சூப்பர் சிங்கர் ஜூனியர்: ஜட்ஜுகளை Judge பண்ணுவோமா?

சூப்பர் சிங்கர் ஜூனியர் அவ்வப்போது திட்டினாலும் தொடர்ந்து பார்த்து தான் வருகிறோம். குடும்பத்தோடு இரவு அமர்ந்து சாப்பிடும் நேரம், லைட் ஆக ஒரு நிகழ்ச்சி என்கிற வகையில் இது வீட்டில் அனைவரும் பார்க்க கூடிய  நிகழ்ச்சியாக உள்ளது

இந்த முறை சூப்பர் சிங்கர் ஜூனியருக்கு ஜட்ஜுகளாக தொடர்ந்து வருவது மனோ, சித்ரா மற்றும் மால்குடி சுபா ஆகிய மூவர் தான். அவ்வப்போது புஷ்பவனம் குப்புசாமி, கரநாடக சங்கீத பாடகி சௌமியா போன்றோர் வருகிறார்கள். இவர்கள் ஜட்ஜுமென்ட் எப்படி இருக்கு என ஒரு அலசல் இதோ:

மனோ 

என்னத்த சொல்ல ! ஒரு ஜோக்கர் மாதிரி கூத்தடிக்கிறார் மனோ ! இருந்துட்டு போகட்டும். அங்கு அமரும் பெண்களும் சிறு குழந்தைகளும் இவர் செய்யும் சேட்டைகளை பார்த்து சிரிக்கிறார்கள். ஆனால் நமக்கு தான் சிரிப்பு வருவதில்லை.

அந்த வாரம் யார் அவுட் ஆனார்கள் என்கிற முடிவாகட்டும், ஸ்பாட் செலக்டட் ஆன தகவலை சொல்வதாகட்டும் இப்படி முக்கிய முடிவை பெரும்பாலும் மனோ தான் அறிவிப்பார் .. அது தான் அவர் செய்யும் உருப்படியான செயல்.

சுபா

இருக்கிற மூன்று ஜட்ஜுகளில் சுத்த மோசம் என்றால் சந்தேகமே இன்றி அது இவர் தான் ! சங்கீத ஞானத்தில் மனோவை விஞ்சி விடுவார் இவர் ! குழந்தைகளை பாராட்ட வேண்டும். அப்போது தான் மூட் அவுட் ஆக மாட்டார்கள், அவர்களுக்கு encouraging ஆக இருக்கும் என்பதெல்லாம் சரி தான். ஆனால் அவர்கள் முன்னேற்றத்துக்கு தேவையான ஒரு உருப்படியான பாயிண்ட்டும் எப்போதும் இவர் சொல்வதில்லை ! " நல்லா பாடினே கண்ணா. தேன்க் யூ வெரி வெரி மச்" என்பது தான் இவர் எல்லாருக்கும் பேசும் ஒரே டயாலக். இதை ஒரு டேப் ரிகார்டரில் இவர் குரலில் ரிக்கார்ட் செய்து எல்லார் பாடிய பின்னும் போட்டு விடலாம்.

சித்ரா

சூப்பர் சிங்கர் ஜூனியரில் மூன்று ஜட்ஜ் இருக்கிறார்கள் என்று சொல்வதே தவறு ! இருப்பது ஒரே ஜட்ஜ் ! அது இவர் தான் ! ஒரு ஜட்ஜ் எப்படி இருக்கணும் என்பதற்கு உதாரணம் சித்ரா தான். என்ன ஒரு அறிவு ! மிக மிக சின்சியர் ஆன ஒரு ஜட்ஜ். எப்படி பாடினாலும் பசங்களை ஓரிரு வரி பாராட்டிட்டு அப்புறமா ஒவ்வொரு குறையா சொல்லுவார். அது யார் மனதையும் புண்படுத்தும் விதத்திலோ, biased-ஆகவோ இருக்காது. இவர் சொல்வதை மாற்றி கொண்டால் சின்ன பசங்க ரொம்ப நல்லா பாடலாம் என்று நிச்சயம் சொல்லலாம். அப்படி இவர் சொல்வதை சரியே எடுத்து கொண்டு நன்கு பாட ஆரம்பித்தவர்களும் நிச்சயம் உள்ளனர்.

எப்போதோ வரும் ஜட்ஜ்களில் :

புஷ்பவனம் குப்புசாமி 

இந்த நிகழ்ச்சியில் இவர் எப்போதாவது மைக் பிடிச்சு பேசினாலே உடனே சேனல் மாற்றிடுவேன். பாடிய குழந்தைகளை பற்றி கவிதை படிக்கிறேன் என சூர மொக்கை போடுவார். அது கவிதையா என்பதும், அது ரசிக்கிற மாதிரி இருக்கிறதா என்பதும் சேனல் நடத்துபவர்களுக்கு புரியாமலா இருக்கிறது? ஹும் :(

பாடகி சௌமியா

பாடல்கள் பற்றி நல்ல அறிவு உள்ளவர். குழந்தைகள் வருத்தப்படாமல் சில பாயிண்டுகள் சொல்வார். ஆனால் எப்போதோ ஒரு முறை வருவதால், முழு flow-வில் பேசாமல், எதையோ கொஞ்சம் முழுங்கி முழுங்கி பேசுற மாதிரி இருக்கும். தொடர்ந்து வந்தால் இவர் ஒரு நல்ல ஜட்ஜ் ஆக இருப்பார்.

இனி சூப்பர் சிங்கரில் நடந்த சில ஷாகிங் விஷயங்கள்.

நன்கு பாடுகிற இருவர் வெளியேற்றப்பட்டது செம ஷாக். இவர்களை விட சுமாராக பாடும் பலர் இன்னும் இருக்க, இவர்களை எப்படி வெளியேற்றினர் என்பது புரியவே இல்லை !

ரக்ஷிதா : நிச்சயம் பைனல் போவார் என நான் நினைத்த பாடகி. அதுக்கு சில காரணங்கள் உண்டு. ஒன்று இவர் தமிழ் நாட்டு பெண். சென்ற முறை மலையாள பெண்ணான அல்காவுக்கு பரிசு தந்ததில் நிறைய சர்ச்சை இருந்தது. சுகன்யா மற்றும் இவர் தான் நன்கு பாடுபவர்களாக தெரிந்தனர். அதில் சுகன்யா மலையாளி. எனவே இவருக்கு வாய்ப்பு அதிகம் என நினைதேன். ஆனால் மிக சீக்கிரமே, இவரை விட மிக சுமாராய் பாடும் எத்தனையோ பேர் இருக்கும் போது அவுட் செய்து விட்டனர்.

வொயில்டு கார்ட் ரவுண்ட்டில் பங்கேற்கவே இப்ப ஒரு செலக்ஷன் நடக்குது. அதில் பாடி ஒய்ல்ட் கார்டுக்கு செலக்ட் ஆகியிருக்கார் ரக்ஷனா. அதிலும் வென்று மீண்டும் முக்கிய நிகழ்வின் உள்ளே வருவார் என நம்புவோம் !

ஆஜிஷ்: குட்டி பையன், ரொம்ப நல்லா பாடுவான். செம ஸ்டைல் வேற ! பல முறை ஸ்பாட் செலக்ட் ஆனவன். சில வாரம் முன்பு இவன் வெண்ணிலவே வெண்ணிலவே பாடிய போது நான் அசந்து போனேன். ஆண் பாடகர்களே குறைவாக உள்ள நிலையில் இவன் பைனல் செல்ல வாய்ப்பு அதிகம் என நினைத்திருந்தேன். எல்லா வாரமும் இவனை பாராட்டி விட்டு, திடீரென ஒரு வாரம் சரியா பாடலை என அனுப்பி விட்டனர் !
****

சரி ஒரே குறையா சொல்றோம் ..இங்கு நடந்த ஒரு நல்ல விஷயத்தையும் பகிர்ந்திடலாம். கெளதம் பாடிய உள்ளத்தில் நல்ல உள்ளம் பாடல் அனைவரையும் நெகிழ்த்தி விட்டது. அந்த பாடலும், அதன் சூழலும், மெட்டுமே நம்மை அழ வைத்து விடும். அதை கெளதம் சரியாக பாட, ஸ்டூடியோவில் இருந்தொருக்கும் பார்த்த பலருக்கும் கண்ணில் நீர் திவலைகள் உருண்டோடின !

 

*********

நிகழ்ச்சி பல லட்சம் பேரால் பார்க்கப்படுகிறது என்பதை உணர்ந்து விஜய் டிவி பாரபட்சம் இல்லாமல் நடந்து கொள்வதும், அடுத்த முறையாவது குழந்தைகளை மதிப்பிட நல்ல சங்கீத அறிவு உள்ள ஜட்ஜுகளை நியமிப்பதும் தான் நமது எதிர்பார்ப்பு !