சூப்பர் சிங்கர் ஜூனியர்: இம்முறை டைட்டில் ஜெயிப்பது யார் ?

சூப்பர் சிங்கர் ஜூனியர் தினம் இரவு ஒன்பது மணிக்கு தொடர்ந்து பார்த்தாக வேண்டிய நிலையில் இருக்கிறோம். வேறு எந்த பக்கம் போனாலும் அந்த நேரம் சீரியல் தான். இருக்கிற கொடுமையில் இது கொஞ்சம் பரவாயில்லை என்ற சூழல் !.

இப்போது இருக்கும் ஏழு போட்டியாளர்கள் பற்றிய சிறு அலசல் இது:

அனு

எங்க ஊருக்கு பக்கத்து ஊரான மன்னார்குடி பொண்ணு ! சுமாராய் பாடும்
இந்த பெண் பைனல்ஸ் வரை செல்வதே கடினம் தான் ! பைனலுக்கு முன்பு அவுட் ஆகும் கடைசி சில பேரில் அனுவும் ஒருவராய் இருக்கலாம் என்பது நம் கணிப்பு.

ஜெயந்த் 

இந்த பையன் பிறந்தது ஆந்திராவில். இவன் நார்மல் பையன் கிடையாது. இதை அவரது அம்மா ஒரு முறை கண்ணீரோடு கூறினார். சிறு வயதில் இவனை தொலைத்து விட்டு, புது ஊரில், எதுவும் சொல்ல தெரியாத இவனை கண்டுபிடிக்க அவர் பட்ட பாட்டை சொன்ன போது ரொம்ப கஷ்டமாக தான் இருந்தது.

ஜெயந்த் நல்லாவே பாடுவான். விஜய் டிவி நடத்திய இன்னொரு சிறுவர் நிகழ்ச்சியில் டைட்டில் ஜெயித்த பையன் இவன் ! பைனல்ஸ் வரை போவான் என நினைக்கிறேன் !

அஞ்சனா 

ஒவ்வொருவராய் அவுட் ஆகும் இந்த மியூசிகல் சேரில் மிக விரைவில் அஞ்சனா வெளியேறக்கூடும் என்பது நம் கணிப்பு.

ஒவ்வொரு ஷோவுக்கும் இவர் அம்மா மற்றும் அப்பா இருவரும் தவறாமல் வந்துடுறாங்க. (அப்பாவும் முழுசா இருப்பது ஆச்சரியம். சொந்த பிசினஸ் பண்றாரோ என்னவோ ? )

யாழினி 

ரொம்ப குட்டி பொண்ணு. பல முறை டேஞ்சர் சோன் வந்து நிற்பார். "இன்னொரு முறை டேஞ்சர் சோன் வந்தால் நீ அவுட் ஆகிடுவே" என்கிற ரீதியில் மனோ பலமுறை சொல்லிருக்காரு.

இன்னும் ஓரிரு ரவுண்டில் இந்த பெண் வெளியேறி விடுவார் என நினைக்கிறேன் 

பிரகதி

ஜட்ஜ்களின் ஹாட் Favourite ! எனக்கு தெரிந்து ஜட்ஜ்கள் பாராட்டுகிற அளவெல்லாம் மிக சிறந்த பாடகி அல்ல. சில நேரம் மட்டுமே நன்கு பாடுவார். பொதுவாய் சூப்பர் சிங்கரில் வெளி நாட்டில் இருந்து வந்து பாடும் ஆட்களுக்கு சற்று lenience உண்டு. அப்படி தான் இவரிடம் lenient ஆக இருக்கிறார்கள் என நினைத்தேன். ஆனால் டாப் 10 வந்த பிறகும், அவரை ஏன் இவ்வளவு பாராட்டுகிறார்கள் என தெரியலை.

இதே ரீதியில் ஜட்ஜ்கள் தொடர்ந்து ஆதரித்தால் இவர் பைனல் செல்வது உறுதி ! அப்புறம் பட்டம் வெல்லவும் வாய்ப்புகள் உண்டு !

ஒன்று மட்டும் சொல்லிக்குறேன்: பிரகதி பாட்டு பாடி கொண்டே நடிக்கிற நடிகையாக தமிழ் திரையில் வருங்காலத்தில் கலக்க கூடும் !

கெளதம் 

இந்த தம்பி எப்படி டாப் 10-ல் வந்தார், அதன் பின்னும் எப்படி இரண்டு ரவுண்ட் அவுட் ஆகமால் இருக்கார் என நிஜமா எனக்கு புரியலை.

மிக சில முறை நன்றாக பாடுவார். பல முறை ரொம்ப சுமார் தான் !

டாப் 10 செலக்ட் செய்யும் போது கடைசியில் மூன்று பேர் டேஞ்சர் சோனில் இருந்தனர். அதில் மிக மோசமாய் பாடியது இவர் தான். ஆனால் மூவரில் நன்கு பாடிய நபரை டாப் 10-லிருந்து வெளியேற்றி விட்டு டாப் 10-க்குள்  இவரை அனுமதித்தனர். தற்போது மீதம் இருக்கும் நபர்களில் ஆண்கள் ஓரிருவர் தான். மீதம் எல்லாம் பெண்கள். எனவே ஆண்களின் representation சற்று இருக்கட்டும் என அனுப்பினரோ என்னவோ ! 

அதே போல் இவரையும்  ஜெயந்தையும்  தவிர இப்போது ஆண் பாடகர்கள் இல்லை. அதிலேயே தம்பி வண்டி ஓட்டிட்டு இருக்கார். பைனல் வரை ஆண்களில் சிலராவது இருக்கணும் என்கிற ஒரே காரணத்துக்காய் இவர் பைனல் வரை கூட ஜட்ஜ்களால் அனுப்பப்பட கூடும் ! 

சுகன்யா                                     

நிஜமாக நன்கு பாட கூடிய பெண். இப்போது பாடி கொண்டிருப்போரில் மட்டும் வைத்து பார்த்தால் சூப்பர் சிங்கர் வெல்ல கூடிய ஆள் என இவரை தான் நினைக்கிறேன் எல்லா வித பாட்டுக்கும் நல்ல ஹார்ட் வொர்க் தந்து, மிக நன்றாக பாடுகிறார். ஒரிஜினல் பாடலை நாம் பல முறை எப்படி கேட்டிருக்கோமோ, அதே போல இருக்கும் இவர் பாடுவது.

இவர் வெல்லாமல் போக ஒரு காரணம் மட்டுமே இருக்கலாம். இவர் ஒரு மலையாளி. ஏற்கனவே சூப்பர் சிங்கர் சீனியரில் ஒரு முறை, ஜூனியரில் ஒரு முறை மலையாளிக்கு பரிசு தந்த போது நிறையவே எதிர்ப்பு கிளம்பியது. அதை மனதில் வைத்து இவருக்கு பரிசு தராமல் போவார்களா, அல்லது கண்டு கொள்ளாமல் எப்போதும் போல ஒரு மலையாளிக்கே பரிசு தருவார்களா என பொறுத்திருந்து பார்க்கலாம் !
****

உண்மையை சொல்ல வேண்டுமெனில், பைனல்ஸ் செல்ல தகுதி வாய்ந்த நான்கு பேரை சொல்வதே சிரமமா இருக்குது !

சுகன்யா மற்றும் பிரகதி மட்டும் பைனல் செல்ல கூடியவர்களாகவும் அதில் சுகன்யா டைட்டில் வெல்ல கூடும் என்பதும் என் எதிர்பார்ப்பு ! எப்படியும் இம்முறை சூப்பர் சிங்கர் வெல்ல போவது ஒரு பெண் தான் என நிச்சயம் நினைக்கிறேன் !

பார்க்கலாம். நம் ஊகம் சரியாக இருக்கா என !

ஒன்று மட்டும் நிச்சயம் சொல்ல வேண்டும்: சென்ற முறை வென்ற அல்கா போலவோ (அவரைக்கூட விட்டுடுங்க; அது exceptional திறமை) அப்போது கலந்து கொண்ட நித்யஸ்ரீ, பிரியங்கா, ஸ்ரீகாந்த், ஷ்ரவன் அளவோ பாடும் ஆட்கள் இம்முறை ஒருவர் கூட இல்லை என்பது தான் சோகமான உண்மை !