சென்னை பஸ் விபத்து: 6 மாணவர் மரணம் -நடந்தது என்ன?

சென்னையில் நேற்று நடந்த பஸ் விபத்தில் ஆறு பள்ளி/கல்லூரி மாணவர்கள் இறந்ததை செய்தித்தாள் அல்லது டிவியில் நீங்கள் பார்த்திருக்கலாம். சம்பவ இடத்தில் இருந்த என் நண்பர் பேசியதை அப்படியே உங்களுக்கு தருகிறேன்

OMR ரோடில் ஒரு நிறுவனத்தில் என்னோட ஆபிஸ் இருக்கு. எனது டியூட்டி நேரம் காலை 6 முதல் மதியம் 2 வரை. நேற்று காலை ஆபிஸ் போயிட்டு எட்டு மணி அளவில் கேண்டீனில் காபி குடித்து கொண்டிருந்த போது "டமார் " என்று ஒரு சத்தம். நாங்கள் கேண்டீன் வழியே எட்டி பார்த்த போது, ரோடில் ஒரு லாரியின் பின்பக்கம் பஸ்சின் பின்புறம் மோதியிருந்தது. ஒரே கூக்குரல். ஆபிசிலிருந்து பலர் இறங்கி சாலைக்கு ஓடினோம்

நாங்கள் சென்றபோது ஒரு ஷேர் ஆட்டோ பஸ் மற்றும் லாரிக்கு அருகே நின்று கொண்டிருந்தது. முதலில் அது குறுக்கே வந்ததால் தான் விபத்தோ என அந்த டிரைவரை கோபமாய் அணுகினோம். ஆனால் அவர் விபத்தில் அடிபட்டு கீழே விழுந்திருந்த பள்ளி மாணவர்களின் பேகுகளை மட்டும் தன் ஷேர் ஆட்டோவின் பின்னே போட்டு கொண்டிருந்தார் என்று தெரிந்தது. அந்த பேகுகள் எல்லாம் ரத்தம் படிந்திருந்ததால்,ஷேர் ஆட்டோ பின்புறம் முழுதும் ரத்தம்.

விபத்து நடந்தது இப்படி தான்:

நிறைய எடையுடன் கூடிய ஒரு லாரி பெருங்குடி OMR - ரோடிலிருந்து வளைந்து இன்னொரு தெரு உள்ளே நுழைந்துள்ளது. அப்போது தெரு முனையில் ஸ்பீட் பிரேக்கர் இருக்க, அதன் மேலே ஏறி தாண்ட முடியாமல் வண்டி பின் புறம் வந்துள்ளது. அதே நேரம் திருப்போரூரிலிருந்து தி. நகர் செல்லும் 591 பஸ் மிக வேகமாக வந்துள்ளது. திடீரென லாரி பின்னே வருவதை கண்ட டிரைவர் வண்டியை வலப்பக்கம் முழுதும் ஒடித்து லாரியை தாண்டி செல்ல பார்த்துள்ளார். பஸ் லாரியை பாதி தாண்டி விட்டது. ஆனால் ரிவர்சில் பின்னாலேயே வந்து கொண்டிருந்த லாரி பஸ்ஸின் பின்புறம் மோதி விட்டது. படியில் இருந்த நால்வரும் வண்டி உள்ளே இருந்த நான்கைந்து பேர் மீதும் லாரி மோதி மிக மோசமாய் காயப்படுத்தி விட்டது.

அந்த இடத்தை பார்க்கவே கொடுமையாய் இருந்தது. இரண்டு மாணவர்கள் இறந்து விட்டது அப்போதே தெரிந்தது. இன்னும் நான்கு மாணவர்கள் மிக மோசமாய் அடிபட்டிருந்தனர்.

பஸ்ஸில் வந்த கலை என்கிற ஆறாவது படிக்கும் மாணவியின் அண்ணனும் அடிபட்டு இறந்தவர்களில் ஒருவன். அவள் அண்ணனை பார்த்து பார்த்து அழுது கொண்டிருந்தாள். அவளிடமிருந்து அவர்கள் அம்மா போன் நம்பர் வாங்கி (அப்பா தவறி விட்டார்) எனது போனிலிருந்து பேசினேன். உங்கள் பையனுக்கு சின்ன விபத்து என்று மட்டும் தான் சொன்னேன். அதற்கே அழ ஆரம்பிச்சிட்டாங்க. என்ன செய்றதுன்னு தெரியலை.

கொஞ்ச நேரத்தில் க்ளோப் ஆம்புலன்ஸ் வந்தது.ஏனோ 108 ஆம்புலன்ஸ் வரலை ; இந்த ஏரியா முழுதும் க்ளோப் ஆம்புலன்ஸ் தான் அதிகம் வருது என நினைக்கிறேன்.

ஸ்பாட்டுக்கு முதலில் வந்த பத்திரிகை தினத்தந்தி தான். விபத்து நடந்தவுடனே லாரி டிரைவர், பஸ் டிரைவர் ரெண்டு பேரும் ஓடிட்டாங்க. கண்டக்டரும் காணும். போலிஸ் வந்த பிறகு தான் கண்டக்டர் எங்கிருந்தோ வந்து சேர்ந்தார்

ஒரு பையனுக்கு மண்டையில் இருந்து ரத்தம் கொட்டிய படி இருந்தது. அவனது பேன்ட், சட்டை இரண்டும் ரத்தமாகி அப்படியே பிரம்மை பிடிச்ச மாதிரி அவன் உட்கார்ந்திருந்தான்

இறந்தவங்க பெரும்பாலும் தி. நகரில் இருக்கும் ஒரு பள்ளி மாணவர்கள். ஒரு சிலர் தரமணியில் படிக்கும் கல்லூரி மாணவர்கள். அதில் ஒரு பையன் அப்பா ரெண்டு வாரம் முன்னே தான் ஒரு பஸ் விபத்தில் இறந்திருக்கார் அடுத்த 2 வாரத்தில் அவங்க குடும்பத்தில் இன்னொரு சாவு !

அங்கிருந்து எல்லாரையும் லைப் லைன் ஆஸ்பத்திரிக்கு எடுத்து சென்றனர். 11 மணிக்கு மேல் வேலை கொஞ்சம் கம்மியா இருந்ததால், லைப் லைன் ஆஸ்பத்திரிக்கு போனேன். அப்போது தொகுதி எம். எல். ஏ வந்திருந்தார். நான்கு பேர் இறந்ததாக ஆஸ்பத்திரியில் கூறினர். 

படம்: நன்றி : NDTV இணையம்

ஆஸ்பத்திரியை அப்போ பார்க்க சினிமாவில் பாக்குற காட்சி மாதிரியே இருந்தது. பசங்களோட அம்மா- அப்பா வெல்லாம் கதறி அழுது கிட்டு இருந்தாங்க

இந்த விபத்து பற்றி மக்கள் பேசிக்கொண்டிருந்தது இது தான் :

பஸ்ஸில் தானாகவே மூடும் டோர் வைத்ததே படியில் யாரும் நிற்க கூடாது; கீழே விழுந்து இறக்க கூடாது என்று தான். இந்த பஸ்ஸில் அந்த டோர் இருந்தும் அதை மூடாம, படியில் தொங்க அனுமதித்துள்ளனர்.


இந்த ரூட்டில் கூட்டம் அதிகம். பஸ் மிக குறைவு. இன்னிக்கு அந்த பஸ்ஸில் ரொம்ப அதிக கூட்டம் தான். பசங்க வேணும்னு அங்கே தொங்கலை. இலவச பாஸ் என்பதால் கண்டக்டர்கள் அவர்களை கடைசியா ஏற சொல்றதும் ஒரு காரணம். காலை மாலை பள்ளி மற்றும் ஆபிஸ் நேரமாவது கொஞ்சம் அதிக பஸ் விடனும்.   பசங்களும் வண்டி உள்ளே போவதே இல்லை. படியிலேயே நிக்குறாங்க. இவங்க தோளில் பேக் மாட்டி கொண்டு நிற்பதால் , அது வெளியே தெரியும் போது வெளியே செல்லும் வாகனங்கள் கொக்கி போல பேகின் காதை இழுத்தே நிறைய பேர் விழுந்து அடி பட்டிருக்காங்க சிலர் இறந்திருக்காங்க. இன்னும் பஸ்ஸில் தொங்குவதை பள்ளி, கல்லூரி பசங்க விடுவதில்லை.

ஒரு விபத்து நடந்தா அதை மீடியா ரொம்ப ஊதி பெருசு பண்றாங்க. மதியம் ரெண்டரை மணிக்கு டியூட்டி முடிஞ்சு வீட்டுக்கு வந்துட்டேன். ஒரு நியூஸ் சானலில் அது இதுன்னு பேசிட்டிருந்தாங்க.  இந்த விஷயத்தில் எப்படி விபத்தை தடுத்திருக்க முடியும்.. அரசு என்ன பண்ணிருக்க முடியும்னு தெரியலை

நாலு பேர் இறந்ததா அரசு சொல்லுது. எட்டு பேர்னு சில டிவியில் சொல்றாங்க ஒருத்தங்க குறைச்சு சொல்றாங்க. இன்னொருத்தங்க அதிகம் சொல்றாங்க. ஆறு பேர் இறந்திருப்பாங்கன்னு நினைக்கிறேன்

இது எல்லாம் முடிஞ்ச பிறகு போலிஸ் இப்போ அதே ரோடில் நின்னுக்கிட்டு புட்போர்டில் போற பசங்களை உள்ளே போங்க உள்ளே போங்க என திட்டிகிட்டு இருக்காங்க இது எத்தனை நாளைக்கோ !