வானவில்: லியோனி- சச்சின் -சுனைனா ....!

25 கமன்ட்டுகளையும், 15 தமிழ்மண ஓட்டுகளையும் ஒவ்வொரு பதிவுக்கும் வாரி வழங்கி கொண்டிருக்கும் வாசக பெருமக்களுக்கு நன்றி ! நன்றி ! நன்றி! ( நாமென்ன கேபிளா ... பத்து லட்சம் ஹிட்ஸ்க்கு நன்றி சொல்ல. நமக்கு கிடைப்பதைத் தானே நாம சொல்ல முடியும் !)
*******
பதிவர் மாநாடு பற்றி 15 நாளா எழுதி எழுதி ஓய்ந்து போய் மத்த விஷயம் இப்போ தான் எழுத ஆரம்பிக்கிறேன். நம்ம ஹவுஸ் பாசே "என்ன இதுவே எழுதுறீங்க வேற எழுத ஆரம்பிங்க" என திட்டும் அளவு எழுதியாச்சு.  படங்கள் போட ஆரம்பித்ததும், அப்புறம் எல்லா படமும் இங்கே போட முடிவு செய்ததும் தான் இவ்ளோ பெரிய நீளத்துக்கு காரணம் ! போன வாரம் வானவில் கூட எழுதலைன்னா பாத்துக்குங்களேன் ! (வானவில் ஏன் வரலைன்னு ரெண்டு பேர் கண்டன மெயில் அனுப்பினாங்க. அவர்களுக்கு என் நன்றி:))

இந்த தடவை டெலிபோன் பில் வந்தா, எங்க மேடம் இன்டர்நெட்டை கழட்டி போடவும் வாய்ப்பிருக்கு ! காலை எட்டு மணி வரை மட்டுமே இலவச அப்லோட்; காலை நேரம் நான் கிச்சனை பார்ப்பேனோ. போட்டோ அப்லோட் செய்வேனா? அடுத்த தடவை பதிவர் மாநாடு வச்சா காமிராவே கொண்டு போக கூடாதோன்னு நினைக்கிறேன்.

"இப்படி  எல்லாம்  சொல்லக்கூடாது ! நீங்க அடுத்த முறையும் காமிரா கொண்டு போகணும்" என்று சொல்வோர் எனது இந்த மாத டெலிபோன் பில் கட்ட ஸ்பான்சர் செய்து உதவவும்  :))

அழகு கார்னர்

சுனைனா : வந்த முதல் படத்திலேயே பலரை வீழ்த்திட்டாங்க. கண், மூக்கு, சிரிப்பு என எல்லாமே அட்டகாசம் ! ஆனா ஏன் இன்னும் பெரிதா பாப்புலர் ஆகலைன்னு தெரியலை.

பாலஹனுமான் சென்னை விஜயம்

அமெரிக்காவில் வசிக்கும் பதிவர் பாலஹனுமான் சென்னை வந்திருந்தார்.  அவரை பார்த்தாலும் சரி, பேசினாலும் சரி அமெரிக்க வாழ் இந்தியர் என்றே சொல்ல முடியாது. சென்னையில் வசிக்கும் ஒரு சாதாரண மனிதர் போல் அவ்வளவு எளிமை. அவர் படித்த புத்தகங்களும், தமிழகத்தில் அவருக்கு தெரிந்த எழுத்தாளர்களும் கேட்டால் கண்ணைக் கட்டுது ! அடுத்த முறை நாம் இங்கே விழா வைக்க வி. ஐ. பி எழுத்தாளர்கள் வேண்டுமானால் அமெரிக்காவில் இருக்கும் பாலஹனுமான் மூலமே யாரையும் சென்னையில் பிடிச்சுடலாம் !

மாலை வேளச்சேரியில் ஒரு ஹோட்டலில் பாலகணேஷும்  நானும் சந்தித்து உரையாடினோம். செம சாப்பாடு ! சரியான அரட்டை ! நம் ப்ளாக்கை சட்ட ஆலோசனை தவிர்த்து (அமெரிக்காவில் இருப்பதால் இந்திய சட்டங்கள் மீது அவருக்கு அதிக ஈடுபாடு இல்லை) -மற்ற அனைத்து பகுதிகளும் விடாது வாசிக்கிறார் என தெரிந்து மிக மகிழ்ச்சி. மீண்டும் ஜனவரியில் அவர் மகள் திருமணத்திற்காக சென்னை வருகிறார் ! சுஜாதாவின் புக்குகள் அதிகம் படித்தவன் என்று எனக்கு இருந்த சிறு இறுமாப்பு இவரை பார்த்ததும் நொறுங்கியது. சுஜாதா நாவல்களில் இருந்து கேள்வி எல்லாம் கேட்டு குவிஸ் வைத்து விட்டார். மூணரை மணி நேரம் பேசியும் பிரிய மனமின்றி தான் பிரிந்தோம் !

டிவி கார்னர் - கே. பி பேட்டி

ஜெயா டிவியில் தினம் இரவு 10 மணி முதல் பத்தரை வரை "திரும்பி பார்க்கிறேன்" என்ற நிகழ்ச்சி ஒளிபரப்பாகிறது. சினிமா உலகில் இருந்த பழைய நடிகர்/ நடிகை/ இயக்குனர் பேசும் நிகழ்ச்சி. இதில் செப்டம்பர் 3 முதல் கே. பாலச்சந்தரின் பேட்டி தொடர்ந்து இடம்பெறுகிறது. நூறு படங்களுக்கு மேல் இயக்கியவர் என்பதால் 35 எபிசோடுக்கு இந்த பேட்டி போகும் என அண்ணன் உண்மை தமிழன் தெரிவிக்கிறார்.

கமல், ரஜினி தொடங்கி பலர் பற்றி இதில் சுவாரஸ்யமாய் பேச வாய்ப்பிருக்கிறது முடிந்தால் பாருங்கள் !

அய்யாசாமி கார்னர்

கல்யாண நாள் அன்று ஆபிசில் ஓணம் கொண்டாடியதால் இந்த கோலத்தில் அய்யாசாமி ...
சட்டை என்னவோ புதுசு. கல்யாண வேஷ்டி ..16 வருஷ பழசு !

ஆபிசில் பிறந்த நாள் கொண்டாடுறது ரைட்டு தான். அதுக்குன்னு குடிக்கிற பாட்டில் &பேசுற போனை கூடவா விட்டு வைக்க கூடாது? பாசக்கார பய புள்ளைக பண்ற வேலை !

கவிதை கார்னர்

உன் மனசு எப்படி
அப்படியே உன் வாழ்க்கை
உன் உழைப்பு எங்கனம்
அது கொண்டே உன் வெற்றி
உன் பேச்சு எவ்வாறு
அவ்வாறே உன் கௌரவம்
உன் சிந்தனை எவ்விதம்
அவ்விதமே உன் பயணம் !

(தன் 21 வயதில் இந்த கவிதை எழுதியது அய்யாசாமியே தான். கவிதையோ இல்லையோ கருத்து இன்னிக்கும் பொருந்துது !)

லியோனி பட்டிமன்றம்- இனியவன் காமெடி

லியோனி பட்டிமன்றத்தில் கலக்கும் இனியவனின் சில அருமையான காமெடிகள் இதோ உங்களுக்காக. அண்டங் காக்காய் கொண்டைகாரி பாட்டுக்கும், ஒரு பொண்ணு ஒன்னு நான் பார்த்தேன் பாட்டுக்கும் இவர் கொடுக்கும் விளக்கம் அப்பப்பா .. ஜூப்பரு !



கிரிக்கெட் கார்னர்

இந்தியா Vs நியூசிலாந்து டெஸ்ட் போட்டி தொடரை எதிர்பார்த்த மாதிரியே இந்தியா வென்றது. சமீப காலமாய் சச்சின் தொடர்ந்து பவுல்ட் ஆகி வருகிறார். வயதானதால் கால்கள் சரியாக நகரவில்லை என்றும் புல் லெங்க்த் பந்துகள் ஆடமுடியாமல் பவுல்ட் ஆவதாகவும் சொல்கிறார் கவாஸ்கர். " விரல்கள் நன்றாயிருக்கையில் வீணையை விற்று விடு" என ஒரு கவிதை இருக்கு. அதை போல சச்சின் ஓரளவு நல்லா ஆடும்போதே ரிட்டையர் ஆகி இளையவர்களுக்கு வழி விடலாம் என்பது பலரின் கருத்து !!

அஷ்வின் இந்திய பிட்சில் நிறைய விக்கெட் எடுத்தாலும் சூப்பர் பவுலர் என சொல்லிட முடியாது. வெளி நாட்டு பிட்சில் டிபன்சிவ் பவுலர் ஆக தான் இருக்க முடியும்.

இப்போதைக்கு இந்திய அணியின் ஒரே நம்பிக்கை நட்சத்திரம் விராட் கோலி தான் ! நீ ஆடுறா ராசா !

ஆசிரியர் தின வாழ்த்துகள் 

ஆசிரியர் தினமான இன்று பள்ளி, கல்லூரிகளில் மட்டுமல்ல வாழ்க்கையிலும் நமக்கு வழிகாட்டியாய் இருக்கும் அனைத்து ஆசிரியர்களுக்கும் நன்றியையும் வணக்கத்தையும் உரித்தாக்குவோம் !