வானவில்: துப்பாக்கி- ஓவியா- கேரட் ஜூஸ்

ஆறுவகை நண்பர்கள்

டைம்ஸ் ஆப் இந்தியாவில் சில சுவாரஸ்ய சமாச்சாரங்கள் வரும். அப்படி வாசித்த ஒன்று ... நம் ஒவ்வொருவருக்கும் தேவை - ஆறு நண்பர்கள் ! வேறு விதமாய் சொல்லணும் என்றால் ஆறு விதமான நண்பர்கள் கொண்ட குழு !

எதற்கும் டென்ஷன் ஆகாத ஒரு நண்பர், உங்களை பற்றி உங்களை விட அதிகம் தெரிந்த ஒருவர், எதிலும் தைரியமாய் இறங்கி பார்க்கும் நண்பர், நீங்கள் எப்போது கஷ்டம் என்றாலும் உடனே ஓடி வர ஒரு நண்பர் இப்படி வெவ்வேறு வித நண்பர்கள் ஒருவருக்கு இருப்பதே ஒரு மனிதனை முழு மனிதனாகவும் அவன் வாழ்க்கையை சுவாரஸ்யமாகவும் ஆக்கும் என்கிறது இந்த ஆராய்ச்சி.

உங்கள் நண்பர்கள் இதில் எந்தெந்த கேட்டகரியில் வருவார்கள் என முடிந்தால் யோசித்து பாருங்கள்.

அழகு கார்னர்

சில பேருக்கு கொஞ்சம் மேக் அப் போட்டாலே பார்க்க ரொம்ப அழகா தெரிவாங்க.

தண்ணீர் தர மறுக்கும் கேரளம்,  தமிழகத்துக்கு தந்த கொடைகளில் இவரும் ஒருவர் !

சந்தித்த நபர்

மடிப்பாக்கத்தில் ஒரு இன்டர்நெட் சென்டருக்கு சென்றிருந்தேன். கடையில் இருந்தவர் ஐம்பது வயது மதிக்கத்தக்கவர். பிரிண்ட் அவுட் எடுக்கணும் என்றதும், "எனக்கு எப்படி செய்யணும் என தெரியாது நீங்களே செஞ்சிக்கனும்" என்றார். அப்புறம் பார்த்தால் கணினியை அல்லது பிரிண்டரை ஆன் செய்யவும் அவருக்கு தெரியலை. வேலை முடிந்து கிளம்பும் போது மழை பெய்ய சற்று காத்திருக்க வேண்டியதாயிற்று.

அவருக்கு கணினி பற்றி தான் தெரியலையே ஒழிய மற்ற உலக விஷயங்கள் செம அறிவு ! " தென் சென்னை, தென் சென்னைன்னு சும்மா லேண்ட் விலை ஏத்திட்டாங்க சார். ஒரு டிரையிநேஜ் கனக்ஷன் தர எவ்ளோ வருஷம் ஆகுது பாருங்க ! தலைக்கு மேலே ஈ. பி ஒயர் போனா அது சிட்டியே இல்லை சார். கிண்டி எல்லாம் பாருங்க ஒயர் எல்லாம் தரைக்கு கீழே தான் போகும்" என்றார்.

தன் பையனுடைய கடை இது என்றும் அவன் இல்லாத நேரம் மட்டுமே நான் இருப்பேன்" என்றும் சொன்னவர் பேசிய மற்ற விஷயங்களில் சென்னை பற்றி நிறையவே அறிந்து கொள்ள முடிந்தது !

டேல் கார்நிஜி சொன்னமாதிரி  " Every man I meet is in someway my superior and I can learn from him".

எதிர்பார்க்கும் படம்: துப்பாக்கி

விஜய் படத்தை எதிர்பார்க்கும் படம் என்று சொல்வதா என்று கிண்டல் செய்யாதீர்கள் ! சிறு சரிவுக்கு பின் விஜய் மீண்டுவிட்டார் என்று தான் சொல்லணும். காவலன், வேலாயுதம், நண்பன் என  ஹாட்ரிக்  அடிச்சுட்டார்.  முருகதாஸ் எனக்கு ஓரளவு பிடித்த இயக்குனர் (ஏழாம் அறிவு சொதப்பலை விடுங்கள்);

கடந்த ஒரு வாரமாய் ஆபிஸ் ஜிம்மில் விஜய் ரசிகர்களுக்கும் அஜித் ரசிகர்களுக்கும் செம விவாதம்.

"எங்க அஜித் வரலாறுல லேடி மாதிரி நடிச்சாரே ; உங்க ஆளால முடியுமா? "

" அட விடுப்பா.. அது அவருக்கு நேச்சுரலா வந்துடுச்சு" - ஒரு சாம்பிள் !

படம் வரும் வெள்ளி ரிலீசா, தீபாவளிக்கு தான் வருகிறதா என்பதில் ஏகப்பட்ட குழப்பம். வெள்ளியன்று வந்தால் மாலை காட்சியே படம் பார்க்க ஜிம் நண்பர்கள் ஏற்பாடு செய்துள்ளனர்...எனக்கும் சேர்த்து. (யாரது ஐயய்யோன்னு கத்துனது. நோ நோ அப்படில்லாம் கத்தப்படாது !)

பாலோ அப் :மடிப்பாக்கம் கொலை வழக்கு


மடிப்பாக்கம் நகை கடையில் பகலில் நிகழ்ந்த கொலை/ கொள்ளை பற்றி இங்கு எழுதியிருந்தோம் அல்லவா? அந்த வழக்கு துப்பு துலக்கப்பட்டு விட்டது

அலி மற்றும் தினேஷ் என்கிற இரு இளைஞர்கள் தான் இதனை செய்துள்ளதாக கண்டுபிடித்துள்ளனர். அலியின் வீட்டில் நகைகள் முழுமையாக கண்டுபிடிக்கப்பட்டுள்ளது. அவற்றில் இறந்த சிறுவனின் ரத்தக்கறை கூட இருந்ததாம் :((

இவர்கள் இருவரும் அறுபது முறைக்கு மேல் கடைக்கு அடகு வைக்கிற மாதிரி வந்து சென்றனராம். கடை முதலாளிக்கு நன்கு அறிமுகம் ஆன இவர்களுக்கு கஞ்சா பழக்கமும் உண்டு என கூறப்படுகிறது.

விரைந்து நடவடிக்கை எடுத்து கண்டு பிடித்துள்ளது போலிஸ். ஐந்து கிலோ நகையும் அப்படியே கிடைத்து விட்டது ..ஆனால்... போன உயிர் போனது தான். அந்த சிறுவனை இழந்து விட்டோம் :(

போஸ்டர் / QUOTE கார்னர்

அய்யாசாமி தயாரித்த கேரட் ஜூஸ்

"கேரட் ஜூஸ் செய்வது ரொம்ப ஈஸிங்க. கேரட் தோலை லேசா சீவி எடுத்துடுங்க. துண்டு துண்டா நறுக்கிக்கோங்க. காய்கறிக்கு நறுக்கிற மாதிரி ஒரே சீரா நறுக்கணும்னு இல்லை. மிக்சியில் தானே போட போறோம் ? நறுக்கிய கேரட்டை பில்டர் இருக்குற மிக்சியில் போட்டு நல்லா அரைக்கணும்.

ஒரு நிமிஷம் போல அரைச்சிட்டு, அப்புறம் கொஞ்சம் தண்ணி ஊற்றி மறுபடி அரைங்க.உடனே குடிக்கிறதா இருந்தா அத்தோட கொஞ்சம் பால் சேத்துக்கலாம். ஜூசை ஸ்கூல் அல்லது ஆபிஸ் எடுத்து போறதா இருந்தா பால் சேர்க்க வேண்டாம் (ஜூஸ் கெட்டு போயிடும் ); லேசா தேன் ஓரிரு சொட்டு சேர்த்தா கேரட் ஜூஸ் ரெடி !

அடிக்கடி இப்படி கேரட் ஜூஸ் செஞ்சு குடிச்சா, கண் பிரச்சனைகள் வராது அத்தோட கலர் அதிகமாகி சும்மா தகதகன்னு மின்னுவீங்க..ம்ம்ம்ம் !" -