வானவில் :10ஆம் வகுப்பு குழப்பங்கள் - வினோதினி - Dr.வரதராஜன்

சென்னை ஸ்பெஷல் : டாக்டர் V.V. வரதராஜன்

டாக்டர் V.V. வரதராஜன் - அசோக் நகர் அருகே இருக்கும் புகழ் பெற்ற குழந்தை மருத்துவர். எங்கள் பெண் மிக சிறியவளாக இருந்தபோது குறிப்பிட்ட விஷயத்துக்கு இவரை அணுகினோம். மிக சின்ன பிரச்னையை சில டாக்டர்கள் பயமுறுத்திவிட, நடுங்கி கொண்டே தான் இவரிடம் சென்றோம் ஆனால் " ஒண்ணுமே இல்லை" என்று முதலில் தைரியம் தந்து சில மாதங்களில் சரி செய்தார். அவள் வளர்ந்து, நாங்கள் மடிப்பாக்கம் வந்த பின் அவரிடம் இப்போது செல்வதில்லை.(தூரம் அதிகம்)

சினிமா நடிகர்களில் பலரின் குழந்தைகளுக்கு இவர் தான் டாக்டர். நாங்கள் இவர் கிளினிக் சென்றபோது பார்த்த சில திரை நட்சத்திரங்கள்: ராஜ்கிரண், சரண்யா, விஜய் மனைவி சங்கீதா உள்ளிட்டோர் ...

இவரை பார்க்க குறைந்தது இரண்டு மணி முதல் மூன்று மணி நேரம் காத்திருக்க வேண்டும். குழந்தைகள் விளையாட ஊஞ்சல், சறுக்கு மரம் மேலும் டிவி போன்றவை இருப்பதால் நன்கு பொழுது போயிடும். காலை பன்னிரண்டு மணி முதல் இரவு பன்னிரண்டு வரை தன் வீட்டின் கீழ் இருக்கும் கிளினிக்கிலேயே பார்ப்பார். போனில் அப்பாயின்ட்மன்ட் வாங்கி கொண்டு தான் பார்க்க முடியும் !

சென்னையில் ஒரு நம்பகமான குழந்தை டாக்டர் என நிச்சயம் இவரை சொல்லலாம் !

வினோதினி

ஆசிட் வீச்சில் காயம் பட்ட வினோதினியின் மரணம், மிகுந்த மன வேதனையை தருகிறது. ஆசிட் வீசப்பட்டது முதல் இறக்கும் வரை அவளும், அவள் பெற்றோரும் எவ்வளவு துடித்திருப்பார்கள் !

ஒரு தலை காதல் என்பதெல்லாம் காதலே அல்ல . இருவரும் ஒருவரை ஒருவர் விரும்புவதை மட்டுமே காதல் என்ற வகையில் சேர்த்து கொள்ளலாம். ஒருதலையாய் ஆசை வைத்து , அது காதலாக மாறா விடில் இப்படியா செய்ய வேண்டும் ! எனது பள்ளி காலம் துவங்கி தொடர்ந்து இத்தகைய செய்திகளை கேள்விப்பட்டு கொண்டு தான் இருக்கிறேன் :((



பெண்கள் படிக்கவும் வேலைக்கும் செல்ல ஆரம்பித்து விட்டாலும் கூட ஆணின் வன்முறையில் இருந்து இன்னும் முழுதாய் மீள வில்லை. பெண்ணை விட உடல்வலிமை மிக்கவன் என்பதால் ஆண்கள் மூலம் இன்னும் சில கொடுமைக்கு ஆளாகவே செய்கிறார்கள்.

வினோதினியின் பெற்றோருக்கு இதிலிருந்து மீண்டு வரும் மன தைரியத்தை ஆண்டவன் அருள்வாராக !

QUOTE CORNER

Life will knock us down. But you have the choice whether to get up and move along or stay down.

பதிவர் பக்கம் - தேன்கிண்ணம் 

தேன்கிண்ணம் என்கிற வலை பதிவில் தொடர்ந்து பிரபல தமிழ் பாடல்களின் வரிகளையும், அந்த பாடலின் ஒலி வடிவத்தையும் பகிர்ந்து வருகிறார் நாகை சிவா. நேயர் விருப்பம் போல, உங்களுக்கு பிடித்த பாடலை சொன்னால் அதனை அடுத்த சில நாட்களில் வெளியிட்டு விடுவார். அநேகமாய் தினம் ஒரு பாடலாவது பகிர்கிறார் பாட்டு ரசிகர்களுக்கு இந்த ப்ளாக் நிச்சயம் பிடிக்கும்.

சம்பவம் - சாலை ஒர சிக்னலும், இளம் பெண்ணும்

ஆழ்வார்பேட்டை TTK சாலை உள்ளே இடது பக்கமாய் நுழைய சிக்னலை டூ வீலரில் கடக்கிறேன். பச்சை சிக்னல் இருந்தும் ஒரு கார் நகராமல் வழியை முழுதும் மறைத்த படி நின்று கொண்டிருந்தது. பின்னால் இருக்கும் வாகனம் எதுவும் கடக்க முடிய வில்லை .

என்னையும் சேர்த்து பலர் ஹாரன் அடித்து தள்ளினர். மனுஷன் அசரவே இல்லை. சரியாய் சிக்னல் சிகப்பிற்கு மாறும் முன் அந்த கார் முன்னே நகர, வேகமாய் சைட் வாங்கி சற்று திட்டலாம் என்று பார்த்த போது தான் அந்த காட்சியை கண்டேன்.

சாலையின் ஓரத்தில் ஒரு பள்ளி செல்லும் சிறு பெண் தனது சைக்கிளை ஸ்டாண்ட் போட்டு விட்டு கீழே விழுந்த புத்தகங்களை பொறுக்கி எடுத்து,  மீண்டும் சைக்கிளை கிளப்பி கொண்டிருந்தாள். நாங்கள் ஆள் ஆளுக்கு ஹாரன் அடித்து டென்ஷன் செய்தும், கார் ஓட்டுனர் - அந்த சிறு பெண்ணை ஹாரன் அடித்து டென்ஷன் செய்யாது, சிக்னல் இருந்தும் கடக்காமல்,  அமைதியாய்  நின்றிருக்கிறார்

இது புரிந்ததும் மனது "பாராட்ட வேண்டிய ஆளை போய் கோபப்பட்டோமே " என என்னவோ போல் ஆனது. இப்படி தான் பல விஷயங்களில் முதலில் நம் புரிதல் ஒன்றாகவும், பின்னர் வரும் புரிதல் வேறாகவும் உள்ளது !

பத்தாம் வகுப்பு.. 

எங்கள் பெண் இவ்வருடம் பத்தாம் வகுப்பு செல்கிறாள். (நமக்கு மனசுல வயசு 25 தான் ! நம்ம பெண் படிப்பது பத்தாவதா? ஓ காட் !) இந்த வருட பாடங்கள் பிப்ரவரியிலேயே துவக்கப்பட்டு விட்டன. ஒரே பீரியடில் பாதி நேரம் ஒன்பதாம் வகுப்பு பாடமும், மீத நேரம் பத்தாம் வகுப்பும் எடுக்கிறார்கள். பிள்ளைகள் எதை தான் படிப்பார்களோ? இதில் பத்தாம் வகுப்பு பாட நூல்கள் வழங்கப்படவே இல்லை. பிள்ளைகள் இணையத்தில் இருந்து டவுன் லோடு செய்து தான் வாசிக்கிறார்கள். புத்தகமே வரமால் இம்புட்டு அவசரமாய் எதற்கு எடுக்கணுமோ ? இதையெல்லாம் போய் பிரின்சிபாலிடம் கேட்கலாம். கேட்டால் மிக பொறுமையாய், அன்பு வழிய " இங்கே அப்படித்தான்; கஷ்டமா இருந்தா, டி. சி வாங்கிட்டு வேற ஸ்கூல் போயிக்குங்க" என்பார். இதனால் அவரை பார்க்கும்போது கும்பிடு போடுவதோடு சரி.

பெற்றோர் ஆசிரியர் கழகமெல்லாம் காகிதத்தில் தான் இருக்கு. நிஜத்தில் இல்லை :(

அய்யாசாமி கார்னர்

இண்டோ அமெரிக்கன் சாம்பரில், முக்கிய தலைப்பொன்றில் பேச - அய்யாசாமி பெயர் போட்டு, இன்விடேஷன் அச்சடித்து வந்திருந்தது. நம்ம ஆள் பந்தாவாய் இன்விடேஷனை வீட்டுக்கு எடுத்து கொண்டு போய் மனைவியிடம் காட்டி , அவர் ரீ -ஆக்ஷனுக்காக காத்திருந்தார்.

இடது கையில் வாங்கி அதனை ஒரு பார்வை பார்த்த மிஸஸ்.அய்யாசாமி " இப்ப என்ன அதுக்கு? நாளைக்கு காலையிலே பெண்ணை ஸ்கூலில் விட முடியாது. அவ்ளோ தானே? நான் கொண்டு போய் விடணும் ; ரைட்டா? " என்று கேட்க,

பாராட்டு எதிர்பார்த்த இடத்தில் பல்பு கிடைக்க, மலங்க மலங்க விழித்தார் அய்யாசாமி !