ, மாணவிகள் டூ வீலர் ஓட்டி வருவதை தொடர்ந்து பார்க்கிறேன். பதினெட்டு வயது நிரம்பாத இவர்கள் லைசன்ஸ் இன்றி தான் வண்டி ஓட்டி வருகிறார்கள். இதனை பள்ளி நிர்வாகங்கள் எப்படி அனுமதிக்கின்றன என்று தெரிய வில்லை. எங்களுக்கு தெரியாது என்று சொல்ல இடமில்லை. அவர்கள் வண்டிகள் பள்ளி வளாகத்திற்குள் தான் நிறுத்த படுகின்றன. மற்றொரு தவறு இவர்கள் யாரும் ஹெல்மெட் போடுவதே இல்லை. ஹெல்மெட் போட வேண்டும் என்கிற சட்டத்திற்காக அல்ல, இன்று பலரும் ஒரு அல்லது இரு குழந்தை மட்டுமே வைத்துள்ள நிலையில், கீழே விழுந்து தலையில் காயம் பட்டால் என்ன ஆவது? வண்டியில் ஹெல்மெட் லாக் வைத்து பூட்டி செல்லலாமே? பள்ளிகள் குறைந்தது ஹெல்மெட் அணிந்து தான் வர வேண்டும் என்றாவது சொல்லலாம். சில நிறுவனங்களே ஹெல்மெட் அணியாத ஊழியர் வண்டிகளை உள்ளே அனுமதிப்பதில்லை

 அய்யாசாமியும், பைக் பெட்ரோல் லாக்கும்


பைக் ஓட்டுவோர் பெட்ரோல் லாக் மூடுவது மிக அவசியம். இல்லா விடில் "பெட்ரோல் சற்று ஆவியாகிடும்; வண்டிக்கு நல்ல மைலேஜ் கிடைக்காது" என்று மெக்கானிக்குகள் சொல்வார்கள். ஆனால் அய்யாசாமிக்கு பெட்ரோல் லாக் மூட நினைவே வராது. எப்போதோ ஒரு நாள் பெட்ரோல் லாக் மூடினால், அன்று வண்டியை எடுக்கும் போது பெட்ரோல் லாக் திறக்க மறந்து விடுவார். இதனால் வண்டி கொஞ்ச தூரம் போய் ஆப் ஆகிடும். மறுபடி வண்டியை கிளப்ப, உதை உதைன்னு உதைச்சுட்டு இருப்பார் அய்யாசாமி !

அறிவிப்புகள் 

1 . கேரள பயண கட்டுரை அநேகமாய் நான்கு பாகங்களாக, வெளி வரும். ஒவ்வொரு வாரமும் வெள்ளியன்று வெளி வரும் இதன் முதல் பகுதி இந்த வெள்ளியன்று துவங்கும்

2 . வீடுதிரும்பலில் கொஞ்ச நாளாக நிறையவே பதிவுகள் வருகின்றன. இது அய்யாசாமிக்கு ஏற்புடையதாய் இல்லை. விரைவில் பதிவுகள் மெதுவாய் குறைய கூடும்.

ரயில் பயணங்களில்

ரயிலில் பயணம் செய்யும் போது, பார்வை இழந்தவர்கள் பாடும் பாட்டு மனதை என்னவோ செய்கிறது. நேற்று மூன்று பார்வை இழந்தவர்கள் "டோலக்" மாதிரி ஒரு கருவியை இசைத்து கொண்டே இந்த வரிகளை பாடியபடி இரயிலினுள் நடந்து வந்தனர்.

"கொடுத்ததெல்லாம் கொடுத்தான். அவன் யாருக்காக கொடுத்தான்
ஒருத்தருக்கா கொடுத்தான். இல்லை ஊருக்காக கொடுத்தான்
ஒருத்தருக்கா கொடுத்தான். இல்லை ஊருக்காக கொடுத்தான் 
இல்லை என்போர் இருக்கையிலே, இருப்பவர்கள் இல்லை என்பார்
மடி நிறைய பொருள் இருக்கும். மனம் நிறைய இருள் இருக்கும்

எது வந்த போதும் பொதுவென்று வைத்து
வாழ்கின்ற பேரை வாழ்த்திடுவோம்"

இந்த பாடலை TMS பாடி எத்தனையோ முறை கேட்டாலும், அவர்கள் இந்த சூழலில் பாடும்போது அர்த்தம் முழுமையாய் புரிகிறது. இந்த வரிகள் தங்களை குத்துவதாலோ என்னவோ சிலர் செய்தி தாளிலும், சிலர் ஜன்னலுக்கு வெளியிலும் முகத்தை திருப்பி கொள்கின்றனர்.

மண் குடிசை வாசலென்றால் தென்றல் வர வெறுத்திடுமா?
மாலை நிலா ஏழை என்றால் வெளிச்சம் தர மறுத்திடுமா?
 
உள்ளத்தை உலுக்கும் அவர்கள் பாடல் தொடர்கிறது ...