பதிவு வெளியிட சிறந்த நேரம் எது? பதிவர் கருத்து

பதிவர்கள் ஒவ்வொருவரும் சிரமப்பட்டு எழுதுவது,  தான் எழுதுவதை நிறைய பேர் வாசிக்க வேண்டும் என்பதால் தான்.  உள்ளடக்கம் நன்கிருக்க வேண்டும், தலைப்பு Catchy ஆக இருக்க வேண்டும் என்பதுடன் எந்த நேரத்தில் வெளியிடுகிறோம் என்பதும் ஒரு முக்கிய விஷயம் தான்.

எனக்கு தெரிந்த வரை நம் ப்ளாகுக்கு ரெகுலராய் தொடர்ந்து வருபவர்கள், Dashboard-ஐ பார்த்து விட்டு, வாசிப்பதால், எப்போது வேண்டுமானாலும் வந்து வாசிக்கிறார்கள். கமன்ட் போடுகிறார்கள். எனவே ரெகுலர் readers-ஐ பொறுத்தவரை நீங்கள் எந்த நேரத்தில் வெளியிடுகிறீர்கள் என்பதில் எந்த வித்யாசமும் இல்லை. சில நேரம் மெதுவாய் படிப்பார்கள். அவ்வளவு தான்.

ஆனால் எந்த ஒரு பதிவையும் ரெகுலராய் வாசிப்போர் கிட்டத்தட்ட 20௦ சதவீதம் மட்டுமே. மீதம் 80 %-க்கும் மேல் திரட்டி மூலம் புதிதாய் வருபவர்களே. இங்கு தான் நாம் பதிவை எப்போது வெளியிடுகிறோம், எப்போது திரட்டியில் இணைக்கிறோம் என்பது முக்கியத்துவம் பெறுகிறது.

இந்தியா மற்றும் பிற இடங்களில் இருந்து வாசிப்போரை எடுத்து கொண்டால் 70 %-க்கும் மேல் இந்தியாவில் இருந்தும் மீதம் 30 சதவீதம் வெளிநாடு வாழ் தமிழர்களும் வாசிக்கிறார்கள். எனவே இந்தியர்கள் அதிகம் வாசிக்கிற நேரத்தில் வெளியிடுவது அவசியம் ஆகிறது

பெரும்பாலானோர் அலுவலகத்து வேலைக்கு இடையே நேரம் கிடைக்கும் போது தான் ப்ளாக் படிக்கின்றனர். ஆகவே இந்தியர்கள் அலுவலகத்தில் இருக்கும் நேரமான காலை பத்து டு மாலை ஏழுக்குள் பதிவுகள் வெளியிடுவது மிக நல்லது.

என் அனுபவத்தில் இந்த மூன்று நேர ஸ்லாட்டுகளும் பதிவு வெளியிட சிறந்தது என்பேன்

1. காலை பத்து டு பன்னிரண்டு. பலரும் அலுவலகம் வந்து ஆபிஸ் மெயில் பார்த்து முடித்து விட்டு பின் ப்ளாகை எட்டி பார்க்கும் நேரமிது. எனவே இந்த நேரம் திரட்டிகளை பார்வையிடுவோர் கூட்டம் அதிகமிருக்கும். உங்கள் பதிவு இந்நேரத்தில் திரட்டியில் இணைத்து, அதன் முதல் பக்கத்தில் இருந்தால், அதன் மூலம் நிறைய பேர் உங்கள் ப்ளாக் உள்ளே வர வாய்ப்பு உண்டு.

2 . மதியம் ஒன்று டு மூணு. சாப்பிட்டு விட்டு சற்று ரிலாக்சுடு ஆக சிலர் இந்த நேரம் திரட்டி பக்கம் வருவதால் இந்த நேரம் சொல்கிறேன்

3. மாலை ஆறு டு எட்டு. சிலர் அலுவலகத்தில் ப்ளாக் படிக்காமல் மாலை வீடு வந்து தான் படிப்பார்கள். மேலும் அமெரிக்கா உள்ளிட்ட நாடுகளில் இருந்து வாசிக்க வருவோர் இந்நேரம் தான் உள்ளே நுழைவர். இப்படி இரண்டு வித வாசிப்போரும் உள்ளதால் இந்நேரமும் நல்லதே.

இது பற்றி சில பிரபல பதிவர்கள் என்ன சொல்கிறார்கள் என பார்ப்போமா?

சென்னை பித்தன்

பதிவை வெளியிடுபவர், பிரபல பதிவர்களாயிருந்தால் எந்த நேரமும் நல்ல நேரம்தான்!.

இல்லையெனில் மாலையும் இரவும் சந்திக்கும் நேரமே சரியான நேரம் என நான் கருதுகிறேன்.இது என் அனுபவம் அடிப்படையில் சொல்வது அவ்வளவே !

ஆரூர் மூனா செந்தில்

நான் நேரம் பார்த்து பதிவு போடுவதில்லை. முன்பே பதிவுகளை தட்டச்சு செய்து வைத்து நான் பதிவிடுபவனில்லை. எனக்கு ஒரு எண்ணம் எழுந்தால் அதனை விரிவுபடுத்தி தட்டச்சு செய்து பதிவு முழுமையடைந்து விட்டதாக கருதினால் எந்த நேரமாக இருந்தாலும் வெளியிட்டு விடுவேன். ஹிட்ஸை எதிர்பார்த்து போடுவது சினிமா விமர்சன பதிவு மட்டுமே. எல்லோரும் 11.30 மணி காட்சி பார்த்து விட்டு விமர்சனம் எழுதும் போது நான் அதற்கு முன்பாகவே 08.00 மணி சிறப்பு காட்சி பார்த்து விட்டு எழுதுவதனால் ஹிட்ஸ் அதிகம் கிடைக்கிறது

கோகுல்

பதிவு வெளியிடும் நேரத்தை விட பதிவின் தலைப்பு அதிக பார்வையாளர்களை இழுத்து வருகிறது என்பது தான் எனது எண்ணம்.எந்த நேரத்தில் பதிவு போட்டாலும் தலைப்பு தான் ரேஸில் முந்த வைக்கிறது. நேரம் என குறிப்பிட்டு பார்த்தால் மாலை ஐந்துக்கு மேல இரவு பத்து பதினொன்று வரை என நினைக்கிறேன்.
*****
உங்களுக்கு பதிவு வெளியிடும் நேரம் குறித்து வேறு வித  கருத்து இருந்தால் அவசியம் பின்னூட்டத்தில் சொல்லுங்கள் நண்பர்களே !