வானவில் 95: குஜால் சாமியார்கள் - கோபிநாத்- தேவா

முக நூல் கிறுக்கல்கள்

கிச்சன் யார் கையில் இருக்கோ, வீட்டோட கண்ட்ரோல் அவங்க கிட்டே தான் இருக்கும்னு பழமொழி உண்டு.

பெண்கள் கையில் கிட்சன் இருந்தா, வீட்டு கண்ட்ரோல் அவங்க கிட்டே தான் இருக்கு. இது சரி. ஆனா, ஆண்கள் கையில் கிட்சன் இருந்தாலும், வீட்டு கண்ட்ரோல் பெண்கள் கிட்டே தான் இருக்கு

பேசாம வீடுன்னா அது பெண்கள் கண்ட்ரோலில் தான் இருக்கும்னு பழமொழியை மாத்திடுங்கப்பா !

####### 

கமல் விஜய் டிவியில் விஸ்வரூபம் பற்றி பேசும் போது literal-ஆக தரையில் உருண்டு புரண்டு சிரித்தேன்.

வழக்கம் போல் தூய தமிழில் முற்று புள்ளி வைக்காமால் நீ........ண்ட வாக்கியங்கள்........பேசினார்.

செம ஹைலைட் : அவர் பேசி முடித்ததும் கோபிநாத் ஏதோ ஒன்று சொல்லி, "நீங்கள் சொல்வதற்கான அர்த்தம் இது தான் என்று எடுத்து கொள்கிறோம்" என்றார். அடேங்கப்பா ! கமல் தமிழில் பேசுவதற்கே
மொழி பெயர்ப்பு தேவையா இருக்கே என மெய் சிலிர்த்தேன் ! # உலக நாயகனே !

"குஜால்" சாமியார்கள்


சாமியார்களில் புது விக்கெட் வின்சென்ட் செல்வகுமார் . மனிதர் கதையை படித்தால் குமட்டுது.

சாமியார்கள் பற்றி நன்கு அறிந்த என் நெருங்கிய நண்பன் பல நிஜ சம்பவங்கள் சொல்லியுள்ளான். அவற்றை இங்கே எழுத்தில் எழுத முடியாது ( நம் ப்ளாகை படிக்கும் பெண்கள் மிக அதிகம்)

அவன் சொன்னதில் எழுத கூடியது இது தான்: " எந்த மதமா இருந்தாலும் சரி, ஒரு சாமியார் கூட செக்ஸ் விஷயத்தில் ஒழுங்கு கிடையாது. ஒவ்வொரு சாமியாரும் பல பேரிடம் செக்ஸ் வச்சிக்காம இருப்பதில்லை. கொஞ்சம் கதை தான் வெளியே தெரியுது "

துறவறம் என்பதே இயற்கைக்கு எதிரானது தான். எந்த மனிதனாலும் செக்ஸ் உணர்வுகளை முழுக்க அழிக்க முடியும் என தோணலை. இப்படி பிரம்மச்சரியம் என்கிற பேரில் பலரை டார்ச்சர் செய்வதை விடுத்து, சாமியார்கள் ஒரே ஒரு பெண்ணை திருமணம் செய்து கொண்டு, பின் சாமியார் பிசினசை தொடரலாம் !

தினம் பதிவு- புதுப்புது அனுபவம்

தினம் பதிவு எழுத ஆரம்பித்ததும் புதுப்புது அனுபவமும், இதுவரை நேரிலோ, மெயிலிலோ, பின்னூடத்திலோ அறிமுகம் ஆகாத மனிதர்களும் காண கிடைக்கின்றனர். இதுவரை அறியாத ஒரு அம்மணி " ஐயா, நாங்கள் குடும்பத்துடன் வட இந்தியா பயணம் செய்ய உள்ளோம்; எந்த ரயிலில் போகலாம், எங்கு தங்கலாம், எந்த இடங்களை சுற்றி பார்க்கலாம் என எங்களுக்கு விரிவாக பதில் எழுதுங்கள் " என்று பள்ளியில் "ஒரு பக்கத்துக்கு மிகாமல் எழுதுக" பாணியில் எழுதி உள்ளார். இவருக்கு இன்னும் பதில் எழுதலை.

இன்னொரு நபர், "இதோ என் போன் நம்பர் - உங்களுடன் பேசணும்" என தந்தி போல் மெயில் அனுப்பினார். என்னமோ ஏதோ என போன் செய்தால் " சார் நாங்க திருச்சியிலே இருக்கோம். நாலைஞ்சு பேச்சிலர்ஸ் சேர்ந்து சிம்லா போறோம்; எப்படி போகலாம் சார்?" என்று பேச ஆரம்பித்தார்.

அய்யாசாமி ரிட்டையர் ஆனதும் டூர் பிசினஸ் பண்ணலாம் போல :-)

இதற்கிடையே ஒருவர் எப்போதோ போட்ட பதிவில் வந்து " ஊட்டி சூப்பர் மார்கெட் பத்தி எழுதுறியே; அவங்க கிட்டே எவ்ளோ கமிஷன் வாங்கினே?" என சட்டையை பிடிக்கிறார். அவரிடம் அய்யாசாமி " அதே கடையில் எனக்கு காய்கறி பை மாத்தி குடுத்தாங்கன்னு அடுத்த வாரமே எழுதிருக்கேன். அதை படிங்க" என கையை பிடித்து கொண்டு பின்னூட்டத்தில் கெஞ்ச வேண்டியதா போச்சு

வாழ்க்கை இப்படி காமெடியா போய் கிட்டு இருக்கு !

நண்பன் தேவா

டில்லி சென்ற போது நண்பன் தேவா இல்லத்தில் தான் தங்கினோம் . அவ்வப்போது வீடுதிரும்பலில் பதிவுகள் எழுதும் தேவாவை நீங்கள் அறிவீர்கள் தானே? தேவா மற்றும் அவர் மனைவியின் உபசரிப்புகள் எங்களை நெகிழ்த்தி விட்டது. நாங்கள் நினைத்திருந்தது " வீட்டில் தங்க மட்டும் செய்வோம்; பெரும்பாலும் அவர்களுக்கு தொந்தரவு இல்லாத படி வெளியில் சாப்பிடுவோம்" என்று. ஆனால் அதற்கு நேர் மாறாய் எல்லா நேரமும் வீட்டில் சாப்பிடுகிற படியே பார்த்து கொண்டார்கள். காலை ஏதாவது இடம் பார்த்து விட்டு மதியம் வீடு வந்து சாப்பிட்டு ரெஸ்ட் எடுத்து விட்டு தான், மாலை மீண்டும் வெளியே போனோம். பெரும்பாலும் தேவா தன் காரிலேயே எல்லா இடமும் அழைத்து சென்றான். தேவாவிடம் "அண்ணன்கள்- அக்கா வீட்டை தவிர, யார் வீட்டிலும் நான்கு நாட்கள் நாங்கள் தங்கியதே இல்லை" என்றேன்.

நிற்க. பயண கட்டுரையில் டில்லி பகுதி முடியும் முன்பே தேவா குடும்பம் சென்னைக்கு மாற்றலாகி வந்து விட்டது ! இனி அடிக்கடி சந்திப்போமா அல்லது சென்னை காரர்கள் மாதிரி போனில் மட்டுமே பேசி கொள்வோமா என தெரியலை. இந்தியா முழுக்க சுற்றி வரும் தேவா இப்போது சென்னையில் ! நல்ல ஒரு நண்பன் அருகில் வந்ததில் எனக்கு மகிழ்ச்சியே !



பதிவர் பக்கம்

ஷங்கர் ராமசுப்ரமணியம் என்ற பெயரில் எழுதும் பதிவரின் ப்ளாக் சமீபத்தில் வாசித்தேன். குறிப்பாய் இந்த கவிதையை வாசியுங்கள்

காலை எழுந்தவுடன்
யூட்யூப்பில் எம்.எஸ்.சுப்புலட்சுமியின் குறையொன்றுமில்லை

பிறகு ஜெயமோகன்.இன்
சாருஆன்லைன்
வழியாக முகநூல்.....

ஒரு நிலைச்செய்தி போட்டுவிட்டேன்
எத்தனை லைக் இன்று வரும்..

...............

என்று நீண்டு செல்லும் கவிதையில் சில இடங்களில் கண்ணாடியில் உங்கள் முகம் பார்ப்பது போல் இருக்கும் !   வாசித்து பாருங்கள் !


போஸ்டர் கார்னர்

கல்யாணத்துக்கு பிறகு பெண்கள் எப்படி ஆகுறாங்க. ..ஆண்கள் என்ன ஆகுறாங்க நீங்களே பாருங்க.




சந்தித்த நபர்:


ஞாயிறு காலை பதினோரு மணி அளவில் "சானை பிடிக்கலையோ சானை " என குரல். வீட்டம்மா நம்மை சானை பிடிக்கும் வேலைக்கு டெபியூட் செய்து அனுப்பினார். இரண்டு பொருளுக்கு முப்பது ரூபாய் சொன்னார் அவர். நியாயமான அளவு கேட்டதால் பேரம் பேசாது ஒப்பு கொண்டேன்.

சானை பிடிக்கும் நேரம் பேச்சு கொடுக்க, அரக்கோணத்திலிருந்து வருகிறார் என தெரிந்தது. அரக்கோணத்திலிருந்து மவுன்ட் ஸ்டேஷன் வந்து இறங்கி, அங்கிருந்து ஒவ்வொரு தெருவாக சுற்றி வருகிறார். ரயில் நிலையத்திலிருந்து ஆறு கிலோ மீட்டர் தூரத்தில் இருக்கும் எங்கள் தெருவுக்கு நடந்தே வந்துள்ளார். " எப்படி சார் இவ்வளவு தூரம் நடந்தே வர்றீங்க.. அதுவும் வெய்யிலில் இந்த வெயிட் தூக்கிட்டு?" என்று நான் கேட்க, "இதெல்லாம் ஒரு தூரமா சார்? தினம் எவ்வளவோ தூரம் நடக்கிறோம்................சானை பிடிக்கலையோ சானை " என்றவாறு மெஷினை தோளில் தூக்கி போட்டபடி நடக்கலானார்.

ஐந்து நிமிடம் நின்றதால் நான் டயர்ட் ஆகி வீட்டினுள் போய் உட்கார்ந்து கொண்டேன்.