சென்னை கார்பரேட் க்ளப்-ஏமாற வேண்டாம் ! ஜாக்கிரதை !

சில ஆண்டுகளுக்கு முன் ஒரு பொருட்காட்சி சென்றிருந்தேன். ஒரு ஸ்டாலில் சென்னை கார்பரேட் கிளப் ஸ்டால் இருந்தது. அதனை பொருட்படுத்தாமல் நகர பார்க்கும் போது " சார் சும்மா பாருங்க" என்று கூப்பிட்டனர். " சார்.. லைப் டைம் ஸ்கீம் சார். எப்ப வேண்ணா இந்தியா முழுக்க இருக்க எங்க க்ளப்புக்கு போய் தங்கலாம். சென்னையா இருந்தா இலவசம் சார். மத்த இடம்னா குறைந்த காசில் ரூம் தருவோம் சார். சாப்பாடு, சுவிம்மிங் பூல் எல்லாம் இருக்கு சார்" என்றனர்.

அந்த ஸ்கீமை படிக்கும் போதே " இந்த ஸ்கீம் இன்னிக்கு லாஸ்ட் நாள் சார் . பத்தாயிரம் ரூபாய் ஒன் டைம் பணம் கட்டினால் போதும்" என்றனர். அவ்வளவு பணம் இல்லை என்றால், செக் இருந்தால் குடுங்க. இல்லாட்டி அப்ளிகேஷன் பில் பண்ணி கையெழுத்து போட்டுடுங்க; நாளைக்கு வந்து பணம் அல்லது செக் வாங்கிக்குறோம் என்றனர். கையில் செக் இருந்தது. குடுத்து விட்டு ரீசிப்ட் வாங்கி கொண்டு வந்தேன் .

அடுத்தடுத்து நடந்த ஏமாற்று வேலைகளை பாருங்கள் :

ஓரிரு வாரத்தில் மெம்பர்ஷிப் கார்டு வந்தது. அதில் "மெம்பர்ஷிப் ஐந்து வருடத்துக்கு மட்டுமே" என்று கூறப்பட்டு இருந்தது. எனக்கு ஸ்கீம் விற்றவரிடம் போன் செய்து கேட்க, " தப்பா பிரின்ட் ஆகியிருக்கும். மாற்றி தருகிறேன்" என்றார். அதன் பின் பத்துக்கும் மேற்பட்ட முறை போன் செய்தும், நேரில் சில முறை சென்றும் மாற்றி தரவே இல்லை.

சரி ஒரு முறை இவர்களின் ரிசார்ட் போகலாம் என ஒரு ஞாயிறு அன்று படப்பையில் உள்ள இவர்கள் ரிசார்ட்டுக்கு என் குடும்பமும், மச்சான் குடும்பமும் சென்றோம். ரிசார்ட்டை நேரில் பார்த்து நொந்து நூடுல்ஸ் ஆகிட்டோம். அங்கு இருந்த அத்தனை பேரும் குடித்து கொண்டிருந்தனர். பெண்கள் யாருமே இல்லை. நாங்கள் மட்டுமே பெண்களுடன் சென்றிருந்தோம்.

அப்படியே திரும்பிடலாமா என்கிற எண்ணம் உந்தி தள்ளினாலும், வந்தது வந்துட்டோம், குளிச்சிட்டாவது போவோம் என சுவும்மிங் பூல் சென்றோம்.  ஆண்களும், குட்டி பசங்களும் குளிக்க ஆரம்பித்த கொஞ்ச நேரத்திலே எல்லாருக்கும் தோல் எரிய ஆரம்பித்தது. தண்ணியை என்னிக்கு மாத்தினாங்களோ ! வெறுத்து போய் கிளம்பி விட்டோம். மேலே ஏறியதும் அனைவர் கண்ணும் நாவப்பழம் கலரில் சிகப்பாய் இருந்தது. அப்புறம் தான் யோசித்தால் எங்களை தவிர யாரும் குளத்தில் இறங்கலை. எல்லாருக்கும் இவங்களை பத்தி தெரியும் போல இருக்கு !

இனி இவர்களிடம் லைப் டைம் கார்டு கேட்டு என்ன பிரயோஜனம் என அதன் பின் அந்த கார்டை தூக்கி கடாசி விட்டேன்.

இது நடந்து இரண்டு, மூன்று வருடம் இருக்கும். சமீபத்தில் எனது நண்பர் ஒருவர் கார்பரேட் கிளப் மெம்பர்ஷிப் வாங்கியிருப்பதாக பெருமையுடன் சொன்னார். அதே கதை.

" இன்னிக்கு ஸ்கீம் லாஸ்ட். இன்னிக்கு போட்டா தான் இந்த ரேட். லைப் டைம் மெம்பர்ஷிப்" என்று சொல்லி யோசிக்க நேரம் தராமல் பணம் பிடுங்கி உள்ளனர். என்னிடம் முதலில் அவர் பேசும் போது மெம்பர்ஷிப் கார்டு அவருக்கு வரலை  !  " வரும் ஆனா அஞ்சு வருஷம்னு தான் போட்டுருக்கும் பாருங்க " என்றேன். " அதெப்படி அஞ்சு வருஷம்னு போட முடியும். என்னிடம் லைப் டைம் என சொன்னார்களே" என என்னை கோபித்தார். சில நாள் கழித்து " ஆமாங்க. அஞ்சு வருஷம்னு போட்டு தான் கார்டு குடுத்திருக்காங்க. சண்டை போட்டு கிட்டு இருக்கேன் " என்றார். சேம் பிளட் !!

வருடங்கள் மாறினாலும் இவர்கள் ஏமாற்றும் முறை மாறவே இல்லை !

இணையத்தில் தேடினால் இவர்களை பற்றி கதை கதையாய் ஏராளம் இதே போல் தகவல் கிடைக்கிறது !


http://www.consumercomplaints.in/complaints/chennai-corporate-club-c119266.html

http://www.mouthshut.com/product-reviews/Chennai-Corporate-Club-Madras-Chennai-reviews-925071434


*****
இதே போல் இன்னொரு சம்பவம். சமீபத்தில் ஒரு போன் கால் வந்தது. சென்னை புக் பேரில் எனது விசிட்டிங் கார்ட் போட்டதாகவும், அது லக்கி டிராவில் செலெக்ட் ஆகி பரிசு விழுந்துள்ளதாகவும், பரிசு வாங்க வேண்டுமெனில் மனைவியுடன் வந்தால் தான் பரிசு தர முடியும் என்றும் சொன்னார்கள். "மனைவி வர மாட்டார். நான் மட்டும் தான் வர முடியும் " என்றதும் " உங்களுக்கு பரிசு கிடையாது போனை வையுங்க" என வைத்து விட்டார்.

சில நாளில் முக நூலில் ஒரு நண்பர் இதே நிறுவனம் பற்றி எழுதி இருந்தார். அதே போன் கால். "புக் பேரில் லக்கி டிராவில் செலெக்ட் ஆகி பரிசு .. மனைவியுடன் வந்தால் மட்டும் ஒரு நினைவு பரிசு தருவோம் " என்று போன் வந்து சென்றதாகவும், அங்கு போனால், இது போன்ற ஒரு கிளப் மெம்பர்ஷிப் தந்து, அதன் விலை இருபதாயிரம், நீங்கள் லக்கி டிராவில் செலக்ட் ஆனதால் உங்களுக்கு பத்தாயிரம் என்று பேசினராம் ! அழகான பெண்களை வைத்து " உங்களால் பத்தாயிரம் செலவு பண்ண முடியாதா? உங்க குடும்பத்துக்காக இவ்வளவு கூட செலவு பண்ண முடியாதா? " என்றெல்லாம் பேசினால் கொஞ்சம் பேராவது பணம் கட்டி விடுகின்றனர்.

இந்த கிளப்னு பேர் வச்சிருக்கவங்க எல்லாம் விதம் விதமா ஏமாத்துறாங்க ! பாத்து சூதனமா இருந்துக்குங்க மக்களே !

*****

டிஸ்கி: நாளைக்கு யாரோ பிரபல (!!??) பதிவர் ஒருவருக்கு பிறந்த நாளாம். யாருன்னு யோசிங்க. நாளை பதிவில் சொல்றேன் !