ஆதி பகவனும், லைப் ஆப் பையும்

லைப் ஆப் பை

லைப் ஆப் பை சமீபத்தில் தான் பார்த்தேன். என்னாது சிவாஜி செத்துட்டாரா என்று கேட்காமல் மேலே படியுங்கள்.

சிறந்த இயக்குனருக்கான விருது உட்பட 4 ஆஸ்கர் விருதுகளை வென்ற லைப் ஆப் பை கதை மிக சுருக்கமாக...



பை என்கிற இளைஞன் தன் வாழ்க்கையில் சந்தித்த வித்தியாச அனுபவம் பற்றி பகிர்கிறான்.

Zoo நடத்தும் தந்தை நஷ்டத்தில் செல்வதால் அதனை மூடி விட்டு விலங்குகளை வெளிநாட்டிற்கு விற்க கப்பலில் கொண்டு செல்கிறார். அனைத்து விலங்குகளுடன் அவர்கள் குடும்பமும் பிரயாணிக்க, சூறாவளி வந்து பெரும்பாலானோர் இறக்கிறார்கள்.

சிறுவன் பை மட்டும் தப்பி ஒரு சிறு படகில் இருக்க, அந்த படகிற்கு ஒரு புலி, வரிக்குதிரை, குரங்கு & கழுதைப்புலி வந்து சேர்கிறது. கடல் வழியே வேறு யாரும் வந்து காப்பாற்றும் வரை அந்த படகிலேயே இருக்கும் நிலை. புலி மற்ற விலங்குகளை கொன்று, கொஞ்சம் கொஞ்சமாக சில நாட்களில் தின்று விடுகிறது. இனி மிஞ்சி இருப்பது பை மட்டும் தான்.

சிறுவன் பை எப்படி தப்பிக்கிறான் - புலி என்ன ஆனது எனபதை அவசியம் படத்தில் பார்த்து தெரிந்து கொள்ளுங்கள்.



சாதாரணமாக தான் துவங்குகிறது படம். அந்த சூறாவளிக்கு பின் தான் சீட்டின் நுனிக்கு வந்து விடுகிறோம். முதலில் பை தப்பிக்க வேண்டும்; அந்த புலி எப்படியேனும் சாக வேண்டும் என்று எண்ணும் நாம், போக போக, புலி உயிர் தப்ப வேண்டும் என்று நினைக்க வைப்பது அழகான திரைக்கதை உத்தி. பை-யின் மனநிலை எதுவோ அதுவே பார்வையாளனின் விருப்பமாகவும் உள்ள மாதிரி படத்தை அழகாய் கொண்டு செல்கிறார் இயக்குனர்.

உடல்நிலை சரியில்லாத புலியை மடியில் போட்டு கொண்டு சிறுவன் அமர்ந்திருப்பது நெகிழ்வான இடங்களில் ஒன்று.

பல காரணங்களுக்காக லைப் ஆப் பை - ஒரு வித்தியாச அனுபவத்தை தருகிறது. ஆங்கில படத்தில் இந்திய நடிகர்கள் பலரும் இருக்கிறார்கள் - பாண்டிச்சேரியில் கதை துவங்குகிறது - ஆங்காங்கு தமிழில் வேறு பேசுகிறார்கள்.

படம் சொல்ல விரும்பும் ஆதாரமான செய்தி - சக உயிர்களிடம் செலுத்த வேண்டிய அன்பும், "Never, never, never Give up - ":attitude -ம் தான்.

அவசியம் பாருங்கள் லைப் ஆப் பை !
****************

ஆதி பகவன்

முதல் நாளே படம் பார்த்த பதிவர்கள் நொந்து புலம்பிட்டாங்க. அதுக்காக நாம பார்க்காம விட்டுட முடியுமா?

ஒரே மாதிரி உருவம் கொண்ட இருவர் - ஒருத்தன் நல்லவன் - இன்னொருத்தன் கெட்டவன். கெட்டவனை போலிஸ் போட்டு தள்ள துடிக்க, அவன் நல்லவனை அந்த வலைக்குள் மாட்டி விட்டு தப்பி கொள்ள பார்க்கிறான். வழக்கம் போல கடைசியில் வாய்மை (!!) வெல்கிறது !

ஆரம்பிக்கும் போது எல்லாம் பரவால்லை என்கிற மாதிரி தான் இருந்துச்சு. சமீபத்தில் வெளி வந்த ஹிந்தி படமான ஸ்பெஷல் 26 மாதிரி ஜெயம் ரவி - போலி சி. பி. ஐ ஆபிசரா வர்றார். அப்புறம் தாதா வேலை பார்க்கிறார். நீத்து சந்திராவை பார்த்ததும் காதலிக்கிறார். இடைவேளை வரை ஓரளவு சகிச்சுக்கலாம். எதோ சுவாரஸ்யமான முடிச்சு போல காட்டி இடைவேளை விட்டாலும் அதுக்கு பிறகு சொதப்புறாங்க பாருங்க.. ..



ஜெயம் ரவியை பார்க்கும் போதெல்லாம் இந்த படத்தை நம்பி 2 வருஷம் வீணடிச்சாரே என்ற நினைப்பு தான் வருது. பகவான் பாத்திரத்தில் ரொம்ப கஷ்டப்பட்டு நடிச்சாலும் எல்லாமே விழலுக்கு இரைத்த நீர்.

நீத்து சந்திரா.. வாரே வா என ஆரம்பத்தில் சொக்கி போக வைத்தாலும், போக போக - பிடிக்காமல் போய் விடுகிறது. தம்மும் தண்ணியுமாய் இருக்கிறார் என்பதல்ல வேறு என்ன காரணம் என யோசிச்சிக்கிட்டே இருக்கேன்

பாடல்கள் ரொம்ப ரொம்ப சுமார் ...அதுவும் படம் முடியும் நேரத்தில் ஒரு பாட்டு போட்ட அமீரை கட்டி வச்சு அந்த பாட்டை நூறு தடவை பார்க்க வைக்கணும்

நெகடிவ் பாத்திரத்தில் வரும் பகவான் செய்யும் வேலைகளும் சரி நடவடிக்கையும் சரி ரொம்ப காமெடியா இருக்கு. அவரை பார்த்து எல்லாரும் நடுங்குறாங்க என்பது நம்புற மாதிரியே இல்ல !

எனக்கு தெரிஞ்சு ஒரு தமிழ் படத்தின் கிளைமாக்சில் ஹீரோ Vs ஹீரோயின் முழு நீள சண்டை போட்டது இந்த படத்தில் தான் இருக்கும்.

படம் முடியும் போது ரெண்டாவது பார்ட்டுக்கு வேறு ஒரு பிட்டை போடுறார் அமீர் - பாவங்கண்ணா - தயாரிப்பாளர் அன்பழகன்க்கு - ஜூஸ் கடையாவது மிஞ்சட்டும் - விட்டுடுங்க !

ஆதி பகவன்- A படம் என்பதால் டிவி யில் போட மாட்டாங்களாம். தியேட்டரிலோ, சி டி யிலோ பார்க்காதவர்கள், இந்த படத்தை என்றும் பார்க்க போவதில்லை என்பதால் க்ரேட் எஸ்கேப் !